कवाडी व्यवसाय सञ्चालन याके मबिउगु धासे कवाडी व्यवसायी तयेस येँ महानगरपालिकाविरुद्ध प्रदर्शन याःगु दु।

येँ महानगरपालिकाय् दर्ता जूगु व्यवसाय चिइकेगु धका वडा कार्यालयं छ्वं पत्रयात कया विरोध यासे कवाडी व्यवसायी तय्सं प्रदर्शन याःगु खः। उमिसं अनाधिकृत कथं कवाड चिइकेगु ज्या बन्द याः, अदालतया निर्णय सम्मान याः, कानुनी शासन लागू याः, जिमिगु व्यवसायय् जूगु हस्तक्षेप बन्द याः ज्वनातःगु प्लेकार्ड ज्वना प्रदर्शन याःगु खः।

येँ महानगरपालिकाया रिङरोड दुने कवाडी व्यवसाय चिइकेगु नीतिया विरुद्ध व महानगरपालिका दुने थीथी वडा कार्यालयपाखे कवाडी व्यवसायदर्ता नवीकरण मयागु धासे उकिइ आपत्ति प्वकूगु खः।

बुधवाः फुटपाथ ब्यवसायी व नगर प्रहरी दथुइ जूगु ल्वापुइ लानाः छम्ह पत्रकार नं बांमलाक घाःपाः जूगु दु। कलंकी जुयाः बाग्लुङ लिहां वनेत्यंम्ह पत्रकार कपिल पौडेलयात लुँहितिइ नगर प्रहरीं ज्वनाः दायेफक्व दाःगु खः।

पौडेलं थः बँपसल्या मखु, पत्रकार खः धकाः कार्ड क्यनं नं नगर प्रहरीं ककु ज्वनाः गाडीइ स्वथंगु खँ धाःगु दु। ल्वापु जूगु भिडियो खिचे यानाच्वंगु इलय् पौडेलयात नगर प्रहरीं दाःगु खः। नगर प्रहरीं क्यामेरा, मोबाइल व घडी तक जफत याःगु धाःगु दु।

नगर प्रहरीं दायाः घाःपाः याःगुलिं वय्कःयात बहनी हे अस्पताल यंकाः वासः याःगु खः। थ्व घटनाय् लानाः झिंछम्ह मनू घाःपाः जूगु धाःगु दु । घाःपाः जूपिं मध्ये छम्ह नगर प्रहरी नं लाःपाः जूगु दु।

मानव अधिकारवादीत कुन्दन अर्याल, चरण प्रसाईं, निराजन थपलिया, भगवती अधिकारी, विष्णुप्रसाद पोखरेल, जगत देउजा, प्रकाशमणि शर्मा व राजुप्रसाद चापागाईं मंकाः विज्ञप्ति पिकयाः घटनायात कयाः खेद प्वंकूगु खः।

सुन्धाराय् फुटपाथ व्यवसायी व नगर प्रहरी दथुइ ल्वापू जुगु दु। फुटपाथ व्यवसाय हटे यागू येँ महानगरपालिकां लिपागु इलय् बहनि ९ बजे लिपा तयेके बिइ धका धाःगु खः।

तर बहनि ७ बजे लिपा हे फुटपाथय् व्यवसाय यायेवं म्हिगः नगर प्रहरीं व्यवसायी तय्त चिइकूगु खः। व हे झ्वलय् सुन्धाराय् छु ई ल्वापू जूगु खः।

नगर प्रहरी ब्यवसायीतय्त ज्वनेगु नापं लाठी चार्ज यायेवं प्रतिकारय् कुहावःगु खः।

थौ येँया महाराजगञ्जय् विद्युत आपूर्ति बन्द जुइगु दु। नेपाल विद्युत प्राधिकरण, महाराजगञ्ज वितरण केन्द्रय् विद्युतीय लाइन भूमिगत याइगु जूगुलि ४ घण्टा सेवा बन्द जुइगु दु।

विद्युत प्राधिकरणया कथं थौ महाराजगञ्जया गोंगबु, सामाखुसी, टाउन प्लानिङ क्षेत्रय् सुथय् १० बजेनिसे २ बजे तक विद्युत सेवा अवरुद्ध जुइगु दु। अथेहे, १८ गते चपली घुम्ती चोक व पासिकोट क्षेत्र, १९ गते हेपालीहाइटनिसे धापासी विद्यालय जुया दाहाल गौंडातक सेवा ४ घण्टाया लागि बन्द जुइगु दु।

अथेतु, २० गते एभरेष्ट बैंक लाजिम्पाटनिसे राष्ट्रपति भवन, टुँडालदेवी, २१ गते गोल्फुटार पेट्रोलपम्प तक बसुन्धारा व २२ गते गोल्फुटारतक ह्याम्स अस्पतालतक सेवा अवरुद्ध जुइ धका प्राधिकरणं धाःगु दु।

सगरमाथा आरोही नाप पत्रकार रोजिता बुद्धाचार्य नेशनल एरोनटिक्स एण्ड स्पेस एडमिनिस्ट्रेशन (नासा) य् पूर्ण छात्रवृत्तिइ अध्ययनयाम्ह न्हापाम्ह नेपाःया मिसा जुगु दु।

नासाय् अध्ययनया लागि पूर्ण छात्रवृत्तिइ नां पिकाय््वं बुद्धाचार्यं थौ हे अध्ययनया लागि अमेरिकाया वासिङ्टन डिसीइ च्वंगु नासाय् वःगु दु।

थ्व स्वया न्ह्यः बुद्धाचार्यं अमेरिका मेरिल्याण्डया बाल्टीमोरय् स्पेस टेलिस्कोप साइन्स इन्स्टिच्युटय् छात्रवृत्तिइ अध्ययन याये धुकुगु खः। हलियकं न्यासःम्हेसिगु आवेदक मध्ये १४ म्ह छनौट जुया बुद्धाचार्यं स्पेस टेलिस्कोप साइन्स इन्स्टिच्युटय् अध्ययन यायेगु ह्वतां चुलागु खः।

नासाय् अध्ययन याइम्ह न्हापाम्ह मिसा वैज्ञानिक जुइवं बुद्धाचार्ययात मोतीदेवी स्मृति केन्द्रं साहसिक मिसा, सगरमाथा आरोही नाप युवा वैज्ञानिक कथं सम्मान याःगु खः। बुद्धाचार्र्य अन्तरिक्षयात्री जुइगु आज्जु ज्वना नासाय् अध्ययन यायेगु धका धाःगु दु।