प्रधानमन्त्री केपी शर्मा ओलीं अस्पतालय् उपचारया निति वइपि बिरामी तयेगु लाइन जुइगु अवस्था क्वचाय्केमाःगुलि च्युता कयादीगु दु।

स्वास्थ्य क्षेत्रय् समस्या, समाधानया उपाय व तत्काल याये फइगु सुधारया विषय बिहीवाः बहनि सिंहदरबारय् जुगु सहलह ज्याझ्वलय् प्रधानमन्त्री ओलीें बिरामीतय्त विना लाइन व भञ्झट मजुइगु कथं याउक उपचार सेवा बिइगु निति छु यायेमाः धका न्यनादीगु दु।

प्रधानमन्त्री ओलीं चिकित्सक व स्वास्थ्यकर्मीतय्त माःगु सुविधा बिया माःगु कथं ज्या यायेगु कथं ब्यवस्था यायेत इनाप यानादीगु दु। “सरकारी अस्पतालया कार्यालय इलय् जाँचय् मयासे बिरामीतय्त क्लिनिकय् सःत्येगु प्रवृत्ति क्वचायेमाः।”, प्रधानमन्त्री ओलीं धयादीगु दु।

बिरामीतय्त भर्ना मयासे उपचारय् मयागु व ध्यवा पुलेमफया उपचार मजुइगु अवस्था क्वचाय्केमा धका धयादीसे वयकलं स्वास्थ्य बीमायात व्यवहारिक व कार्यान्वयन योग्य दयकेत इनाप यानादीगु दु।

उगु सहलह ज्याझ्वलय् उपप्रधानमन्त्री नाप अर्थमन्त्री विष्णुप्रसाद पौडेल, स्वास्थ्य लिसे जनसङ्ख्यामन्त्री प्रदीप पौडेल, मुख्यसचिव, सम्बन्धित सचिवपिनिगु ब्बति दुगु खः।

नेकपा एमालेया उपाध्यक्ष गुरुप्रसाद बरालं वःगु चुनावय् याकचा हे बहुमत हयेगु आधार तयार जुइ धुकुगु दु धका धयादीगु दु।

आःतक तयार जुगु संगठनात्मक उपलब्धि हे मिसन–०८४ सफल जुइगु आधार खः धका बरालं धयादीगु दु। ‘छगू तहया संगठनात्मक उपलब्धि वये धुकुगु दु।

राजनीतिक–वैचारिक कथं प्रष्ट जुइगु ज्या जुगु दु’ उपाध्यक्ष बरालं धयादीगु दु, ‘थ्व हे संगठनात्मक उपलब्धि व वैचारिक प्रष्टताया हे आधारय् वइगु चुनावं एमाले न्हापागु शक्ति जुइ।’ थ्व स्वया न्ह्यः बराल बागमती प्रदेश इन्चर्ज जूयादी। वंगु वाः जूगु सचिवालय बैठकं बरालयात उपाध्यक्षया न्हुगु जिम्मेवारी बिउगु खः।

बागमतीइ आः न्हुम्ह इन्चार्जय् डा.राजन भट्टराईयात बिउगु खः। शुक्रवाः बरालया बिदाइ व भट्टराईयात लसकुस ज्याझ्वः यागु खः। उगु लसकुस ज्याझ्वलय् भट्टराई न पार्टीयात छधीयाना यकेगु जुइ धका धयादीगु खः।

बागमती देय् या हे राजधानी प्रदेश जूगुलि मिसन–०८४ या लक्ष्य याःगु निति अर्थपूर्ण सन्देश बिइगु कथं ज्या यायेगु जुइ धका धयादीगु खः।

थौ ३० क्वःगु विश्व आदिवासी दिवस तःजिक हंगु दु। स्वेच्छिक कथं बिस्क च्वनाच्वपि व याकन हे सम्पर्कय् वःपि आदिवासीतय्गु अधिकार संरक्षण धइगु संयुक्त राष्ट्रसंघया मूल नारा ज्वना विश्व आदिवासी दिवस हंगु दु।

थौ दिवसया लसताय् नेपाल आदिवासी जनजाती महासंघया नेतृत्वय् येँ तःजिक झाँकी नाप ¥याली पिकाःगु दु। नेवाः, मगः, थारु, तामाङ, राई, लिम्बूलगायत जातीय संस्थातय्स थः थःगु ब्यानर नाप ¥याली पिकागु दु।

थः थःगु जातिया लँ पुना ¥यालीइ ब्बति काःगु खः। भृकुटीमण्डप पिकष ¥याली कमलादीस्थित प्रज्ञा भवनय् वना मूल समारोहय् छगु तःजिक ज्याझ्वः जूगु खः।

इस्तानबुलं वःगु टर्की एयरलाइन्सया विमान त्रिभुवन अन्तर्राष्ट्रिय विमानस्थलय् अवतरण यायेत्यंगु इलय् ‘ओभरशुट’ जूगु दु।

उडान राडारया कथं सुथय् ६ः१० बजे अवतरण यायेत्यंगु विमान ओभरशूट यानाः २० मिनेट लिपा अवतरण याःगु खः। ‘मिस एप्रोच’या हुनिं विमान ओभरशुट जूगु विमानस्थल ज्याकुथिं धाःगु दु।

छम्ह हवाई यातायात नियन्त्रकया कथं ‘अस्थिर दृष्टिकोण’ लिपा विमान ओभरशुट जूगु खः।

प्रधानमन्त्री केपी शर्मा ओलीं संघीयताया प्रभावकारी कार्यान्वयनया नितिं थःव थः सहकार्य व संवादया लिसें जनतायात केन्द्रीत जुया न्ह्यावनेत इनाप यानादीगु दु।

सिंहदरवारय् काठमाडौं उपत्यका मेयर फोरमया पदाधिकारीत नाप जूगु नापलाये ज्याय् प्रधानमन्त्री ओलीं ‘सु स्वया सु तःधं’ धइगु कथं मवसे केन्द्र व स्थानीय सरकार दथुइ समन्वय याना समस्याया समाधान याना जनताया सेवा बिइमाःगुलि बः बियादीगु दु।

वय्कलं जनप्रतिनिधिपिन्त थःपिं जनताया पक्षय् ज्या यायेत निर्वाचित जुयागु खः, अहंकार व अहंकारं निर्देशित जुइमखु धकाः धयादिगु खः वय्कलं नगर प्रहरी न्ह्यने तया सतक व्यापारीतय्त दमन याःगु खँ न्ह्यथनादिसें दिकेत इनाप यानादीगु खः। छिपिं जनताप्रति विनम्र व शिष्ट जुइमाः। प्रधानमन्त्री ओलीं जनप्रतिनिधियात सतकय् न्यासि वनीपिं जनतां याइगु प्रशंसा शुद्ध व दीर्घकालीन खः धकाः प्रधानमन्त्री ओलीं धयादीगु दु। सामाजिक संजालय् नक्कली नाम याइगु प्रशंसा ताः ईतक जुइमखु धका धयादीगु खः।

फोरमं नेपाल विद्युत प्राधिकरणं स्थानीय तहया नामय् थः यःथे सतक मतया बिल छ्वया बक्यौता क्यगुलि समस्या वःगु धका प्रधानमन्त्री ओलीयात ध्यानाकर्षण यागु खः। लिसः बिइगु झ्वलय् प्रधानमन्त्री ओलीं सम्बन्धित मन्त्रालय व निकायनाप थुइका माःगु सहजीकरण यायेगु भलसा बियादीगु खः। वयकलं फोहोरमैला व्यवस्थापन बालाक्क समाधान यायेगुलि सरकार ध्यान वःगु दु धका स्पष्ट यानदीगु खः।

फोरमया अध्यक्ष चिरीबाबु महर्जनं प्रधानमन्त्री ओलीया कार्यकाल बालाक्क न्ह्याय् फयेमाः धका धयादीसे पारस्परिक सम्बन्ध व सहअस्तित्वया ग्वहालि जुइमाः धका धयादीगु खः।