नेवाः देय् दबू स्वनिगः बिशेष प्रदेशं भाषा विधेयकयात कया भेला याइगु जूगु दु।

देय् दबू स्वनिगः बिशेष प्रदेशया मंगलवाः असोज २३ गते च्वंगु मुँज्यां चेतन मानन्धर हत्याया विरोधयात कया ऐक्यबद्धता प्वंकेगु व बाग्मती प्रदेशया संसदं भाषा विधेयकयात पारित याःगुयात कया आः न्ह्याः वनेगु सवालय् सरोकारवालापिनिगु भेला यायेगु खँ क्वःछिगु दु।

देय् दबू स्वनिगः विशेष प्रदेश समितिया नायः श्रीकृष्ण महर्जनया नायःसुइ जूगु उगु मुँज्यां असोज २४ गते बुधवाः चेतन मानन्धरया हत्याकाण्डयात कया जुयाच्वंगु विरोधप्रति ऐक्यबद्धता प्वंकेगु नितिं फिब्व ख्यः माइतिघर मण्डलाय् वनेगु धकाः क्वःछिउगु दु। देय् दबू केन्द्रीय समितिया कार्यवाहक नायः चन्द्रलाल राजभण्डारीया विशेष उपस्थिति जूगु उगु मुँज्याय् केन्द्रीय न्वकू शान्त श्रेष्ठ, मूछ्याञ्जे सत्यनारायण डंगोल, छ्याञ्जे हरि कुमार श्रेष्ठया नं उपस्थिति दुगु खः।

फिब्वः ख्यलय् ऐक्यबद्धता प्वंकेगु नितिं केन्द्रीय कार्यवाहाक नायः चन्द्रलाल राजभण्डारीया नेतृत्वय् वनेगु धकाः नं खँ क्वःछिउगु दु । मुँज्यां २५ गते विहिवाः भाषा विधेयक पारित याकेगु नितिं भूमिका म्हितूगु नेवाः खलः पुचःनिसें भाषा ख्यलय् ज्या याना वयाच्वंगु नेवाः खलः पुचःया प्रतिनिधि नापनापं देय् दबूया पालिकाया नेतृत्वयात तकं दुथ्याका भेला याना योजना दयेकेगु धकाः नं निर्णय याःगु दु ।

उगु मुँज्याय् देय् दबू येँ जिल्लाया नायः धनबहादुर तिमिला महर्जन, यल जिल्लाया नायः रविन्द्र शाक्य व ख्वप जिल्लाया नायः नरेश नेवाः नं सहभागी जुयादीगु खः।

येँ महानगरपालिकां वंघलय् आज्जु द्यःया थाय् च्वंगु पसः चिइकूगु दु। वंगु बिहीवाः झन्डै झीनिदँनिसे सञ्चालन यानाच्वंगु न्ह्यय्गु पसः बन्द याःगु दु धका आकाश भैरव सञ्चालन समितिया सचिव श्याम महर्जनं जानकारी बिःगु दु।

वयकःया कथं पसः सञ्चालक व गुथि समितिया सहमतिइ उगु पसः द्यःया थाय् क्वय् चिइकूगु खः।’ स्थानीय व सम्पदा अभियानकर्ता तय्सं द्यःया क्वय् चिपः यायेमज्यु व फोहोर जूगु धका धयावया च्वंगु खः,’ वयकलं धयादीगु दु,’

हनुमानध्वाकाय् सम्पदा संरक्षण विभागं स्वला न्ह्यःनिसे उगु पसः चिइकेत पौ छ्वया हःगु खः।’ आज्जु द्यःया थाय् प्यंगू लस्सी पसः, नयेगु पसः बाहेक मेमेगु पसः खोले याके बिइ धका धाःगु दु।

चिरख्वा हाइड्रोपावर लिमिटेडं थौंनिसे सर्वसाधारण तय्त प्राथमिक सेयर (आईपीओ) निष्कासन याःगु दु ।

थ्व स्वया न्ह्यः आयोजना प्रभावित व वैदेशिक रोजगारीइ च्वना च्वपि नेपाःमि तय्त आईपीओ निष्कासन याना इने धुका सर्वसाधारण तय्त छगू सेयरया १०० रुपैयाँ भाः कथं ८ लाख ५९ हजार ३०० कित्ता आईपीओ निष्कासन याःगु दु ।

कम्पनीं स्थानीय बासिन्दा तय्त पिकाःगु सेयरय् आवेदन मबियगु नापं सर्वसाधारण तय्त मिइत्यःगु खः। थ्व स्वया न्ह्यः कम्पनीं न्हापागु चरणय् स्थानीय तय्थ ४ लाख कित्ता निष्कासन याःगु खः।

न्हापागु चरणय् कम्पनीं वैदेशिक रोजगारीइ वनाच्वपिन्त ८० हजार कित्ता, कर्मचारीया लागि १६ हजार कित्ता नापं सामूहिक लगानी कोषया लागि ४० हजार कित्ता निष्कासन याना इने धुकुगु दु।

कम्पनीया शेयर निष्कासन लिसे बिक्री प्रबन्धक आरवीवी मर्चेन्ट बैंकिङ लिमिटेड याःगु खः।

लुँ तोलां थौं स्वसः थहावःगु दु। लुँ तोलां स्वसः थहावना थौं १ लाख ८ हजार ९ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाःग दु।

अथेहे वहः तोलां न्यातका कुहावःगु दु। वहः तोलाय् न्यातका कुहावया थौं १ हजार ३ सय ४० रुपैयाँ न कारोबार जूगु दु धका महासङ्घं धाःगु दु।

रत्नकीर्ति महाविहार अध्ययन मण्डल मखंबहाःया ग्वसालय् तिथि विवादया कारणं नखः हनेगुलिइ अलमल मजुइमा धइगु ल्याखं वंगु शनिवाः छगू ज्याझ्वः जुगु दु।

‘प्रज्ञा, ज्ञान प्राप्ति’ विषयय् उगु ज्याझ्वः जूगु खः । अध्ययन मण्डलंं हरेक लाया लिपांगु शनिवाः न्ह्याका वयाच्वंगु बैचारिक व सूचनामूलक गोष्ठि ज्याझ्वः कथं तःजिगु नखः मोहनि हनेगु खँय् अलमल मजुइमा धइगु ल्याखं उगु ज्याझ्वः याःगु खः। ज्याझ्वलय् उपप्राध्यापक मदनसेन वज्राचार्यं ‘चथाः मोहनि, स्वन्ति’ विषयय् केन्द्रीत जुयाः गोष्ठि पौ न्ह्यब्वयादीगु खः ।

उगु गोष्ठि पौ न्ह्यब्वयादिसें उपप्रा. वज्राचार्यं झीके दइगु राग, द्वेषया अन्त्य यायेगु निंतिं हे झीसं मोहनिया इलय् स्याक्वत्याक्व नखः हना वयाच्वनागु खः धयादिल । लिसें वय्कलं चन्द्रमा राग, द्वेषया प्रतीक जूगु व मोहनिया इलय् नःलास्वां पिनातःगु थासय् तइगु तु राग व पालु द्वेषया प्रतीक जूगु धासें थुकथं राग द्वेषया अन्त्य यानाः जीवन हनेत हे झीसं थ्व लिसे नखःत हना वयाच्वनागु खः धयादिल ।

मोहनिया इलय् झीसं छ्यला वयाच्वनागु थीथी वसजाःलिसें थीथी पुजा व उकिया महत्वया बारे कनादिसें वय्कलं राग, द्वेषया प्रतीकयात छेदन यायेकथं हे भुयुफसि नं पालेगु याना वयाच्वनागु खः धयादिल । थुकथं हे स्वन्तिया इलय् झीसं हनातयाम्ह लक्ष्मी द्यः, वयां कन्हय्कुन्हु म्हपुजा व अनंलि किजापुजाया महत्वयात विषयय् नं वय्कलं ध्वाथुइकादीगु खः ।

स्वन्तिया इलय् स्वन्हुयंकं जुइगु थीथी पुजाया थःथःगु महत्व दुगु नापं थुपिं स्वन्हुं दर्शनं जाःगु विषयय् नं वय्कलं कनादीगु खः । झीसं चथाः, मोहनि व स्वन्ति नखः हनेगु धइगु प्रज्ञा, ज्ञान प्राप्तिया निंतिं खः धासें थौंया इलय् नखःया महत्व मथुया वनाच्वंगु खँय् दुःख तायेकादिल । वय्कलं थौंकन्हय् नखः हनेगु धइगु हे साःसाःगु, भिंगु नसा ज्वलं नयेगुलिइ जक सीमित जुया वनाच्वंगु तर नखःया महत्वयात थुइकेगु कुतः मजूगु खँय् असन्तुष्टि प्वंकादिल । ज्याझ्वलय् नेपालभाषा केन्द्रीय विभागया उपप्रा. डा. वज्रमुनि वज्राचार्यं नेवाः संस्कृति व दर्शन विषयय् नुगःखँ तयादीगु खः ।

वय्कलं चित्तयात प्रज्ञामय यायेमाःगु खँय् बः बियादिसें राग, द्वेष, क्लेश दुम्ह मनुखं अप्वः दुःख फया च्वनेमाली धासें सुखी जीवन हनेया निंतिं राग, द्वेष, क्लेश, मोह त्याग याये फयेकेमाः धयादिल ।

अध्ययन मण्डलया जितेन्द्रविलास वज्राचार्यया सभाध्यक्षताय् जूगु उगु ज्याझ्वलय् रत्नकीर्ति महाविहार कार्य समितिया नायः विद्यामान विलास वज्राचार्यया उपस्थितिइ दुगु खःसा दुजः लजुना वज्राचार्यं लसकुस यानादीगु खः ।