नेपालगञ्जय् स्थानीय प्रशासनं अनिश्चितकालया लागि कर्फ्यु तःगु दु।

हिन्दु व मुस्लिम समुदाय दथुइ तनाव सिर्जना जुइ खने दय्वं कर्फ्यु जारी जूगु दु धका बाँके प्रहरी प्रमुख एसपी सन्तोष राठौरं जानकारी बिःगु दु।

ओमकार परिवार, हिन्दु समाज व शिव सेना नेपाल दथुइ ¥यालीइ अप्पां क्यकेवं कर्फ्यु जारी याःगु खः ।

जनता समाजवादी नेवाः संघया न्हूधाः जुगु दु । जनता समाजवादी नेवाः संघया देय् मुना लिसें मू पुचःया न्हूधाः ज्याझ्वः जसपाया कार्यबाहक नायः लिसें पूर्वमन्त्री राजेन्द्र प्रसाद श्रेष्ठया मूपाहाँसुइ जूगु खः।

उगु ज्याझ्वलय् न्हूपिन्त पार्टी प्रवेश याकूगु खः । गणेश बासुरी खलः बालजुपाखें मंगल धून थानां न्ह्याःगु उगु ज्याझ्वलय् जसपाया मूदुजःपिं डा.पुष्पराज राजकर्णिकार, कृष्णबहादुर घःजु, शोभा बज्राचार्यपिन्स भिंतुना न्वंचु तयादीगु खः। उगु ज्याझ्वलं ज्ञानेन्द्ररत्न बज्राचार्ययात सर्वसम्मत नायः कथं ल्यःगु खः।

अथेहे न्वकूलय् खगेन्द्र बहादुर जोशी, लक्ष्मी देवी श्रेष्ठ, बेखामान अवाले, प्रभात सागर सिंह प्रधान, राजेश प्रसाद श्रेष्ठपिन्त ल्यःगु खः। मू छ्याञ्जेय् नजरराम महर्जन, ल्यु मूछ्याञ्जेय् सुरज महर्जन व आशा रत्न डंगोल, प्रफुल्ला श्रेष्ठ व ओम राज श्रेष्ठपिन्त छ्याञ्जेय् ल्यःगु खः। अथेहे दां भरिं अञ्जु मल्ल, ल्यू दांभरि शुष्मा सिख्राकारपिन्त ल्यःगु खः।

मूदुजलय् रुद्र प्रसाद देवभण्डारी, संगीता मल्ल, श्रीकृष्ण महर्जन, राज शोभा शाक्य, मनोजमान कर्माचार्य, सरल गोपाल महर्जन, संजीव शाक्य, अजय देसार, दामोदर श्रेष्ठ, विक्रम शाक्य, रबिन्द्र शाक्य, सरोज घःजु, विद्या चित्रकार, पदम लाल श्रेष्ठ, सि.वि.बज्र, ज्ञानु देवी श्रेष्ठ, सुदर्शन मुनकर्मी, सन्दिप महर्जन, सन्देश मुनिकार, श्रीकृष्ण महर्जन, राजेन्द्र हाडा, अर्जुन श्रेष्ठ, दिलकुमार श्रेष्ठ, अनुज जोशी, श्रीप्रसाद श्रेष्ठ, विजया मानन्धर, राजेन्द्र खडगी, रबिन श्रेष्ठ, सुनिल वज्र बज्राचार्य, रामकुमारी महर्जन, लक्ष्मण कुमार शाही व हिरालक्ष्मी श्रेष्ठयात ल्यःगु खः।

एसियाली खेलकुद अन्तर्गत क्रिकेटया क्वाटरफाइनल कासाय् नेपाल भारतनापं २३ रनं पराजित जूगु दु।

थुगु कासा लिपा नेपाल एसियाली क्रिकेटं पिहावंगु दु। कासाय् त्याकेगु लागि २ सय ३ रनया लक्ष्य ज्वना वःगु नेपालं निर्धारित २० ओभरय् ९ विकेटय् १ सय ७९ रन जक दयके फूगु खः।

नेपाःया दीपेन्द्रसिंह ऐरीं दकलय् अप्पो ३२ रन दयकूगु खः। सन्दीपं २९ रन दय्का आउट जूगु खः। अथेहे कुशल भुर्तेल २८ रन, करण केसी १८ रन दय्का अविजित जूगु खः। भारतया स्पिनर रवि विश्रोई व आवेश खानं स्वंगू स्वंगू विकेट काःगु खःसा अर्शदीप सिंहं निगु विकेट काःगु खः।

हान्झाउय् क्रिकेट मैदानय् टस त्याका न्हापा ब्याटिङ याःगु भारतं निर्धारित २० ओभरय् ४ विकेटय् २ सय २ रन दयकूगु खः। भारतया यशस्वी जैसवालं शतकीय पारी म्हितूगु खः। कप्तान ऋतुराज गायकवाड २५ रनय् आउट जूगु खः।

नेपाःया दीपेन्द्रसिंह ऐरीं निगु, सोमपाल कामी व सन्दीप लामिछाने छगू छगू विकेट काःगु खः।

लुँ वहःया भाः थौं भचा कुहावःगु दु। लुँ तोलां सच्छि कुहावःगु दु । लुँ तोलां सच्छि कुहावया थौं १ लाख ७ हजार ९ सय रुपैयाँ न कारोबार जुयाच्वंगु दु धका नेपाल सुन चाँदी व्यवसायी महासङ्घं धाःगु दु।

अथेहे वहः तोलां न नीतका कुहावःगु दु। वहः तोलां नीतका कुहावया थौं १ हजार ३ सय ४० रुपैयाँ न कारोबार जूगु दु धका महासङ्घं धाःगु दु।

सहप्राध्यापक गोपाल पौडेल ‘बसन्त’ या निगु सफू सार्वजनिक जूगु दु। ‘हे देव तिमी’ नेपाली व ‘आउट अफ बक्स’ अङ्ग्रेजी भाषाया निगु सफू आध्यात्मिक चेतना व जीवन जगत् थुइकेगु काव्य पितब्बज्या जूगु खः।

त्रिभुवन विश्वविद्यालयअन्तर्गत धनकुटा क्याम्पसय् ताः ईनिसे अङ्ग्रेजी भाषा व साहित्यय् प्राध्यापन यानाच्वनादीम्ह ‘बसन्त’ या ‘हे देव तिमी’ य् गूपु ताःहाकःगु चिनाख दुथ्याका तःगु खः। पूर्वीय जीवन पद्धतिइ वयकः चिनाखय् ज्ञान व विज्ञानमध्ये ज्ञानया सत्ता हे दक्को थाय् दइगु सत्य स्थापना याःगु दु।

व स्वया बिस्कं अङ्ग्रेजीया ‘आउट अफ बक्स’ चाहिँ २२८ गु चिहाकःगु चिनाखया सङ्ग्रह खः । अनुभूति, अध्यात्म, जीवन दर्शन, प्रकृतिलगायतया विविध विषय दुथ्याका चिहाकःगु चिनाखं तसकं कलात्मक खनेदु। ‘बसन्त’या थ्व स्वया न्ह्यः स्वंगु चिनाखँया सङ्ग्रह प्रकाशन जुइ धुकुगु दु।

उकि मध्ये अङ्ग्रेजीया ‘मन’ व ‘मन व प्राण’ संयुक्त राज्य अमेरिकाया मिचिगन स्टेट युनिभर्सिटीया दक्षिण एसिया अध्ययनय् पाठ्य सामग्रीइ दुथ्याका तःगु दु।

‘आउट अफ बक्स’ न सन्दर्भ सामग्रीया कथं तःगुलि अन या प्राध्यापक डा. मारोहाङ याक्थुङया भूमिकाय् च्वया तःगु दु। निगुलि सफू सेर्गेम प्रकाशन गृह दमकं प्रकाशन याःगु खः।