हल्चाकय् हल्चोक आकाश भैरवया द्यः छेँय् गजु व पता छायेगु ज्याझ्वः जूगु दु।

म्हिगः जूगु उगु ज्याझ्वलय् धार्मिक बिधि कथं पूजा यानाः थथे आँगः छेँय् गजु व पता छाय्गुलि संयोजन येँया न्ह्यखाः त्वाःया रविकृष्ण श्रेष्ठया छेँजः पिन्सं याःगु खः ।

ताम्रकार समाजं यल संस्कृति, सम्पदा संरक्षण यासे नेवाः समुदायया समग्र हकहितया लागि जातीय समाज दथुइ एकताया यायेमाः धका धयादीगु दु।

शनिवाः जावला ख्यः श्री उग्रचण्डीमाई ताम्रकार दूकु द्यःया थाय् जुगु छगु ज्याझ्वलय् समाजया २५ क्वःगु मंकाः मुँज्या व १७ क्वःगु दँ मुज्याय् वक्तापिन्स खँ तयादीगु खः। समाजया अध्यक्ष विनोद ताम्रकारं दलीय आस्था, जातया हिसाबं बिस्क बिस्कं जूसा सकल नेवाः समुदाय छवाः व हकहितया लागि जातीय समाज दथुइ थः व थःपि सहकार्य व समन्वय यासे वना न्ह्या वनेमाःगुलि बः बियादीगु खः। ‘यल नेवाः समुदाय दुने थीथी जातीय समाज सहअस्तित्व व समानताया अधिकार मजूलि मंकाः आज्जु काये फइ मखु धका धयादीगु खः। ’अध्यक्ष ताम्रकारं धयादीगु दु ‘छु न समाजया जनसंख्या यक्को दयेफु, सूयागु म्हो जुइफु।

संगठनया आकार, जातीय जनसंख्या अप्पो व म्हो जूसा मंकाः हितया लागि मिले जू ज्यायेगु क्षमता थकाये फयेमाः। थुकिइ सकसियागु हितय् जुइ ।’ यलया २१ गू जातीय समाजपि छथाय् च्वना स्थापना जूगु यल नेवाः समाज जातीय समाजपि छथाय् च्वना नेवाः समुदायया हित व यलय् समग्र विकासया लागि ज्या यायेत स्थापना यायेत न्ह्या वनिइ धका अध्यक्ष ताम्रकारं धयादीगु खः, ‘ताम्रकार समाज थ्व हे संस्थाया संस्थागत विकासय् प्रतिबद्ध जुयाच्वंगु दु । मंकाः भावयात कया न्ह्यावनेगु झी सकसियागु दायित्व खः।’

उगु ज्याझ्वलय् यल नेवाः समाजया संयोजक कृष्णदास कमाचार्य न यल नेवाः समाज जातीय समाज दथुइ मंकाः भावना कथं न्ह्यावनेमाः धका धयादीगु खः।

ज्याझ्वः उलेज्या यानादीसे वाग्मती प्रदेशया उद्योग, वाणिज्य, भूमी नाप प्रशासन मन्त्री रामकृष्ण चित्रकारं यलया दक्को जातीय समाज छवाः जुया न्ह्याः वनां सक्रिय जुइमाःगुलि बःबिया न्ह्या वनेमाःगु व ग्वाहालि यायेत प्रदेश सरकारं माःगु ग्वाहालि यायेत प्रतिबद्धता व्यक्त यानादीगु खः। सरकारनाप थःगु सरोकार क्यनेत जक मखु मिले जुया न्ह्यावनेत न वयलकं सल्लाह बियादीगु खः।

उगु ज्याझ्वलय् यल महानगरपालिकाया मेयर चिरिबाबु महर्जनं जातीय समाजया क्रियाशीलताया लागि महानगरपालिकां न्ह्यावलय् ग्वाहालि याये धका धयादीगु खः।

येँ महानगरपालिकां नेपालभाषा मंकाः खलःयात छगु ज्याझ्वः दथुइ छेँ औपचारिक कथं लःल्हागु दु । म्हिगः शनिवाः जूगु छगू ज्याझ्वःया दथुइ मंकाः खलःया छेँ औपचारिक कथं लःल्हागु खः ।

येँ १५ वडा बिजेश्वरी दयेकुगु मंकाः खलःया छेँया उलेज्या मूपाहाँ कथं येँ महानगरपालिकाया उपमेयर सुनिता डंगोलं मंकाः खलःया नायः जनकवि दुर्गालाल श्रेष्ठ, येँ १५ वडाया वडा अध्यक्ष इश्वरमान डंगोलपिन्स मंकाः उलेज्या यानादिगु खःसा छेँया ताःचाः उप मेयर डंगोलं नेपालभाषा मंकाः खलःया नायः जनकवि दुर्गालाल श्रेष्ठंयात लःल्हानादिगु खः ।

मंकाः खलःया नायः जनकबि श्रेष्ठया सभाध्यक्षताय् जुगु उगु ज्याझ्वलय् रमेशमान पियां लसकुस यानादिगु खःसा प्रतापमान शाक्यं सुभाय् देछानादिगु खःसा राजा शाक्यं न्ह्याकादिगु खः । उगु छेँय् दनिइगु निति पुर्व मेयर बिद्यासुन्दर शाक्यं शिलान्यास यानादीगु खःसा येँ महानगरपालिकाया आर्थिक ग्वाहालि दयेकेगु ज्या जुगु खः ।

तीनकुने च्वंगु गैह्रीगामय् प्यम्ह सीना च्वंगु लुगु दु। दिव्य फर्निचर मिल दुन् छगु हे परिवारया स्वम्ह नाप प्यम्ह सी ना च्वंगु लुगु दु।

काठमाण्डौ उपत्यका प्रहरी कार्यालयया प्रवक्ता, प्रहरी वरिष्ठ उपरीक्षक दिनेशराज मैनालीया कथं ज्वंगु हतियार प्रहार याना स्यागू अवस्थाय् प्यम्ह सी ना च्वंगु लुगु खः।

सीपि निम्ह मिसा व निम्ह मिजंपि खः। दोलखा छेँ कुमार भुजेल, वयकःया अम्बिका व कुमारया मां शुभद्रा भुजेल व मोरङया नवीन राईपि सी ना च्वंगु धका प्रहरीं धाःगु दु।

आः घटनास्थलय् प्रहरी परिचालन याना थप अनुसन्धान जुयाच्वंगु धका उपत्यका प्रहरी कार्यालयया प्रवक्ता, प्रहरी वरिष्ठ उपरीक्षक मैनालीं जानकारी बिःगु दु।

नेपाल आयल निगमं इन्धनया भाः थकाःगु दु। वंगु चान्ह्यःनिसे लागू जुइ कथं पेट्रोल लिटरं छतका व डिजल नापं मचिकनय् लिटरं स्वतका थकाःगु दु धका निगमं धाःगु दु।

न्हुगु भाः कथं आः येँं, पोखरा व दिपायलय् पेट्रोल लिटरं १८३ रुपैयाँ थ्यःगु दु सा विराटनगर, जनकपुर, अमलेखगञ्ज, नेपालगञ्ज, धनगढी व वीरगञ्जय् १८० रुपैयाँ ५० पैसा व सुर्खेत व दाङय् १८२ रुपैयाँ थ्यःगु दु।