लीलादेवी गड्टौला नेपाः सरकारया मुख्य सचिव पदय् नियुक्त यागु दु। आइतवाः च्वंगु मन्त्रिपरिषद बैठकं थौंकन्हय् कायम मुकायम मुख्यसचिव जुयाच्वनादीम्ह लीलादेवी गड्टौलायात मुख्यसचिवय् नियुक्त याःगु दु

वय्कः नेपाःया न्हापांम्ह मिसा मुख्यसचिव जुयादीगु दु। गडटौला थ्व हे भदौ १५ गतेय् अवकाश काइगु जूगु दु । ५८ दँया सीमाया हुनिं गड्टौला अवकाश काइगु जूगु दु। तर व स्वयां न्ह्यः वय्कलं लच्छि स्वयां अप्वः ई तक मुख्य सचिवया जिम्मेवारी काइगु जूगु दु।

थौ लुँ तोलां नीप्यसः कुहावःगु दु। लुँ तोलां नीप्यसः कुहावया थौ १ लाख ४५ हजार रुपैयाँ न कारोवार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोला न न्यय् न्यातका कुहावःगु दु। वहः तोलां न्यय् न्यातका कुहावया १ हजार ५ सय ५० रुपैयाँ न कारोवार जुगु दु धका महासङ्घं धाःगु दु।

धोबीखोलाय् बुद्धनगर–बबरमहल स्वाइगु ताँ चर्केय् जूया वयेगु वनिइगु बन्द जूगु दु। महानगर प्रहरीया कथं ताँ चर्केय् जुया वयेगु वनेगु बन्द यानागु धका धागु दु।

मदिक्क वाः वया च्वंगु कारण धोबीखोलाय् लः थहावःगुलि १० नम्बर वडा व ११ नम्बर वडा स्वाइगु ताँ चर्के जूगु धका नगर प्रहरी उपरीक्षकं जानकारी बिउगु दु। चर्के जुगु ताँ मदय्कूतले वयेगु वनेगु बन्द जुइधका धाःगु दु।

सौर्य एयरलाइन्सया जहाज दुर्घटनाय् सीपि १८ म्हेसिगु शवया पोष्टमार्टम जुयाच्वंगु दु। दक्को पोष्टमार्टम याये धुका परिवार व थःथितिपिन्त शवया जिम्मा बिइगु जुइ धका पोष्टमार्टमय् संलग्न चिकित्सकं धाःगु दु।

त्रिवि शिक्षण अस्पतालय् बुधबारनिसे हे पोष्टमार्टम जुयाच्वंगु दु।

त्रिभुवन अन्तर्राष्ट्रिय विमानस्थलय् सौर्य एयरलाइन्सया विमान दुर्घटना् पाइलट मनिषरत्न शाक्य घाःपाः जूगु खः। म्हिगः सुथय् ११ः१५ बजे सौर्य एयरलाइन्सया जहाज पोखरा वनेगु झ्वलय् विमानस्थलय् दुर्घटना जूगु खः।

दुर्घटनाय् घाःपाः जूम्ह पाइलट शाक्ययात येँया सिनामंगलस्थित केएमसी अस्पतालय् वासः याकातःगु दुसा वय्कः खतरामुक्त जूगु खँ चिकित्सकतय्सं धाःगु दु।

विमान दुर्घटनाय् लानाः को–पाइलट सुशान्त कटवाल नापं अमितमान महर्जन, सागर आचार्य, दिलीप बर्मा, मनुराज शर्मा, अश्विन निरौला, सुदीपलाल जोशी, सर्वेस मरासैनी, श्याम विन्दुकार, नवराज आले, राजाराम आचार्य, अधिराज शर्मा, प्रिजा खतिवडा, उद्धव पुरी, यज्ञप्रसाद पौडल, सन्तोष महतो, पुण्यरत्न शाही व यमनी नागरिक अरेफ रेडा सीगु खः।

जहाज दुर्घटनाय् लानाः सीपिनिगु पोस्टमार्टम म्हिगःनिसें न्ह्याःगु दु। त्रिवि शिक्षण अस्पतालया फरेन्सिक विभाग प्रमुख डा.गोपाल चौधरीया कथं पोस्टमार्टमया नितिं स्वंगू पुचः परिचालन जूगु दु।