येँ महानगरपालिकां येँया न्हूतसकय् पार्किङ यायेत रोकेयायेवं उगु निर्णयविरुद्ध व्यापारीपिं आन्दोलित जूगु दु।

अन च्वपि ब्यापारी तय्सं थौं मंगलवाः पसः बन्द यानाः वडा ज्याकुथिइ थ्यंकाः निर्णय भिंकेत इनाप याःगु दु । येँ महानगरपालिकां थौं मंगलवाःनिसें पीच सतकय् सवारी पार्किङ याके मबिइगु निर्णय याःगु खः।

धर्मपथ, जुद्ध शालिकनिसें इन्द्रचोक, खिचापुखू, महाबौद्ध, वीर अस्पताल लिसेंया लागाया सतकय् पार्किङ निषेध यानाब्यूगु खः । थुकिया विकल्पय् काठमाडौं टावरय् निःशुल्क पार्किङया व्यवस्था यायेगु महानगरपालिकां जानकारी ब्यूगु दु।

येँ महानगरपालिकां थौं मंगलवाःनिसें न्हूसतक लागाया सतकय् ‘नो पार्किङ’ च्वयातःगु संकेत चिं तःगु दु। नगर प्रहरीं थौं मंगलवाःनिसें पीच सतकय् पार्किङ यायेमदइगु जानकारी ब्यूगु दु।

वीर अस्पताल न्ह्यःनेया सतक खण्डय् पार्किङ याःसा मोटरसाइकलत धाःसा नगर प्रहरीया सवारीसाधन छ्यलाः ल्ह्वनाः यंकूगु दु

क्यान्सर पीडित पाँचथरया अग्रज पत्रकार कवीन्द्र शेर्मायात दक्षिण कोरियापाखे आर्थिक ग्वाहालि याःगु दु । गपतय् भक्तपुर क्यान्सर अस्पतालय् वासः याकेगु झ्वलय् शेर्माया उपचारया लागि किरात याक्थुङ पापोहाङ शेर्मा सङजुम्भो दक्षिण कोरियाया नेतृत्वमा संकलन याःगु खः।

नेपाल आदिवासी जनजाति पत्रकार महासंघ (फोनिज) या संघीय कार्यालय येँया ग्वससालय् उपचार याना च्वम्ह शेर्मायात ३ लाख ८७ हजार रुपैयाँ ग्वहालि याःगु खः । फोनिजया अध्यक्ष गजुरधन राई व सङ्जुम्भोका नेतृत्वय् मंकाः कथं उगु ध्यवा ग्वहालि याःगु खः।

हस्तान्तरण याःगु रकममध्ये ३ लाख ६० हजार रुपैयाँ रकम दक्षिण कोरियाय् संकलन याःगु खःसा ल्यः दुगु रकम नेपालय् हे संकलन याःगु खः । पाँचथरय् च्वना ताः ईनिसे पत्रकारिता यानाच्वंम्ह शेर्माया गःपतय् क्यान्सर जूया आः उपचार यायेगु झ्वलय् किमो बिइगु याना च्वंगु खः।

नामसंगीति वाचन गुरु चित्रवीर बज्राचार्यया न्हापांगु ज्याःजंकुया लसताय् “आर्यमञ्जुश्री नासंसंगीति गाथा (नेपालभाषा अनुवादसहित) व धर्मश्री मित्र कथा” सफू प्रकाशन यानाः नामसंगीति वाचन यानादीपिन्त दोहलपाकथं  देछाल ।

यलया बालिफलय् च्वंगु अशोक पार्टी प्यालेसय् गुरु बज्राचार्यया ५०० म्हं मल्याक शिष्यपिंनाप नामसंगीति पाठ जूगु थुगु ज्याझ्वलय् गुरु बज्राचार्यया कायपिं सुरजवीर, संजिववीर, सुदिजवीर व भौपिं रमा र रिजु बज्राचार्यं थुगु सफू पिथनादीगु खः । सफूया देबः किपातय् वरिष्ठ चित्रकार लोक चित्रकारं च्वयादीगु नामसंगीति द्यःया किपातं छायपियातःगु दुसा थुगु सफू खेमराज शाक्यं सम्पादन यानादीगु खः ।

थुगु सफुतिइ पण्डित बद्रीरत्न बज्राचार्यं च्वयादीगु स्वयम्भू पुराणया षष्टम अध्यायय् च्वंगु धर्मश्री मित्रया बाखं, बौद्ध अध्येता मीनबहादुर शाक्यं सम्पादन यानादीगु नामसंगीति नेपालभाषा अनुवादया षटचक्र अनुशंसा व गुरु बज्राचार्य बःचाहाकःगु जीवनी दुथ्यानाच्वंगु जुल ।

ज्याझ्वलय् बज्राचार्यया गुरु नेपाल परम्परागत बौद्धधर्म संघया अध्यक्ष प्रा.डा. नरेशमान बज्राचार्ययात गुरुपूजा यासें हनापौ देछाःगु खःसा नेपाल परम्परागत बौद्धधर्म संघ, व संघया महासचिव दिनेश शाक्य व सम्पादन खेमराज शाक्यया नं सुभाय् पौ देछाःगु खः । नामसंगीति ब्वनेगु परम्पराय् न्ह्यज्यानाच्वंपिन्त देछाःसें थुगु सफू पिथनागु गुरु बज्राचार्यया काय् सञ्चारकर्मी सुरजवीर बज्राचार्यं कनादिल ।

ज्याझ्वलय् नेपालभाषा एकेडेमीया चान्सलर यज्ञरत्न धाख्वा, हिरण्यवर्ण महाविहार विहार सुधार समितिया नायः पुष्पराज बज्राचार्य, नेपाल परम्परागत बौद्धधर्म संघया महासचिव दिनेश शाक्य, पद्मावती वचत तथा ऋण सहकारी संस्थाया नायः नेमवीर शाक्यं नं भिंतुना देछानादीगु खः ।

गुरु बज्राचार्य वंगु पुस २८ गते ७७ बर्ष, ७ महिना, ७ दिन, ७ घडी, ७ पला पूवंगु ल्याखं वय्कःया जहान ज्ञानीदेवी बज्राचार्यनाप परम्पराकथं ज्याःजंकु याःगु खः । यलया हिरण्यवर्ण महाविहार क्वाःबहाः (गोल्डेन टेम्पल) या वीशस्थविर आःजु गुरु चित्रवीर बज्राचार्य ४ दशकनिसें नामसंगीति वाचनय् सक्रिय जुयाच्वनादीम्ह खः । नेपाल परम्परागत बौद्धधर्म संघया ग्वसालय् आर्यमञ्जुश्री नामसंगीति पर्व न्ह्यासांनिसें त्वाःत्वालय् नामसंगीति हालेगु स्यनाच्वनादीम्ह वय्कःया नामसंगीति परम्परा प्रवर्द्धनय् महत्वंजाःगु भूमिका म्हितादीगु दु ।

ऐतिहासिक, धार्मिक–सांस्कृतिक नापं पुरातात्विक नगर पन्तिइ विश्व सम्पदा धलखय् सूचिकृत यायेगु ज्या लिपागु ब्बय् थ्यःगु दु। २०५२ सालनिसे विश्व सम्पदा धलखये सूचिकृत यायेगु कुतः जुयाच्वंगु खःसा थीथी कारणं ज्या मजुयाच्वंगु खः।

आः, स्थानीय सरकारया कुतलय् पन्ति विश्व सम्पदा धलखय् सूचिकृत यायेगु ज्या तयारी जुयाच्वंगु दु। युनेस्को न बिःगु मापदण्ड यक्को पूरा जुगुलि आः छु भचा मापदण्ड पूरा याना पुरातत्व विभाग जुया युनेस्कोय् छ्वयेगु तयारी जुयाच्वंगु दु।

नगरपालिकां आः संरक्षणया लागि व्यवस्थापकीय योजना निर्माण यानाच्वंगु दु । पन्तिइ १ किलोमिटर दुने ४२ गु मूर्त सम्पदा दु । अन मूर्त व अमूर्त याना ७० गु स्वया अप्पो सम्पदा दुगुलि उगु शहर छगु खुल्ला संग्रहालय कथं न कायेगु याः।

प्रधानमन्त्री पुष्पकमल दाहाल ‘प्रचण्ड’ व श्रीलङ्काया राष्ट्रपति रनिल विक्रमासिङ्घे दथुइ भेटावार्ता जूगु दु।

असंलग्न आन्दोलन (नां) या सदस्य राष्ट्रया १९ क्वःगु सम्मेलनय् ब्बति कायेगु निति युगाण्डाया कम्पालाय् निम्हेसिया दथुइ थौं शनिवाः निगु पक्षीय नापा लायेगु ज्या जूगु खः। प्रधानमन्त्री प्रचण्डं असंलग्न परराष्ट्र नीतिया मामिलाय् नेपाः व श्रीलङ्का छगु हे थासय् च्वना क्षेत्रीय सहकार्य व निम्ह देय् दथुइ सहकार्य याना न्ह्यावनेमाःगुलि बः बियादीगु खः ।

अथेहे श्रीलङ्काया राष्ट्रपति विक्रमासिङ्घे न सार्कयात सक्रिय याना न्ह्याकेगु निति थःम्हेसिया न ग्वाहालि यायेगु धका धयादीगु खः।

उगु ज्याझ्वलय् प्रधानमन्त्री प्रचण्डनापं परराष्ट्रमन्त्री एनपी साउद, प्रधानमन्त्रीया परराष्ट्र मामिला सल्लाहकार डा रूपक सापकोटा, परराष्ट्र सचिव सेवा लम्साल नाप परराष्ट्र मन्त्रालयया अधिकारी पिनिगु न ब्बति दुगु खः ।