प्रधानमन्त्री केपी शर्मा ओलीं नेपाली भूमिइ जन्मे जूम्ह सिद्धार्थ गौतमया ध्यानं बुद्ध दर्शन वैज्ञानिकताया आधारित जूगुलि थुकियात कमजोर याये मज्यु धका धयादीगु दु।

नेपाल मण्डल लिटरेचर कल्चर टष्टं म्हिगः छगु ज्याझ्वः दथुइ जूगु ज्याझ्वलय् बौद्ध विद्वान डा अजयक्रान्ति शाक्यं च्वयादीगु ‘बुद्धका मौलिक दर्शन’ सफू विमोचन नाप अनगारिका गुरुमापिन्त सङ्घदान ज्याझ्वलय् सम्बोधन यानादीसे प्रधानमन्त्री ओलीं थः ज्याझ्वलय् वयेगु इलय् प्रशनन चिन्तन ज्वना वयेगु बिचाः यानागु खःसा बिचाः मयाकथं सौर्य एयरया विमान दुर्घटनास्थलय् वना वया झ्यातुगु मन ज्वना वयेत विवश जूगु धका धयादीगु खः।

वयकलं मदुपिन्त बिचाः हाय्का दीसे घाःपाः जूम्ह क्याप्टेनया भिं उसाँय्या कामना यानादीगु खः। नेपाःया सामाजिक, धार्मिक व प्राकृतिकरुपं विविधतायुक्त देय् जूगुलि गज्यागु धर्म माने याइ, याइ मखु धइगु मेगु हे खँ जुगुलि सरकारं नेपाः दक्को नेपाःया मंकाः खँयात आत्मसात् यायेमाः धका धयादीगु खः।

“नेपाः हलिमयय् मानवतावादया चेतना फैलै याइगु व बुद्ध दर्शन बिइम्ह बुद्ध जन्मय् जूगु देय् खः। दक्को मानव व प्राणी जातियात भिं व करुणाया दर्शन बिइगु देय् खः।” प्रधानमन्त्री ओलीं धयादीगु दु, “बुद्धया शिक्षां वंगु फलयात विस्तार यायेमाःगु बिचाः नाप जि प्रधानमन्त्री जुयागु इलय् सरकारं लुम्बिनीइ अन्तर्राष्ट्रिय ध्यान केन्द्र दयकाःगु खः।

राणाकालय् भिक्षु—भिक्षुणी जुइगु अपराध कथं कायेगु याइ । बुद्ध दर्शनयात थाकूके मज्यु। थ्व वैज्ञानिकताय् आधारित खः। झिपी बुद्धया ज्ञान व शिक्षायात विस्तार यायेगु पक्षय् दु।” प्रधानमन्त्री ओलीं थःके दुगु ज्ञान मय्पिन्त बिइमाः धका धयादीसे डा शाक्यं थःके दुगु ज्ञानयात न मेपिन्त बिइगुत स्वगूलि लसता प्वकादील।

सौर्य एयरलाइन्सया जहाज दुर्घटनापाखे घाःपाः जूम्ह क्याप्टेन मनिषरत्न शाक्यया स्वास्थ्य अवस्था थुइकेगु निति प्रधानमन्त्री केपी शर्मा ओली केएमसी अस्पताल सिनामंगलय् म्हिगः वंगु दु।

म्हिगः उगु जहाजय् च्वपि १९ म्ह मध्ये शाक्य छम्ह जक बचे जुइत ताःलागु खः।

प्रधानमन्त्री केपी शर्मा ओली सौर्य एयरलाइन्सया जहाज दुर्घटना जूगु थासय् थ्यःगु दु। उद्दारया ज्या क्वचाय्वं दुर्घटनास्थल निरीक्षणया लागि ओली उखेपाखे वःगु खः।

व स्वया न्ह्यः गृहमन्त्री रमेश लेखक न निरीक्षणया लागि विमानस्थल वःगु खः।

बागमती प्रदेशय् मुख्यमन्त्री नापं मन्त्रीपिन्स थौ सपथ काःगू दु। कांग्रेसपाखे कुन्दनराज काफ्ले, श्याम खड्का व मधुकुमार श्रेष्ठपिं बिना विभागीय मन्त्री नियुक्त जूगु दु। उमिगु जिम्मेवारी लिपा क्वछिउगु जूगु दु।

अथेहे एमालेया खुम्ह मन्त्रीपिन्स न सपथ काःगु दु। एमालेपाखे प्रकाश श्रेष्ठं कृषि नाप पशुपन्छी मन्त्रालय, किरण थापा मगरं स्वास्थ्य मन्त्रालय, कृष्ण सिलवालं वन लिसे वातावरण मन्त्रालय, सुकमाया तामाङं उद्योग, वाणिज्य, भूमि लिसे प्रशासन मन्त्रालय, अमन मास्कें भौतिक पूर्वाधार विकास मन्त्रालय व प्रेमभक्त महर्जनं श्रम रोजगार लिसे यातायात मन्त्रीया सपथ काःगु खः।

सौर्य एयरया विमान दुर्घटना जुगु जानकारी वयेवं प्रधानमन्त्री केपी शर्मा ओली त्रिभुवन विमानस्थलय् वनेत्यःगु दु

थौ बुधवाः सुथय् ११ बजे जूया ११ मिनेटय् सौर्य एयरया विमान पोखरा वनेगु झ्वलय् त्रिभुवन विमानस्थलय् मिँ च्याःगू खः। उगु बिमानय् च्वना वंपि १८ म्ह सीउगु खः सा छम्हेसित उद्दार याःगु खः।

उगु दुर्घटनाया सूचं वयेवं प्रधानमन्त्री ओली दुर्घटनास्थल त्रिभुवन विमानस्थलय् वनेत्यःगु दु धका वयकःया स्वकीय सचिव राजेश बज्राचार्यं जानकारी बिःगु दु।

गृहमन्त्री रमेश लेखक न विमान दुर्घटनास्थलय् थ्यके धुकुगु दु।