नेपाल संवत न्हूदँ राष्ट्रिय समारोह समितिं थ्वहे वइगु ने.सं. ११४४ कछलाथ्व पारु न्हूदँ तःजिक न्यायेकेगु नितिं थौं बिहिवाः येँया थँहिति त्वालय् नासः पूजा याःगु दु।

समारोह समितिया नायः प्रा.डा. नरेशमान बज्राचार्य व राजगुरु मंजुश्री बज्राचार्यपिन्सं न्हूदँया लसताय् जुइगु सांस्कृतिक ¥यालि तःजिक क्वचायेमाः धकाः पूजा यानादीगु खः।

उगु नासः पूजा ज्याझ्वलय् न्हूदँया सचिवालय दुजःपिं उपस्थित जूगु खः।

अथेहे, थौं बिहिवाः हे सनिलय् सांस्कृतिक बाजं खलः पुचःया बाजंगुरुपिन्त प्रसाद ग्रहण याकेगु ज्याझ्वः येँया खुसिबुइँ च्वंगु नेपाः ब्यांक्वेटय् यायेत्यंगु दु।

नेपाल संवत न्हूदँ राष्ट्रिय समारोह समितिया दुजः लिसें न्हिल्याः पौया कजि देवदास मानन्धर मदुगुलिं विचाः हायेकूगु दु।

थौं बिहिवाः सुथय् मदुम्ह मानन्धरया छेँ थँहितिइ वनाः विचाः हायेकिइगु ज्या जुगु खः। समारोह समितिया नायः प्रा.डा. नरेशमान बज्राचार्यलिसें समितिया सचिवालय दुजःपिन्सं मदुम्ह मानन्धरयात लुमंकूसें छगू मिनेट मौनधारण याःगु खः।

मदुम्ह मानन्धरप्रति श्रद्धाञ्जलि देछासें वय्कःया किपाय् स्वाँ देछाःसें धारणी पाठ याःगु खः।

बरिष्ठ पत्रकार नाप ‘जनआस्था’ वाःपौया प्रबन्ध सम्पादक राजेन्द्र स्थापितया मां नीलप्रभा स्थापित म्हिगः मन्त।

म्हिगः बुधवाः किस्ट अस्पताल यंकूगु खः। अस्पतालय् वासः याकेगु झ्वलय् बहनी ९ बजे मदुगु खः। वय्कः ८५ दँ दुम्ह खः। मदुम्ह स्थापितया खुम्ह काय् लिसें छम्ह म्ह्याय् दी।

बरिष्ठ पत्रकार राजेन्द्र स्थापित माइलाम्ह काय् खः।

सर्वोच्च अदालतया अन्तरिम आदेशं गुठी संस्थानया प्रशासक किरण शाक्य पुनःबहाली जुयादीगु दु।

वंगु कार्तिक २ गतेया मन्त्रिपरिषदया निर्णय लिपा पदमुक्त जूयादीम्ह शाक्यं म्हिगः मंगलवाः त्रिपुरेश्वरस्थित संस्थानया केन्द्रीय कार्यालयय् वना प्रशासकया हैसियतं हाकनं ज्या न्ह्याकूगु दु।

सरकारं शाक्यया पदावधि क्वचाइगु न्ह्यय्ला न्ह्यः पदमुक्त यायेगु निर्णय याःगु खः। शाक्या थासय् सरकारं शैलश कुँवरयात प्रशासकय् नियुक्ति याःगु खः। वयालिपा शाक्यं थःत गैरकानुनी कथं पदमुक्त यागु दाबी यानादीसे कानुनी उपचारया लागि प्रधानमन्त्री लिसे मन्त्रिपरिषदया कार्यालय, भूमि व्यवस्था, सहकारी लिसे गरिबी मन्त्रालय, गुठी संस्थानयात प्रतिवादी दयका वंगु मंगलवाः मुद्दा दायर यानादीगु खः।

उगु मुद्दाया न्हापागु सुनुवाइ यायेगु झ्वलय् अल्पकालीन आदेश बिःगु खः। शाक्ययात प्रशासकपाखे चिइकेगु सरकारया निर्णय तत्काल कार्यान्वयन मयायेत धाःगु खः। न्यायाधीश हरिप्रसाद फुँयालया एकल इजलासं सरकारया नामय् वंगु आइतवाः अल्पकालीन अन्तरिम आदेश खः।

अदालतया आदेशय् धयातःगु दु– ‘निवेदकयात पदं चिइकेगु सरकारया निर्णय निजया सुविधा सन्तुलनया नितिं तत्काल कार्यान्वयन यायेमतय्÷याकेमतय् व निजया वयागु हे थासय् ज्या याकेत सर्वोच्च अदालत नियमावली २०७४ या नियम ४९(२)(ख) बमोजिम अल्पकालीन अन्तरिम आदेश जारी यानागु दु।’ अदालतं आदेशया प्रयोजनयो लागि थ्व हे मंसिर ४ गते पेशी तोेके याःगु दु।

बाग्मती प्रदेशय् नेपालभाषा लागू याःगुयात लसकुसयासें लसता प्वंकेगु ज्या नापं बाग्मती प्रदेशया सांसदपिन्त सुभाय् देछाय्गु ज्या म्हिगः सोमवाः येँया केल त्वालय् जूगु दु।

उगु ज्याझ्वःया मूपाहां नेवाः देय् दबूया केन्द्रीय नायः पवित्र बज्राचार्यं नेपाभाषाया प्यगः थापिं म्वानाच्वंगु खःसा थौं वय्कःपिं तसकं लयताइगु खः। नेपालभाषायात बाग्मती प्रदेशय् कामकाजि भाषा कथं लागू यायेगु नितिं विधेयक पारित याःगु तसकं लसताया खँ खः धका धयादीगु खः।

स्थनीय सरकारं भाषायात मान्यता बिइगु ज्या याःसां नं लागू याये फयाच्वंगु मदु धयादिसे मूपाहां बज्राचार्यं थुकिया कारण राज्य सत्तां दमनया कारणं अधिकार प्रयोग याये मफुगु अवस्था वल आः अधिकार छ्यलेगु नितिं नेवाःतसें थःगःगु छेँय् मस्तय्त नेवाः भाय् छ्यलेमाः धकाः धयादिल ।

अथे हे पाहां वाग्मती प्रदेशया सांसद वसन्त मानन्धरं बाग्मती प्रदेशपाखें आः तकया दुने ५० गू कानुन दयेके धुंकूगु खँ न्हयथसें थुगु कानुन आः तकया मध्ये विशेष कानुन खः धयादिसें संघीयतायात लागू यायेगु कथंया विशिष्ट कानुन खः धयादिल । वय्कलं व्यवहारय् लागू यायेगु सवलय् समस्यायात कया सचेत जुइमाःगु खँ न्ह्यथसें थुगु कानुन कार्यान्वयन याये मफत धाःसा दस्तावेजय् जक सिमित जुइफु धकाः धयादिल । अथे हे बाग्मती प्रदेशया मेम्ह सांसद शैलेन्द्रमान बज्राचार्यं आः भाषा ऐन कार्यान्वयन नितिं सकले छँप्प छधी जुइमाःगु धयादिल ।

भाषा विधेयकयात पारित यायेमाः धकाः हे थः भाषा विधेयक सहलह ब्याकीगु समितिइ हे थः च्वनागु खः धयादिसें सकल नेवाःत छप्पँ जुया न्ह्याः वनेमाः धकाः बः बियादिल ।

ज्याझ्वःया मूवक्ता देय् दबू स्वनिगः विशेष प्रदेशया नायः श्रीकृष्ण महर्जनं बाग्मती प्रदेशय् भाषा सम्वन्धि विधेयक प्रस्तूत जुयाच्वंगु इलय् येँय् च्वना व हे विधेयकयात कया भाषा बैज्ञानिक नापं कानुनविद्त लिसे सहलह ब्याका निश्चित ईया दुने संशोधन यायेमाःगु जुया चांचां प्रदेशया राजधानी हेटौंडाय् वना संशोधन यायेगु नितिं सांसदतलिसे सहलह ब्याकेगु ज्या जूगुलिं विधेयक तसकं बांलाक संशोधन जुया वःगु खः धयादिसें सांसदपिन्त सुभाय् देछायादिगु खः। वय्कलं भाषा विधेयकं नेवाः भाय्यात बाग्मती प्रदेशया कामकाजि भाषाया रुपय् मान्यता बिइगु जक मखु नेवाःतय्गु लिपियात नं विकास याना यंकेगु अले प्रदेशय् दुगु मेमेगु भाषायात नं विकास याना यंकेगु नितिं ज्या यायेगु ज्या जुइ धयादिल ।

अथे हे नेपाल संवतया आन्दोलनया भावना कथं आवंलि बाग्मती प्रदेशसभां नेपाल संवतयात तकं लागू याइ धयादिसें आःया अवस्थाय् नेपालय् भाषा नीति संघ सरकारयात दयेकेबिइगु, स्थानीय सरकारयात नं भाषाया कानुन दयेके बिइगु नितिं भूमिका म्हितेगु ई वल धयादिल । देय् दबू स्वनिगः विशेष प्रदेशया नायः महर्जनं संघ सरकारयात तकं आः सम्वत सम्वन्धि कानुन दयेके बिइगु नितिं सकल नेवाःत छप्पँ जुया वनेमाः धकाः बः बियादिल । येँ जिल्ला समितिया नायः धनबहादुर महर्जन तिमिलाया सभाध्यक्षताय् जुगु ज्याझ्वलय् नासः दबुलिइ मैनमत च्याका लसता प्वंकूगु खः ।