संसदय् जुयाच्वंगु पंगः चिइकेगु निति प्रधानमन्त्री पुष्पकमल दाहाल प्रचण्ड व सभामुख देवराज घिमिरे दथुइ सहलह जूगु दु।

थौं सुथय् बालुवाटारय् जूगु सहलहय् सभामुख घिमिरे न संसद् मचागुलि प्राकृतिक प्रकोप संम्वन्धि विषय बहस यायेमखगु धका धयादीगु खः।

सत्तापक्ष व प्रतिपक्षं गम्भीरतापूर्वक सहलह याना सहमति याना संसद् न्ह्याकेमाः धका सभामुखं प्रधानमन्त्री प्रचण्ड याःगु ध्यानाकर्षण याकूगु खः।

लिसः बिइगु झ्वलय् प्रधानमन्त्री प्रचण्डं संसद् न्ह्याकेगु विषय प्रमुख प्रतिपक्षी दल एमालेया अध्यक्ष केपी शर्मा ओलीनाप न खँ ल्ह्यायेगु जुइ धका सभामुखया निजी सचिवालयं धाःगु दु।

एमाले न तस्करी जूगु लुँ उच्चस्तरीय समिति दयका छानबिन याये माःगु माग यासे १० गतेनिसे संसद् अवरूद्ध याना वयाच्वंगु खः। सरकारं धाःसा अनुसन्धानया लागि उच्चस्तरीय समिति म्वाः धका धयावया च्वंगु खः।

येँ महानगरपालिकाया कार्यपालिका वैठकय् विवाद जूगु दु। कार्यपालिकाया वैठकय् पेश जूगुलि २१ प्रस्तावमध्ये लिपागु विविध शीर्षकय् सहलह जूगुलि विवाद जुगु खः।

वडाध्यक्षपिन्स विविध शिर्षकय् सहलह जुइवं विभागीय समितिं फ्वंगु योजना बजेटय् मलागु, वडां मफ्वनागु बजेट वडाय् बिःगुलि न्ह्यसः तःगु खः । कार्यपालिका सदस्यपिन्स महानगरया उपप्रमुख सुनिता डंगोलं बजेट निर्माण यायेगु झ्वलय् वयकःया भूमिकाबारे न्ह्यसः तःगु खः।

उपप्रमुख डंगोलं बजेट थः याकचां दयकाःगु मखु धासे बजेट तर्जुमा समितिं दयकागु धका लिसः बिःगु खः। विवाद अप्पोया वनेवं म्हिगः जुयाच्वंगु लाइभ न बन्द जुगु दु। कार्यपालिका बैठकया लिपागु इलय् विवाद जुयावनेवं कार्यपालिका सदस्यपिन्स न्ववाना च्वंगु इलय् लाइभ बन्द जुगु खः।

कार्यपालिका सदस्यपिन्स प्रशासन प्रमुखयात जिम्मेवार मदुगु धका धया च्वंगु इलय् लाइभ बन्द जुगु खः।

बझाङया खिराताडी केन्द्रविन्दू जूया भुखाय् ब्बःगु दु।

राष्ट्रिय भूकम्प मापन तथा अनुसन्धान केन्द्र लैनचौरया कथं बिहीवाः बहनि ९ बजे जूया १३ मिनेटय् बझाङया खिराताडी जःखः केन्द्रविन्दू जूया ३ दशमलव ९ रेक्टरस्केलया भुखाय् ब्बःगु खः।

नेवाः न्ह्यलुवाः नाप ज्यापु महागुथी नगर समितिया छ्याञ्जे, मचाराजा महर्जनया अजि हरीमाया महर्जन मन्त।

हरीमाया महर्जन ९३ दँय् म्हिगः श्रावन ३१ गते बुधवाः आकाझाकां मदुगु खः।

वयकःया थौं लुतिया दिपय् दाहसंस्कार याःगु खः।

सन् नेपाल लाइफ इन्स्योरेन्सं थौ साउन ३२ गते बिहीवाःनिसे सर्वसाधारणयात प्राथमिक सेयर (आईपीओ) या आवेदन खुल्ला याःगु दु।

इन्स्योरेन्सं वैदेशिक रोजगारीइ च्वना च्वपि नेपाःमिपिन्त निष्कासन याये धुका आः आईपीओ बाँडफाँट याये धुका सर्वसाधारणया लागि आईपीओ आवेदन खुल्ला याःगु दु। कम्पनीं नेपाल धितोपत्र बोर्डपाखे जारी पुँजी ३ अर्ब २० करोड रुपैयाँया बराबर ३ करोड २० लाख कित्ताया ३० प्रतिशत जुइगु कथं ९६ लाख कित्ता साधारण सेयर निष्कासन यायेत अनुमति बिःगु दु ।

छगू कित्ताया १०० रुपैयाँ भाः १३९ रुपैयाँ प्रिमियम नाप कम्पनीं प्रतिकित्ता २३९ रुपैयाँ आईपीओ निष्कासन यायेत स्वीकृति बिःगु दु । इन्स्योरेन्सं उगु मध्ये ९ लाख ६० हजार कित्ता सेयर छगु कित्ताया १०० भाः दुगु १३९ रुपैयाँ थप याना २३९ रुपैयाँ न वैदेशिक रोजगारीइ च्वना च्वपिन्त निष्कासन याये धुका बाँडफाँट याये धुकुगु दु।

अथेहे कम्पनीं ४ लाख ८० हजार कित्ता सेयर सामूहिक लगानी कोषयात व ४ लाख ८० हजार कित्ता सेयर कम्पनीया कर्मचारीपिनिगु लागि सुरक्षित यागु खः। ल्यः दुगु ७६ लाख ८० हजार कित्ता सेयरया लागि सर्वसाधारणपिन्स आवेदन बिइ फइगु जुगु दु।

कम्पनीं सर्वसाधारणपिन्त छगू कित्ताया १०० रुपैयाँ १३९ प्रतिशत रुपैयाँ प्रिमियम थप याना छगू कित्ता २३९ रुपैयाँ सेयर निष्कासन खुल्ला याःगु दु। अथेहे कर्मचारीया लागि धाःसा छगू कित्ता १०० रुपैयाँ अंकित भाःया सेयर जारी याःगु दु।

कम्पनीया आईपीओ याःगु लगानीकर्तापिन्स भदौ ४ गते तक आवेदन बिइ फइ । उगु इलय् न माग कथं आवेदन मवसा  आवदेन बिइगु म्याद भदौ १४ गते तक ई तया तःगु दु।