प्रधानमन्त्री पुष्पकमल दाहाल प्रचण्डयात थ्व हे वइगु कछलाथ्व दशमी मंसीर ६ गते बुधवाः न्हिनसिया १२ः३० ता इलय् येँया प्रज्ञाभवनय् तःजिक सुभाय् देछाइगु ज्याझ्वः दु।

नेपाल संवत न्हूदँ राष्ट्रिय समारोह समिति व नेवाः देय् दबूलिसें थीथी खलः पुचःपाखें मंकाः कथं थथे सुभाय् देछायेगु ज्याझ्वः यायेत्यंगु खः । उगु ज्याझ्वः ताःलाकेगु नितिं थौं सोमवाः न्हिनय् प्यता इलय् येँया ज्याथाय् च्वंगु छुस्या बहालय् थीथी खलः पुचःया मंकाः मुँज्या च्वंगु दु।

समारोह समितिं नेपाल सरकारं वंगु कार्तिक २७ गते मन्त्रिपरिषदया बैठकं नेपाल संवतयात सरकारी दस्ताबेजय् छ्यलिइगु निर्णय याःगु लसताय् प्रधानमन्त्री प्रचण्डयात थथे सुभाय् देछायेगु ज्याझ्वः तःगु खः । अथेहे, उगु ज्याझ्वलय् नेपाल सरकारपाखें मान्यता बिइगु कथं शंखधर दिवसया लसताय् माल्यार्पण ज्याझ्वः नं तःगु दु ।

नेपाल संवतयात सरकारं निर्णय याःकथं सरकारी दस्तावेजय् छ्ययेकेगु नितिं अथेहे, पहिचानया आन्दोलनं याःगु थीथी माग पूवंकेगु नितिं दबाबमूलक ज्याझ्वः कथं नं थथे सुभाय् देछायेगु ज्याझ्वः यायेत्यनागु खँ मू ग्वसाः खलः न्हूदँ समारोह समितिं धाःगु दु। समारोह समितिं उगु ज्याझ्वलय् प्रधानमन्त्री प्रचण्डलिसें थीथी पार्टीया नेवाः नेता तय्त विशेष पाहाँकथं ब्वनातःगु दु।

समितिं बिःगु जानकारी कथं प्रधानमन्त्रीपाखें उगु ज्याझ्वलय् विशेष सम्बोधन यायेत्यंगु खँ धाःगु दु।

नेपाल संवतयात राष्ट्रिय संवत कथं हनिइगु निति यल महानगरपालिकां कुतः यायेमाः धका ताम्रकार समाजया अध्यक्ष विनोद ताम्रकारं धयादीगु दु।

नेपाल संवत् ११४४ न्हुँदया लसताय् जुगु श्री उग्रचण्डीमाई ताम्रकार समाजया भवनय् जुगु उगु ज्याझ्वलय् वयकलं अथे धयादीगु खः। ‘संघीय सरकारं नेपाल संवतयात सरकारी माईन्युट व दस्तावेजय् अनिवार्य छ्यलेगु निर्णय याये धुका, वाग्मती प्रदेशं नेपाल भाषा व तामाङ भाषायात न सरकारी कामकाजी भाषा दयकेगु विधेयक पारित याये धुकुगु स्थितिइ स्थानीय तह न हे न्ह्यचिलां नेपाल संवत हनिइगु उपयुक्त जुइ ।’ धका वयकलं धयादीगु खः। अध्यक्ष ताम्रकारं महानगरपालिकां नेपाल संवत हनिइगु निति सहकार्य यासे थुकिया नेतृत्व कायेमाःगुलि बः बियादीगु खः।

उगु ज्याझ्वलय् यल महानगरया मेयर चिरिबाबुु महर्जनं थुकिया विषय वइगु कार्यपालिका बैठकय् प्रस्ताव तयेगु जुइ धका धयादीगु खः। यल महानगरया मेयर महर्जनं धयादीगु दु नेपाल भाषा मंका खलः यलनाप सहकार्य याना खोकना, बुंगमती, हरिसिद्धि व धापाख्यलय् शंखधर साख्वाया झ्वाता तयेगु ज्या जुइ धुकुगु दु धका जानकारी बियादीगु खः।

वाग्मती प्रदेशया उद्योग वाणिज्य, भूमी लिसे सामान्य प्रशासन मन्त्री रामकृष्ण चित्रकारं बागमति प्रदेशय् नेपाल भाषा व तामाङ भाषायात सरकारी कामकाजी भाषायात मान्यता बिइ धुकुगु दु धका धयादीसे थुकियात व्यवहारय् यकां ज्या यायेमाः धका धयादीगु खः।

यलया क्षेत्र नं २ या सांसद् प्रेम महर्जन, नेवाः देय् दबूका केन्द्रीय अध्यक्ष पवित्र बज्राचार्य, यलया प्रमुख जिल्ला अधिकारी रुद्रप्रसाद पण्डित, नेपाल भाषा मंका खलः यलया अध्यक्ष हिराकाजी महर्जन, न्हुदँ राष्ट्रिय समारोह समिति ११४४या नाय प्राडा नरेशमान बज्राचार्य, नेवाः पत्रकार राष्ट्रिय दबूया नायः नृपेन्द्रलाल श्रेष्ठ, हलि नेवा दबू नेपाः च्याटरया नायः सुरेन्द्र भक्त श्रेष्ठ लगायत पिनिगु ब्बति दुगु खः।

मंगलमार्ग अन्तर्राष्ट्रिय बौद्ध ध्यान केन्द्रं देशय् शान्ति, मैत्री व समृद्धिया कामना यासे यलया नख्खुइ भिक्षुसंघयात कथिन चीवर दान याःगु दु।

केन्द्रया जग्गा दाता दशलाल डंगोल व वयकःया जहान राममाया डंगोल नापं केन्द्रया अध्यक्ष रामकाजी अवाले व वयकःया जहान पूर्णलक्ष्मी अवालेपिन्स उगु  दान ज्याझ्वः यानादीगु खः।

उगु ज्याझ्वलय् भिक्षु भिक्षुणी व सच्छिम्हं मल्याक उपासकउपासिका तय्गु उपस्थितिइ शीलप्रार्थना, बुद्धपुजा, प्रवचन व दानप्रदान ज्याझ्वः जुगु खः । वया लिपा मू दाताया परिवारं भिक्षुसंघयात चीवरदान याःगु खः। दान बिःगु चीवरयात बुद्धमूर्ति खटय् तया दाता परिवारया निवास नख्खं परम्परागत बाजं नापं व उपासकउपासिका तय्सं केन्द्रया जःखः चाःहिइगु खः।

ज्याझ्वलय् यल क्षेत्र नं २ या संघीय सांसद् प्रेमबहादुर महर्जन, वाग्मती प्रदेशसभा सदस्य प्रेमभक्त महर्जन, यल महानगरपालिकाया उपमेयर मञ्जरी शाक्य, ज्यापू समाजया अध्यक्ष तीर्थलाल महर्जन, ताम्रकार समाजया अध्यक्ष विनोद ताम्रकार लगायत थी थी सामाजिक नाप बौद्ध संघसंस्थाया पदाधिकारी तय्गु उपस्थिति दुगु खः।

वर्ल्ड नेवाः अर्गानाइजेशन नेपाः च्याप्टरं ख्वाःपौं कथं ‘हलिं नेवाः पौ’ प्रकाशन याःगु दु।

नेपाल संवत ११४४ या लसताय् भिंतुना कालबिलं नाप उगु ‘हलिं नेवाः पौ’या बिमोचन न जूगु दु। वल्र्ड नेवाः अर्गानाइजेशन नेपाः च्याप्टरया नायः सुरेन्द्र भक्त श्रेष्ठया सभाध्यक्षताय् जुगु उगु ज्याझ्वलय् मूपाहाँ कथं बागमती प्रदेशया उद्योग वाणिज्य भूमी लिसे प्रशासन मन्त्री रामकृष्ण चित्रकार झायदीगु खः।

मूपाहाँ मन्त्री चित्रकारं नेवाः समुदाय न हनिइगु नखः चखः छगु कथं हे जुइमागुलि बःबियादीगु खः। हलिं नेवाः पौ प्रकाशनया कजि उत्तमकुमार श्रेष्ठं वल्र्ड नेवाः अर्गानाइजेशन व उकिइ दुथ्याःगु मेमेगु देशया शाखाय् जुइगु गतिविधियात दुथ्याका नेवाः समाज तक थ्यकिइगु आज्जु कथं थुगु पौ पिकाइगु खः धका धयादीगु खः।

नेपाल संवत् न्हूदँ राष्ट्रिय समारोह समिति–११४४ या अध्यक्ष लिसे ज्याझ्वःया विशेष पाहाँ प्रा.डा.नरेशमान बज्राचार्यं उगु ख्वापौ प्रकाशन जुगुलि लसता प्वकूसे नेवाः समाजय् प्रचलित मौलिक शब्दत न छ्यलेत इनाप यानादीगु खः। अथेहे नेवाः देय् दबूया नायः पवित्र बज्राचार्य, वल्र्ड नेवाः अर्गानाइजेशनया केन्द्रीय सल्लाहकार रोजीना प्रधान राई, गुठी संस्थानया प्रशासक प्रमुख किरण शाक्य, नेवाः पत्रकार राष्ट्रिय दबूया नायः नृपेन्द्रलाल श्रेष्ठपिन्स ‘हलिं नेवाः पौ’ प्रकाशन जुगुलि लसता प्वकादीगु खः।

नेपाः च्याप्टरया न्वकू रमेशमान मुनिकारं लसकुस यानादीगु उगु ज्याझ्वलय् नेपाः च्याप्टरया न्वकू श्यामप्रसाद श्रेष्ठं सुभाय् देछानादीगु खः। ज्याझ्वः मंगल ताम्राकारं न्ह्याकादीगु खः।

येँ महानगरपालिकाया प्रवक्ता लिसें १७ वडा अध्यक्ष नविन मानन्धरया अबु भगवान मानन्धर मन्त ।

वयकः ८० दँय् मधुमेह लिसें थीथी ल्वया हुनिं थौं चान्हय् ३ बजे मनमोहन अस्पतालय् मदुगु खः। मदुम्ह मानन्धरया अन्तिम संस्कार येँया लुँतिइ यागु खः।

वयकःया छम्ह काय् व स्वम्ह म्ह्याय् व जहान दी।