नेपाल आदिवासी जनजाति पत्रकार महासंघ फोनिजया २४ क्वःगु स्थापना दिवसया लसताय् नेपालभाषा टाइम्स न्हिपौयात फोनिज मातृभाषा पत्रकारिता सम्मान लःल्हाःगु दु ।

प्रदेश नं १ या राजधानी विराटनगरय् जूगु उगु ज्याझ्वलय् संघीय मामिला व सामान्य प्रशासनमन्त्री अमनलाल मोदीं सम्मान लःल्हाःगु खः । मांभासं निरन्तर पत्रिका पिथनाः आदिवासी जनजातिया सः तयावयाच्वंगुलिं थुगु सम्मान बिउगु खः ।

मन्त्री मोदी हनापौ लःल्हानादीगु खःसा फोनिजया नायः गजुर्धन राइं नीन्याद्वः दांया चेक लःल्हानादीगु खः । अथेहे ज्याझ्वलय् दिलिप थापामगरयात फोनिज राष्ट्रिय पत्रकारिता सम्मान, किसन राई (मरणोपरान्त), देव पचभैया मगर, जीवन लामा व उन्नति चौधरीयात फोनिज राष्ट्रिय पत्रकारिता पुरस्कार लःल्हाःगु खः ।

अथेहे विदुर खवास, सुजाता लिम्वुयात फोनिज प्रदेश १ पाखें पहिचान पत्रकारीता पुरस्कार लःल्हागु खः । ज्याझ्वलय् मन्त्री मोदीं फोनिजया स्थापना दिवसया लसताय् पिथंगु सफू नं विमोचन याःगु खः । सफुलिइ पत्रकार महासंघया नायः सत्यनारायण बहादुर श्रेष्ठयात कयाः थीथी लेखत नं दुथ्याकातःगु दु ।

फोनिज नायः राइया सभापतित्वय् जूगु ज्याझ्वलय् मन्त्री मोदी लिसें थीथी व्यक्तित्वपिसं फोनिजया २४ क्वःगु स्थापना दिवसया भिंतुना बियादीगु खः ।

कपनय् खहरे खुसिइ अतिक्रमण यानाच्वंगु छेँ थुनेगु निति धका धासे येँ महानगरपालिकाया डोजर वनेवं तनाव जूगु दु।

येँ महानगरपालिका १० व बूढानीलकण्ठ नगरपालिका वडा नम्बर ७ या सिमानाय् दुने साततले चुकय् नापं खुसिइ सिथय् मिचय् याना छेँ दयकूगु, सेटब्याक मत्वतूसे खुसिइ मिचे यागुलि थुनागु धका महानगर प्रहरीया डिएसपी मिनबहादुर थापां धाःगु दु।

उमिसं सामाखुसीया खुसिइ थे चायकेगु यायेगु योजना दु धका धाःगु खः। तर बूढानीलकण्ठ नगरपालिका व अनया स्थानीयपिन्स डोजर चले याके बिइगु मदु। वाः वयाच्वंगु इलय् डोजर आतंक याःगु धासे अनच्वपिन्स महानगरविरुद्ध नाराबाजी याःगु खः।

अथे जुगुलि डोजर चले याके मबिउगु खः। आः येँ महानगरपालिका, बूढानीलकण्ठ नगरपालिका व स्थानीयपि दथुइ सहलह जुयाच्वंगु दु।

२९ क्वःगु अन्तर्राष्ट्रिय आदिवासी जनजाति दिवसया लसताय् थीथी ज्याझ्वः जूगु दु। ‘हिउपाःया संवाहक आदिवासी युवा’ धइगु नारा बियाः देयन्यंकं दिवस हंगु खः ।

थुगुसीया आदिवासी दिवसय् आदिवासी युवाया सक्रियता व सशक्तीकरणयात बः बियागु खँ नेपाल आदिवासी जनजाति महासंघं धाःगु दु । दिवसया लसताय् म्हिगः येँया बानेश्वरय् जनजाति आयोगं छगू ज्याझ्वः याःगु खःसा महासंघं नेपाल प्रज्ञाप्रतिष्ठानय् ज्याझ्वः याःगु खः ।

प्रज्ञा प्रतिष्ठानय् जूगु ज्याझ्वलय् मूपाहां कथं झाःम्ह प्रधानमन्त्री पुष्पकमल दाहाल अधिवक्ता भगवती पाण्डें तामाङ समुदाय लगायतया संस्कारयात कयाः बिउगु अभिव्यक्तिपाखे सरकारया ध्यानाकर्षण जूगु खँ कनादिल । लिसें वय्कलं पाण्डे दोषी खनेदत धाःसा कारबाही यायेगु खँ नं धयादीगु दु ।

उकथं हे वय्कलं वंगु साउन १७ गते पाण्डेयात ज्वनेमाःगु माग यासें जूगु प्रदर्शनय् बल प्रयोग याःपिं प्रहरीयात नं कारबाही यायेगु खँ धयादिल । सभा न्ह्यः महासंघं येँय् छगू ¥याली नं पिकाःगु खः । उकी नेवाः देय् दबू लगायत थीथी जातीय समुदायतय्सं ब्वति काःगु खः ।

सन् १९९४ डिसेम्बर २३ कुन्हु संयुक्त राष्ट्रसंघया साधारणसभां अगष्ट ९ तारिखयात अन्तर्राष्ट्रिय आदिवासी दिवस कथं हनेगु घोषणा याःगु खः ।

येँ महानगरपालिका १३ वडा टंकेश्वरय् च्वंगु नील बाराही माविं स्थानीयपिनिगु दिगुद्यः लिकयाः स्कुलया स्वाहाने दयेकूगु खँयात कयाः विरोध जूगु दु ।

स्थानीय जनता हे स्कुलय् वनाः दिगुद्यः थेंज्याःगु सम्पदा लिकायेगु ज्या यात धकाः विरोध याःगु खः ।स्कुलया न्ह्यःने लानाच्वंगु दिगुद्यः लिकयाः आः स्कुलया कम्पाउण्ड दुने तयातःगु दु ।

थुकियात कयाः वहे वडाया अभियन्ता सुमन साय्मि समेत वनाः विरोध याः वंगु खः ।

नेपाल आदिवासी जनजाति पत्रकार महासंघं फोनिज मातृभाषा पत्रकारिता सम्मान–२०८० नेपालभाषा टाइम्स न्हिपौयात बिइगु जुगु दु।

अथेहे फोनिज राष्ट्रिय पत्रकारिता सम्मान–२०८० य् दिलिप थापा मगर, सरोकार टेलिभिजनयात बिइत्यःगु दु। महासंघया साउन २३ गते च्वंगु संघीय सचिवालय बैठकं याःगु निर्णय सार्वजनिकयासे अथे जानकारी बिःगु खः।

फोनिजं ‘फोनिज राष्ट्रिय पत्रकारिता सम्मान–२०८०’, ‘फोनिज मातृभाषा पत्रकारिता सम्मान–२०८०’ व ‘फोनिज राष्ट्रिय पत्रकारिता पुरस्कार–२०८०’ बिइगु निर्णय याःगु खः।

अथेहे फोनिज राष्ट्रिय पत्रकारिता पुरस्कार–२०८० या सिरपा किसन राईयात (मरणोपरान्त), हङकङ, देव पचभैया मगर, जीवन लामा व उन्नति चौधरीयात बिइगु जुगु दु। सिरपा व हना ल्यःज्या समितिइ निवर्तमान अध्यक्ष डण्ड गुरुङया संयोजकत्वय् सल्लाहकारपि आङदावा शेर्पा व मनोज घर्तीमगर दुजःपि दुगु समितिपाखे ल्यःगु खः।

उगु ज्याझ्वः फोनिजया २४ क्वःगु स्थापना दिवसया लसताय् थ्व हे वइगु साउन २७ गतेय् प्रदेश १ या विराटनगरय् तःजिक ज्याझ्वः याना लःल्हाय् त्यःगु खः।