त्रिभुवन अन्तर्राष्ट्रिय विमानस्थल भन्सार कार्यालयपिने बरामद यागु लुँ नेपाल राष्ट्र बैंकया टक्सार महाशाखाय् लनिइगु ज्या जुगु दु।

महाशाखाया प्रमुख थानेश्वर आचार्यं केन्द्रीय अनुसन्धान ब्यूरो सीआईबी न लुँ लनिइगु निति इनाप याःगु पौ थःत वये धुकुगुलि लुँ लनिइगु ज्या जुगु दु ुधका जानकारी बिःगु दु।

वयकःया कथं टक्सारय् सामान चायेका लुँ छुटे यायेगु व वयालिपा गालेयाना प्रक्रिया सुरु जुइ। राजश्व अनुसन्धान विभागं साउन ३ गते सिनामंगलय् लुँ नापं १५५ किलो ‘ब्रेक शु’ बरामद याःगु खः ।

मोटरसाइकल व स्कुर ब्रेक शु दुने उगु लुँ सूचुका हःगु खः। लुँ छुटे याये लनिइगु निति छन्हु क्वचाइ, वया लिपा गुणस्तर जाँचया लागि थप स्वन्हु काइ धका वयकलं धाःगु दु।

सीआईबी, राजश्व, नेपाल राष्ट्र बैंक व टक्सार कार्यालयया प्रतिनिधिपिनिगु रोहबरय् लुँ गालेयाइगु व लनेगु ज्या जुइ।

पोखराय् च्वनाच्वंपिं नेवाः तयगु संस्था नेवाः खलः कास्कीया अध्यक्षय् अशोक पालिखेयात सर्वसम्मतं ल्यःगु दु । वंगु शनिवाः जूगु साधारणसभा व अधिवेशनं न्हूगु ज्यासना पुचः ल्यःगु खः ।

न्हूगु ज्यासना पुचलय्ं दक्वं पदाधिकारी, सल्लाहकारलिसें आमन्त्रित दुजःपिं नं मनोनित याःगु खः । अथेहे खलःया न्हूगु ज्यासना पुचःया वरिष्ठ न्वक तीर्थ श्रेष्ठयात ल्यःगु दुसा प्रकाशलाल श्रेष्ठयात न्वकु, श्रीकृष्ण कतिला मूछ्याञ्जे, भैरवलाल श्रेष्ठ लिउ मूछयाञ्जे व चन्द्रबहादुर भण्डारीयात दांभरिं ल्यःगु खः ।

अधिवेशनया बन्द सत्रं ज्यासना पुचलय् दुजः व आमन्त्रित दुजःपिं ल्ययेगु जिम्मेवारी नायःयात बिउकथं क्लस्टर मिले यानाः सकलें दुजःपिं नं ल्यःगु खः । ज्यासना पुचःया दुजलय् संगीता वज्राचार्य, विनित जोजिजु, कृष्णबहादुर श्रेष्ठ, सुशील गोशली व गोपाल बाटाजुयात ल्यःगु दुसा संस्थागतपाख सन्तोष श्रेष्ठ, हर्कमान शाही व श्रवणलाल जोशीयात ल्यःगु खः। परिषद् दुजलय् शान्तकुमार श्रेष्ठ व सुरेन्द्र श्रेष्ठयात ल्यःगु दुसा रजनी श्रेष्ठ, विक्रम उदास, रिशव तिमिला व लिलाबहादुर श्रेष्ठयात मनोनित याःगु दु ।

अथे हे आमन्त्रित दुजःकथं विश्व बिजुक्छे, हरिप्रसाद श्रेष्ठ, रामप्रसाद श्रेष्ठ, नन्दलाल श्रेष्ठ, सुविन्द्र श्रेष्ठ, विमल श्रेष्ठ, रोहित बाटाजु, ईश्वर कर्माचार्य, नारायण श्रेष्ठ, थमनारायण श्रेष्ठ, शुद्धव श्रेष्ठ, जयराम श्रेष्ठ, उदयबहादुर अमात्य, अर्जुन ताम्राकार, नरबहादुर श्रेष्ठ, अञ्जु बाटाजु, रत्नदेवी श्रेष्ठयात ल्यःगु दु ।

खलःया नवनिर्वाचित नायः पालिखें पञ्चांग निर्णायक समितिइ सकलें ब्रम्हूत जूगु जक जूगुलिं नेवाः समुदायया नखःचखः उखेथुखे लानाच्वंगु धासें उकियात भिंकेगु निंतिं पहल यायेगु प्रतिवद्धता प्वंकादिल । अधिवेशनय् खलःया मूछ्याञ्जे सुरेन्द्र श्रेष्ठं वार्षिक प्रगति विवरण व दांभरिं चन्द्रबहादुर राजभण्डारीं आर्थिक विवरण न्ह्यब्वयादीगु खः ।

रत्नकीर्ति महाविहार अध्ययन मण्डल, मखंया ग्वसालय् लच्छिया छकः हरेक लाया लिपागु शनिवाः न्ह्याना वयाच्वगु अनुसन्धान नाप सूचनामूलक कार्यशाला ज्याझ्वलय् चचा गुरु मणिरत्न बज्राचार्यं चर्या(चचा) व तुतः विषययात कया कार्यपत्र न्ह्ब्बःगु दु।

उगु कार्यपत्रय् चचागुरु मणि रत्न बज्राचार्यं चचा व तुतःया महत्वया लिसें उकिया थीथी पक्षयात कःघाना थःगु खँ न्ह्यब्वयादीगु खः। रत्नकीर्ति महाविहारया नायः विद्यामान बज्राचार्य न ब्बति दुगु उगु ज्याझ्वलय् ग्वसाः खलःया नायः जीतेन्द्र विलास बज्राचार्यं नं थःगु खँ तयादीगु खः । उगु ज्याझ्वलय् कार्यपत्रयात कयाः प्रा. मदन सेन बज्राचार्यं टिप्पणी यानादीगु खः।

ज्याझ्वलय् सुजन बिलास बज्राचार्यं लसकुस न्वचु बियादीगु खःसा महाविहारया छ्यान्जे सागर मान बज्राचार्यं चचा व तुतःया विषययात कःघाना थःगु खँ तयादीगु खः।उगु ज्याझ्वलय् लोटस रिसर्च सेन्टरपाखें बुद्ध जयन्तीया लसताय् ग्वसाःग्वगु निबन्ध कासाय् न्हापलाम्ह रबिन्द्र बज्राचार्ययात भिन्तुना व हनिगु ज्या जुगु खः ।

न्हाप सिरपा कथं वगु झीद्धः नगद सिरपा फुक्क अध्ययन मण्डलया कोषाध्यक्ष निरजबिलासयात लः ल्हाना बिज्यागु जगु खः ।

किलागः त्वाःया गुरु इन्द्र महर्जनया लुमंतिइ पिदंगु स्मृति ग्रन्थया विमोचन लिसें उकिया बारे अन्तरसंवाद ज्याझ्वः जुगु दु।

वंगु शनिवाः राष्ट्रिय नाचघरय् छगू ज्याझ्वःया दथुइ सपूmया विमोचन जूगु खः । अथेहे इन्द्र महर्जन सम्बन्धी वृत्तचित्र नं न्ह्यब्वयेगु ज्या जूगु खः ।

स्मृतिग्रन्थ प्रकाशन समूहया जुजुभाइ डंगोलया सभापतित्वय् जूगु उगु ज्याझ्वलय् स्मृतिग्रन्थ लिसें मदुम्ह गुरु इन्द्र महर्जनया बारे थीथी वक्तापिंसं न्ववानादीगु खः । ज्याझ्वः मदुम्ह गुरु महर्जनया तःधीम्ह काय नरेन्द्र महर्जनं लसकुस यासें न्ह्याःगु खः ।

ज्याझ्वलय् प्रतिनिधिसभाया सांसद विराजभक्त श्रेष्ठ, बागमती प्रदेशया सांसदपिं हरिप्रभा खड्गी श्रेष्ठ, शैलेन्द्र वज्राचार्य, पुलांम्ह मन्त्री जीवनराम श्रेष्ठ, येँ मनपाया पुलांम्ह मेयर विद्यासुन्दर शाक्य लिसें विज्ञपिं प्रा.डा. त्रिरत्न मानन्धर, डा. चुन्दा वज्राचार्य, डा. चन्द्रमान वज्राचार्य, डा. पञ्च महर्जन, भोलाकुमार श्रेष्ठ, प्रकाश दर्नाल, राजभाइ जकःमि आदिपिंसं थःपिनि बिचाः तसें मदुम्ह इन्द्र महर्जन थःहे छम्ह सम्पदा जुइधुंकूगु व वय्कःया लुमंतिइ आः हुलाक टिकट पिकायेगु लागिं नं पहल यायेमाःगु खँ कनादीगु खः ।

सफूयात कयाः पत्रकारपिं पुष्कर माथेमा व सुरेश किरणपिंसं समीक्षा यानादीगु खः । ज्याझ्वःया सभापति जुजुभाइ डंगोलं आः याकनं हे ‘गुरु इन्द्र महर्जन प्रतिष्ठान’ नीस्वनेगु ग्वसाः दुगु जानकारी नं बियादिगु खः। 

नेपाल आदिवासी जनजाति पत्रकार महासंघ (फोनिज) संघीय समितिं म्हिगः आइतवाः विराटनगरय् पहिचान आन्दोलनः आःया लँपू संवाद ज्याझ्वलय् पहिचानपक्षधर बुद्धिजीविपि नाप छगु ज्याझ्वः जूगु दु।

उगु सम्वाद ज्याझ्वलय् पहिचानपक्षधर बुद्धिजीविपि प्राध्यापक डाक्टर महेन्द्र लावती, लेखक नाप विश्लेषकपि खगेन्द्र संग्रौला, भवानी बराल व डम्बर खतिवडापिन्स थःथःगु धारणा तःगु खः। पहिचानया आन्दोलन याःगु माग व मुद्दायात सम्बोधन मयासे राष्ट्रिय पार्टीपिन्स खुसिइ नामय् प्रदेशया नामकरण जूगु धका धयादीसे बुद्धिजीविपिन्स वइगु दिं आः क्षेत्रीय पार्टी दयकेमाःगुलि बः बिःगु दु। कोशी प्रदेशसभाय् आदिवासी जनजातिपि (विशेष याना राई, लिम्बू)या उपस्थिति दुसां राष्ट्रिय पार्टीया शीर्ष नेतापिनिगु कारण उमिसं पहिचानया विरुद्धय् मतदान याःगु खः धका दाबीयासे धाःगु दु ’वः हे कारण क्षेत्रीय पार्टी माःगु खः।’

प्राध्यापक डाक्टर महेन्द्र लावतीं मधेशी आन्दोलन व थारुहटया ताःलागु स्वया मोर्चा दयकलं, गठबन्धन दयकल, पहिचानवादी पार्टीया दुथ्याका वा पहिचानवादी राजनीतिक शक्ति निर्माण याना जक पहिचानया आन्दोलनं हःगु अधिकारयात स्थापित यायेफइ धका धयादीगु खः। ‘जिगु विचाः यदि १ नम्बर क्षेत्रय् क्षेत्रीय राजनीतिक शक्ति जुल धाःसा उकिइ पहिचानया विषय दुथ्याइ। डा. लावतीं धाःगु दु, ‘छाय् धाःसा राजनीतिक शक्तिया उद्देश्य धइगु हे यक्को मत हयेगु खः। उकियाना राजनीतिक शक्ति निर्माण यायेगु इलये थ्व पहिचानय् समस्या कभरेज याइ थे च्वंं।’

अथेहे च्वमि नाप विश्लेषक डम्बर खतिवडां न राजनीतिक पार्टीपिन्स जक पहिचानया माग व मुद्दायात सम्बोधन याइगु जुगुलि उगु लँ लयेमाः धका बः बियादीगु खः। पहिचानया आन्दोलनयात दुग्यकं आत्मसाथ याइगु राजनीतिक शक्तिकेन्द्रया अभाव खनेलुगु धका धयादीसे खतिवडां राष्ट्रिय तहपाखे न मुद्दायात दुथ्याकेगु कथं राजनीतिक शक्ति निर्माणया कुतः यायेमाःगु व क्षेत्रीय शक्ति न दयकेगु कुतः जुल धाःसा जक पहिचानया मुद्दा सम्बोधन याये फइ धका धयादीगु खः। वयकलं एमाले अध्यक्ष ओलीया अज्ञानता व अहंकार, माओवादी अध्यक्ष प्रचण्डया अवसरवाद व काँग्रेस सभापति शेरबहादुर देउवाया बेवास्ता हे कारण पहिचानया माग व मुद्दा सम्बोधन मजुगु धका दाबी यानादीगु खः।

अथेहे मेम्ह च्वमि नाप विश्लेषक खगेन्द्र संग्रौलां २ नम्बर प्रदेशय् क्षेत्रीय पार्टी व क्षेत्रीय भावना बलागुलि हे कारण पहिचानया नां मधेश जूगु धका दाबी यानादीगु खः। ल्याय्म्हपिनिगु धैर्य त्वःतिइ थे थम्हेसिया खने धुकुगु व लडाकु दस्ता दयके धुकुगु धका धयादीसे उपि ल्याय्म्हपिन्त विश्वासघात जुगु कारण हतियार ल्ह्वने मालिइगु भावना अप्पो जुया वंगु लिच्वःया कारण घातक जुइगु संकेत क्यगु दु। वयकलं धाःगु दु, ’शासकपिन्स थुगु परिस्थिति मथुल धाःसा गुलि घातक जुइ उकिया आँकलन शासकपिन्स हे यायेमाः।‘

पहिचानवादीपिन्स कोशी नां खारेजया जक खँ ल्हाना आज्जु मदुगु लडाइ जुइ धका धयादीसे मंकाः सहमतिइ वनेमाःगुलि बः बियादीगु खः। ‘कोशी खारेज जुलकि खालि जुगु थाय् पहिचानवादीपिन्स तयेगु चाहे जूगु नां छु खः उगु विषयय सहलह याये मालं। किरात न्हापा कि लिम्बुवान धइगु ल्वापू छाय् ? थुगु हे कारण न पहिचान विरोधीयात अपूकेगु ज्या जुयाच्वंगु दु,’ संग्रौलां धाःगु दु, ‘राईपिन्स किराँत नां दाबी याना च्वंगु दु। मेगु ताः ईनिसे संघर्षया पृष्ठभूमि दुगु व योगदान याना वयाच्वंगु समुदाय लिम्बूपि खः। उगु कारण जिगु प्रस्ताव किरात लिम्बुवान दयकेमाः धइगु दु।’

मेम्ह विश्लेषक भवानी बरालं कोशी नां खारेज मजूसा प्रदेशय् ‘कोशीइ मिँ च्याइगु’ चेतावनी बिःगु दु। मुख्य राजनीतिक दलपिन्स न्हापागु मान्यतायात स्थापित यायेगु लागि कोशीइ मिँ च्याके बिइ मज्यु धका धयादीगु खः। आःया लँपू धइगु कोशी खारेजी हे खः धका बः बियादीगु खः। वयकलं धयादीगु दु, ‘आः २०८४ या चुनाव पिया छु जुइ मखु। आन्दोलनया हे पाखें, जनमत दयेका न्ह्या वनेमाः धका धयादीगु खः।