नेपाल आयल निगमं पेट्रोल व डिजलया भाः थकाःगु दु।

थौ चान्ह्य च्वंगु निगम सञ्चालक समिति बैठकं डिजेल व मचिकय् लिटरं १४ व पेट्रोल लिटरय् न्यातका थकाना भाः समायोजन याःगु दु धका निगम स्रोतं धाःगु दु।

आः पेट्रोलया भाः लिटरं १७५ रुपैयाँ व डिजल नाप मचिकं लिटरं १६४.५ रुपैयाँ थ्यःगु दु।

त्रिभुवन अन्तर्राष्ट्रिय विमानस्थल भन्सार कार्यालय पिने बरामद याःगु लुँ नायेकूगु इलय् ६० किलो ७१६ ग्राम जक खने दुगु दु।

नेपाल राष्ट्र बैंकया टक्सार महाशाखाया प्रमुख थानेश्वर आचार्यया कथं ब्रेक शु छुटे याना लुँ नायेकूगुलि ६० किलो ७१६ ग्राम जक दुगु खः। लुँ नायेके न्ह्यः ६० किलो ७८९ ग्राम दुगु खः।

लुँ ७३ ग्राम कम खनेदुगु दु। राजस्व अनुसन्धान विभागं साउन ३ गते सिनामंगलय् लुँ नाप १५५ किलो ‘ब्रेक शु’ बरामद याःगु खः। मोटरसाइकल व स्कुटरया ब्रेक शु दुने लुँ सूचुका हगू खः।

सेयर बजाः थौं मगलवाः निगुगु अंकं कुहावःगु दु। थौ मंगलवाः ३१.८० अंकं कुहावया बजाः २०४५.४४ विन्दुइ थ्यःगु दु।

थ्व धइगु १.५३ अंकं कुहावःगु खः। म्यूचअल फण्डबाहेक दक्को उपसूचक घटे जूगु दु। उकि मध्ये दकलय् अप्पो उत्पादन नाप प्रशोधन उपसूचकया लगानीकर्तापिनिगु ४.२६ प्रतिशतं कुहावःगु खः।

मंगलवाः २७८ धितोपत्रया ६१ हजार ३४१ कारोबारपाखे ५६ लाख ३ हजार १७९ कित्ता सेयर न्यायेगु मिइगु जुगु दु। उकिपाखे २ अर्ब १५ करोड ७३ लाख १२ हजार ३६९ रुपैयाँ बराबरया कारोबार जूगु खः।

थौं इमर्जिङ नेपाल लिमिटेडया सेयर भाः दकलय् अप्पो ५.१८ प्रतिशतं थहावःगु दु। नेपाल बैंक डिभेन्चर, सिक्लेस हाइड्रोपावर, नविल ग्रोथ फण्डया धितोपत्र थौ दकलय् अप्पो थहावःगु खः।

हिमालयन डिष्टिलरीया लगानीकर्तापिन्स थौं दकलय् अप्पो घाटा जूगु दु। थुगु शेयर भाः ७.६९ प्रतिशतं घटे जूया २०१७ रुपैयाँय् कुहावःगु दु।

थ्रीस्टार हाइड्रो, मोलुङ हाइड्रो, इन्फिनिटी लघुवित्तया शेयर यक्को कुहावःगु दु। हिमालयन डिष्टिलरी, शिवम सिमेन्ट, सोल्टी होटेल, आईएमई लाइफ इन्स्योरेन्स, एभरेष्ट बैंकया शेयर यक्को कारोबार जूगु दु।

यलया च्यासल हितिइ खुया यकूगु गुक्वःगु शताब्दीया दनाच्वंम्ह विष्णुया आकृति अस्ट्रेलियाया मेलबर्नस्थित छगू लिलाम गृह ‘लियोनार्ड जोएल अक्सन’ य् तयातःगु लुगु दु।

सन् ८० दशकय् सुरुइ यलया च्यासल च्वंगु हिति खुया यकूगु उगु ल्ह्वंया आकृति याःगु अवस्थिति व म्हसिका प्रमाणित याना ‘लस्ट आर्ट्स अफ नेपाल’ अभियानं बिःगु सूचं, अस्ट्रेलिया हे मेगु निजी संग्रहकर्तां २०१६ अक्टोबर १६ य् लिलामी तःगु खः।

उगु इलय् उकिया भाः ४० हजार अस्ट्रेलियन डलर तयातःगु खः।

किपा सामाजिक संचालपाखे

नेपाल रेडक्रस सोसाइटी मध्यपुर थिमि उपशाखां २६ क्वःगु स्थापना दिवस हंगु दु।

मध्यपुर थिमि नगरपालिका वडा नं. ४ या वडाध्यक्ष बालकृष्ण पात्या श्रेष्ठया मूपाहाँसुइा उपशाखाया २६ क्वःगु स्थापना दिवस हःगु खः। स्थापना दिवस हनेगु झ्वलय् महामारी कथं फैलै जुगु डेंगु रोग सम्बन्धी ब्रसर व पर्चा वितरणयासे जनचेतनात्मक प्रचार अभियानया पदयात्रा याःगु खः।

उपशाखाया सभापति बाबुकाजी श्रेष्ठया सभाध्यक्षताय् जुगु उगु पचारात्मक पदयात्राय् उपशाखाया संस्थापक दुर्गामोहन श्रेष्ठ, पूर्व सभापतिपि रमेश उखा श्रेष्ठ, ज्ञानदेव श्रेष्ठ, भुवनचरण श्रेष्ठपिनिगु न सहभागिता दुगु खः।

उपसमितिया संयोजकपि कन्या मन्दिर प्रजापति, लक्ष्मीकेशरी श्रेष्ठ, पुष्परत्न रन्जित, नजरमान श्रेष्ठ, अर्जेन श्रेष्ठपिनिगु उपस्थिति दुगु खः।