भारतया सिक्किमय् च्वंगु राष्ट्रिय भाषा नाप संस्कृति बिद्यालय, गान्तोकया ब्वनामिपिन्त वंगु येँय् लसकुस याःगु दु।

बिद्यालयया प्रमुख बिकास प्रधानया नेतृत्वय् वःपिं नीम्हेसित येँया तजिलजि गुथि, नेपाःपाखें लसकुस याःगु खः । तजिलजि गुथि नेपाःया नायः राजु नापित, न्वकू शान्तकुमार महर्जन, छ्याञ्जे सन्धिर महर्जन, दांभरि तुलसा श्रेष्ठ, दुजःपिं सुनिता महर्जन व प्रनिमा नापितं खादां न्ययेका ख्येँ सगं बिया नेवाः परम्परा कथं लसकुस याःगु खः।

उगु हे ज्याझ्वलय् जीवित कुमारी संस्कृति संरक्षण, संवद्धन नापं प्रचारप्रसार यानाच्वंगु ह्यूमत मिसा पुचःनाप म्हसिका कालबिल याःगु खः। पुचःया नायः मचानानी महर्जनं पदाधिकारीया म्हसिका बियां कुमारी संस्कृति संरक्षणय् यानावयाच्वंगु ज्याझ्वःया बारे जानकारी बियादीगु खः।

नेपाःया धार्मिक, सांस्कृतिक व ऐतिहासिक सम्पदा नापं नेवाः तजिलजि अध्ययनया नितिं शैक्षिक भ्रमणय् वःपिन्त लसकुस लिपा गुथिया नायः नापितं नेवाः भ्वय्या बारे जानकारी बिसें सकलसित भ्वय् नं नकूगु खः।

उपप्रधानमन्त्री लिसे गृहमन्त्री नारायणकाजी श्रेष्ठ न्यान्हु भ्रमण यायेगु झ्वलय् चीन प्रस्थान याःगु दु।

उपप्रधानमन्त्री श्रेष्ठ नाप न्ह्यम्ह सदस्यीय प्रतिनिधिमण्डलपि थौं चान्ह्यः चीनया सिचुवान प्रान्त भ्रमणया लागि प्रस्थान याःगु दु। श्रेष्ठ छेन्दु अन्तर्राष्ट्रिय विमानस्थय् अवतरण जूया थौं हे ‘पश्चिमी चीन अन्तर्राष्ट्रिय मेला’ या लसकुस भ्वँजय् ब्बति काइगु जुगु दु।

उपप्रधानमन्त्री श्रेष्ठ बिहीवाः ‘पश्चिमी चीन अन्तर्राष्ट्रिय मेला’ य् उलेज्या झ्वलय् ब्बति कायेगु निति विशेष अतिथिया कथं सम्बोधन याइगु ज्याझ्वः दु। अथेहे न्हिनय् छेन्दुइ योजना प्रदर्शनी हल व अन्तर्राष्ट्रिय मित्र शहर सिचुवानया भ्रमण लिसे प्रदर्शनी अवलोकन याइगु ज्याझ्वः दु ।

अथेहे उगु हे दिं बहनि चिनियाँ कम्युनिष्ट पार्टी, सिचुवान प्रान्तया नेतापि नाप बेलिया ज्याझ्वः न दु ।

परराष्ट्र मन्त्रालयया सहसचिव लोकबहादुर थापा, गृहमन्त्रालयया सहसचिव रुद्रदेवी शर्मा, उद्योग मन्त्रालयया सहसचिव महेश बराल, उपप्रधानमन्त्री श्रेष्ठया स्वकीय सचिव सुरेशकाजी श्रेष्ठ, राष्ट्रिय समाचार समितिया संवाददाता अशोक घिमिरे व अङ्गरक्षक बाबुराम खरेलपि प्रतिनिधिमण्डलय् दुथ्याःगु खः।

अदालतया अवहेलनासम्बन्धी मुद्दाय् सर्वोच्च अदालतं येँ महानगरपालिकाया मेयर बालेन शाहयात लिखित लिसः फ्वंगू दु।

अधिवक्ता वर्षाकुमारी झा न बिःगु निवेदनय् न्यायाधीश तिलप्रसाद श्रेष्ठया एकल इजलासं मंगलवाः लिखित लिसः फ्वंगू दु।

उच्च अदालत, यलं भारतीय चलचित्र प्रदर्शन रोके मयायेत बिःगु आदेश लिपा येँ महानगरपालिकाया मेयर बालेनं सार्वभौमिकता व स्वाधिताया सवालय् छु न कानुन व अदालतयात मानेमयागु धका धाःगु खः।

दँय् दँसं बियावया च्वंगु मदन भण्डारी राष्ट्रिय सिरपाः थुगुसि न बिइगु जुगु दु। मदन भण्डारी फाउण्डेशनं २०६८ सालनिसे मदन भण्डारी राष्ट्रिय सिरपाः व वंगु २०७८ सालनिसे अध्ययन, अनुसन्धान याना च्वंगु मनू वा संस्थायात सिरपाः लःल्हाना वयाच्वंगु खः।

थुगु दँया मदन भण्डारी राष्ट्रिय सिरपा सोलु दूधकुण्ड नगरपालिका–४, फाप्लु, सोलुखुम्बु च्वम्ह डा.मिङमार गेल्जेन शेर्पा व हेटौँडा उपमहानगरपालिका–४ प्रतिभानगर, मकवानपुरय् च्वम्ह निरु कुमारी मगरयात लःल्हाइगु जुगु दु।

उगु सिरपाः छगु ज्याझ्वः दथुइ थ्व हे वइगु असार १४ गते जननेता मदन भण्डारीया ७२ क्वःगु बुदिंया लसताय् लःल्हाइगु जुगु दु। हना पौं नाप १ लाख नगद न लःहाइगु ज्याझ्वः दु।

नेपालभाषाया संकिपाख्यःया कलाकार नाप निर्देशक स्वतन्त्र संसार महर्जन म्हंमफया थौं चान्ह्यः शहिद गंगालाल हस्पिटलय् भर्ना जुयादीगु दु।

वयकः छातिइ समस्या जुइवं थौं चान्ह्यः शहिद गंगालाल हस्पिटलय् भर्ना जुयादीगु दु। थौं सुथय् वयकःयात एनजीओ प्लास याःगु धका वयकःया जहान प्रेमा महर्जन जानकारी बियादीगु खः।

आः वयकःया स्वास्थ्य सुधार जुगु दु धका वयकःया जहानं धयादीगु दु।