गण्डकी प्रदेशसभा सदस्य दीपक मनाङे न मन्त्री पदया शपथ काःगु दु। थौ सोमवाः मनाङे प्रदेश प्रमुख डिल्लीराज भट्टपाखे पद लिसे गोपनीयताया शपथ काःगु खः।

मनाङें गण्डकीइ भौतिक पूर्वाधार लिसे यातायात मन्त्री जूगु खः। केन्द्रय् एमाले व माओवादी केन्द्रया गठबन्धन जुइवं गण्डकीइ नेपाली कांग्रेसं प्रदेशसभाय् थःपिनिगु बहुमत थ्यकिइगु तयारी जुयाच्वंगु दु।

व हे कथं मनाङे पाखे स्वतन्त्रय् त्याका दीपक मनाङेयात मन्त्री याःगु खः।

चुनाव त्याके धुका एकीकृत समाजवादीइ दुहावम्ह मनाङे थौ हे पार्टी त्वताःगु घोषणा याःगु खः।

लुँ तस्करी प्रकरणय् स्वागुलि पूर्वसभामुख नाप माओवादी केन्द्रया उपाध्यक्ष कृष्णबहादुर महरायात केन्द्रीय अनुसन्धान ब्युरो (सीआईबी) न लाजिम्पाटस्थित कार्यालयय् यकूगु दु।

महरायात थौ सुथय् भैरहवा विमानस्थलं येँ हया सीआईबीया कार्यालय यकूगु खः। लुँ  तस्करी सम्बन्धी छानबिन यायेत गठन यागु उच्चस्तरीय जाँचबुझ आयोगं महरायात  मुद्दा न्ह्याकेगु सिफारिस याःगु खः। व हे कथं कारबाही यायेत गृह मन्त्रालयं प्रहरीयात निर्देशन बिःगु खः।

महरायात थौ सोमवाः सुथय् कपिलवस्तुपाखे प्रहरीं ज्वंगु दु प्रहरी महानिरीक्षक (आईजी) बसन्त कुँवरं जानकारी बिगु दु। महरायात रुपन्देहीया भैरहवास्थित गौतम बुद्ध विमानस्थलं येँ हया सीआईबीया कार्यालय यकूगु खः।

हलिं नेवाः गुथिया झिंन्याक्वःगु दँमुँज्या शनिवाः चैत्र ३ गते नेवाःतय्गु पुलांगु वस्ती पालुङगय् तःजिक जूगु दु।

मकवानपुर जिल्लाया थाहा नगरपालिकाय् नेवाः वस्तीत मध्ये ऐतिहसिक नापं सांस्कृतिक थाय् पालुङगय् जूगु खः। बागमती प्रदेशया सामाजिक विकास मन्त्री कुमारी मोक्तानया मूपाहाँ कथ झागु उगु ज्याभ्वलय् हलिं नेवाः गुथिया केन्द्रीय नायः विनोद महर्जनया सभाध्यक्षताय् जूगु खः।

ज्याझ्वलय् थाहा नगरपालिकाया मेयर विष्णुबहादुर विष्ट, नेवाः देय् दबूया केन्द्रीय नायः पवित्र बज्राचार्य विशेष पाहाँ कथं झायादीगु खः। ज्याझ््वलय् हलिं नेवाः गुथिया केन्द्रीय नेतृत्वय् च्वना ज्या याना वने धुंकूपिं जुजुमान श्रेष्ठ, रिजु श्रेष्ठ, शान्ति श्रेष्ठ व समाजसेवी लक्ष्मण गमालयात हनापौ लःल्हाःगु खः।

अथे हे थाहा नगर दुनेया नेवाः वस्तीतय्त दुथ्याका संस्कृतिक संरक्षित क्षेत्र घोषणा यायेगु नितिं नगरपालिकां दयेकूगु कार्यदलय् च्वना ज्या यानाच्वंपिन्त सगं पौ लःल्हाःगु खः। उगु ज्या पूवंके फयेमा धकाः कार्यदलया कजि विनोद महर्जन, सल्लाहकार श्रीकृष्ण महर्जन अले दुजःपिं भवानी प्रधान, विजय मल्ल, राजन बलामी, मंगललाल गोपाली, निरन्जन श्रेष्ठ, विष्णु गोपाली, विमल गोपाली, हरिगोपाल श्रेष्ठ, अन्जना प्रधान, विश्वमान श्रेष्ठ, नरहरी गोपालीयात सगं पौ लःल्हाःगु खः।

ज्याझ्वलय् मूपाहां प्रदेश मन्त्री मोक्तान, विशेष पाहां देय् दबूया नायः बज्राचार्य, थाहा नगरपालिका वडा नं. २ या सदस्य युवराज विष्टपिन्सं नेवाः कला, संस्कृतिनिसें पालुङ वस्तीया बारे न्वंवानादीगु खः।

काठमाडौं सुनचाँदी व्यवसायी संघया अध्यक्षय् रोहिना देवि शाक्य निर्विरोध निर्वाचित जूगु दु। म्हिगः शनिवाः जुगु २१ क्वःगु साधारण सभा व न्ह्यय्क्वःगु अबिधेशनं शाक्ययात शाक्य निर्विरोध निर्वाचित याःगु खः।

सुनचाँदी व्यवसायी संघया इतिहासय रोहिना देवि शाक्य दकलय् न्हापाम्ह मिसा अध्यक्ष जुगु दु । अध्यक्षय् शाक्यया नेतृत्वय् २२ म्हेसिगु न्हुगु कार्यसमिति ल्यःज्या जुगु दु। उगु ज्यासना पुचलय् स्वम्ह उपाध्यक्षय् उपेन्द्रकाजी शाक्य, मुक्तिरत्न बज्राचार्य व दशरत्न बज्राचार्य निर्वाचित जुगु दु।

अथेहे, सचिवय् लेखरत्न शाक्य, कोषाध्यक्षय् रमेशमान शाक्य, सह–सचिवय् अभिषेक शाक्य, सह–कोषाध्यक्षय् पद्मेश शाक्य निर्वाचित जुगु दु। दुजलय् सूूर्यरत्न बज्राचार्य, सुरेन्द्रकाजी शाक्य, सुजेन शाक्य, निकेशरत्न शाक्य, मनिष शाक्य, उजिना शाक्य, मोहिनी शाक्य, सञ्जयरत्न शाक्य निर्वाचित जुगु दु।

अथेतु, माणिकरत्न बज्राचार्य, रविन्द्र शाक्य, कबिर चन्द्र शाक्य, सन्दीप शाक्य व मिसा दुजलय् अरुणा श्रेष्ठ निर्वाचित जुगु दु। निर्वाचित जूपिन्त नेपाल सुनचाँदी व्यवसायी महासंघया अध्यक्ष माणिकरत्न शाक्यं स्वामां क्वखाय्कां भिंतुना बिःगु खः।

ज्याझ्वःया उलेज्या मूपाहाँ युवा लिसे खेलकुद मन्त्री विराजभक्त श्रेष्ठं यानादीगु खः।

नित्या रञ्जना युनिकोड फन्ट सार्वजनिक जुगु दु। म्हिगः शनिवाः नेपाल कला परिषदय् छगु ज्याझ्वः दथुइ येँ महानगरपालिकाया उपमेयर सुनिता डंगोलं नित्या रञ्जना युनिकोड फण्ट पितब्बज्या यानादीगु खः।

थौया इलय् डिजिटल युगय् लिपीया संरक्षण व प्रवर्द्धन यायेगु कथं डिजिटल मार्केटय् दुहावने माःगुलि क्यालिजात्रा फाउण्डेशन व भारतया प्रतिष्ठित फन्ट डिजाइन कम्पनी छगु टाइपया सहकार्यय् रञ्जना युनिकोड फन्ट विकास यानागु खः धका क्यालिजात्रा फाउन्डेसनया अध्यक्ष आनन्द कुमार महर्जनं धयादीगु खः।

महर्जनया कथं थुगु रञ्जना युनिकोड फन्ट हलियकं निःशुल्क कथं छ्यलेफइगु व देवनागरी युनिकोडया नापं नेवाः युनिकोडय् न उपलब्ध यायेफइ धका धयादीगु दु।

उगु ज्याझ्वलय् रञ्जना लिपीबारे स्वर वर्ण, व्यञ्जन वर्ण व ल्याः गुकथं च्वयेगु धका रञ्जना लिपीइ टाइप याना न क्यःगु खः। नापं आर्ट काउन्सिलय् रञ्जना फन्टं च्वयातःगु आखःया ब्बज्या न जूगु खः।