श्री एअरलाइन्सं थौं जुइगु दक्को उडान स्थगित याःगु दु।

थीथी जहाजय् पटक पटक प्राविधिक समस्या वयेवं श्री एअरलाइन्सं थौं दक्को उडान बन्द जूगु दु धका प्रवक्ता अनिल मानन्धरं उज्यालोयात जानकारी बिःगु दु।

म्हिगः येँ न धनगढीपाखे ब्बःगु जहाज अवतरण मयासे हाकन येँ लिहावःगु खः।

थौं दक्को जहाजयात ग्राउन्डेड याना बालाक्क जाँच याना कन्ह्यनिसे नियमित उडान शुरु यायेत्यःगु खः।

श्री एअरलाइन्सनाप च्यागः जहाज दु।

चीनया न्यान्हुयकं भ्रमणय् वनाच्वम्ह उपप्रधान लिसे गृहमन्त्री नारायणकाजी श्रेष्ठ थौं स्वदेश लिहावइगु जुगु दु। न्ह्यम्हेसिगु प्रतिनिधिमण्डलया नेतृत्वयाना श्रेष्ठ बुधवाः चीनया सिचुवान प्रान्त भ्रमणय् वःगु खः।

भ्रमणया झ्वलय् वयकलं चीनया उपप्रधानमन्त्री ह लि फङ दथुइ निगुपक्षीय भेटवार्ता जूगु खः। उगु भेटवार्ताय् निगु देय् दथुइ व्यापार, लगानी, पर्यटन, ‘कनेक्टिभिटी’ लगायतया विषय सहलह जुगु खः।

उपप्रधानमन्त्री श्रेष्ठं छेन्दुइ जूगु १९ क्वःगु पश्चिम चीन अन्तर्राष्ट्रिय मेलाय् मू वक्ताया कथं सम्बोधन यानादीगु खः। अथेहे वयकलं सिचुवान विश्वविद्यालयय् जूगु ज्याझ्वलय् नेपाल–चीन सम्बन्धया बारेय् सम्बोधन मन्तव्य बियादीगु खः।

संसदीय मामिला पत्रकार समाजया अध्यक्षय् मनोज सत्याल विजयी जूगु दु। म्हिगः शनिवाः जूगु समाजया च्याक्वःगु अधिवेशनय् जूगु निर्वाचनय् सत्यालयात अध्यक्षय् ल्यःगु खः।

वयकः ६३ मत हया विजयी जूगु खः। अथेहे, वयकःया प्रतिस्पर्धी विष्णु क्षेत्रीं ४४ व तुलसी सापकोटां २७ मत हःगु खः। न्हुगु कार्यसमितिइ उपाध्यक्षय् सृजना घिमिरे, किरण दाहाल, महासचिवय् जयसिंह महरा, सचिवय् गुन्जन राज गिरी व सबिता शर्मा, कोषाध्यक्षय् अमुल थापा निर्वाचित जूगु खः।

अथेतु, सदस्यय् कमलराज भट्ट, रोमन आचार्य, शीला तिमल्सिना, मीरा बस्नेत, अन्जन लामिछाने, राजु थापा, विनोद कटुवाल व रघुनाथ बजगाईं निर्वाचित जूगु खः।

नामि वाःपौया सम्पादक सचाःकःमि श्याम स्मृतया अबु बैकुण्ठ श्रेष्ठ म्हिगः आकाझाकां मन्त।

वयकः ७६ दँय् मदुगु खः। दम व स्वँय् समस्या जुयाच्वम्ह वयकः म्हिगः बहनि ८ः४५ इलय् छेँय् मदुगु खः।

वयकःया स्वम्ह काय्, छम्ह म्ह्याय् व जहान दीइ।

नेपालभाषा मंकाः खलःया छेँ येँ महानगरपालिकाया मेयर बालेन साह न दयेका बिउगु धकाः प्रचार शुरु याना हःगु दु ।

येँनं पिहां वइगु छगू अनलाइनं प्रशारण उगु गलत समाचार प्रेषित याःगु खः । मंकाः खलःया उगु छेँ पूर्व मेयर विद्यासुन्दर शाक्यपाखें बजेट निकासा यानाः दयेकूगु खः ।

उगु छेँया शिलान्यास तकं पूर्व मेयर शाक्यं यानादीगु खः । छु दिं न्ह्यः जक ये महानगरपालिकाया मेयर शाह न दयकूगु धका प्रचार याना हःगु खः। ‘हरपल’ नांगु छगू अनलाइनं उगु समाचार प्रशारण याःगु खः ।

समाचारया लागिं उगु अनलाइनं मंकाः खलःया छेँय् वनाः भिडियो नं शुटिङ यानातःगु दु । येँ महानगरया मेयर साहं थ्व स्वयां न्ह्यः नं पूर्व मेयर शाक्यया पालय् जूगु ज्या थम्हं यानागु धकाः गलत प्रचार याना जूगु खः ।

न्हापा हे सम्झौता जुयाः तयार जुयाच्वंगु हाइ मास मत तयेगु ज्या, १०२ एम्बुलेन्सपाखें निःशुल्क सेवा बीगु ज्या, नेपाल प्रहरीलिसे जानाः थाय्थासय् सिसी क्यामेरा तयेगु ज्या नं वर्तमान मेयर साहं थम्हं यानागु धकाः प्रचार याना जूगु खः ।