बाँसबारी छालाजुत्ता जग्गा प्रकरणय् उद्योगी विनोद चौधरीं इन्कारी बयान बिःगु दु।चौधरी बाँसबारी छालाजुत्ताया सरकारी जग्गा कानुन बमोजिम हे आःयागु सीजी चाँदबाग रेसिडेन्सीया नामय् वःगु दु धका बयान बिःगु दु धका जिल्ला सरकारी वकिल कार्यालयया स्रोतं धाःगु दु।

नेपाल प्रहरीया केन्द्रीय अनुसन्धान ब्यूरो न बाँसबारी छालाजुत्ताया जग्गा प्रकरणय् अनुसन्धानया लागि चौधरीयात बिहीवाः जिल्ला सरकारी वकिल कार्यालयय् सःतूगु खः। चौधरी थौ सुथय् ८ निसे ११ बजे तक रामशाहपथया जिल्ला सरकारी वकिल कार्यालयय् बयान बिउगु खः।

बयानया झ्वलय् चौधरीयात जग्गा लित कायेगु झ्वलय् मुद्दा न्ह्यानेगु मखु धका धाःगु खः। तर चौधरीं धाःसा थःगुपाखे छु न गल्ती मजुगु धका धासे कानुन बमोजिम माने यायेत तयार दु धका धाःगु स्रोतं न्ह्यथःगु दु।

मन्त्रीपरिषदया बैठकं अरनिको पाँडेनाप प्यम्हेसत राष्ट्रिय योजना आयोगया सदस्यय् मनोनीत यायेगु निर्णय याःगु दु।

सरकारया प्रवक्ता रेखा शर्माया कथं बिहीवाः च्वंगु मन्त्रिपरिषदया बैठकं आयोगया सदस्यय् येँया संगीता सिंह, जुम्लाया कुसेन्द्रबहादुर महत, पाल्पाया शिवराज अधिकारी व यलया अरनिकोकुमार पाँडेया नियुक्ति यायेगु निर्णय याःगु दु।

अधिकारी त्रिवि अर्थशास्त्र केन्द्रीय विभाग प्रमुख खःसा संगीता सहरी विकास विज्ञ खः।

लुँ तोला थौ नीखुसः थहावना न्हुगु रेकर्ड तःगु दु । थौ लुँ तोला नीखुसः थहावने वं आःतक बजारय् दकलय् अप्पो थ्यःगु रेकर्ड जूगु खः। लुँ तोलां थौ नीखुसः थहावना १ लाख २७ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहःया भाः न थौ स्वीन्यातक थहावःगु दु। वहः तोलां स्वीन्यातका थहावना थौ १ हजार ५ सय ५५ रुपैयाँ थ्यगु दु धका महासङ्घं धाःगु दु।

प्रहरीया केन्द्रीय अनुसन्धान ब्युरो (सीआईबी) न व्यवसायी लिसे नेपाली कांग्रेसया सांसद विनोद चौधरीयात अनुसन्धान यायेगु ज्या न्ह्याकू दु।

बाँसबारी छालाजुत्ता कारखानाया सरकारी जग्गा प्रकरणय् स्वाम्ह चौधरीयात सीआईबी न अनुसन्धान यायेगु ज्या न्ह्याकूगु दु।

चौधरीयात अनुसन्धान प्रक्रिया न्ह्याकूगु धका सीआईबी न सभामुख देवराज घिमिरेयात जानकारी बिइ धुकुगु संसद् सचिवालयया प्रवक्ता एकराम गिरीं जानकारी बिउगु दु।

छालाजुत्ता कारखानाया जग्गा मनूया नामय् हःगुलि थ्व स्वया न्ह्यः विनोदया किजा अरुणयात सीआईबी न ज्वने धुकुगु दु।

अदालतं चौधरीयात पिने तया हे अनुसन्धान यायेगु आदेश बिइगुलि थुनामुक्त जूगु खः।

सङ्गीतकार सन्तोष श्रेष्ठं निक्वःगु पटक गिनिज बुक अफ वर्ल्ड रेकर्ड तःगु दु। हलिमयय् तजाःगु थासय् प्रत्यक्ष रूपं वाद्यवादनया म्ये हालेगु व म्युजिक भिडियो छायाङ्कन याःगु म्ये ‘तिलिचो ताल...’ पाखे श्रेष्ठं गिनिज बुक अफ वल्र्ड रेकर्ड तया दसिपौ काःगु दु।

‘तिलिचो ताल’ म्ये डा. डिआर उपाध्यायं च्वंगु खःसा, सन्तोष श्रेष्ठं लय् व सागर अधिकारीं सः बिउगु खः। थुगु म्ये मनाङ जिल्लाया तिलिचो ताल स्वया च्वय् ५ हजार १०५ मिटर उचाइलय् प्रत्यक्ष रूपं वाद्यवादननाप म्ये, रेकर्डिङ व छायाङ्कन याःग खः। श्रेष्ठं न्हापागु पटक ५० देशया ५० भाषाय् सङ्गीतबद्ध याना ‘ढुकढुकीभित्र तिम्रो...’ म्येय् गिनिज बुक अफ वर्ल्ड रेकर्डपाखे सम्मान याये धुकुगु खः।

थ्व स्वया न्ह्यः निदँ न्ह्यः सन्चबहादुर राई लगायतया समूह न ४ हजार ८१३ मिटर उचाइललय् रेकर्ड व छायाङ्कन याना खरेल समूहया कीर्तिमान भङ्ग याःगु खः। उगु म्ये २०७९ वैशाख ९ गते ५ हजार १०५ मिटर (१६ हजार ७४८ फिट २ इन्च) उचाइलय् रेकर्डिङ व छायाङ्कन याःगु खः।