अमेरिकाया न्यूयोर्कय् ६८ क्वःगु युएन वुमनया ‘द कमिसन अन दि स्टाटस अफ वुमन’ य् ब्बति कया महिला, बालबालिका लिसे ज्येष्ठ नागरिक मन्त्री भगबती चौधरी स्वदेश लिहावःगु दु।

म्हिगः ४ः२५ या कतार एयरलाइन्सया फ्लाइटं मन्त्री स्वदेश लिहावःगु दु धका मन्त्री चौधरीया स्वकीय सचिब शंकर चौधरीं जानकारी बिःगु दु।

मन्त्री चौधरीनाप मन्त्रालयया सचिब सुमनराज अर्याल, सहसचिव रामकृष्ण लामिछाने, उपसचिव विनोदकुमार दाहाल, समाज कल्याण परिषदया सदस्य सचिब मनोज भट्टपिन्स लसकुस याःगु खः।

स्वदँलिपा नेपालं युएन वुमनया सम्मेलनय् मन्त्रीस्तरीय प्रतिनिधि मण्डलं ब्बति काःगु खः। मिसापिनिगु सामाजिक, आर्थिक, न्यायिक समानता लगायतया विषयय् संयुक्त राष्ट्रसंघं दँय् दँसं विश्व सम्मेलन जुयावया च्वंगु खः।

विश्व कविता दिवसया लसताय् स्वंगू सफू विमोचन जूगु दु। उगु ज्याझ्वलय् गाजलं दाःगु चा, चिन्तनया लँय् जि व अमुलिइ प्यकालँय् जि जि नांया सफू विमोचन जूगु खः।

फू विमोचन  मंकाः कथं नेपालभाषा केन्द्रीय विभागया प्रमुख डा. राजन लाल जोशी, प्राज्ञ ध्रुव मधिकर्मी व साहित्यकार पूर्ण ताम्रकारपिन्स यानादीगु खः। खुगू दसक न्ह्यः नं प्रकाशनय् वयेधुंकूगु डा.आनन्द जोशी व विमल ताम्रकारं सम्पादन याःगु ‘गाजलं दाःगु चा’या निगूगु संस्करण पिदंगु खः।

रुवरिक व कुतः पिकाकया ग्वसालय् जूगु उगु ज्याझ्वलय् गायक सत्यनारायण मानन्धरं नेपालभाषा साहित्यया आदिकवि महिन्द्र मल्लं रचना याःगु कवितायात म्ये हाला न्यंकादीगु खः।

भेपपाखे तस्करी जूगु लुँ संलग्नताय् दुगु द्धपनय् ज्वम्ह पूर्वसभामुख नाप माओवादी उपाध्यक्ष कृष्णबहादुर महरा न्यान्हुलिपा हे रिहा जूगु दु।

केन्द्रीय अनुसन्धान ब्यूरो (सीआईबी) या अनुसन्धान अधिकृतं याःगु सिफारिसया आधारय् सरकारी वकिलया कार्यालयं महरायात हाजिरी जमानतय् त्वःतुगु धका धाःगु दु।

प्रहरीं महरायात वंगु चैत ५ गते कपिलवस्तुया सीमा क्षेत्र न्ह्यने ज्वःगु खः। पूर्वन्यायाधीश डिल्लीराज आचार्य नेतृत्वय् लुँ तस्करी अनुसन्धान जाँचबुझ आयोगं चैत १ गते लःल्हागु प्रतिवेदनय् महरायात मुद्दा न्ह्याकेमाःगु सिफारिस याःगु खः।

सीआईबी न उन्मुक्ति बिउगु महरायात मुद्दा न्ह्याकेगु झीगु आधार दु धका प्रतिवेदनय् उल्लेख याःगु दु। प्रतिवेदनयात कार्यान्वयन यायेगु  मन्त्रिपरिषदं निर्णय यायेवं प्रहरीया केन्द्रीय अनुसन्धान ब्यूरो (सीआईबी) या न्हुगु टोलीं हाकन जाँच याःगु खः।

नेपाल मेडिकल कलेजया स्टाफ नर्सतय्त एडभान्स कार्डिएक लाइफ सपोर्ट, बेसिक लाइफ सपोर्ट लिसे एयरवेज म्यानेजमेन्ट सम्बन्धी तालिम बिःगु दु।

कलेजया नर्सिङ विभाग, क्रिटिकल केयर लिसे इमरजेन्सी म्यानेजमेन्टं बिःगु प्यंन्हुया तालिमय् १०३ म्ह स्टाफ नर्सपिन्स ब्बति काःगु खः।

कलेजय् ज्या यानाच्वंगु स्टाफ नर्सतय्त क्षमता विकास यायेगु उद्देश्यं उगु तालिम बिःगु खः।

तालिमय् ब्बति काःपि स्टाफ नर्सतय्त उपचारया झ्वलय् बिरामीतयेगु शारिरीक स्वास्थ्य अवस्था स्वया वयात गज्यागु प्रकारया लाइफ सपोर्ट माःगु निश्चित याना छ्यलेगु स्यंगु खः।

गृह मन्त्रालयं आमसञ्चारमाध्यमया विषय निगरानी व कारबाही यायेगु प्रमुख जिल्ला अधिकारीयात बिउगु परिपत्र भिंकूगु दु।

७७ जिल्लाया प्रमुख जिल्ला अधिकारीतय्त म्हिगः बिहीवाः छ्वःगु परिपत्रय् अनलाइन लिसे छापा सञ्चारमाध्यमया अनुगमन व कारबाही यायेत जिल्ला प्रशासन कार्यालयय् डेस्क तयेगु उल्लेख दु। उगु परिपत्रय् सार्वजनिक जुइवं विरोध सुरु जुगु खः। वयालिपा हे म्हिगः बिहीवाः बहनि गृह मन्त्रालयय् मेगु विज्ञप्ति जारी यासे सञ्चारमाध्यमय् निगरानी व कारबाही यायेगु विषय परिपत्रय् समावेश मजुगु धका स्पष्टीकरण बिगु खः।

गृहया प्रवक्ता नारायणप्रसाद भट्टराइ न जारी याःगु विज्ञप्तिइ ‘मिति २०८० चैत ६ गते मन्त्रालयपाखे थुगु सम्बन्धी परिपत्र मजुगु व सञ्चारमाध्यमय् प्रकाशित सरोकारयात ध्यानय् तया मस्यौदाय् उल्लेख जूगु उगु बुँदायात चिइका मेमेगु विषयय् जक समावेश याना मिति २०८० चैत ८ गते परिपत्र जुगु व्यहोरा सम्बन्धित समसित जानकारीया लागि इनाप यानागु दु’, धका धयातःगु दु।