लुँया भाः थौ तोलां च्यासः थहावंगु दु। लुँ तोलां च्यासः थहावना थौ १ लाख २५ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न न्यय् तका थहावना १ हजार ५ सय १५ रुपैयाँ न कारोबार जुगु दु धका महासङ्घं धाःगु दु।

काठमाडौं विश्वविद्यालयका संस्थापक मध्ये छम्ह प्रा.डा. भद्रमान तुलाधर मन्त।

मस्तिष्कघातया कारण वःगु स्ववाः निसे अस्पतालय् वासः याकाच्वम्ह तुलाधर म्हिगः बुधवाः मदुगु खः।

वयकलंं रूसपाखे गणितय् विद्यावारिधि यानादीगु खः। प्रा.डा. सुरेशराज शर्मा, प्रा.डा.तुलाधर नाप प्रा.सीताराम अधिकारी काठमाडौं विश्वविद्यालयया प्रमुख संस्थापकपि खः।

गणितया प्राध्यापक प्रा.डा. तुलाधरं विश्वविद्यालयया रजिष्ट्रार कथं ज्या न याये धुकुम्ह खः।

थ्व हे वइगु चैत ६ गते प्रतिनिधि सभाय् प्रधानमन्त्रीनाप न्ह्यसः लिसः ज्याझ्वः जुइगु दु।

थौ बुधवाः च्वंगु प्रतिनिधि सभाया कार्य व्यवस्था परामर्श समितिया बैठकं क्वछिगु पाक्षिक कार्यतालिकाय् चैत ६ गते प्रधानमन्त्रीनाप न्ह्यसः लिसः यायेगु ज्याझ््वः दु धका उल्लेख याःगु दु।

प्रतिनिधिसभा नियमावली २०७९ या परिच्छेद ९ य् न्ह्यावलय् न्हापागु वाःय् प्रधानमन्त्रीनाप न्ह्यसः लिसः ज्याझ्वः दु धका उल्लेख दु।

उगु ज्याझ्वलय् प्रधानमन्त्री वा प्रधानमन्त्रीया कार्यक्षेत्रनाप प्रत्यक्ष रुपं सम्बन्धित विषय सांसदपिन्स न्ह्यसः न्यनेफइ।

प्रधानमन्त्री पुष्पकमल दाहाल प्रचण्ड थौ प्रतिनिधिसभाय् विश्वासया मत काःगु दु। सभामुख देवराज घिमिरे प्रतिनिधिसभा बैठकय् विश्वासया मतसम्बन्धी प्रस्ताव निणयार्थ प्रस्तुत यायेगु झ्वलय् बहुमत सांसदं मत ब्यूगु खः।

मत विभाजन जुयाः कुल २६८ मत कुतुवंगुलिं प्रचण्डं १५७ कयाः बहुमत काउगु खःसा सभामुखं विश्वासया मत काःगु घोषणा याःगु खः। प्रचण्डया विपक्षय् ११० मत लाःगु दुसा छम्ह सांसद तटस्थ च्वंगु दु।

कांग्रेस नाप गठबन्धन तोडे यानाः प्रधानमन्त्री प्रचण्डं वंगु फागुन २१ गते मन्त्रिपरिषद् पुनर्गठन याःगु खः।

राष्ट्रिय सभाया अध्यक्षय् नारायण दाहाल निर्वाचित जूगु दु। थौ मंगलवाः राष्ट्रिय सभाय् जुगु मतदानय् दाहालया पक्षय् ३९ व विपक्षय् १७ मत वःगु खः।

मतदानय् ५६ म्ह सांसद पिनिगु उपस्थित दुगु खः। राष्ट्रिय सभाय् आः दुगु ल्याखं बहुमत दुगु उल्लेख यासे सभाध्यक्ष उर्मिला अर्यालं दाहालयात राष्ट्रिय सभाया अध्यक्षय् निर्वाचित जूगु धका घोषणा याःगु खः।

दाहाल सत्तारुढ दलपाखे उम्मेदवार जुगु खः। दाहालयात नेकपा एमाले, नेकपा माओवादी केन्द्र, नेकपा एकीकृत समाजवादी व जनता समाजवादी पार्टीया समर्थन दुगु खः।