सर्वोच्च अदालतं परमादेश बिइवं नेकपा (एमाले) कोसी प्रदेश संसदीय दलया नेता हिक्मत कार्की थौं बहनि मुख्यमन्त्री नियुक्त जुइत्यःगु दु।

सर्वोच्चं म्हिगः बिहीवाः उद्धव थापा नेतृत्वया सरकारयात बर्खास्त याना कार्कीयात संविधानया धारा १६८ या उपधारा ३ बमोजिम ४८ घौं दुने मुख्यमन्त्री नियुक्त यायेत आदेश बिःगु खः। प्रदेश प्रमुख पर्शुराम खापुङं शुक्रवाः बहनि कार्कीयात मुख्यमन्त्री नियुक्त याना शपथ यायेगु ज्या जुइत्यःगु दु।

प्रदेश प्रमुखया कार्यालयं बिःगु जानकारी कथं मुख्यमन्त्री नियुक्त याना थौं हे शपथ नकेगु तयारी जूगु दु धका कार्यालयया निमित सचिव नरेन्द्र श्रेष्ठं धाःगु दु। कार्कीं एमाले सांसद तिलकुमार मेन्याङ्बो व एकराज कार्कीयात मन्त्री नियुक्त यायेगु तयारी याःगु दु।

मुख्यमन्त्री नियुक्त जुइवं ३० दिं दुने कार्कीं प्रदेश सभाय् विश्वासया मत कायेमाः।

नेपालया आन्तरिक लिसे बाह्य पर्यटन प्रर्वद्धनय् सञ्चारमाध्यमया भूमिकायात प्रभावकारी दय्केगु नापं पत्रकारपिनिगु क्षमता अभिवृद्धि यायेगु उद्धेश्यं पत्रकारपिन्त फोटोपत्रकारिता प्रशिक्षण बिःगु दु।

नेपाल पर्यटन बोर्ड व संयुक्त राष्ट्रसंघीय विकास कार्यक्रम युएनडिपीपाखे मंकाः कथं सञ्चालन जूगु परियोजना, जिविकोपार्जनया पुनः उत्थानया लागि दिगो पर्यटन परियोजना (एसटीएलआरपी) या ग्वसालय् नापं नेपाल फोटो पत्रकार समूह, संचारिका समूहसनापं सहकार्य व सिटिजन्स मिडियाया प्राविधिक संयोजनय् निन्हयक पर्यटन फोटो पत्रकारिता प्रशिक्षण ज्याझ्वः जूगु दु।

उगु प्रशिक्षण ज्याझ्वलय १ सय ५ म्ह पत्रकारपिन्स ब्बति काःगु खः। संचारिका समूहया अध्यक्ष विमला तुम्खेवा, एनएफपीजेया अध्यक्ष प्रदीपराज वन्त, प्रशिक्षक किशोर श्रेष्ठ, जिविकोपार्जनया पुनः उत्थानया लागि दिगो पर्यटन परियोजना (एसटीएलआरपी) य् जिवीकोपार्जन विज्ञ धर्म दवाडी, प्रशिक्षार्थीयापाखे राजेन्द्र श्रेष्ठ, शुशीला बस्नेतपिन्स थुगु तालिमपाखे पत्रकारपिनिगु व्यवसायिक क्षमता अभिृवृद्धिइ यायेगु निति ग्वाहालि जुइ धका धयादीगु खः।

तालीमय् वरिष्ठ फोटोपत्रकार मिनरत्न बजाचार्य, किशोर श्रेष्ठ, राजन काफ्ले नाप फोटोपत्रकार प्रदीप कुमार क्षेष्ठ, सुनिल शर्मा, शुशिल श्रेष्ठ, सुनिल शर्मा, सागर श्रेष्ठपिन्स क्यामेराया संचालन, फोटोया महत्व बिषय प्रशिक्षण बियादीगु खः।

लुँ तोलां थौं स्वसः थहावंगु दु। लुँ तोलां स्वसः थहावना थौं १ लाख १२ हजार ३ सय रुपैयाँ न कारोबार जूगु दु धका नेपाल सुन चाँदी व्यवसायी महासङ्घं धाःगु दु।

अथेहे, वहः तोलां थौं न्यातका कुहावःगु दु। वहः तोलां न्यातका कुहावया थौ १ हजार ४ सय ५ रुपैयाँ न कारोबार जूगु दु धका महासङ्घं धाःगु दु।

पुजा स्वयम्भूइ च्वंगु थेरवाद दीपय् बुद्ध पुजा जूगु दु । स्वयम्भूस्थित आनन्दकुटी विहारया क्वसं च्वंगु नेपाःया थेरवाद भिक्षु अनागारिकापिनिगु अन्तिम संस्कार याइगु दीपय् वंगु बुधवाः बुद्ध पुजा याःगु खः ।

श्रद्धेय श्रद्धाचारी गुरुमांया नेतृत्वय् उगु बुद्ध पुजा जूगु खः । वंगु बुधवाः दीप व उकिया जःखः दक्वं थासय् सुचुकुचु यानाः बुद्ध पुजा याःगु खः । छुं दिं न्ह्यः थेरवाद भिक्षु, अनागारिकाया अन्त्येष्ठि याइगु दीप छचाःखेरं फोहर मुंकाः तःगु सुकुम्वासीतय्सं टहरा दयेकाः च्वनेगु यायेवं उकियात चिइकाः अन सुचुकुचु यायेगु ज्या जूगु खः ।

श्रद्धाचारी गुरुमांया हे पहलय् दीप लागा सुचुकुचु यानाः लय्पतिकं बुद्ध पुजा यायेगु क्वःछिउगु खः ।

वज्राचार्य क्लबं पंजरां फः वना वःगु दानदक्षिणा (ध्यबा) नेवाः देय् दबूयया निर्माणाधीन दबू छेँया निंतिं ग्वाहालि यायेगु क्लबं जानकारी बिउगु दु ।

क्लबपाखें दँय्दसं थुकथं पंजरांपाखें संकलन जूगु दानदक्षिणा येँ देय्या हे थीथी महाविहार, क्वाःपाःछेँ आदि निर्माणया निंतिं ग्वाहालिकथं लःल्हायेगु याना वयाच्वंगु दु । थुगुसी धाःसा देय् दबूया दबू छेँयात ग्वाहालि यायेगु क्लबं जानकारी बिउगु दु ।

लिसें पंजरांकुन्हु सकल शाक्य वज्राचार्यपिं छगू थासय् मुनाः पंजरां फः वनेगु ज्याझ्वलय् ब्वति कायेत नं क्लबं इनाप याःगु दु । थ्व हे झ्वलय् वज्राचार्यं क्लबं फुटसल कासा नं याइगु जूगु दु ।

स्वनिगःया थीथी महाविहारया वज्राचार्य संघया प्रतिनिधित्व जुइकथं उगु फुटसल कासा यायेत्यनागु क्लबं जानकारी बिउगु दु ।