यल महानगरपालिकां स्थानीय मातृभाषायात प्राथमिकता बिया वइगु शैक्षिक सत्रनिसे कक्षा १ निसे ३ तक नेपालभाषा न ब्बकिइगु जूगु दु।

महानगरपालिकां वइगु आर्थिक दँ ०८०÷८१ या नीति न कार्यक्रम सार्वजनिक यासे प्रमुख चिरीबाबु महर्जनं वइगु शैक्षिक सत्रनिसे कक्षा १ निसे ३ तक नेपाल भाषाया पाठ्यक्रम तयार याना लागू यायेगु घोषणा याःगु खः। महानगरपालिका दुने सामुदायिक विद्यालय नेपाल भाषां ब्बकेगु व छगु छगु स्कूलय् छम्ह छम्ह शिक्षकया व्यवस्था यायेगु धका धाःगु दु।

यल महानगरं ऐतिहासिक, परम्परागत थाय्, सम्पदा, संस्कृति, नँसा त्वँसा, ज्यायात प्रोत्साहन जुइगु कथं पाठ्यक्रम दयका व्यवहारिक शिक्षाय् बःबिइगु नीति हयेगु धका धाःगु खः।

येँ महानगरपालिकाया प्रमुख बालेन्द्र साह (बालेन) या शिक्षा सल्लाहकार रेशु अर्यालं राजीनामा बिःगु दु।

अर्यालं बालेनया लिपागु ज्याय् असन्तुष्टि प्वकूसे शिक्षा सल्लाहकार पदपाखे राजीनामा बिःगु खः। शैक्षिक मेला, फिल्म बन्द यायेगु ज्याया प्रमुख बालेन्द्र शाह यानाच्वंगु गतिविधिइ असन्तुष्टि क्यसे शिक्षा सल्लाहकार अर्यालं थःगु पदपाखे राजीनामा बिःगु खः।

वयकलं थःगु समाजिक सञ्जालपाखे राजीनामाया घोषणा याःगु खः। वःगु भदौय् महानगरया कार्यपालिका बैठकं अर्यालयात शिक्षा सल्लाहाकारय् नियुक्त याःगु खः।

शेयर बजाः थौं न कुहावःगु दु। शेयर बजाः परिसूचक नेप्से थौं बुधवाः १४ दशमलव शून्य ५ अङ्कं कुहावया २ हजार ५० दशमलव ७८ विन्दुइ कुहावःगु खः।

थौं होटल, जीवन बिमा, उत्पादन व व्यापार समूहया शेयर सामान्य थहावंसा मेमेगु समूहया शेयर कुहावःगु खः। बजाः नाप कारोबार रकम न कुहावःगु दु। म्हिगः मङ्गलवाः ४ अर्ब ११ करोड रुपैयाँया कारोबार जूगुलि थौं २ सय ७१ गु कम्पनीया ८६ लाख ५१ हजार कित्ता शेयर ३ अर्ब ४९ करोड ६८ लाख रुपैयाँया कारोबार जूगु खः।

दकलय् अप्पो शिवम् सिमेन्टया २३ करोड रुपैयाँया शेयर कारोवार जूगु खः। दकलय् अप्पो ग्रीन भेन्चर्स कम्पनीया शेयर ८ प्रतिशत व मेन्छियाम हाइड्रो नाप कर्पोरेट विकास बैंकया शेयर ५ प्रतिशत स्वया अप्पो कुहावःगु दु।

समग्र बजाः कुहावःसा थौं सिटी होटलया शेयर १० प्रतिशत व सोल्टी होटलया शेयर साढे ७ प्रतिशतं थहावःगु खः।

लुँया भाः थौं तोलां च्यासः कुहावःगु दु। लुँ तोलां च्यासः कुहावया थौं १ लाख ११ हजार रुपैयाँ न कारोबार जूगु दु धका नेपाल सुन चाँदी व्यवसायी महासंघं धाःगु दु।

अथेहे, थौं वहः तोलां न पीन्यातका कुहावःगु दु। वहः तोलां पीन्यातका कुहावया १ हजार ३ सय ८५ रुपैयाँ न कारोवार जुगु दु धका महासंघं धाःगु दु।

नेवाः न्ह्यलुवा लिसें मानव अधिकारकःमि पद्मरत्न तुलाधरया हुलाक टिकट नेपाल सरकारं पिकाःगु दु।सरकारं तुलाधरया १० तका वंगु हुलाक टिकट पिकाःगु खः।

म्हिगः सञ्चार मन्त्रालयय् जूगु छगू ज्याझ्वलय् सञ्चार मन्त्री रेखा शर्मां हुलाक टिकटय् टाँचा तयादीगु खः। उगु ज्याझ्वलय् पद्मरत्न तुलाधर लुमंति गुथिया दुजःपिनि नं उपस्थिति दुगु खः। म्हिगः व्यक्तित्व शीर्षकया न्याम्ह व्यक्तित्वपिनि हुलाक टिकट सार्वजनिक याःगुली तुलाधरया टिकट नं लाःगु खः ।

तुलाधरया लिसें सरकारं आरोही आङरिता शेर्पा, गायिका कोइली देवी व साहित्यकारपिं पूर्णप्रकाश नेपाल ‘यात्री’ लिसें माधवप्रसाद देवकोटाया नं हुलाक टिकट सार्वजनिक याःगु खः। थ्व हुलाक टिकटया ‘फस्र्ट डे कभर’ डिल्ली बजार व बबरमहलया हुलाक विभागय् न्यायेगु दु ।