सोमवाः न्हिनय् सवा १ बजेया लागि सःतूगु राष्ट्रियसभाया बैठक स्थगित याःगु दु। मेगु बैठक  फागुन २४ गते न्हिनय् सवा १ बजे च्वनिइगु कथं स्थगित याःगु दु।

विशेष कारणवश बैठक स्थगित जूगु दु धका संसद सचिवालयं सूचना अधिकारी दशरथ धमलां जानकारी बिःगु दु।

अथेहे, सोमवाःया लागि सःतूगु प्रतिनिधि सभाया बैठक न फागुन २४ गते तकया लागि स्थगित याःगु दु।

प्रधानमन्त्री पुष्पकमल दाहाल प्रचण्डं राष्ट्रपति रामचन्द्र पौडेलयात नापलानां न्हुगु सत्ता गठबन्धन दयकूगु खँय् जानकारी बिःगु दु।

कांग्रेसनाप गठबन्धन त्वाःथला एमाले व रास्वपानाप सत्ता समीकरण लिपा प्रधानमन्त्री प्रचण्ड शितल निवासय् वंगु खः।

प्रधानमन्त्री प्रचण्डं मन्त्रिपरिषद पुनर्गठनया तयारीबारे न जानकारी बिःगु खः।

नेकपा माओवादी केन्द्रया सचिवालय बैठक च्वनाच्वंगु दु। समसामयिक राजनीतिक परिस्थितिया विषय छलफल यायेगु निति माओवादीया सचिवालय बैठक च्वनेत्यःगु खः।

बैठकय् अध्यक्ष नाप प्रधानमन्त्री प्रचण्डं शीर्ष नेतापि दथुइ सहलह जुयाच्वंगु धका छम्ह नेतां जानकारी बिःगु दु।

सत्ता गठबन्धनया थौ सुथय् च्वनिइ धका धाःगु बैठक स्थगित जूगु दु। सत्ता गठबन्धनया दल दथुइ समसामयिक परिस्थितिइ सहलह यायेगु निति थौ सुथय् ८ बजे प्रधानमन्त्री निवास बालुवाटारय् बैठक सःतूगु खः।

उगु बैठक स्थगित जूगु धका प्रधानमन्त्रीया सचिवालयं धाःगु दु। बैठकय् सत्य निरुपण व मेलमिलाप आयोग व बेपत्ता छानबिन सम्बन्धी विधेयक सम्बन्धी प्रतिवेदनया मस्यौदाय् सहलह यायेगु निति उगु मुँज्या सःतूगु खः।

राष्ट्रिय सभाया १९ म्ह न्हुपि निर्वाचित जूपि सदस्य तयेस थौ शपथ काइगु जुगु दु।

थौ सुथय् ११ः३० बजे संसद भवनया ल्होत्से हलय् उपाध्यक्ष उर्मिला अर्यालं राष्ट्रिय सभा सदस्यतय्त शपथ ग्रहण याकिइगु जुगु दु।

शपथ काइपि सदस्यपि थुकथं दु

रुकमिणी कोइराला, कृष्णप्रसाद सिटौला, पूजा चौधरी, आनन्दप्रसाद ढुंगाना, विष्णुदेवी पुडासैनी, जितजङ्ग बस्नेत, मनरुपा शर्मा, पदमबहादुर परियार, किरणबाबु श्रेष्ठ, विष्णुकुमारी सापकोटा, झक्कुप्रसाद सुवेदी, सावित्री मल्ल,  विष्णुबहादुर विश्वकर्मा, कृष्णबहादुर रोकाय, रेनु चन्द, नारायणदत्ता भट्ट व बलदेव बोहरा ।