राष्ट्रिय सभाया अध्यक्ष गणेशप्रसाद तिमिल्सनां थौं मंगलवाः च्वनिइ धका धाःगु राष्ट्रिय सभाया बैठक स्थगित याःगु दु।

अध्यक्ष तिमिल्सनां विशेष कारणवश मंगलवाः च्वनिइ धका धाःगु बैठक बुधवाःया लागि निर्धारण याःगु दु धका संघीय संसद सचिवालयया महासचिव भरतराज गौतमं छगु सूचं पिकना जानकारी बिःगु दु।

स्वच्छ वातावरणीय मौलिक हकया लागि वृक्षारोपण येँ महानगरपालिका –१३ ताहाचलस्थित जन प्रभात मा.वि. परिसरय् थौं सोमवाः ‘प्लास्टिक प्रदूषण विरुद्ध लागौं’ धइगु मू नारा ज्वना वृक्षारोपण याःगु दु।

वायु प्रदुषण व्यवस्थापन नागरिक सञ्जाल येँया ग्वसालय् थौं जडीबुटी व फलफुलया १०८ सिमा पिइगु ज्या जूगु दु।

विश्व वातावरण दिवसया लसताय् पर्यावरण स्वच्छताया निति विद्यालय परिसरय् थीथी सिमा पिगू धका सञ्जालया अध्यक्ष निरू महर्जनं धाःगु दु। वयकलं हलियकं जूयाच्वंगु वातावरण प्रदूषणया समस्या जुयाच्वंगु दु धका धयादीसे वनस्पति, मनू तय्त यक्को लिच्वः लानाच्वंगु दु धका धयादीगु खः।

येँ महानगर २० वडा अध्यक्ष राजेन्द्र मानन्धर, विद्यालय व्यवस्थापन समितिया निवर्तमान अध्यक्ष रामशरण डंगोल, येँ महानगर १३ वडाया वडासदस्यपि रजनि महर्जन, मैयाँ देउला व २० वडाया सदस्य अनेश चित्रकारपिन्सं वातावरणसम्बन्धी याइगु संस्था एन्फो, विद्यालयया शिक्षक, कर्मचारी, विद्यार्थीपिनिगु न ब्बति दुगु खः।

ऐतिहासिक, सांस्कृतिक वस्ती ख्वनाय् वंगु म्हिगः आइतवाः छगू तःजिगु देय् भ्वय्या ज्याझ्वः जूगु दु।

ख्वनाया ऐतिहासिक व सांस्कृतिक रुद्रायणी देवीया देवगणय् दुहां वःपिं न्हूपिं च्याम्ह देवगणया लसकुस व सम्मानय् उगु देय् भ्वय् जूगु खः । रुद्रायणी देवीया देवगणय् ताःई न्ह्यवंनिसें प्वनाच्वंगु च्याम्ह गणया रुपय् न्हूपिं ल्याय्म्हत दुहां वःगु लसताय् ख्वनाय् उत्सव हनेकथं उगु देय् भ्वय् न्यायेकूगु खः ।

ज्याझ्वलय् झायादीम्ह उपप्रधानमन्त्री लिसें गृहमन्त्री नारायणकाजी श्रेष्ठं संस्कार, संस्कृति, पहिचानया संरक्षणय् सक्रिय जुयादीपिं देवगणयात थुकथंया औपचारिकताय् जक सीमित जुइगु सम्मान मयासे प्रोत्साहन नं बीमाःगु व उकिया निंतिं विशेष व्यवस्था यायेमाः धयादिल ।आधुनिकीकरणय् वनेगु पहिचान त्वःताः यान्त्रिकीकरणया नक्कल यायेगु मखु धासें उपप्रधानमन्त्री श्रेष्ठं आधुनिकताया नामय् भद्दा जुइक नक्कल यायेगु प्रवृत्ति अप्वयाच्वंगु खँय् सचेत जुइमाः धयादिल ।

थनया रुद्रायणी द्यःया गंप्याखनय् ४६ म्ह दइ । थुपिं पीखुम्ह देवगण मदयेकं प्याखं पूवंकेगु ला छु संचालन तकं याये फइगु सम्भावना मदु । रुद्रायणी गंप्याखनय् दुहां वःपिं १८ दँनिसें ४८ दँ दुपिं आर्यन महर्जन, नारायण महर्जन, देवलाल महर्जन, गोविन्द महर्जन, किशोर महर्जन, केशराम महर्जन, दिवाकर महर्जन, बुद्धिरत्न डंगोल खः । वय्कःपिं सकलें गंप्याखनय् दुहां वःगु लसताय् वय्कःपिनिगु हे सम्मानय् वंगु आइतवाः देय् भ्वय्या ग्वसाः ग्वःगु खः ।

यल महानगरपालिका वडा नं. २१ या संयोजनय् देवगणया सम्मान व धार्मिक विधिकथं सगं बीगु ज्याझ्वःलिसें देय् भ्वय्या ग्वसाः ग्वःगु खः । मुक्कं ख्वनामित हे जानाः ग्वसाः ग्वयाः व्यवस्थापन याःगु देय् भ्वजय् न्हय्द्वःयात भ्वय् नकूगु खः ।

पुलांम्ह मन्त्रीलिसें नेकपा माओवादी केन्द्रया नेत्री पम्फा भुसालं ख्वना देय्यात सांस्कृतिक पर्यटकीय क्षेत्रया रुपय् विकास यानाः समुन्नत व समृद्ध ख्वनाया रुपय् न्ह्यःने यंकेगु स्वयेमाः धयादिल । वय्कलं बहुचर्चित फास्ट ट्रायकया योजना ख्वनाया मौलिक वस्तीयात लिच्वः मलाइकथं न्ह्यःने यंकेमाः धयादिल ।

ज्याझ्वःया सभापतिलिसें २१ वडाअध्यक्ष रविन्द्र महर्जनं द्यःगंया निंतिं च्याम्ह थप जूसां अझं मेपिं स्वम्ह देवगणया व्यवस्थापन याये ल्यं दुगु जानकारी बियादिल ।

किपू नगरपालिकाया पुर्व मेयर रमेश महर्जन मोटरसाइकल दुर्घट्नाय् जूया घाःपाः जूगु दु।

म्हिगः आईतवाः बहनि ६ ताइलय् किपूया छुगामय् दुर्घट्ना जुगु खः ।

मोटरसाइकलय वयाच्वंबलय् मेगु मोटरसाइकलं ठक्कर बिया दुर्घटना जुगु खः ।

दुर्घटनाय् लानाः पुर्व मेयर महर्जनया तुतिइ घाः जुगु दु ।

येँ महानगरपालिका १६ वडाया शितला माध्यमिक विद्यालयय् देय्या हे न्हापांगु ‘कोड क्लब’या स्थापना याःगु दु ।

येँ महानगरपालिकाया उपप्रमुख सुनिता डंगोलं छगू ज्याझ्वःया दथुइ विद्यालयय् स्थापना याःगु कोड क्लबया उलेज्या यानादीगु खः । उपप्रमुख डंगोललिसें शिक्षा विभाग प्रमुख सिताराम कोइराला, शिक्षा सल्लाहकार रेशु ढुंगाना अर्याल, आइटी विज्ञ सगुन ढुंगाना लगायतया पुचलं विद्यालयया बुक फ्रि फ्राइडे, शिक्षाय् सीप विकास अन्तर्गत ब्युटिसियन व हेयर स्टाइल, नियमित रुपं कक्षाय् जुयाच्वंगु ह्याण्डस अन अन्तर्गत थीथी गतिविधि व क्रियाकलापया अनुगमन नं यानादीगु खः ।

विद्यालयय् स्काउट, नेपालभाषा संगीत, किपा च्वज्या थेंज्याःगु सीप तालिम लगायतया विषयय् स्यनेकने जुयाच्वंगु दु । विद्यालयया प्रधानाध्यापक लक्ष्मण श्रेष्ठं वय्कःपिं विद्यालयय् जुनियर रेडक्रस सर्कल (जुरेस), इको क्लब, जर्नल प्रकाशनक्लब, डीआरआर क्लब, स्काउट कोड क्लब, बालक्लब, डिबेट क्लब लगायत थीथी झिगू क्लब संचालन जुयाच्वंगुनापं उकिया गतिविधिया बारे नं जानकारी बियादीगु खः ।

व्यवस्थापन समितिया अध्यक्ष शुक्रलाल श्रेष्ठं विद्यालयय् गठन यानातःगु दक्वं क्लब सक्रिय दुगु व ‘शिक्षाय् सीप’ ज्याझ्वः अन्तर्गत सौन्दर्य कला व हेयर स्टाइल सम्बन्धी तालिमय् विद्यालयया मिसा व मिजं विद्यार्थीया उतिकं सहभागिता दुगु जानकारी बियादिगु खः ।

कोड क्लबया विद्यार्थीतय्सं खुल्ला चौर वा ख्यलय् म्हितीगु फुटबल, बास्केटबल, भलिबल थेंज्याःगु कासा म्हिताः न्ह्यइपुक कम्प्युटरय् न्हूगु कासा दयेके फइ । थुकिया लिधंसा धइगु स्क्राय्च कोडिङ खः । थुकथं निर्माण याःगु ज्याझ्वःत १६० गू देय्या विद्याथीतय् नेटवर्कय् थ्यनी ।

अले थ्व प्लेट फार्मपाखें अन्तर्राष्ट्रियस्तरय् तकं धेंधेंबल्लाः याये फइ । झिंप्यंगू विद्यालयय् शुरु यायेत्यंगु कोड क्लब महानगरपालिका दुनेया दक्वं सार्वजनिक विद्यालयय् स्थापना यायेगु तयारी जुयाच्वंगु दु । उगु क्लबपाखें ब्वँमिपिंसं कोडिङ, एनिमेसन, सामान्य प्रोग्रामिङलिसें वेबसाइट व थीथी कथंया एप्लिकेशन (एप्स) दयेकेगु क्रियाकलाप बारे सयेक सीके याये फइ ।

डिजिटल शिक्षा परिदृश्य उत्थान यायेत व ब्वँमि व स्यनामिपिंत न्हू न्हूगुकथंया प्राविधिक उपकरणलिसे सशक्त याना यंकेगु विचाःकथं महानगरपालिकां ‘डिजिटल एण्ड बियोन्ड’लिसे सहकार्य यानाः प्रत्येक सामुदायिक ब्वनेकुथिइ Raspberry–Pi Foundation Code Club गठन यायेगु शुरु याःगु विद्यालयया प्रधानाध्यापक श्रेष्ठं कनादिल । आइटी विज्ञ ढुंगानायाकथं तगिं ४ निसें तगिं ९ तकया विद्यार्थीतय्त उमेर समूहय् तयाः कोडिङ सम्बन्धी ज्याझ्वः संचालन यायेगु व थुकथंया ज्याझ्वलं ब्वनामितय् सीप, शैक्षिक व सोचयालिसें आलोचनात्मक विचारया विकासय् नं ग्वाहालि जू वनीगु विश्वास याःगु दु ।

येँ महानगरपालिका व शितला माध्यमिक विद्यालयया सहकार्यय् विद्यालयया थःगु हे वेबसाइट निर्माण सम्पन्न यानाः कन्टेन्ट म्यानेमेन्टया ज्या नं जुयाच्वंगु दु । थुकिं सामुदायिक विद्यालयं थःगु म्हसीका विश्वया न्ह्यःने थ्यंकेत ग्वाहालि जुइ ।उपप्रमुख डंगोलं शितला माध्यमिक विद्यालयं याःगु थुकथंया प्रगतिपाखें थः अतिकं लय्ताःगु व विद्यालयया निंतिं सकतांकथंया ग्वाहालि यायेत तयार दु धयादिल । वय्कलं शिक्षा व स्वास्थ्यया आमूल परिवर्तनय् महानगरपालिका महत्वकांक्षी ज्याझ्वःलिसें न्ह्याः वनाच्वंगुलिं सकसिगु साथ व ग्वाहालिया आवश्यकता दुगु नं धयादिल ।