शेयर बजाः थौ बुधवाः दोहोरो अङ्कं थहावःगु दु। शेयर बजाः परिसूचक नेप्से थौं २९ दशमलव ४७ अङ्कं थहावना २ हजार ४५ दशमलव ४५ विन्दुइ थहावःगु दु।

थौं दक्को समूहया शेयर थहावःगुलि जलविद्युत्, होटल, उत्पादन व व्यापार समूहया शेयर तसकं थहावःगु दु। दकलय् अप्पो खुटेली बुखारी जलविद्युत् कम्पनीया शेयर १० प्रतिशत व लिबर्टी इनर्जी व ग्लोबल आईएमई ब्यालेन्स फन्डया शेयर साढे ९ प्रतिशतं थहावःगु दु।

समग्र बजाः थहावःसा थौ दकलय् अप्पो सिटिजन्स सुपर ३० म्युचुअल फन्डया शेयर साढे ७ प्रतिशतं कुहावःगु दु। बजाः नापं कारोबार रकम न थहावःगु दु।

४२ लाख ३७ हजार कित्ता शेयर १ अर्ब ५१ करोड रुपैयाँया कारोबार जूगु दु। दकलय् अप्पो घोराही सिमेन्ट इन्डस्ट्रिजया शेयर ७ करोड ५७ लाख रुपैयाँया कारोबार जूगु दु।

साउन १० गतेनिसे दिनाच्वंगु प्रतिनिधिसभाया बैठक थौनिसे सञ्चालन जुइगु दु। राष्ट्रिय मान्यता कयातःपि राजनीतिक दलया प्रमुख सचेतकपि दथुइ निगु बुँदे सहमति जुइवं संसद् सञ्चालन जुइगु निश्चित जूगु दु।

सहमति जूगु कथं सरकारं असोज ५ गते तक न्यायिक आयोग गठन याइगु जुगु दु। नेपाल प्रहरीया केन्द्रीय अनुसन्धान ब्यूरों असोज २ गते अनुसन्धान क्वचायेवं जक आयोग गठन यायेगु निर्णय याःगु खः।

कांग्रेस प्रमुख सचेतक रमेश लेखकं प्रहरीया अनुसन्धानयात प्रभाव मजुइगु कथं आयोग गठन यायेगु निति दक्को सहमत जुगु खः। असोज ५ गते आयोग गठन यायेगु व आयोगं उगु दिं निसे ज्या न्ह्याकिइ।

लुँ तोलां थौ सच्छि थहावःगु दु। लुँया भाः तोलां सच्छि थहावना १ लाख १० हजार ६ सय रुपैयाँ थ्यःगु दु धका नेपाल सुन चाँदी व्यवसायी महासंघं धाःगु दु ।

अथेहे, वहः तोलां १ हजार ४ सय २५ रुपैयाँ न कारोबार जूगु दु धका महासंघं धाःगु दु।

संसदय् जूयाच्वंगु पंगः चिइकेगु निति जुयाच्वंगु सहलह यायेगु निति राष्ट्रिय दलपिनिगु बैठक सुरु जूगु दु।

प्रधानमन्त्री कार्यालय, सिंहदरबारय् सुरु जूगु उगु बैठकय् नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, राप्रपा व जनता समाजवादी पार्टीया नेतापिनिगु ब्बति दुगु खः।

उगु बैठकय् लुँ तस्करीया छानबिन यायेगु लागि उच्चस्तरीय आयोग गठनबारे सहलह जूगु खः। उच्चस्तरीय आयोग गठनया माग यासे एमाले न साउन १० गते निसे संसद बैठक अवरुद्ध याना वयाच्वंगु खः। संसदया बैठक बुधवाः न्हिनसिया ३ बजेया लागि सःतूगु खः।

धादिङयाया गजुरी–२ चालिसे धाःगु थासय् च्वंगू त्रिशूली खुसिइ बस कुतुवना च्याम्ह सीगु दु सा च्याम्ह घाःपाः जूगु दु।

येँपाखे पोखरा वनाच्वंगु प्रदेश ३–०१–००५ ख ९९५२ नम्बरया थौ सुथय् ११ः१५ बजे सतकय् करिब ४० मिटर क्वय् त्रिशूली खुसिइ कुतुवंगु खः।

दुर्घटनाय् निम्ह मिसा व खुम्ह मिजंपि सीगु दु धका जिल्ला प्रहरी कार्यालय धादिङया प्रवक्ता नाप डिएसपी सन्तु जयसवालं जानकारी बिःगु दु। ‘घटना जूगु थासं झीखुम्हसित उद्धार यानागु खः, उकि मध्ये च्याम्ह सीगु दु सा च्याम्ह घाःपाः जूगुलि घाःपाःजूपि स्थानीय अस्पतालय् उपचार जुया जुयाच्वंगु दु,’ डिएसपी जयसवालं धाःगु दु।

घटना जूगु थासय् नेपाली सेना, सशस्त्र प्रहरी व नेपाल प्रहरीया टोलीपिन्स उद्धार यायेगु ज्या जुयाच्वंगु दु।