बिष्णु–नाति फोटो पत्रकारिता सिरपाः नरेश श्रेष्ठयात छगू ज्याझ्वः दथुइ थौं लःल्हागु दु।

बागमती प्रदेशया पयर्टन, संस्कृति व सहकारी मन्त्री पुकार महर्जनं छगु ज्याझ्वःया दथुइ हिमालय टाइम्सया फोटो पत्रकार श्रेष्ठयात हनापौ लःल्हानादीसे हनादीगु खःसा दाता बिष्णु देबी महर्जनं नगद झीद्धः नगद सिरपाः लःल्हानादीगु खः।

अथेहे मन्त्री महर्जनं ताः ईनिसे बाजं स्यनिइगु ज्या यानादीम्ह सुनिता महर्जनयात बाद्य गुरुया सम्मान लःल्हानादीगु खः। थौं बिष्णु–नाति फोटो पत्रकारिता सिरपाः गुथिया ग्वसालय् जूगु उगु ज्याझ्वलय् बरिष्ठ फोटो पत्रकार नातिकाजी महर्जन व वयकःया जहान बिष्णु देबी महर्जनं उगु सिरपाः निस्वादीगु खः।

पुर्णिमा शाक्यं न्ह्याकादीगु उगु ज्याझ्वलय् बरिष्ठ फोटो पत्रकार अमर चित्रकार, रासस राजु शाक्य, नेवाः पत्रकार राष्ट्रिय दबूया नायः नृपेन्द्रलाल श्रेष्ठपिन्स न फोटो पत्रकारिताया महत्व नाप सिरपाः त्याकादीपिन्त भिंतुना देछानादीगु खः। 

नेवाः न्ह्यलुवाः लिसें पुलांम्ह स्वास्थ्य राज्यमन्त्री, न्हूदँ समारोह समितिया सल्लाहकार समितिया कजि तीर्थराम डंगोलया आत्मबृतान्त ‘काठमाडौं कांग्रेस व तीर्थराम’ या सफूयात कयाः समीक्षाया लिसें चर्चा परिचर्चा ज्याझ्वः जूगु दु ।

येँया नेपाः ब्यांक्वेटय् म्हिगः शनिवाः जूगु उगु ज्याझ्वलय् डंगोललिसें वय्कःया तिरिमय्जु तेज डंगोल झायादीगु खः । उगु समीक्षा ज्याझ्वलय् नेवाः न्ह्यलुवाः मल्ल के सुन्दरं तीर्थराम डंगोल तसकं इमान्दारम्ह व्यक्ति जूगु दसि जूगु उगु सफू ब्वनाः सकसिनं सिकेफइगु खँ कनादिसें तीर्थराम डंगोलया राजनीतिक जीवनय् अजूचायापूगु ढंगं जूगु खः तयादीगु खः ।

नेवाः न्ह्यलुवाः मल्लं वय्कःया उगु सफू दुने डंगोलया व्यवसाय कथं मचिकंया डिलर कयाः ज्या यानादिल । तर छन्हु वय्कःयात छम्ह मनुखं मचिकंया डिलर जुइगु कि, लिडर जुइगु ? धकाः न्यंगु न्ह्यसलं वय्कःयात थिलं । वय्कलं मचिकंया डिलर त्वःता लिडर जूगु खँ कनादिसें सफू दुने इमान्दरपूर्वक यक्व हे खँत मग्याःसे गनं सुचुकेगु ज्या मयाःसे च्वयातःगु खँ कनादिल ।

सफूया समीक्षा यायेगु झ्वलय् न्हूदँ समारोह समिति ११४३ या नायः प्रा.डा. नरेशमान बज्राचार्यं तीर्थराम डंगोलया सफू न्हूपुस्तायात ब्वंके हे माःगु सफू जूगु विचाः प्वंकूसें थःपिन्सं न्हापा तीर्थराम डंगोलयात पुलांम्ह मन्त्री धकाः जक म्हसीकूगु खःसा उगु सफू ब्वनेधुंकाः वय्कःप्रति थःपिनिगु स्वयेगु दृष्टिकोण हे पाःगु धासें थुकथंया सफू मन्त धाःसा इतिहास हे तनीगु खँ तयादिल । बज्राचार्यं मेपिं नेवाः न्ह्यलुवाःपिन्त नं थः बल्लाःगु हे इलय् तीर्थराम डंगोलंथें आत्मबृतान्त च्वयेत इनाप नं यानादिल ।

उगु सफूया समीक्षा ज्यापु महागुथि, येँ महानगर समितिया न्वकू लिसें न्हूदँ समारोह समितिया दुजः नानीहेरा महर्जन, नेवाः अभियन्ता भगवान शाक्य, अथेहे, येँ महानगरपालिकाया प्रवक्तालिसें येँ मनपा १७ वडाया वडाध्यक्ष नविन मानन्धरपिन्स यानादीगु खःसा तीर्थराम डंगोलया व्यक्तित्वयात कयाः पुलांम्ह रक्षामन्त्री भीमसेन दास प्रधानं थःगु नुगःखँ तयादीगु खः ।

ज्याझ्वलय् पुलांम्ह महान्यायाधिवक्ता मुक्ति प्रधान लिसें थीथी हनेबहःपिं व्यक्तिपिंउपस्थित जूगु उगु ज्याझ्वः नेवाः अभियन्ता सुजीव बज्राचार्यं न्ह्याकादीगु खः ।

बरिष्ठ अभिनेता सानु ताम्राकार थौं शनिवाः मन्त । वयकः थौं शनिवाः न्हिनसिया ३ बजे जुया २० मिनेतय् मदुगु खः।

नर्भिक अस्पतालय् वासः यायेगु झ्वलय् मदुगु खः। ७४ दँ दुम्ह ताम्राकार २८ दिं निसे जलास्येँ सम्बन्धी समस्याया उपचार यानाच्वनादीम्ह खः।

ताम्राकारया पार्थिव शरीरयात कन्ह्यः आइतवाः पशुपतिया आर्यघाटय् दाहसंस्कार यायेगु तयारी दु धका चलचित्र कलाकार संघया अध्यक्ष मोहन निरौलां धाःगु दु।

वगु असार २१ गते काय् कलाकार सारुक मदुगु खः।

हलि नेवाः दबू नेपाः च्याटरं हलि नेवाः दबूया केन्द्रिय नायः सयुक्तm श्रेष्ठयात छगू ज्याझ्वः दथुइ हना ज्याझ्वः याःगु दु।

बिशेषपाहाँ येँ महानगरपालिकाया निवर्तमान मेयर बिद्यासुन्दर शाक्यं स्वामां क्वखाय्का व मूपाहाँ बागमती प्रदेशया संस्कृति, पर्यटन लिसे सहकारीमन्त्री पुकार महर्जनं दबूया केन्द्रिय नायः श्रेष्ठयात हनादीगु खः।

नेपाः च्याटरया नायः सुरेन्द्रभक्त श्रेष्ठया सभाध्यक्षताय् जुगु उगु ज्याझ्वलय् थी थी पदय् मनोनित जूपिन्त मूपाहाँ मन्त्री महर्जनपाखे मनोनित जूपिन्त पौ लःल्हाःगु खः। नेपाः च्याटरय् मू संरक्षक कथं समाजसेवी पञ्चवीर सिंह तुलाधर, संरक्षकय् सुवर्णकेशरी चित्रकारयात मनोनित याःगु खः।

अथेहे, सल्लाहकारय् नरेन्द्रभक्त हाडा, पुष्करभक्त माथेमा, अम्बिका श्रेष्ठ, रघुवरभक्त मानन्धर, विजय प्रकाश सैंजु, ई. नहेन्द्र प्रधान, सुर बहादुर श्रेष्ठ, हरि स्यस्यः व उमेश स्थापितयात मनोनित याःगु खः।

दुजलय् अम्बिका तुलाधर, उत्तम श्रेष्ठ, निराकार श्रेष्ठयात मनोनित याःगु खः।

नेपालभाषाया बरिष्ठ च्वमि नाप संस्कृतिविद् ज्ञानकाजी मानन्धर थौं मन्त ।

ताः ई न्ह्यवंनिसें जलस्येँया ल्वचं कयाः उसाँय् मदयाच्वंम्ह वय्कः ८९ दँय् थौं सुथय् भ्वँतया थःगु हे छेँय् मदुगु खः । भ्वँतया कला, संस्कृति व सम्पदाया बारे अध्ययन यानाः वय्कलं तःगू सफू च्वयादीगु दु ।

अथे हे वय्कलं भ्वँतया थीथी धार्मिक, सांस्कृतिक बाखंयात नाट्य रुपान्तरण यानाः नाटक सफू नं च्वयादीगु दु । कपिलवस्तुस भगवान्, कुमारी, खड्गजोगिनी, बनेपा स्तवन, अरनिकोया श्वेतचैत्य, मानन्धरतय्गु विषय छुं खँ वय्कःया नांजाःगु सफूत खः ।

अथे हे वय्कलं अंग्रेजी भासं ‘द लिजेण्ड अफ नेपाल’ नांगु सफू नं च्वयादीगु दु । वय्कलं भ्वँतया चण्डेश्वरी, येँया कुमारी, ख्वपया नवदुर्गा, पन्तिया इन्द्रेश्वर महाद्यः, किपूया बाघभैरव, गोर्खाया गोरखनाथ आदि बारे नं अनुसन्धान यानाः च्वसुत च्वयादीगु दु ।

मदुम्ह मानन्धरया अन्त्येष्टि थौं हे भ्वँतय् यायेत्यंगु दु । वय्कः जहान लिसें निम्ह काय् व निम्ह म्ह्याय् दी ।