लुँया भाः थौं निद्धः थहावंगु दु। लुँ तोलां निद्धः थहावनां थौ १ लाख २१ हजार रुपैयाँ तोके याःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां नीतका थहावंगु दु। वहः तोलां नितका थहावना थौ १ हजार ४ सय १० रुपैयाँ न कारोबार जूगु दु।

नेवाः देय् दबू किपू नगर समितिया निक्वःगु बुँसा दँ हनेगु झ्वलय् किपू नगर दुने रञ्जना लिपि छ्यलाः साइनबोर्ड तयातःगु सरकारी ज्याकू, खलः पुचः, पसःनिसें स्कूल, कलेजयाना ८० गू संस्थायात हंगू दु।

शनिवाः देय् दबू किपू नगर समितिया नायः बुद्धिलाल ज्यापुया सभाध्यक्षताय् जूगु उगु ज्याझ्वलय् मूपाहाँ कथं देय् दबू स्वनिगः विशेष प्रदेशया नायः श्रीकृष्ण महर्जनया मूपाहांसुइ हनेज्या जूगु खः। किपू भाजंगःया भैलः द्यःया देगःयात कालुपाण्डेया स्तूप धकाः गलत कथं प्रचार यानातःगु अवस्थाय् उगु गलत प्रचारयात खण्डन यायेगु सन्देश बिइत व हे भैलःद्यः दुगु थासय् मुना नेवाः ध्वाँय ब्वयेका ¥याली याना अजूचाइपुगु दिप कथं नालातःगु भाजंगःया दिप दुगु विष्णुदेवी देगः लनगाय् थ्यंकाः समारोह जूगु खः।

भाजंगःया उगु दिप दुगु लागाया सांस्कृतिक भूमि संरक्षणया नितिं नेवाः समुदाय आन्दोलित जुयाच्वंगु अवस्थाय् थःपिनिगु नं एक्यबद्धता दु धकाः सन्देश बिइगु कथं अन हे देय् दबूपाखें ज्याझ्वः याःगु खः।

ज्याझ्वलय् मूपाहाँ देय् दबू स्वनिगः विशेष प्रदेश समितिया नायः महर्जनं नेवाः देय् दबू किपू नगर समितिं सकल नेवाःतय्त सन्देश बिइगु कथं ज्याझ्वः याना वयाच्वंगु दु धयादिसें विगतय् बागमती प्रदेशय् नेपालभाषायात सरकारी कामकाजि भाषाया रुपय् लागू याकेगु नितिं सतकय् तकं क्वहां वःगु लिसें थीथी गतिविधि यानाच्वंगु च्वछाय् बहःजू धयादिगु खः।

अथेहे, पाहाँपिं देय् दबू येँ जिल्लाया छ्याञ्जे धनवीर महर्जन, ज्यापु महागुथि किपू नगर समितिया नायः रामभोला महर्जनपिन्सं न ब्बति कयादीगु खः।

येँ महानगरपालिका २४ वडाया न्हूगु भवन दयकेगु नितिं फागुन १७ गते विहिवाःया जग शिलान्यास यायेगु ज्या जूगु दु।

२४ अध्यक्ष विनोदकुमार राजभण्डारीं जग शिलान्यास यानादीगु खः। उगु भवन साढे ३ आना जग्गाय् लिप्ट नाप साढे ३ तल्लाया दयकेत्यःगु खः।

भ्याट बाहेक ३ करोड ३३ लाख २१ हजार ५ सय १९ दांया लगतय् दयकेत्यंगु खः।

केन्द्रीय मानन्धर संघं शनिवाः हेटौंडाय् साँस्कृतिक ज्याझ्वः याःगु दु। येँ महानगरपालिकाया साझेदारी, संघया युवा व सञ्चार उपसमितिया संयोजन व हेटौंडाया मानन्धर गुठीतयेगु सहकार्यय् उगु ज्याझ्वः जूगु खः।

उगु ज्याझ्वलय् बागमती प्रदेशया कृषि लिसे पशुपन्छी विकास मन्त्री डा. राजेन्द्रमान श्रेष्ठ मूपाहाँ व केन्द्रीय मानन्धर संघया केन्द्रीय अध्यक्ष मनोजकुमार मानन्धरया सभाध्यक्षताय् बागमती प्रदेशया सांसदपिं एकालाल श्रेष्ठ व शैलेन्द्र बज्राचार्य विशेष पाहाँ कथं ब्बति काःगु खः।

मन्त्री श्रेष्ठं जाति, भाषा व संस्कृति प्रदेशनापं देय् या सम्पत्ति जूगुलि थुकिया संरक्षण व प्रबर्द्धन यायेगु निति दक्को मिले जूया न्ह्याः वनेमाः धका धयादीगु खः। नेपाःया गौरब कथं नेपाल भाषा, नेवाः संस्कृति नापं  नेपाल सम्बत महत्वपूर्ण जूगु धका धयादीगु खः।

बागमती प्रदेशया सांसद एकालाल श्रेष्ठं प्रदेशय् नेवाः व तामाङ भाषायात सरकारी कामकाजया भाषा दयके धुकुगुलि नेपाल भाषा, संस्कृति संरक्षण यायेगु निति सरकार, नेवाः समुदाय व संघसंस्था छथाय् च्वना ज्यायाना न्ह्याः वनेमाः धका धयादीगु खः। प्रदेश सांसद शैलेन्द्र बज्राचार्यं संघीयताया बारेय् नकारात्मक धारणा वयाच्वगुलि राजनीतिक, भाषिक, साँस्कृतिक अधिकार कायेत संघीयतां महत्त्वपूर्ण भुमिका म्हितूगु दु धका धयादीगु खः।

हेटौंडा थे साँस्कृतिक ज्याझ्वः पर्साया वीरगञ्ज व बाराय् जुइ धका नेवाः पत्रकार राष्ट्रिय दबूया केन्द्रीय महासचिव व केन्द्रीय मानन्धर संघया केन्द्रीय सदस्य केके मानन्धरं जानकारी बियादीगु खः।

कवाडी व्यवसाय सञ्चालन याके मबिउगु धासे कवाडी व्यवसायी तयेस येँ महानगरपालिकाविरुद्ध प्रदर्शन याःगु दु।

येँ महानगरपालिकाय् दर्ता जूगु व्यवसाय चिइकेगु धका वडा कार्यालयं छ्वं पत्रयात कया विरोध यासे कवाडी व्यवसायी तय्सं प्रदर्शन याःगु खः। उमिसं अनाधिकृत कथं कवाड चिइकेगु ज्या बन्द याः, अदालतया निर्णय सम्मान याः, कानुनी शासन लागू याः, जिमिगु व्यवसायय् जूगु हस्तक्षेप बन्द याः ज्वनातःगु प्लेकार्ड ज्वना प्रदर्शन याःगु खः।

येँ महानगरपालिकाया रिङरोड दुने कवाडी व्यवसाय चिइकेगु नीतिया विरुद्ध व महानगरपालिका दुने थीथी वडा कार्यालयपाखे कवाडी व्यवसायदर्ता नवीकरण मयागु धासे उकिइ आपत्ति प्वकूगु खः।