लुम्बिनी बौद्ध विश्वविद्यालयया उपकुलपतिइ प्रा. डा सुवर्णलाल बज्राचार्य नियुक्त याःगु दु।

सिफारिस समितिइ याःगु सिफारिसया आधारय् विश्वविद्यालयया कुलपति लिसें प्रधानमन्त्री पुष्पकमल दाहाल ‘प्रचण्ड’ थौं बुधवाः वयकःयात नियुक्त याःगु खः ।

उगु पद वंगु खुला न्ह्यः निसें खालि जुयाच्वंगु खः। प्रा.डा. बज्राचार्य त्रिभुवन विश्वविद्यालयपाखें अवकाश कायेधुकक्ह प्राध्यापक न खः।

विद्यालय व्यवस्थापन समितिइ अध्यक्ष वडा अध्यक्षपिन्त हे तया व्यवस्थापन समिति विघटन यायेगु येँ महानगरपालिकाया निर्णय सर्वोच्च अदालतं अंकुश तयाबिगु दु।

संवैधानिक इजलासय् थौं बुधवाः हितवीर सिंह कंसाकारपिन्स तःगु रिटय् अन्तरिम आदेश बिउसे अदालतं येँ महानगरपालिका क्षेत्रय् सामुदायिक विद्यालय व्यवस्थापन समिति तत्काल विघटन मयायेत आदेश बिःगु दु।

प्रधानन्यायाधीश विश्वम्भर श्रेष्ठ नेतृत्वया संवैधानिक इजलासय् न्यायधीशपि ईश्वर खतिवडा, आनन्दमोहन भट्टराई, प्रकाशमानसिंह राउत व सपना प्रधान मल्लपिन्स हे आदेश बिःगु खः।

महानगरपालिकां वंगु साउन ३० गते च्वंगु नगरसभां सामुदायिक विद्यालयय् दूगु व्यवस्थापन समितियात विघटन यायेगु व सम्बन्धित वडाया अध्यक्ष वा अध्यक्षपिन्स क्वछिइपि मनूपिन्त विद्यालय व्यवस्थापन समितिइ अध्यक्ष दयकेग व्यवस्था यायेगु निर्णय याःगु खः।

येँ महानगरपालिकाय् दुने ८९ गू सामुदायिक विद्यालय दु। कंसाकार नाप १८ गु विद्यालय व्यवस्थापन समितिया अध्यक्ष महानगरया मेयर बालेन शाहयात विपक्षी दयका अदालतय् वंगु खः। अदालतं महानगरयार्त कारण क्यंनेत आदेश जारी यासे तत्काल उगु निर्णय कार्यन्वयन मयायेत अन्तरिम आदेश जारी याःगु खः ।

शेयर बजाः थौं बुधवाः न कुहावःगु दु। म्हिगः मङ्गलवाः न्यागु अङ्कं कुहावःगु दु शेयर बजाः परिसूचक नेप्से थौं २ दशमलव ८२ अङ्कं कुहावया १ हजार ९ सय ९० दशमलव ५९ विन्दुइ थ्यःगु दु।

होटल व व्यापार समूहबाहेक मेगु दक्को समूहया शेयर कुहावःगु दु। दकलय् अप्पो सिद्धार्थ इक्विटी फन्डया शेयर ८ प्रतिशत व महिला लघुवित्त वित्तीय संस्थाया शेयर ६ प्रतिशतं कुहावःगु दु।

समग्र बजाः कूहावंसा न सिटी होटलया शेयर झन्डै १० प्रतिशतं थहावःगु दु। बजाः घटे जूसा न कारोबार रकमय् धाःसा सुधार वःगु दु।

म्हिगः साढे ८६ करोड रुपैयाँ न शेयर कारोबार जूगुलि थौं ३८ लाख ३ हजार कित्ता शेयर १ अर्ब १३ करोड रुपैयाँया कारोबार जूगु दु। दकलय् अप्पो माछापुच्छ्रे बैंकया १० करोड रुपैयाँया शेयर कारोवार जूगु दु।

नेकपा एमाले नेतापि च्वनावंगु वुद्ध एयरया जहाज  जनकपुर विमानस्थल न्ह्यने थ्यःसा हाकन येँ हे लिहावःगु दु।

सिरहाय् जुइगु सचिवालय बैठकय् ब्बतिइ कायेगु निति वरिष्ठ उपाध्यक्ष ईश्वर पोखरेल, उपाध्यक्षपि सुवास नेम्वाङ, बिष्णु पौडेल, अष्टलक्ष्मी शाक्य, उपमहासचिव बिष्णु रिमाल, नेता अमृत बोहरापि बुद्ध एयरया विमानं जनकपुर वंगु खः।

तर जनकपुर विमानस्थलय् आकाशय् हे परिचारिकां छू प्राविधिक समस्याया कारण क्यसे जनकपुर दिकेमफइगु जानकारी बिःगु खः। वया लिपा उगु जहाज येँ हे लिहावःगु खः।

थुगु दँय् गुंपुन्हि व सापारु गुकुन्हु हनेगु धकाः नेपालय् जक मखु भारतय् नं अन्यौलता पिहां वयाच्वंगु दु ।

भारतय् राखी गुवलय् चीगु धइगु खँय् विवाद पिहां वःगु दु । अन हिन्दूतय् गुंपुन्हि कुन्हु तता केहेँ नं दाजु किजापिन्त ल्हातिइ राखी चिकेगु परम्पर दु।

तर गुंपुन्हि १४ गते खः लाकि १५ गते खः धइगु विवाद पिहां वः थें अन राखी बन्धन अगष्ट ३० तारिख कुन्हु खः कि ३१ तारिख कुन्हु खः धकाः विवाद ब्वलनाच्वंगु दु ।

अन नं ३० व ३१ तारिख धाइपिं विभाजित जुयाच्वंगु दु ।