सरकारया प्रवक्ताया जिम्मेवारी सञ्चार लिसे सूचना  प्रविधिमन्त्री रेखा शर्मायात बिगु दु।

थौ बिहीवाः च्वंगु मन्त्रिपरिषदया न्हापागु बैठकय् मन्त्री शर्मायात सरकारया प्रवक्ता दयकेगु क्वछिगु दु। वयकः थ्व स्वया न्ह्यःया सरकारय् न प्रवक्ता जूयादीगु खः।

मन्त्रिपरिषद् बैठकया निर्णय सार्वजनिक यासे प्रवक्ता शर्मां संयुक्त राष्ट्रसंघया कमिसनअन द स्ट्याटस अफ वुमन सीएसडब्ल्यूया ६८ क्वःगु सत्रय् ब्बति कायेगु निति महिला, बालबालिका लिसे ज्येष्ठ नागरिकमन्त्री भगवती चौधरीयात स्वीकृति बिइगु निर्णय जुगु जानकारी बियादीगु खः।

नेपाःया बजारय् लुँ भावं न्हुगु रेकर्ड तःगु दु। लुँया भाः आतक हे दकलय् अप्पो थ्यःगु दु। नेपाल सुनचाँदी व्यवसायी महासङ्घया कथं थौ लुँ तोलां १ हजार ५ सय रुपैयाँ थहावना १ लाख २५ हजार रुपैयाँ थ्यःगु दु।

अथेहे वहःया भाः न थौ तोलां स्वीतका थहावःगु दु। वहः तोलां स्वीतका थहावना १ हजार ४ सय ७० रुपैयाँ न कारोबार जुयाच्वंगु दु धका महासङ्घं धाःगु दु।

समाजसेवी माोतिशान्ति शाक्य ललितपुर उद्योग वाणिज्य संघय् छात्रवृत्ति नाप सामाजिक उत्तर दायित्व समितिइ सल्लाहकार मनोनित जुयादीगु दु।

वयकःयात अध्यक्ष बिश्वराज बज्राचार्यं संघय् छात्रवृत्ति लिसे सामाजिक उत्तर दायित्व समितिइ शर्मिला श्रेष्ठ जोशीया संयोजकत्वय् फाल्गुण २३ गते बुधवाः च्वंगु सचिवालयया वैठकं मनोनित याःगु खः।

किपू नगरपालिका वडा नम्बर १ या वडाध्यक्ष हिरालाल महर्जन मन्त। क्यान्सर ल्वचं पीडित  जूयाच्वम्ह महर्जन थौ चान्ह्यः वयकःया हे छेँय् मदुगु खः।

अस्पतालं महर्जनलयात म्हिगः हे छेँय् हःगु खः। वडाध्यक्ष महर्जनया पार्थिव शरीर थौ किपू नगरपालिकाया कार्यालयय् श्रद्धाञ्जली बिइगु निति तइगु जुगु दु।

६० दँ दुम्ह वयकः महर्जन २०७९ य् नेपाली कांग्रेसपाखे किपू कीर्तिपुर नगरपालिका वडा नम्बर १ या अध्यक्षय् निर्वाचित जूगु खः।

नेपाल राष्ट्रिय खड्गी समाज जिल्ला समिति कास्कीया प्यक्वःगु तःमुँज्या क्वचाःगु दु। उगु ज्याझ्वलय् समाजया केन्द्रीय उपाध्यक्ष अरोजकुमार शाही मूपाहाँ कथं झायादीगु खःसा नेवाः खलः कास्कीया अध्यक्ष अशोक पालिखे, पोखरा मनपा १ वडाया अध्यक्ष साहारा प्रधान विशेष पाहाँ कथं झायादीगु खः।

कास्की जिल्ला समितिया अध्यक्ष हर्खमान शाहीया अध्यक्षताय् जूगु उगु ज्याझ्वलय् जिल्ला सचिव विजय शाहीं न्ह्याकादीगु ज्याझ्वलय् मिलन शाहीं संगठनया बारे खँ तयादीगु खः। ज्याझ्वलय् कास्कीया थीथी संगठनया प्रतिनिधिपिंसं भिंतुना न्वचु बियादीगु खः।

खड्गी समाज कास्की जिल्लाया ज्याथःपिं दुजःपिं लिसें भेट्रान धावक आइलाल शाही, २०७७ निसें २०७९ तकया दुने एसईई पास यानादीपिं संगठनया दुजःपिनि मस्त व संगठनया आर्थिक ग्वाहालि यानादीपिंत सम्मान नं याःगु खः।

ज्याझ्वलय् थीथी सांस्कृतिक ब्वज्या नं जूगु खः । तःमुँज्यां विकल शाहीया अध्यक्षताय् न्हूगु कार्यसमिति नं ल्यःगु दु। न्हूगु कार्यसमितिइ निर्मल खड्गी, सेते शाही, जगत लाल शाही व आनन्द शाही उपाध्यक्ष, बिजय शाही महासचिव, श्याम शाही उप महासचिव, आईलाल शाही सचिव, कृष्णलाल शाही कोषाध्यक्ष, सरिता साही सह–कोषाध्यक्षय् ल्यःगु खःसा यम बहादुर शाही, राज कुमार शाही, राममाया शाही, नुन कुमार शाही, कृष्ण खड्गी, तिर्थमाया शाही, पूर्णसिं खड्गी, सानु शाही व बिष्णु वmुमार खड्गीयात दुजलय् ल्यःगु खः।