यल महानगरपालिकां ६ अर्ब ५० करोड ५ लाख ८८ हजार रूपैयाँया बजेट हःगु दु। उपमेयर मञ्जली शाक्य बज्राचार्यं बजेट सार्वजनिक याःगु खः।

साढे ६ अर्बया बजेटय् पूँजीगतपाखे ४ अर्ब २१ लाख ४६ हजार व चालूपाखे २ अर्ब ४९ करोड ८४ लाख विनियोजन याःगु खः।

यल महानगरं सतक पूर्वाधार, सम्पदा संरक्षण, छगू वडा छगू उद्यान, छखाः छेँ छगु सिमा, स्मार्ट स्ट्रिट लाइट, प्रत्येक वडाय् सार्वजनिक शौचालय, अपाङ्गमैत्री फुटपाथलगायत विषययात प्राथमिकता बिःगु दु।

वकबज्र अध्ययन मण्डलपाखें बज्रयान पुजाविधि सयकूपिन्त दसिपौ लःल्हागु दु।

मैत्रीपूर्ण महाविहार  संरक्षण समिति क्वाःबहाःया नायः महेश बज्राचार्यया सभाध्यक्षताय् जूगु उगु ज्याझ्वलय् मूपाहाँ कथं येँ महानगरपालिका १७ वडाध्यक्ष नविन मानन्धर व २५ वडाध्यक्ष राजेश महर्जन झायादीगु खः।

राजु बज्राचार्य, सजन बज्राचार्य व ज्ञानकाजी बज्राचार्यपिन्स प्रशिक्षण बियादीगु खः।

येँ महानगरपालिकां वइगु आर्थिक दँ २०८०÷८१ या लागि बजेट हःगु दु । थौं आइतवाः महानगरया उपमेयर सुनिता डंगोलं नगरसभाया बैठकय् वइगु आर्थिक दँया लागि २५ अर्ब ५४ करोड रुपैयाँया बजेट न्ह्यब्बःगु खः।

बजेटय् चालुपाखे ८ अर्ब ६१ करोड ५३ लाख २८ हजार (३३ दशमलव ७२ प्रतिशत) व पुँजीगतपाखे १६ अर्ब ९३ करोड २४ लाख ९२ हजार रुपैयाँ (६६ दशमलव २८ प्रतिशत) विनियोजन याःगु खः।

महानगर दुने दक्को सतक व पेटीमध्ये विस्तृत परियोजना प्रतिवेदन (डीपीआर) दुगु सतक व पेटीइ मर्मत लिसे निर्माण याना ’धुलोरहित काठमाण्डौ’ योजनायात कार्यान्वयन यायेगु धका बजेटय् उल्लेख याःगु दु ।

थुगु योजना कथं थीथी ज्याझ्वः सञ्चालन यायेत १ अर्ब रुपैयाँ विनियोजन यानागु दु धका उपमेयर डंगोलं जानकारी बिःगु दु। अथेहे सडक निर्माणया ज्याय् थप व्यवस्थित दयकेत थःगु हे आस्फाल्ट प्लान्ट स्थापनायासे पूर्वाधार एम्बुलेन्सयात प्रभावकारीरूपं सञ्चालन यायेत २५ करोड रुपैयाँ विनियोजन याःगु दु।

सेयर बजाः थौं भचा थहावंगु दु। कारोबार रकम साढे ६ अर्ब थ्यःगुलि थौं बजाः ६२.२१ अंकं थहावना २११७.७३ विन्दुइ थ्यःगु दु। थौं बजाः ३.०३ प्रतिशतं थहावःगु दु।

आइतवाः दक्को उपसूचकय् लगानीकर्तापि उत्साह खनेदुगु दु। उकि मध्ये दकलय् अप्पो जीवन बीमा कम्पनीइ (७.७९ प्रतिशत) थहावंगु खः। आइतवाः २२ गू धितोपत्रया कारोबार सकारात्मक सर्किट लेवलय् थ्यःगु दु।

दक्कोयाना २७५ गू धितोपत्रया ९० हजार २४९ गू कारोबारपाखे १ करोड ४७ लाख ५१ हजार २४७ कित्ता सेयर किनबेच जूगु खः। अथेहे ६ अर्ब ४९ करोड ४ लाख १२ हजार ६६५ रुपैयाँया कारोबार जूगु खः।

लाइफ इन्स्योरेन्स कर्पोरेसन, हिमालय लाइफ इन्स्यारेन्स, एनएमबी ५०, सामलिङ पावर कम्पनी, बीपीडब्लू लघुवित्त संस्था नापं कम्पनीया कारोबार सकारात्मक सर्किट लेवलय् थ्यःगु खः।

बजाः थहावंसा थौं शुभम् पावर, एनआईबीएल ग्रोथ फण्ड, पाँचथर पावर, तेह्रथुम पावरया धितोपत्रया भाः कुहावःगु दु। आइतवाः शिवम् सिमेन्ट, सोल्टी होटेल, हिमालयन डिष्टिलरीपिनिगु यक्को धितोपत्र कारोबार जूगु खः।

येँ महानगरपालिकां थःगु हे टेलिभिजन स्थापना याइगु जूगु दु। आर्थिक वर्ष २०८०÷८१ या बजेट प्रस्तुत यासे उपप्रमुख सुनिता डंगोलं अथे घोषणा याःगु खः।

टेलिभिजन स्थापनाया लागि महानगरं ५ करोड रुपैयाँ विनियोजन यानागु दु धका जानकारी बिःगु खः।