विराट नेपालभाषा साहित्य सम्मेलन गुथिपाखें नेवाः न्ह्यलुवाः मल्ल के सुन्दरयात विराट पूर्ण वैद्य लुमन्ति सिरपा लःल्हाःगु दु।

नेपालभाषा आकादेमिया चान्सलर यज्ञरत्न धाख्वांं दोसल्लां न्ययेकादीगु खःसा ज्याझ्वःया मूपाहाँ योगेन्द्र प्रधानंं हनापौ देछानादीगुलि सिरपाया दाता मिरा शाक्य वैघं छगू लखया ध्यवा लःल्हानादीगु खः।

उगु ज्याझ्वलय् अनिल स्थापित व राकेश मान मास्केयात विराट सुरत्न सिरपा नं देछायगु ज्या जूगु खः ।

कन्ह्यः कात्तिक ११ गते शनिवाः खण्डग्रास चन्द्रग्रहण जुइगु दु धका नेपाल पञ्चाङ्ग निर्णायक विकास समितिं धाःगु दु।

चान्ह्यः १ः१९ बजे निसे सुरु जुइगु चन्द्रग्रहणया सुतक न्हिनय् ४ः१९ बजेनिसे सुरु जुइ धका समितिया सदस्य प्रा.डा.देवमणि भट्टराई न जानकारी बिःगु दु । चान्ह्यः २ः३८ बजे ग्रहण सिधइ धका पञ्चाङ्गं धाःगु दु।

चन्द्रग्रहण २०८० छगु हे जक दुगु धका विकास समितिं धाःगु दु।

पत्रकार नापं सार्क जर्नलिष्ट फोरमया केन्द्रिय अध्यक्ष राजु लामाया अबु नेत्र बहादुर तामाङ मन्त ।

तामाङ वासः यायेगु झ्वलय् ७७ दँय् काठमाण्डौं क्यान्सर सेन्टरय् म्हिगः न्हिनय् २ः१५ बजे बुधवाः मदुगु खः। वंगु खुलानिसे क्यान्सर ल्वचं पिडित जुयाच्वम्ह वयकः वासः यायेगु झ्वलय् मदुगु खः।

मदुम्ह तामाङया निम्ह, खुम्ह काय् व न्ह्यय् म्ह्याय् दी । पत्रकार लामा तःधिम्ह काय् खः।

मदुम्ह तामाङयात म्हिगः हे अन्त्येष्टि याःगु खः।

उपप्रधानमन्त्री नापं गृहमन्त्री नारायणकाजी श्रेष्ठ थौं येँ लिहावःगु दु। चीन भ्रमणय् वनाच्वंम्ह श्रेष्ठ अन हे हृदयाघात जुइवं बेइजिङय् उपचार यानाच्वंगु खः।

श्रेष्ठं बेइजिङस्थित पेकिङ युनियन मेडिकल कलेज हस्पिटलय् न्यान्हु तक उपचार यानाच्वंगु खः। वासः याना उपप्रधान लिसे गृहमन्त्री श्रेष्ठ बुधवाः येँ लिहावःगु खः।

वंगु १७ व १८ अक्टोबरय् बेइजिङय् स्वंगू बेल्ट एण्ड रोड फोरम फर इन्टरनेशनल कोअपरेसन (बीआरएफ) य् ब्बति कायेगु निति श्रेष्ठ चीनय् वंगु खः।

तलेजु द्यःया वाहन प्रतीक कथं तुयूम्ह सलं जात्रा क्वचाःगु दु । ऐतिहासिक लिसे सांस्कृतिक महत्व जाःगु सलं जात्रा दँय् दँसं मोहनिया दशमी व एकादशीया चान्ह्य यायेगु परम्परा दु ।

जात्रा यायेगु न्ह्यः तलेजुया प्यम्ह मू नाइके, आचाःजु, जोशी, राजोपाध्यायपाखे तान्त्रिक विधि कथं तलेजु द्यःया थाय् चान्ह्यः पूजा, सिंन्हंया साइत पूजा याना विर्सजन पूजा क्वाइकिइगु याइ ।

पूजा क्वचाय् धुकां सलंया विधिवत्रुपय् पूजा याना ख्वपय् चाहिकां तलेजुया आचाःजु सिद्धिविर कर्माचार्यं जानकारी बिइगु याइ ।

सलंयात तलेजुया मू चुक पिने हया ख्वप नगरया क्वया दरबारया खौमा, इटाछें, भार्वाचो, वंशगोपाल, भुजीकोखा, नारायण चुक व च्वयेया दरबार दुने खिछें, चोछें, भोलाछें, थालाछें, दत्तात्रय, गोलमढी, सुकुलध्वाका व तमारी जूया नारायण चुकय् चाःहिका जात्रा क्वचायेकिइगु याइ ।