नागरिकताया माग यासे येँया माइतीघर मण्डलाय् आन्दोलन यानाच्वपि सर्वसाधारणपिन्त प्रहरीं थौं बल प्रयोग याःगु दु।

राष्ट्रपति रामचन्द्र पौडेलं प्रमाणीकरण याये धुका नागरिकता विधेयक सर्वोच्च अदालतं कार्यान्वयनय् पना बिःगुलि थःपिन्त नागरिकतापाखे वञ्चित जूगु धका धासे नागरिकता पीडित संघर्ष समितिं माइतीघरय् प्रदर्शन याःगु खः।

मंगलवाः धासा अन प्रहरीं आन्दोलनय् हस्तक्षेप याःगु खः। निषेधित क्षेत्रय् प्रदर्शन याःगु धासे प्रहरीं बल प्रयोग याःगु खः।

राष्ट्रपतिं प्रमाणीकरण याःगु नागरिकता विधेयकय् बुगुया आधारय् नागरिकता दुपि सन्तानयात वंशजया नागरिकता बिइगु व्यवस्था दु।

तर उगु व्यवस्था कार्यान्वयन मजुगुलि बुगु आधारय् नेपाली नागरिकता कयातःपि सन्तानपि नागरिकताविहीन जुयाच्वंगु दु।

पशुपति क्षेत्र विकास कोष सञ्चालक परिषदया सदस्यय् शिक्षित पराजुली व हरिनाथ ढकाल नियुक्त याःगु दु ।

कोष सञ्चालक परिषदया सदस्य तक जुयादीम्ह संस्कृति, पर्यटन लिसे नागरिक उड्डयनमन्त्री सुदन किराँतीं पराजुली व ढकालयात सदस्यय् नियुक्त याःगु दु धका प्रवक्ता रेवतीरमण अधिकारीं जानकारी बिःगु दु।

कोष सञ्चालक परिषदया सदस्य मन्त्री लिसे परिषद् अध्यक्षस्तरीय निर्णयपाखे नियुक्त जुइगु व्यवस्था पशुपति क्षेत्र विकास कोष ऐन, २०४४ य् यानातःगु दु।

ऐनया दफा ८ या उपदफा २ कथं संस्कृतिविज्ञ नाप धार्मिक पर्यटन विज्ञमध्येपाखे म्हतिइ न न्ह्यम्ह सदस्य कोष सञ्चालक परिषदय् नियुक्त यायेगु व्यवस्था दु।

बुद्ध दर्शन, ज्ञान, शिक्षायात मू बिषय दयेका ग्वसाः ग्वःगु बौद्ध हाइकु साहित्य धेंधेंबल्लाकासाया त्याकामिपिन्त छगू ज्याझ्वः दथुइ सिरपाः लःल्हागु दु।

मुक्क ६४ म्ह हाइजिनतय्गु ब्वति काःगु उगु धेंधेंबल्ला कासाय् बिमलप्रभा बज्राचार्य, मिलन शाक्य, रामेश्वर श्रेष्ठ जलन, रामेश्वर मिश्रण श्रेष्ठ व रिता महर्जन याना न्याम्ह उत्कृष्ट हाइजिन घोषणा जूगु खःसा आनन्दसिद्धि तुलाधर, बद्रि बेदना, बुद्धलक्ष्मी बज्राचार्य, दिब्या ताम्राकार, प्रदीप आर तुलाधर, राजु नापित, रिता महर्जन व तेजकृष्ण श्रेष्ठपि च्याम्ह हाइजिनपिन्त नेपाल प्रज्ञाप्रतिष्ठानया उपकुलपति बिमल निभाः श्रेष्ठं सिरपा व दसिपौ लःल्हागु खः ।

अथेहे उगु ज्याझ्वलय् झिपु हाइकु मध्ये उत्कृष्ट न्यापू हाइकु मुनाः “बौद्ध हाइकु” सफू उपकुलपति विमल निभाः, लुम्बिनी बौद्ध विश्वविद्यालयया उपकुलपति तिलकराम आचार्य, डिन माणिकरत्न शाक्यपिन्स मंकाः कथं सफू चिखिफ्यनादीगु खः।

नेवाः हाइकु ख्यः व लुम्विनी बौद्ध विश्वविद्यालय बौद्ध अध्ययन संकायया मंकाः ग्वसालय् जूगु धेंधेंबल्ला कासां नेपालमण्डलया बौद्ध इतिहास, सभ्यता, कला, संस्कृतिया अध्ययन अध्यापनय् ग्वाहालि व तिवः जुइमा धकाः बौद्ध हाइकु धेंधेंबल्लाकासा ग्वसाःग्वयागु नेवाः हाइकु ख्यःया कजि सुरेश प्रधानं जानकारी बियादियादीगु खः।

प्रा.डा.बज्रराज शाक्य, डा.पुष्पराज राजकर्णिकार व धु्रव मधिकर्मीपि निर्णायक मण्डलपि च्वनादीगु खः।

प्रधानमन्त्री पुष्पकमल दाहाल प्रचण्डं समाजवादी मोर्चा राजनीतिक ह्यूपाः विरुद्ध वनिइपिनिगु निति हताःया घोषणा खः धका धाःगु दु।

थौं सोमवाः ’समाजवादी मोर्चा नेपाल’ घोषणा यायेगु झ्वलय् प्रधानमन्त्री नाप नेकपा (माओवादी केन्द्र) या अध्यक्ष प्रचण्डं मोर्चा घोषणा राजनीतिक ह्कयूपाः विरुद्ध वःपि निति हताःया घोषणा खः धका धाःगु दु।

नेकपा (एकीकृत समाजवादी) या अध्यक्ष माधवकुमार नेपालं सू नाप ल्वायेगु निति समाजवादी मोर्चा दयकाःगु मखु धका धाःगु दु।

कांग्रेसयात ख्यायेत व एमालेनाप ल्वायेत मोर्चा दयकाःगु मखु धका धाःगु खः। थौं सोमवाः येँ जूगु ’समाजवादी मोर्चा नेपाल’ घोषणा ज्याझ्वलय् अथे धयादीगु खः।

वयकलं धयादीगु दु, ‘थुगु मोर्चा स्वार्थया मोर्चा मखु। थुगु मोर्चा सिद्धान्तहीन मोर्चा मखु। थुगु मोर्चा विचारहीन मोर्चा मखु। थुकिया प्रस्ट उद्देश्य दु धका धाःगु खः।