लुँ तोलां थौं निसः कुहावःगु दु। लुँ तोलां निसः कुहावया थौं १ लाख १० हजार रुपैयाँ थ्यःगु दु।

अथेहे वहः तोलां थौं न्यातका थहावःगु दु। वहः तोलां न्यातका थहावना १ हजार ४ सय ४० रुपैयाँ न कारोबार जुगु दु।

उपत्यका मेयर्स फोरमया अध्यक्षय् यल महानगरपालिकाया मेयर चिरीबाबु महर्जनयात ल्यःगु दु।

स्वनिगः दुने महानगरपालिका व नगरपालिकाया मेयरपिनिगु उगु फोरमया उपाध्यक्षय् वासुदेव थापा, महासचिवय् घनश्याम गिरी, सचिवय् प्रकाश अधिकारी, कोषाध्यक्षय् कृष्णहरि महर्जन व सहसचिवय् सुरेन्द्र श्रेष्ठयात ल्यःगु दु।

सरकारं कोशी प्रदेशया नामकरणविरूद्ध जूगु आन्दोलनय् ज्यान गुमे याम्ह पदम लिम्बूयात सहिद घोषणा याःगु दु।

शुक्रबाः सुथय् च्वंगु मन्त्रिपरिषद् बैठकं लिम्बूयात सहिद घोषणा यायेगु निर्णय जूगु दु धका संस्कृति, पर्यटन नाप नागरिक उड्डयन मन्त्री सुदन किराँतीं जानकारी बिःगु दु।

सरकारं लिम्बुया परिवारयात क्षतिपूर्ति न बिइगु निर्णय याःगु दु। प्रदेशया नां कोशी तःगु विरोधय् चैत ५ गते विराटनगरय् जूगु प्रदर्शनय् सहभागी लिम्बु प्रहरीं यागु लाठीचार्जय् घाःपाः जूगु खःसा उपचार यायेगु झ्वलय् चैत १० गते मदुगु खः।

नेपाल खुल्ला विश्वविद्यालयया व्यवस्थापन नाप कानुन संकायया डिन पदय् प्रा.डा. अरहन स्थापित नियुक्त जूगु दु ।

वय्कः ताः ई न्ह्यवंनिसें उगु विश्वविद्यालयया व्यवस्थापन विषय प्राध्यापनयाना वयाच्वनादीम्ह खः ।

प्रा.डा. स्थापित नेपालभाषाया च्वमि लिसें भाषिक कार्यकर्ता नं खः ।

बुगंद्यःया न्हवं थौं याइगु जुगु दु।

बैशाख कृष्ण प्रतिपदाया दिं कुन्हु बुगंद्यःया न्हवं याइगु खः। थौं न्हिनय् ४ बजे लिपा लगनख्यलय् न्हवं यायेगु याइ।

बुगंद्यः २०८० बैशाख ८ गते रथय् तइगु खःसा ११ गतेनिसे रथ सालिइगु याइ।