लुँ तोलां थौं न्यासः कुहावःगु दु। लुँ तोलां न्यासः कुहावया थौं १ लाख १६ हजार ५ सय रुपैयाँ न कारोबार जूगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न न्यातका कुहावःगु दु। वहः तोलां न्यातका कुहावया थौं १ हजार ४ सय १० रुपैयाँ कारोवार जुगु दु धका महासङ्घं धाःगु दु।

गुठी संस्थानया केन्द्रीय प्रशासक किरण शाक्ययात न्ह्यला ल्यः दनिइगु खःसा सरकारं पदमुक्त याःगु दु। थीथी थासय् मठाधिश नियुक्ति यायेगुलि विवाद जुयाच्वंगु इलय् मन्त्रिपरिषद्या छु ई न्ह्यःया बैठकं केन्द्रीय प्रशासकपाखे शाक्ययात पदमुक्त याःगु दु।

थुकियात सरकारया गैरकानूनी ज्या कथं कायेगु याःगु दु । गुठी संस्थान ऐन २०३३ या दफा १२ (क) कथं शाक्ययात केन्द्रीय प्रशासकय् नियुक्ति यागुलि शाक्यया नियुक्ति पत्रय् उल्लेख याःगु दु। नियुक्तिपत्रय् धाःसा मेमेगु बाहेक स्वदँया लागि नियुक्ति यानागु धका धयातःगु दु।

पदावधि पुरा यायेगु निति न्ह्यला या ई ल्यःदनिइगु इलय् शाक्ययात पदमुक्त यायेगु सरकारया गैरकानूनी ज्या कथं कायेगु याःगु दु । तत्कालीन केपी शर्मा ओली नेतृत्वया सरकारं २०७८ जेठ २० गते शाक्ययात संस्थानया केन्द्रीय प्रशासक पदय् नियुक्ति याःगु खः । शाक्ययात पदमुक्त यायेगु योजना कथं वंगु भदौं १२ गते भूमी व्यवस्था, सहकारी लिसे गरिबी निवारण मन्त्रालयं स्वन्हुया ई बिया स्पष्टिकरण न्यनेगु निर्णय याःगु खः ।

उकियात गुठी संस्थानं संरक्षण यायेमाःगु गुठी जग्गाया संरक्षण यायेत प्रभावकारी कथं ज्या याय् मफुगु, गुठी सम्बन्धी जनगुनासो सम्बोधन याये मफुगु, संस्थानया आन्तरिक व्यवस्थापनय् छु न कुतः याना मच्वंगु, संस्थानया अमानती, राजगुठी, मठ, बन्दोबस्त व सञ्चालनया लागि महन्त, पुजारी नापं व्यवस्थापकया व्यवस्थापन याये मफुगु व ज्या याःगु सम्पादन सन्तोषजनक खने मदुगु द्धपः शाक्ययात बिःगु खः। वया लिपा वंगु असोज १८ गते मन्त्रालयं व स्वया न्ह्यः बिःगु स्पष्टिकरणया लिसः सन्तोषजनक मजुगु धका धासे छितः छाय् मचिइकेगु धका धासे स्वन्हुया दुने स्पष्टिकरण न्यनेगु ज्या जुगु खः।

स्वदँया निति धकाः शाक्ययात नियुक्तिपत्र बिःगु खःसा सरकार कार्याकाल पुरा यायेत ई मबिउगु कथं थुगु ज्यायात गैरकानूनी संज्ञा बिःगु दु। संस्थानया जानकार तय्गु कथं सरकारं छु स्वार्थया प्रभावय् लानां शाक्ययात पदमुक्त याःगु धका अनुमान याःगु दु । महोत्तरीस्थित समरदहीया महन्त नियुक्ति यायेगु विषयय् शाक्यया भूमी, व्यवस्था, सहकारी लिसे गरिबी निवारण मन्त्री रञ्जिता श्रेष्ठ चौधरीया सचिवालयनाप विवाद जुगु खः।

सचिवालयं हयेत्यम्ह महन्तयात शाक्यं नियुक्ति बिइ माने मजुइवं चिइकेगु चलखेल शुरु जुगु खः । अथेहे विवादास्पद छवि दुम्ह चिनिया लामायात नियुक्ति यायेगु विषय शाक्य माने मजुइवं विवाद अझ तःच्वंगु खः। लामायात नियुक्ति मबिइत स्थानीय तय्स नं विरोध याःगु खः वयालिपा शाक्ययात चिइकेगु निति स्वार्थ पुचःतय्सं दबाब बिइत बालुवाटार तक थ्यःगु खःसा व स्वया न्ह्यःतक शाक्य याःगु ज्यायात बालांकू ताय्क तम्ह मन्त्री श्रेष्ठ न उगु पुचःया दबाबय् क्वछिइमाःगु दु । शाक्ययात पदमुक्ति यायेगु निति उगु स्वार्थ पुचःया छगु लिच्वः कथं हिलावंगु धकाः मन्त्रालयया अधिकारी तय्स धाःगु दु।

नरलय् थौं जात्रा क्वचाःगु दु। गन मदुगु जात्रा हाँडीगामय् धइगु उखानय् प्रख्यात थुगु जात्रा थौं क्वचाःगु दु।

उगु जात्राय् दकलय् क्वय् गजू जुइगु, द्यःयात च्वय् तया, रथयात अखतं चाःहिकेगु याइ व रथय् मैनया स्वा तयेगु याइगु खः। गजू क्वय तया द्यः च्वये तइगु याना हे गन मदुगु जात्रा गामय् धायेगु याना वया च्वंगु ख।

थुगु जात्राय् स्वंगु रथ दइ, रथय् गजू क्वय् जुइसा द्यः च्वय् जुइ, रथय् (नारायण द्यः) जुइ। मेमेगु द्यःया थाय् गजू च्वये द्यः क्वय् जुइगु जुइ।

जुगु जात्राय् सत्यनारायण द्यःया जात्रा खः। थुगु जात्रा कोजाग्रत पुन्हि कुन्हु नरया हाँडीगाय् जुइगु याइ।

नेपाःया प्यन्हुया औपचारिक भ्रमणय् वयाच्वंम्ह संयुक्त राष्ट्रसंघया महासचिव एन्टोनियो गुटरेस यलय् च्वंगु यल दरबार स्क्वायर वःगु दु।

थौं आइतवाः न्हिच्छिंयक उच्चस्तरीय भेटवार्ता क्वचाय्का यल दरबारय् वःगु खः। यल दरबार स्क्वायर चाःहू वम्ह महासचिव गुटरेसयात यल महानगरपालिकाया मेयर चिरिबाबु महर्जन व उपमेयर मन्जली शाक्यं लसकुस याःगु खः।

अथेहे महासचिव गुटरेस कन्ह्यः नाम्चे, पोखरा लुम्बिनी वनिइगु ज्याझ्वः दु ।

बागमती प्रदेसया संसदं नेपालभाषा व तामाङ भाषायात सरकारी कामकाजि भाषा यायेगु नितिं विधेयक सर्वसम्मतं पारितयाःगुयात कया नुवाकोट जिल्लाया विदुर नगरय् लसकुसयासें सांसदपिन्त सुभाय् देछाःगु दु।

नेवाः देय् दबू नुवाकोट जिल्ला समिति व नेवाः देय् दबु विदुर नगर समितिया मंकाः ग्वसालय् म्हिगः शनिवाः उगु ज्याझ्वः जूगु खः । बटारया पुलांगु बजारय् च्वंगु फल्चाय् जूगु उगु ज्याझ्वःया सभानायः देय् दबू नुवाकोट जिल्ला समितिया नायः रामप्रसाद जोशी जुयादीगु खः ।

देय् दबू बागमती प्रदेश समितिया दुजः नरेन्द्र प्रधानं न्ह्याकादीगु उगु ज्याझवःया मूपाहां देय् दबू स्वनिगः विशेष प्रदेशया नायः श्रीकृष्ण महर्जन जुयादीगु खः। वागमती प्रदेस संसदं सर्वसम्मतं पारित याःगु विधेकय् नेवाः भाय्यात प्रदेशया कामकाजि भाषाया रुपय् लागू यायेगु नापनापं नेपाल संवतयात तकं प्रयोग यायेगु धकाः उल्लेख जुयाच्वंगु खँ न्ह्यथसें मूपाहां महर्जन आः स्थानीय सरकारयात तकं स्थानयि भाषाया ऐन दयेके बिइगु नितिं भूमिका म्हितेमाःगु कनादिल ।

अथे हे भाषा विधेयक पारित याःगु दिं असोज २२ गतेयात आः नेपालभाषा लसता दिं कथं हनेमाःगु खँ तकं कनादीगु खः । अथे हे स्थानीय थीथी खलः पुचःया प्रतिनिधिपिन्सं नं भिंतुना न्वचू तयादीगु खः । शनिवाः हे बहनी हाकनं उगु हे फल्चा मैन मत च्याका धिमे बाजं थाना उत्सव न्यायेकूगु खः ।