शेयर बजाः परिसूचक नेप्से थौं ५३ दशमलव ७० अङ्कं कुहावःगु दु। वःगु बुधवाः ३५ दशमलव ३७ अङ्कं कुहवःगु नेप्से थौं न यक्को हे अङ्कं घटे जूगु दु।

नेप्से २ हजार ९७ दशमलव २९ बिन्दुइ कुहावःगु दु। थौं दक्को समूहया शेयर घटे जूगुलि माइक्रो फाइनान्स, विकास बैंक व जलविद्युत् समूहया शेयर ३ प्रतिशत स्वया अप्पो कुहावःगु दु।

थौं २८६ गु कम्पनीया १ करोड १३ लाख कित्ता शेयर कारोबार जूगु दु। ५ अर्ब ८ करोड १९ लाख रुपैयाँया शेयर कारोवार जूगु दु। दकलय् अप्पो हिमालयन लाइफ इन्स्योरेन्सया ४२ करोड ५६ लाख रुपैयाँया शेयर कारोबार जूगु दु।

२०७ गु कम्पनीया शेयर कुहावलि सृजनशील लघुवित्त व माउन्टेन इनर्जीया शेयर ९ प्रतिशत स्वया अप्पो कुहावःगु दु। समग्र बजाः कुहावंसा बीपी डब्लू लघुवित्त व सिटी होटलया शेयर १० प्रतिशतं थहावःगु दु।

येँ महानगरपालिकां बालुवाटारस्थित ललितानिवासया जग्गा तारबार याइगु जूगु दु। आइतवाः महानगर प्रहरीया छगू टोली बालुवाटारय् वःगु दु।

बालुवाटारस्थित एनआरएनए कार्यालय न्ह्यने महानगर प्रहरीया टोली वःगु खः। आः ललितानिवासया जग्गा यकिन याना व लिपा तारबार तयेगु धका महानगर प्रहरीं धाःगु दु।

ललितानिवासया करिब १४३ रोपनी सरकारी जग्गा मनूयो नामय् याःगु द्धपनय् १७५ म्हेसित विशेष अदालतय् भ्रष्टाचारया मुद्दा न्ह्याका च्वंगु दु। अथेहे उगु जग्गा मनूया नामय् नामसारी यायेगु झ्वलय् सरकारी भ्वँ किर्ते याःगु द्धपनय् प्रहरीया केन्द्रीय अनुसन्धान ब्यूरो सीआईबी न अनुसन्धान यानाच्वंगु दु।

श्री एअरलाइन्सं थौं जुइगु दक्को उडान स्थगित याःगु दु।

थीथी जहाजय् पटक पटक प्राविधिक समस्या वयेवं श्री एअरलाइन्सं थौं दक्को उडान बन्द जूगु दु धका प्रवक्ता अनिल मानन्धरं उज्यालोयात जानकारी बिःगु दु।

म्हिगः येँ न धनगढीपाखे ब्बःगु जहाज अवतरण मयासे हाकन येँ लिहावःगु खः।

थौं दक्को जहाजयात ग्राउन्डेड याना बालाक्क जाँच याना कन्ह्यनिसे नियमित उडान शुरु यायेत्यःगु खः।

श्री एअरलाइन्सनाप च्यागः जहाज दु।

चीनया न्यान्हुयकं भ्रमणय् वनाच्वम्ह उपप्रधान लिसे गृहमन्त्री नारायणकाजी श्रेष्ठ थौं स्वदेश लिहावइगु जुगु दु। न्ह्यम्हेसिगु प्रतिनिधिमण्डलया नेतृत्वयाना श्रेष्ठ बुधवाः चीनया सिचुवान प्रान्त भ्रमणय् वःगु खः।

भ्रमणया झ्वलय् वयकलं चीनया उपप्रधानमन्त्री ह लि फङ दथुइ निगुपक्षीय भेटवार्ता जूगु खः। उगु भेटवार्ताय् निगु देय् दथुइ व्यापार, लगानी, पर्यटन, ‘कनेक्टिभिटी’ लगायतया विषय सहलह जुगु खः।

उपप्रधानमन्त्री श्रेष्ठं छेन्दुइ जूगु १९ क्वःगु पश्चिम चीन अन्तर्राष्ट्रिय मेलाय् मू वक्ताया कथं सम्बोधन यानादीगु खः। अथेहे वयकलं सिचुवान विश्वविद्यालयय् जूगु ज्याझ्वलय् नेपाल–चीन सम्बन्धया बारेय् सम्बोधन मन्तव्य बियादीगु खः।

संसदीय मामिला पत्रकार समाजया अध्यक्षय् मनोज सत्याल विजयी जूगु दु। म्हिगः शनिवाः जूगु समाजया च्याक्वःगु अधिवेशनय् जूगु निर्वाचनय् सत्यालयात अध्यक्षय् ल्यःगु खः।

वयकः ६३ मत हया विजयी जूगु खः। अथेहे, वयकःया प्रतिस्पर्धी विष्णु क्षेत्रीं ४४ व तुलसी सापकोटां २७ मत हःगु खः। न्हुगु कार्यसमितिइ उपाध्यक्षय् सृजना घिमिरे, किरण दाहाल, महासचिवय् जयसिंह महरा, सचिवय् गुन्जन राज गिरी व सबिता शर्मा, कोषाध्यक्षय् अमुल थापा निर्वाचित जूगु खः।

अथेतु, सदस्यय् कमलराज भट्ट, रोमन आचार्य, शीला तिमल्सिना, मीरा बस्नेत, अन्जन लामिछाने, राजु थापा, विनोद कटुवाल व रघुनाथ बजगाईं निर्वाचित जूगु खः।