लुँया भाः थौं तोलां च्यासः कुहावःगु दु। लुँ तोलां च्यासः कुहावया थौं १ लाख ११ हजार रुपैयाँ न कारोबार जूगु दु धका नेपाल सुन चाँदी व्यवसायी महासंघं धाःगु दु।

अथेहे, थौं वहः तोलां न पीन्यातका कुहावःगु दु। वहः तोलां पीन्यातका कुहावया १ हजार ३ सय ८५ रुपैयाँ न कारोवार जुगु दु धका महासंघं धाःगु दु।

नेवाः न्ह्यलुवा लिसें मानव अधिकारकःमि पद्मरत्न तुलाधरया हुलाक टिकट नेपाल सरकारं पिकाःगु दु।सरकारं तुलाधरया १० तका वंगु हुलाक टिकट पिकाःगु खः।

म्हिगः सञ्चार मन्त्रालयय् जूगु छगू ज्याझ्वलय् सञ्चार मन्त्री रेखा शर्मां हुलाक टिकटय् टाँचा तयादीगु खः। उगु ज्याझ्वलय् पद्मरत्न तुलाधर लुमंति गुथिया दुजःपिनि नं उपस्थिति दुगु खः। म्हिगः व्यक्तित्व शीर्षकया न्याम्ह व्यक्तित्वपिनि हुलाक टिकट सार्वजनिक याःगुली तुलाधरया टिकट नं लाःगु खः ।

तुलाधरया लिसें सरकारं आरोही आङरिता शेर्पा, गायिका कोइली देवी व साहित्यकारपिं पूर्णप्रकाश नेपाल ‘यात्री’ लिसें माधवप्रसाद देवकोटाया नं हुलाक टिकट सार्वजनिक याःगु खः। थ्व हुलाक टिकटया ‘फस्र्ट डे कभर’ डिल्ली बजार व बबरमहलया हुलाक विभागय् न्यायेगु दु ।

पोखरा अन्तर्राष्ट्रिय विमानस्थलय् थौं न्हापागु पटक अन्तर्राष्ट्रिय व्यावसायिक जहाज अवतरण याःगु दु।

चीनया छेन्दुपाखे सिचुवान एयरलाइन्सया न्यारोबडी ए ३१९ जहाज थौं सुथय ९ बजे जूया ६ मिनेटय् पोखरा अन्तर्राष्ट्रिय विमानस्थलय् अवतरण याःगु खः।

थुगु जहाज पोखराया फेवातालय् थ्व हे असार ८ व ९ गते आयोजना जुइत्यःगु नेपाल चाइना ड्रागन बोट रेस फेस्टिभलय् सहभागी जुइत कासामि ज्वना थन वःगु खः ।

उगु जहाजय् चीन भ्रमणं राष्ट्रिय सभाया अध्यक्ष गणेशप्रसाद तिमिल्सिनाया नाप नेपाली प्रतिनिधिमण्डलपि न लिहावःगु खः। थुगु जहाज थौं हे चीन लिहावनिगु जुगु दु ।

बझाङय् गाडी दुर्घटना जुया सुदूरपश्चिम प्रदेशया आन्तरिक मामिला नाप कानुनमन्त्री पृथ्वीबहादुर सिंह मन्त।

उगु दुर्घटनाय् सिंह नापं स्वम्हेसिगु ज्यान वःगु खः। दुर्घटनाय् घाःपाः जूया मन्त्री सिंहया जहान अमृतादेवी सिंह व तताःजू जयादेवी सिंह वयकः स्वया न्ह्यः हे मदुगु खः।

दुर्घटनाय् घाःपाः जूया मन्त्री सिंहया उपचार यायेगु झ्वलय् कोहलपुर मेडिकल कलेजय् मदुगु धका सुदूरपश्चिमया प्रहरी प्रमुख डीआईजी भरत बोहरां जानकारी बिःगु खः।

मन्त्री सिंह गवा वःगु सुदूरपश्चिम प्रदेश ०१–००१ झ ४८० नम्बरया जीप धनगढीपाखे बझाङ वना च्वंगु इलय् केदारस्युँ गाउँपालिकाय् दुर्घटना जूगु खः।

नेवाः नखः न्यूयोर्कया ग्वसालय् सनिवाः च्याक्वःगु इहि मुना ज्याझ्वः क्वचाःगु दु।

समन्त बज्राचार्यं नेवाः विधिपूर्वक इहि न्ह्याकूगु खः।

न्यूयोर्कया ज्याक्सनहाइटय् च्वंगु शेर्पा किदुगंयागु भवनय् ग्वसाः ग्वःगु उगु इहि मुना ज्याझ्वलय् प्यंगु स्टेट– न्यूयोर्क, फिलाडेल्फिया, कोलराडो व मिनसोटापाखें यानाः मुक्कं खुम्ह मस्त दुथ्याःगु खः।