बागमती प्रदेश मन्त्री रामकृष्ण चित्रकारं बागमती प्रदेशया सरकारया मन्त्री परिषदं पारित याना संसदंपाखें नीति तथा कार्यक्रम तकं पारित याये धुंकूगु अले बजेटय् तकं वये धुकुगु दु धका धयादिगु दु।

थ्व हे वइगु साउन महिनानिसें विधेयक संसदय् वइगु अले नेपालभाषा व तामाङ भाषायात कामकाजि भाषा कथं लागू यायेगु नीति वइगु भाषा विधेयक नं पारित जुइ, उकिया नीति थःम्हं माःगु कथंया भुमिका म्हितेगु बचं बियादिगु दु।

नेवाः देय् दबू स्वनिगः विशेष प्रदेशया नायः श्रीकृष्ण महर्जन, बरिष्ठ न्वकू नवीन थेच्वमि, न्वकू प्रा.डा. अमिता प्रधान व सचिवालय दुजः अभिवक्ता नरेश श्रेष्ठं थौं नापलायेगु झ्वलय् मन्त्री चित्रकारं अथे धयादीगु खः।

असार ७ गते बिहिवाः मन्त्री निवासय् हे वना बाग्मती प्रदेशय् नेपालभाषा व तामाङ भाषायात कामकाजि भाषा कथं लागू याकेगु नीति भाषा ऐन पारित याकेगु नीति मन्त्री नापं सांसदपिं नापलायेगु अभियानया झ्वलय् स्वनिगः विशेष प्रदेश समितिं प्रदेश मन्त्री चित्रकारयात नापलाःगु खः ।

भारतीय फिल्मय् रोके यायेगु येँ महानगरपालिकाया निर्णयविरुद्ध मुद्दा न्यायाधीश धीरबहादुर चन्दया एकल इजलासय् लाःगु दु।

चलचित्र संघया पाखे प्रीतम घिमिरें येँ महानगरविरुद्ध बिहीवाः उच्च अदालत पाटनय् निषेधाज्ञा आदेश माग यासे रिट दायर याःगु खः। संघया पाखे कानुन व्यवसायी जयलाल भण्डारीं थुगु मुद्दाय् थौं हे आदेश वइगु सम्भावना दु धका धाःगु दु।

वयकःया कथं थुगु मुद्दाय् मेयर बालेन शाह, नगर प्रहरी, गृह मन्त्रालय व सञ्चार, सूचना नाप प्रविधि मन्त्रालययात विपक्षी दयका मुद्दा दायर याःगु खः। मेयर शाहया निर्देशनय् सोमवाःनिसे येँ महानगर दुनेया सिनेमा हलय् भारतीय फिल्मया प्रदर्शन रोके याःगु खः।

यल महानगरपालिकां स्थानीय मातृभाषायात प्राथमिकता बिया वइगु शैक्षिक सत्रनिसे कक्षा १ निसे ३ तक नेपालभाषा न ब्बकिइगु जूगु दु।

महानगरपालिकां वइगु आर्थिक दँ ०८०÷८१ या नीति न कार्यक्रम सार्वजनिक यासे प्रमुख चिरीबाबु महर्जनं वइगु शैक्षिक सत्रनिसे कक्षा १ निसे ३ तक नेपाल भाषाया पाठ्यक्रम तयार याना लागू यायेगु घोषणा याःगु खः। महानगरपालिका दुने सामुदायिक विद्यालय नेपाल भाषां ब्बकेगु व छगु छगु स्कूलय् छम्ह छम्ह शिक्षकया व्यवस्था यायेगु धका धाःगु दु।

यल महानगरं ऐतिहासिक, परम्परागत थाय्, सम्पदा, संस्कृति, नँसा त्वँसा, ज्यायात प्रोत्साहन जुइगु कथं पाठ्यक्रम दयका व्यवहारिक शिक्षाय् बःबिइगु नीति हयेगु धका धाःगु खः।

येँ महानगरपालिकाया प्रमुख बालेन्द्र साह (बालेन) या शिक्षा सल्लाहकार रेशु अर्यालं राजीनामा बिःगु दु।

अर्यालं बालेनया लिपागु ज्याय् असन्तुष्टि प्वकूसे शिक्षा सल्लाहकार पदपाखे राजीनामा बिःगु खः। शैक्षिक मेला, फिल्म बन्द यायेगु ज्याया प्रमुख बालेन्द्र शाह यानाच्वंगु गतिविधिइ असन्तुष्टि क्यसे शिक्षा सल्लाहकार अर्यालं थःगु पदपाखे राजीनामा बिःगु खः।

वयकलं थःगु समाजिक सञ्जालपाखे राजीनामाया घोषणा याःगु खः। वःगु भदौय् महानगरया कार्यपालिका बैठकं अर्यालयात शिक्षा सल्लाहाकारय् नियुक्त याःगु खः।

शेयर बजाः थौं न कुहावःगु दु। शेयर बजाः परिसूचक नेप्से थौं बुधवाः १४ दशमलव शून्य ५ अङ्कं कुहावया २ हजार ५० दशमलव ७८ विन्दुइ कुहावःगु खः।

थौं होटल, जीवन बिमा, उत्पादन व व्यापार समूहया शेयर सामान्य थहावंसा मेमेगु समूहया शेयर कुहावःगु खः। बजाः नाप कारोबार रकम न कुहावःगु दु। म्हिगः मङ्गलवाः ४ अर्ब ११ करोड रुपैयाँया कारोबार जूगुलि थौं २ सय ७१ गु कम्पनीया ८६ लाख ५१ हजार कित्ता शेयर ३ अर्ब ४९ करोड ६८ लाख रुपैयाँया कारोबार जूगु खः।

दकलय् अप्पो शिवम् सिमेन्टया २३ करोड रुपैयाँया शेयर कारोवार जूगु खः। दकलय् अप्पो ग्रीन भेन्चर्स कम्पनीया शेयर ८ प्रतिशत व मेन्छियाम हाइड्रो नाप कर्पोरेट विकास बैंकया शेयर ५ प्रतिशत स्वया अप्पो कुहावःगु दु।

समग्र बजाः कुहावःसा थौं सिटी होटलया शेयर १० प्रतिशत व सोल्टी होटलया शेयर साढे ७ प्रतिशतं थहावःगु खः।