सेयर बजाः थौं मंगलबाः दोहोरो अंकं थहावःगु दु । २७.३१ अंकं थहावना बजाः १८७१.३३ विन्दुइ थहावःगु खः।

नेप्से १.४८ प्रतिशतं थहवंसा कारोबार १ अर्ब न मथ्य। २६२ गु धितोपत्रपाखे ३५ हजार २३७ गु कारोबारपाखे ३३ लाख १५ हजार ७२० कित्ता सेयर किनबेच जूगु खः।

कारोबार रकम ९४ करोड ५२ लाख ४९ हजार १७९ रुपैयाँ जूगु दु। मंगलबाः दक्को उपसूचक थहावःगु दु। दकलय् अप्पो उत्पादन व प्रशोधन थःहावंगु दु।

थौं कालिञ्चोक दर्शन प्रालि व आदर्श लघुवित्तया कारोबार सकारात्मक सर्किट लेबलय् थ्यःगु दु। श्रृजनशील लघुवित्त, युनिक नेपाल लुघवित्त, छ्याङ्दी हाइड्रोया धितोपत्र यक्को थहावःगु दु।

लुँ तोलां थौं न्यासः थहावःगु दु। लुँ तोलां थौं न्यासः थहावना १ लाख ९ हजार ८ सय रुपैयाँ न कारोवार जूगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न थौं न्यातका थहावःगु दु। वहः तोलां न्यातका थहावना १ हजार ४ सय ३५ रुपैयाँ न कारोबार जूगु दु।

मचातय्त लक्षित यानाः यल महानगरपालिका– १६ वडा बालअधिकार समितिं आईतबाः व्यक्तित्व विकास लिसें उद्घोषण तालिम याःगु दु ।

यलया हःबहाःस्थित रत्नाकर महाविहारया सामुदायिक भवनय् न्ह्याःगु तालिमया यल महानगरपालिका– १६ या वडाअध्यक्ष निर्मलरत्न शाक्यं उलेज्या यानादिल । थःगु नुगःखँ तय्गु झ्वलय् वडाअध्यक्ष शाक्यं न्ववाय्गु बानी, तरिका, व सम्बन्धी सैद्धान्तिक व व्यवहारिक ज्ञान व्यक्तित्व विकासया अनिवार्य तत्व खःगु धयादिल ।

समितिया कजि लिसें वडाया महिला सदस्य बबिता श्रेष्ठं मचातय्गु बाल विकासया अधिकार, सहभागिताया अधिकारयात केन्द्रबिन्दुइ तयाः ज्याझ्वःया ग्वसाः ग्वयावयागु जानकारी बियादिल । १२ दँनिसें १६ दँतक्कया २०म्ह लक्षित यानाः ज्याझ्वः याय्गु बिचाः दुगुलिइ सहभागीया ३५ हाराहारीइ थ्यंगुलिं मचा लक्षित ज्याझ्वःया आवश्यकता व महत्व अझ अप्वःगु सीदुगु कजि श्रेष्ठया धापू खः ।

व इलय् रत्नाकर महाविहार संरक्षण समितिया दुजः कर्ण बज्राचार्यं मचातय्के दुने सुलाच्वंगु प्रतिभा पिब्वय्त थुकथंया ज्याझ्वलं ग्वहालि जुइगु विश्वास प्वंकादिल ।

अथे हे, नेपाल समाचारपत्रका सहायक सम्पादक सुनील महर्जनं मचात स्वभावं हे यक्व सय्केगु क्षमता ज्वनावइगु जूगुलिं स्थानीय तहं बालमैत्री परिवेशय् व क्षमताया भरपुर सदुपयोग याय्गु नीति, कार्यक्रम हय्माःगुलिइ बः बियादिल । न्हय्न्हुतक्क जुइगु उगु तालिमया मुख्य प्रशिक्षक सरिता बज्राचार्य व ग्वहालिमिया रुपं प्रेरणा बज्राचार्य दु ।

नेपालभाषाया बाखं साहित्य क्षेत्रय् च्वसा न्ह्याकावःपिं बाखंमितय् नगरकोटय् बाखं गोष्ठी जूगु दु। शुक्रबाः व शनिबाः निन्हु जूगु ज्याझ्वलय् साहित्यकारलिसें शिक्षाविद् व पूर्व संविधान सभा सदस्य मदुम्ह लक्ष्मण राजवंशीयात लुमंकूगु खः ।

बाखं दबूया ग्वसालय् जूगु ज्याझ्वलय् साहित्यकार राजवंशीं नेपालभाषाया बाखं साहित्य ख्यलय् व बाखं दबू संस्था नीस्वनेत बियादीगु योगदानया चर्चा याःगु खः। निन्हु जूगु ज्याझ्वलय् नेपालभाषा साहित्य क्षेत्रया नांजाःपिं साहित्यकारत अन्जना ताम्राकार, भगतदास श्रेष्ठ, निजिरोस श्रेष्ठ, किरणकेन रन्जितलिसें तःम्ह हे बाखंमितय्सं थःथःगु बाखं न्यंकूगु खः।

सकसिगु बाखंयात कयाः वरिष्ठ साहित्यकार केदार सितुं टिप्पणी यानादीगु खःसा समालोचक पूर्ण ताम्राकारं समालोचना यानादीगु खः। गोष्ठीइ बाखंमितय् दथुइ बाखं साहित्ययात कयाः अन्तरक्रियात्मक सहलह नं जूगु खः।

बाखं दबूया संस्थापक दुजः लोचनतारा ताम्राकार व साहित्यकार बद्री वेदनां ग्वसाः खलःपाखें न्ववानादीगु खः।

यल महानगरपालिका वडा ५ या वडाअध्यक्ष विकासमान श्रेष्ठं भौतिक पूर्वाधारलिसें सामाजिक लिसें मानवीय विकासयात सन्तुलनय् तयाः ज्या यानाच्वनागु धयादीगु दु ।

वडाया ग्वहालिइ बोधिचर्या नेपालं यलया लगनखेलय् याःगु प्यन्हुया सिद्धिसाधना तालिमया समापन समारोहस वय्कलं थथे धयादीगु खः। यलया लगनखेल, कुमारीपाटी, मानभवन, थसिखेललिसेंया क्षेत्र कःघाःगु वडाय् मानवीय व भौतिक विकास नितां माःगु नं वडाअध्यक्ष श्रेष्ठया धापू खः।

वडां पाटन स्वास्थ्य विज्ञान प्रतिष्ठानलिसे जानाः छेँय् छेँय् स्वास्थ्य सेवा थ्यंकेगु योजना दय्काच्वनागु नं वय्कलं जानकारी बियादिल। वडाय् प्लास्टिक  झोला निषेध यानागु, स्वास्थ्य सेवायात सर्वसुलभ दय्केत कुतः यानावयागु व जेष्ठ नागरिकया हितय् ज्या यानावयागु धासें वडाअध्यक्ष श्रेष्ं थुकी वडाबासीया पृष्ठपोषण जरुरी दुगु धयादिल । 

बोधिचर्या नेपालया नायः अनिल शाक्यं जीवनय् सफल, तनावरहित जुयाः म्वाय्त थःगु मन व उकिया प्रक्रियायात थुइकेमाःगुलिइ बः ब्युसें तालिमं थुखेपाखे छुं न छुं स्यंगु धयादिल। तालिमय् कयागु ज्ञान, सीपयात व्यावहारिक रुपं अभ्यास यासें अझ तब्या व गहन दय्केमाःगु सुझाव शाक्यं बियादिल।