संघीय मामिला नाप सामान्य प्रशासन मन्त्रालयं निजामती कर्मचारीपिन्स टिकटक मदयकेत निर्देशन बिगु दु।

मन्त्रालयया कार्यालय इलय्, कार्यालय पोसाक फिना, कार्यालयया सवारी साधन छ्यला च्वंगु इलय् व कार्यालय दुन् टिकटक दयकेत रोके याःगु दु धका सहसचिव नाप प्रवक्ता कमलप्रसाद भट्टराई न जानकारी बिःगु दु।

‘अथेहे, कार्यालयनाप सम्बन्धित ज्याया बारे न टिकटक मदयकेत निर्देशन बियागु दु’, धका वयकलं धयादीगु खः। अथेहे निजामती कर्मचारीपिन्स थज्यागु नियम उल्लंघन यातकि अनुशासन नियम अन्तर्गत कारबाही जुइ धका वयकलं धयादीगु दु।

बाजुराय् भुखाय् ब्बःगु दु। राष्ट्रिय भूकम्प मापन नाप अनुसन्धान केन्द्रया कथं थौं सुथय् ७ बजे जूया ३८ मिनेटय् उगु भुखाय् ब्बःगु खः।

जिल्लाया बिछिया थासय् केन्द्रविन्दु जूया ४.४ म्याग्निच्युडया भुखाय् ब्बःगु दु धका केन्द्रया सहायक प्राविधिक राजेश शर्मां जानकारी बिःगु खः।

राष्ट्रिय जनगणनाय् सार्वजनिक जूगु गलत तथ्यांक भिंकेगु मागयासें तथ्यांक कार्यालय न्ह्यःने जनजातिपिन्स बिरोध प्रदर्शन याःगु दु।

किरात राई यायोक्खा केन्द्रीय कार्य समिति, किरात राई वान्तावा खिम, अथार मगरात कलाकार संघ, नेपाल आदिवासी जनजाति महासंघ लगायतपिन्स प्रदर्शन याःगु खः । राई जातिया विषयय् सार्वजनिक जूगु तथ्यांक गलत खः धासें उमिसं उकियात भिंकेत माग याःगु दु ।

लिसें आन्दोलनकारीतय्सं न्यागू बुँदा भिंकेमाःगु खँ नं दुथ्याकूगु दु । प्रदर्शनया झ्वलय् ‘जवं खवं वनेगु जुइ मखु, गलत तथ्यांक माने यायेमखु, ‘गलत तथ्यांक याकनं भिंकि’, ‘राज्ययात सही तथ्यांक बिउ’, ‘२०६८ सालया जनगणनाय् किरात राई जाति दुनेया न्हूगु जाति सम्बन्धी मिथ्यांक वःगुलिं खारेज या’ ‘मगरया विरासत कायम या’, ‘मगरयात जुयाच्वंगु राज्यया षडयन्त्र बन्द या’, ‘मगर जाति दुनेया पुन थर बिस्कं जाति मखु’ धइगु माग तयाः प्लेकार्ड नं प्रदर्शन याःगु खः ।

शेयर बजाः कारोवारया न्हापागु दिं थौं बजाः थहावःगु दु। थौं आइतवाः शेयर बजाः परिसूचक नेप्से ४० दशमलव ४८ अङ्कं थहावना १ हजार ९ सय ८० दशमलव ०९ विन्दुइ थ्यःगु दु।

दक्को समूहया शेयर थौं थहावगुलि फाइनान्स, विकास बैंक, लगानी व व्यापार समूहया शेयर तसकं थहावःगु खः।  कारोबार रकम न थौं थहावना साढे ३ अर्ब रुपैयाँ थ्यःगु दु।

२सय ७५ गु कम्पनीया ९५ लाख २८ हजार कित्ता शेयर ३ अर्ब ४५ करोड ४३ लाख रुपैयाँया कारोबार जूगु दु। दकलय् अप्पो नागरिक लगानी कोषया ११ करोड ४७ लाख रुपैयाँया शेयर किनबेच थौं जूगु खः।

अथेहे थौं भुगोल इनर्जी व सीटी होटलया शेयर १० प्रतिशतं थहावःगु दु। समग बजाः थहावःसा आदर्श लघुवित्त नाप खुगु कम्पनीया शेयर सामान्य कुहावःगु दु।

अनुसन्धान नाप सूचनामूलक कार्यशाला गोष्ठी लय् लय् पतिकं जूयावयाच्वंगु ज्याझ्वलय् अनसन्धानकर्ता जितेन्द्र बिलास बज्राचार्यं नेवाःतयेस हनावयावंगु गणेद्यःया कार्यपत्र न्ह्यब्वयादीगु खः।

वयकलं न्ह्यब्बयादीगु कार्यपत्रय् गणेद्यः नाप स्वानाच्वंगु विषयवस्तु गणेद्यःया बाहं, विराजमान दिशा, थीथी नां, गणेद्यःया थीथी ल्हाः,गणेद्यःया ज्वंसा, छु छु विशेषता ज्वनातःम्ह गणेद्यः गन गन बिराजमान जुयाच्वंगु धइगु बिषय न्ह्यब्बयादीगु खः। वयकःया कार्यपत्रय् गणेद्यःया ल्हाः निपाःनिसें झिंखपा तक दुगु धका धयादीगु खः।

गणेद्यः धायवं महाद्यः व पार्वतीया काय् धकाः थुइका वयाच्वंगु दु । मुख्यतया गणेद्यःयात गणपति, छपू वा दुम्ह परव्रम्ह हेरम्बा, लम्वेदर व विनायक खः धकाः नं धायगु याना वयाच्वंगु दु धका धयादीसे वयकलं छ्यं किसिया जूगुलिं कपाः तःग्वःगु, न्हायपं तपाःगु, मिखा चिग्वःगु व वाः नापंया स्वं नं दुम्ह द्यःया गणेद्यः धकाः थुइकेगु याना वयाच्वंगु खँ उलादीगु खः। नेवाःत हरेक पूजा यायेगु इलय् गणेद्यःयात निं पुजा याय्गु परम्परा दु धका धयादीगु खः।

वयकलं न्ह्यब्बयादीगु कार्यपत्रय् नेवाःतयसं छ्यलीगु सुकुन्दाय् नं गणेद्यः दइ । गणेद्यः न्ह्यगू शताव्दीपाखे ओडियानाचार्य नां याम्ह छम्ह तान्त्रिक नेपालय् वया चोभारय् हेवज्र नैरात्मायागु पुरशचरण च्वंगु धका धयादीसे गणेद्यःया नां कया वनेबलय् पूर्व स्वम्ह सूर्यविनायक, जल विनायक ( क्वयना गणेद्यः), कार्य विनायक, अशोक विनायक, चन्द्र विनायक खः।

नेवाःतय्सं गणेद्यःयात त्वाःया रक्षक, रिद्धिसिद्धिया प्रदायककथं माने यानातःगु दु धका धयादीगु खः। रत्नकीर्ति महाविहार (मखन बहाल) अध्ययन मण्डलया ग्वसालय् न्ह्याकूगु थुगु गोाष्ठीस उपस्थित थीथी व्यत्तित्वपिन्सं गणेद्यःया बारे न्ह्यसः तयादीगु खःसा उकिया लिसः वयकलं बियादीगु खः।

रविन्द्र बज्राचार्यया सभाध्यक्षताय् जूगु उगु ज्याझ्वः मण्डलया दुजः सुजन विलास बज्राचार्य न्ह्याकादीगुलि रत्नकीर्ति महाविहारया छु्याञ्जे सागरमान बज्राचार्यजुं थःगु धार्मिक नुगः खँ तयादीगु खः।कार्यपत्रय् टिप्पणी मदनसेन बज्राचार्यंं यानादीगु खः ।