इजरायलय् हमासया आक्रमणय् गुम्ह नेपाःमि घाःपाः जूगु दु। घाःपाःजूपि मध्यय् निम्हेसिगु अवस्था गम्भीर दु धका परराष्ट्र मन्त्रालयं धाःगु दु।

म्हिगः शनिवाः मन्त्रालय आकस्मिक बैठक च्वने धुका पिथःगु वक्तव्यय् थुुकियाःगु पुष्टि याःगु दु। उमिगु म्हसिका व विवरण धाःसा खुले जूगु मदुनि ।

मन्त्रालयं इजरायलय् संकटग्रस्त अवस्थाय् नेपाल सरकारपाखे ऐक्यबद्धता दु धका धाःगु दु।

नेवाः पत्रकार राष्ट्रिय दबू ख्वप जिल्लाया अध्यक्ष रामगोपाल तमखुयात मां रामेश्वरी तमखु मन्त।

वंगु शुक्रवा बहनि ७२ दँ आकाझाकां छेँय् न्हिनय् ४ः२० ति मदुगु खः। मदुम्ह रामेश्वरी तमखुया जहान नापं निम्ह काय् निम्ह म्ह्याय् दी।

रामगोपाल तमखु दकलय् तधीम्ह काय् खः।

यल उद्योग वाणिज्य संघया ४४ क्वःगु साधारण सभा म्हिगः छगु ज्याझ्वः दथुइ उलेज्या जूगु दु । थौं न्हुगु ज्यासना पुचःया निति चुनाव जुइगु दु।

थौं सुथय् ८ बजे निसे चुनाव याइगु ज्याझ्वः दु। थौं जुइगु चुनावया निति अध्यक्ष पदय् स्वम्हेसिगु उम्मेदवार दु। बिश्वराज बज्रचार्य व रुपक मान महर्जनयानिगु प्यानलया दथुइ जुइत्यःगु खः।

अथेहे अध्यक्षय् स्वतन्त्र कथं रविन्द्रराज ताम्राकार प्वाःस्याः नं उम्मेदवारी बियादीगु खः।

कोशी प्रदेशया मुख्यमन्त्री हिक्मतकुमार कार्की नेतृत्वया सरकारं थौं विश्वासया मत काइगु जूगु दु।

सर्वोच्च अदालतया परमादेशं वंगु भदौ २२ गते संविधानया धारा १६८ या उपधारा ३ कथं मुख्यमन्त्री जुयादीम्ह कार्कीं थौं विश्वासया मत काइगु जूगु दु।

पदीय जिम्मेवारी काये धुका ३० दिं दुने विश्वासया मत कायेमाःगु संवैधानिक प्रावधान दु ।

नेपालभाषा एकेदेमि व येँ महानगरपालिकाया ग्वसालय् जूगु नेवाः सांस्कृतिक ज्ञानकोष तयारीया प्रगति विवरण न्ह्यब्वयेगु निंतिं जूगु सहलह ज्याझ्वलय् न्ववानादीसे येँ महानगरपालिकाया उपमेयर सुनिता डंगोलं नेपालभाषा एकेदेमिं तयार याना वयाच्वंगु नेवाः सांस्कृतिक ज्ञानकोषयात डिजिटलाइजेशन यायेगु निंतिं महानगरपालिका ग्वाहालि यायेत तयार दुगु खँ धयादीगु दु ।

उपमेयर डंगोलं नेवाः संस्कृति, नेवाः सभ्यता, नेवाः बारे न्हू पुस्तां छुं हे मसिया वनेधुंकूगुलिं थुकियात डिजिटलाइजेशन याये हथाय् जुइधुंकूगु खँ धासें नेवाः सांस्कृतिक ज्ञानकोषयात थीथी भासं अनुवाद यानाः डिजिटलाइजेशन यायेगु निंतिं येँ महानगरपालिकां माःगु ग्वाहालि जुइगु बचं बियादिल ।

ज्याझ्वलय् येँ महानगरपालिकाया ग्वाहालि दयेकाच्वंगु ज्ञानकोष प्रगति विवरण न्ह्यब्वसें नेपालभाषा एकेदेमिया भाइस चान्सलर व परियोजना संयोजक मल्ल के सुन्दरं नेवाः अमूर्त सांस्कृतिक सम्पदा; नेवाः नाट्य, संगीत व चलचित्रमूर्त; सांस्कृतिक सम्पदा भाषा, साहित्य, खँग्वःधुकू, ब्याकरण, लिपि; शिल्प व ज्ञान; नेवाः म्हसीका, आन्दोलन व नगरीय सभ्यता यानाः न्यागू थीथी विषयय् स्वद्व पृष्ठया सफू पिथनीगु जानकारी बियादिल । थ्व झ्वलय् वय्कलं थ्व ज्ञानकोष झिद्वः खँग्वःया विस्तृत विवरण दइगु व न्याद्वः किपा दइगु नं जानकारी बियादिल ।

ज्ञानकोषया निंतिं आःतक न्हय्द्वलं मल्याक खँग्वः संकलन जुयाः विवरण च्वयेसिधःगु जानकारी नं बिउगु खः ।

ज्याझ्वलय् न्ववानादिसें भाजु मल्लं आःतक नेपाल सरकारं करोडौं दां बियाः न्ह्याकातःगु नेपाल प्रज्ञाप्रतिष्ठानं तकं ज्ञानकोष दयेकेगु आँट यायेमफुनिगु अवस्थाय् नेवाःतय्सं आँट यानाः थ्व ज्या न्ह्याकूगु दु धासें थ्व ज्ञानकोषं भावी पुस्तायात नेवाः सभ्यता, नेवाः तजिलजि, नेवाः साहित्य, थनया नगर, जात्रापर्वबारे पूवंक जानकारी कायेफइगु खँ धयादिल । ज्ञानकोषयात अझ वृहद् रुपं न्यंकायंकेगु निंतिं थुकिया अनुवाद यायेमाःगु, डिजिटलाइजेशन यायेमाःगु प्रस्ताव वय्कलं तयादीगु खः ।

ज्याझ्वलय् परियोजना व्यवस्थापक अनिल स्थापितं परियोजना गुकथं न्ह्यानाच्वंगु धयागु बारे जानकारी बियादीगु खः । येँ महानगरपालिका सम्पदा विभागया प्रमुख अर्चना शाक्यं लसकुस यानाः न्ह्याःगु ज्याझ्वलय् येँ महानगरपालिकाया प्रवक्ता नवीन मानन्धरं गुलि फु उलि याकनं ज्ञानकोष तयार यायेमाःगु खँय् बः बियादिसें थुकियात अडियो भिडियोसहित डिजिटलाइज यायेगु निंतिं येँ महानगरपालिकाया वइगु बजेटय् हे थ्व परियोजनायात दुथ्याकेफइगु खँ धयादीगु खः ।