येँ महानगरपालिकां भोटाहिटीइ च्वंगु आरके स्विट्सय् तालं ग्वयाबिःगु दु।

बेसमेन्टय् चायेकातःगु स्विट्स बन्द यायेत इनाप यासां अटेर याःगुलिं आरके स्विट्सय् तालं ग्वयेत बाध्य जुगु धका नगर प्रहरी प्रमुख राजु पाण्डे धाःगु खः।

पाण्डेया कथं बेसमेन्टया नक्साय् स्टोर यायेगु धकाः न्ह्यथंनातसां आरके स्विट्स नामय् क्याफे रेष्टुरेन्ट चायेकातःगुलिं जनप्रतिनिधिपिनिगु न्ह्यने तया तालं ग्वयाबिःगु खः।

लुँया भाः थौं न थहावःगु दु। लुँ तोलां थौं गुसः थहावःगु दु। थौं लुँ तोलां गुसः थहावना १ लाख १२ हजार ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोलां न थौं न्यातका थहावःगु दु। वहः तोलां न्यातका थहावना थौं १ हजार ४ सय २० रुपैयाँ न कारोबार जूगु दु धका महासङ्घं धाःगु दु।

राष्ट्रिय सभाया अध्यक्ष गणेशप्रसाद तिमिल्सनां थौं मंगलवाः च्वनिइ धका धाःगु राष्ट्रिय सभाया बैठक स्थगित याःगु दु।

अध्यक्ष तिमिल्सनां विशेष कारणवश मंगलवाः च्वनिइ धका धाःगु बैठक बुधवाःया लागि निर्धारण याःगु दु धका संघीय संसद सचिवालयया महासचिव भरतराज गौतमं छगु सूचं पिकना जानकारी बिःगु दु।

स्वच्छ वातावरणीय मौलिक हकया लागि वृक्षारोपण येँ महानगरपालिका –१३ ताहाचलस्थित जन प्रभात मा.वि. परिसरय् थौं सोमवाः ‘प्लास्टिक प्रदूषण विरुद्ध लागौं’ धइगु मू नारा ज्वना वृक्षारोपण याःगु दु।

वायु प्रदुषण व्यवस्थापन नागरिक सञ्जाल येँया ग्वसालय् थौं जडीबुटी व फलफुलया १०८ सिमा पिइगु ज्या जूगु दु।

विश्व वातावरण दिवसया लसताय् पर्यावरण स्वच्छताया निति विद्यालय परिसरय् थीथी सिमा पिगू धका सञ्जालया अध्यक्ष निरू महर्जनं धाःगु दु। वयकलं हलियकं जूयाच्वंगु वातावरण प्रदूषणया समस्या जुयाच्वंगु दु धका धयादीसे वनस्पति, मनू तय्त यक्को लिच्वः लानाच्वंगु दु धका धयादीगु खः।

येँ महानगर २० वडा अध्यक्ष राजेन्द्र मानन्धर, विद्यालय व्यवस्थापन समितिया निवर्तमान अध्यक्ष रामशरण डंगोल, येँ महानगर १३ वडाया वडासदस्यपि रजनि महर्जन, मैयाँ देउला व २० वडाया सदस्य अनेश चित्रकारपिन्सं वातावरणसम्बन्धी याइगु संस्था एन्फो, विद्यालयया शिक्षक, कर्मचारी, विद्यार्थीपिनिगु न ब्बति दुगु खः।

ऐतिहासिक, सांस्कृतिक वस्ती ख्वनाय् वंगु म्हिगः आइतवाः छगू तःजिगु देय् भ्वय्या ज्याझ्वः जूगु दु।

ख्वनाया ऐतिहासिक व सांस्कृतिक रुद्रायणी देवीया देवगणय् दुहां वःपिं न्हूपिं च्याम्ह देवगणया लसकुस व सम्मानय् उगु देय् भ्वय् जूगु खः । रुद्रायणी देवीया देवगणय् ताःई न्ह्यवंनिसें प्वनाच्वंगु च्याम्ह गणया रुपय् न्हूपिं ल्याय्म्हत दुहां वःगु लसताय् ख्वनाय् उत्सव हनेकथं उगु देय् भ्वय् न्यायेकूगु खः ।

ज्याझ्वलय् झायादीम्ह उपप्रधानमन्त्री लिसें गृहमन्त्री नारायणकाजी श्रेष्ठं संस्कार, संस्कृति, पहिचानया संरक्षणय् सक्रिय जुयादीपिं देवगणयात थुकथंया औपचारिकताय् जक सीमित जुइगु सम्मान मयासे प्रोत्साहन नं बीमाःगु व उकिया निंतिं विशेष व्यवस्था यायेमाः धयादिल ।आधुनिकीकरणय् वनेगु पहिचान त्वःताः यान्त्रिकीकरणया नक्कल यायेगु मखु धासें उपप्रधानमन्त्री श्रेष्ठं आधुनिकताया नामय् भद्दा जुइक नक्कल यायेगु प्रवृत्ति अप्वयाच्वंगु खँय् सचेत जुइमाः धयादिल ।

थनया रुद्रायणी द्यःया गंप्याखनय् ४६ म्ह दइ । थुपिं पीखुम्ह देवगण मदयेकं प्याखं पूवंकेगु ला छु संचालन तकं याये फइगु सम्भावना मदु । रुद्रायणी गंप्याखनय् दुहां वःपिं १८ दँनिसें ४८ दँ दुपिं आर्यन महर्जन, नारायण महर्जन, देवलाल महर्जन, गोविन्द महर्जन, किशोर महर्जन, केशराम महर्जन, दिवाकर महर्जन, बुद्धिरत्न डंगोल खः । वय्कःपिं सकलें गंप्याखनय् दुहां वःगु लसताय् वय्कःपिनिगु हे सम्मानय् वंगु आइतवाः देय् भ्वय्या ग्वसाः ग्वःगु खः ।

यल महानगरपालिका वडा नं. २१ या संयोजनय् देवगणया सम्मान व धार्मिक विधिकथं सगं बीगु ज्याझ्वःलिसें देय् भ्वय्या ग्वसाः ग्वःगु खः । मुक्कं ख्वनामित हे जानाः ग्वसाः ग्वयाः व्यवस्थापन याःगु देय् भ्वजय् न्हय्द्वःयात भ्वय् नकूगु खः ।

पुलांम्ह मन्त्रीलिसें नेकपा माओवादी केन्द्रया नेत्री पम्फा भुसालं ख्वना देय्यात सांस्कृतिक पर्यटकीय क्षेत्रया रुपय् विकास यानाः समुन्नत व समृद्ध ख्वनाया रुपय् न्ह्यःने यंकेगु स्वयेमाः धयादिल । वय्कलं बहुचर्चित फास्ट ट्रायकया योजना ख्वनाया मौलिक वस्तीयात लिच्वः मलाइकथं न्ह्यःने यंकेमाः धयादिल ।

ज्याझ्वःया सभापतिलिसें २१ वडाअध्यक्ष रविन्द्र महर्जनं द्यःगंया निंतिं च्याम्ह थप जूसां अझं मेपिं स्वम्ह देवगणया व्यवस्थापन याये ल्यं दुगु जानकारी बियादिल ।