प्रधानमन्त्री पुष्पकमल दाहाल ‘प्रचण्ड’ न त्रिभुवन विश्वविद्यालय शिक्षण अस्पताल महाराजगन्जय् उपचार यानाच्वम्ह राष्ट्रपति रामचन्द्र पौडेलया स्वास्थ्य अवस्थाबारे जानकारी कयादीगु दु।

थौं सुथय् टिचिङ अस्पतालय् वना भिंउसाँय् या कामना यानादीगु दु धका प्रधानमन्त्रीया स्वकीय सचिव रमेश मल्लं जानकारी बिःगु दु।

“सम्माननीय प्रधानमन्त्री पुष्पकमल दाहाल ‘प्रचण्ड’ जु र्थौं सुथय् त्रिभुवन विश्वविद्यालय शिक्षण अस्पताल महाराजगन्जय् वना उपचारया ना च्वम्ह सम्माननीय राष्ट्रपति रामचन्द्र पौडेलजुयात नापलाना भिंउसाँय्या कामना यानादीगु दु,” वयकलं सामाजिक संजालय् च्वयादीगु दु। राष्ट्रपति पौडेलया प्वाथय् समस्या वया शनिबाः अस्पतालय् भर्ना जुयादीगु खः।

राष्ट्रपति रामचन्द्र पौडेल अस्पतालय् भर्ना जुयादीगु दु। प्वाथय् समस्या जुया पौडेल शनिबाः बहनि त्रिवि शिक्षण अस्पतालय् भर्ना जुयादीगु खः।

आः वयकः चिकित्सकपिनिगु निगरानीइ उपचार यानाच्वंगु दु।

दोलखाया सुरी केन्द्रबिन्दु जूया भुखाय् ब्बःगु दु।

राष्ट्रिय भूकम्प मापन नाप अनुसन्धान केन्द्र लैनचौरया कथं दोलखाया सुरी केन्द्रबिन्दु जूया थौं सुथय् ११ बजे जूया २७ मिनेटय् ५.२ रेक्टर स्केलया भुखाय् ब्बःगु खः।

उगु भुखाचं दोलखा, ओखलढुङ्गा, रामेछाप, सिन्धुपाल्चोक, नुवाकोट व स्वनिगलय् तक महसुस जूगु दु।

प्रदेश १ या नां ‘कोशी प्रदेश’ खारेज यायेमाः धासें येँय् नं प्रदर्शन जूगु दु। कोशी प्रदेश नां खारेजीया माग यासें पहिचानवादी संघसंस्थातय्सं येँया फिब्व ख्यलंनिसें संसद भवन तक ¥याली न्ह्याकूगु खः ।

बानेश्वरया लँय् तुं प्रहरीतय्सं निषेधित क्षेत्र धकाः बारं घेरे याना तःगुलिं प्रदर्शन अनं च्वय् न्ह्याः वने मफुत। उकिं अन हे सभा यासें ज्याझ्वः क्वचायेकूगु खः।प्रदर्शनकारीतय्सं कोशी प्रदेशया नां ऐतिहासिक पहिचानया आधारय् हाकनं नामाकरण यायेमाःगु, प्रदर्शनया झ्वलय् सीम्ह पदम लिम्बुयात शहिद घोषणा यायेमाःगु माग याःगु खः ।

प्रदर्शनय् सचेत पहिचानवादी संघर्ष समिति, किराँत याक्थुङ चुम्लुङ नापं नेवाः देय् दबू, आदिवासी जनजाति महासंघ लगायतया पहिचानवादी संघसंस्थातय्सं ब्वति काःगु खः । ज्याझ्वलय् ब्वति काःपिं नेवाः कार्यकर्तातय्सं ‘बागमति’ प्रदेशया नां नं स्वीकार्य मजू धासें थ्व नां नं हिलाः पहिचानवादी नां तयेमाः धकाः नारा थ्वयेकीगु खः।

थ्वहे झ्वलय् प्रदेश १ या थीथी स्थानीय निकायया वडा कार्यालयय् वनाः किरातनी आन्दोलनकारीतय्सं ग्वःगु ताःफ्वः म्हिगः प्रहरी वयाः तछ्याना बिउगु दु ।

उपप्रधान नाप गृहमन्त्री नारायणकाजी श्रेष्ठं पदभार सम्हालेयाःगु दु। वंगु पुस ११ गते उपप्रधान नाप भौतिक पूर्वाधारमन्त्री जूयादीम्ह श्रेष्ठयात प्रधानमन्त्रीं शुक्रबाः मन्त्रिपरिषद् पुनर्गठन यायेगु झ्वलय् गृहया जिम्मेवारी बिःगु खः।

वयकलं थौं शुक्रबाः हे गृहमन्त्रीया पदभार सम्हाले यानादीगु खः। श्रेष्ठ झीदँ लिपा गृह मन्त्रालयया नेतृत्व यानादीगु खः।