बाजुराय् वंगु चान्ह्यः भुखाय् ब्बःगु दु।वंगु चान्ह्यः १० बजे जूया २७ मिनेटय् ४.३ म्याग्निच्युडया भुखाय् ब्बःगु दु धका राष्ट्रिय भूकम्प मापन केन्द्र लैनचौरं धाःगु दु।

उगु भुखाय्या धक्का जिल्ला सदरमुकामया नापं वया जःखःया जिल्लाय् न महसुस जूगु दु धका धाःगु दु। भुखाय् ब्बया गुलि क्षति धका विवरण वःगु मदुनि।

लुँ तोलां थौं खुसः कुहावःगु दु। लुँ तोलां खुसः कुहवया थौं १ लाख ९ हजार २ सय रुपैयाँ न कारोवार जुगु दु धका नेपाल सुनचाँदी व्यवसायी महासङ्घं धागु दु।

अथेहे वहः तोलां न झीतका कुहावःगु दु। वहः तोलां झीतका कुहावया थौं १ हजार ३ सय ७० रुपैयाँ न कारोबार जुगु दु धका महासङ्घं धागु दु।

शेयर बजार कारोवार जुइगु वाःया न्हापागु दिं थौं शेयर बजार परिसूचक नेप्से २६ दशमलव ८५ अङ्कं कुहावया १ हजार ८ सय ८८ दशमलव ३० विन्दुइ कुहावःगु दु।

थौं दक्को समूहया शेयर कुहावंसा लघुवित्त व उत्पादन समूहया शेयर तसकं कुहावःगु दु। बजाः घटे जूसा २ सय ५९ गु कम्पनीया ३७ लाख ५४ हजार कित्ता शेयर १ अर्ब २८ करोड ९३ लाख रुपैयाँया कारोबार जूगु दु।

दकलय् अप्पो हिमालयन डिस्टिलरीया ८ करोड ६१ करोड रुपैयाँया शेयर किनबेच जूगु खः। जालपा सामुदायिक लघुवित्त, जीवन विकास लघुवित्त, महिला लघुवित्त व युनिक नेपाल लघुवित्तया शेयर १० प्रतिशतं कुहावःगु दु।

अप्पो धइथे लघुवित्त कम्पनीया शेयर तसकं कुहावःगु खः। समग्र बजार कुहावसां मायाखोला जलविद्युत् व एसियन हाइड्रोया शेयर १० प्रतिशतं थहावंगु दु।

विश्व बैंकं नेपाःयात १२ करोड अमेरिकी डलर (झण्डै १६ अर्ब रुपैयाँ) बराबरया अनुदान बिइगु जुगु दु।

विश्व बैंक कार्यकारी निर्देशक बोर्डं आइतबाः नेपाल सरकारया प्रमुख विद्यालय शिक्षा क्षेत्र कार्यक्रम कार्यान्वयन यायेत उगु रकम बराबरया अनुदान बिइगु निर्णय याःगु दु। थुगु ज्याझ्वः विगतया विद्यालय क्षेत्रया ज्याझ्वः आधारितय् जुइ। माल्दिभ्स, नेपाल व श्रीलंकाया लागि विश्व बैंकया कन्ट्री निर्देशक फारिस हदाद जेर्भोसं गुणस्तरीय शिक्षाय् लगानी यायेमाःगुलि मानव पूँजी विकासया लागि महत्वपूर्ण जुइ धका धयादीगु खः।

थुकिइ न्हुगु संघीय राज्यया महत्वकांक्षा यायेत शिक्षाया गुणस्तर व समतामूलक पहुँच दयकेत नेपाल सरकारया दृष्टिकोण तक दुथ्याका समर्थन यायेगु धका वयकलं धयादीगु खः। थुगु अनुदान कोभिड–१९ या कारण बन्द जूगु विद्यालयया कारण जूगु हानीयात सम्बोधन यायेत, उपयुक्त कक्षा कोठा निर्माण नाप डिजिटल शिक्षणयात सुदृढ यायेत छ्यलेगु जुइ धका विश्व बैंकं धाःगु दु। नाप छात्रवृत्ति ज्याझ्वः न जुइफइगु धका धाःगु दु।

नेवाःतय्गु अधिकार, पहिचानया लागि न्ह्यानाच्वंगु नेवाः देय् दबूया थगु हे छेँ मदयाः नेवाःतय्गु दथुइ हे म्हसिका च्वनेमाःगु दुःखया खँ जूगुलिं नेवाः नुगः दुपिं सकलसिया ग्वाहालि दत धाःसा नेवाःदेय् दबुया छेँ थःगु कार्यकालय् दयकेगु नेवाः देय् दबूया नायः पवित्र बज्राचार्यं धयादिल।

वय्कलं स्वनिगलय् च्वंपिं नेवाःत थवंथवय् छप्पँछधि जुइत थाकुगु तर गुथि विधेयकया आन्दोलनं नेवाःत क्वाहावःगुलिं यानाः स्वनिगःपिने च्वपिं नेवाःत धाःसा छप्पँछधि जुयाः ज्या न्ह्याकाच्वंगुलि गर्व याय् बहःजू धयादिल ।

नेवाः देय् दबू येँ जिल्लाया दँ मुँज्या जगत सुन्दर ब्वनेकुथिइ जूगु ज्याझ्वलय् नुगःखँ तयादिसें स्वनिगः विशेष प्रदेशया नायः श्री कृष्ण महर्जनं देय् दबूया पहलय् अडान पौ बियागुया नतिजां बाग्मति प्रदेशय् नेवाः भाय् कामकाजी भाय्या रुपय् छ्यलेत निम्ह विशेषज्ञ सरकारपाखें ल्ययेगु ज्या जुइ धुंकूगु धयादिल ।

लोककवि राजभाई जकःमिं देय् दबूया चिनाखं ब्वना दिगु ज्याझ्वलय् जिल्लाया छ्याञ्जे धनबिर महर्जनं बार्षिक कार्य प्रगतिप्रतिवेदन व दाँभरिं धर्मराज शाक्यं आर्थिक प्रतिवेदन न्ह्यब्वःगु खः । निगुलिं प्रतिवेदनय् वःगु न्ह्यसःयात नायः धनबहादुर महर्जनं थःगु मन्तव्यया झ्वलय् सकसिया सल्लाह सुझाव व न्ह्यसःयात कुला दिउगु खँ नापं वय्कलं जिल्लाया भावि ज्याझ्वःया बारे नं कनादीगु खः ।

सचिव सुनिता महर्जनं न्ह्याकादीगु खः उगु हे ज्याझ्वलय् जिल्लाया दुज नापं अतिरिक्त क्रियाकलाप कजि बालकृष्ण श्रेष्ठं चिनाखँ ब्वनादिउगु खसा दुजः मन्दिरा श्रेष्ठं नेवाः देय् दबू किपू नगरया नायः बुद्धिलाल ज्यापुं च्वयादिगु म्ये हालादिगु खः ।