प्रस्तावित प्रधानन्यायाधीश हरिकृष्ण कार्कीया सुनुवाइ थौं क्वचाःगु दु।

प्रस्तावित प्रधानन्यायाधीश कार्की न थौं सिंहदरबारय् जूगु संसदीय सुनुवाइ समितिया बैठकय् थःगु कार्ययोजना पेस याःगु खः। उगु झ्वलय् वयकलं थः इच्छाविपरीत न्यायाधीश जुयागु अय्न इमान कायम यानागु दु धका धाःगु खः।

सुनुवाइ समितिया मेगु बैठक शुक्रबाः ८ बजे च्वनिगु जुगु दु। शुक्रवाः जुइगु बैठकय् न्ह्यसः लिसः याइगु जुगु दु। कामु प्रधानन्यायाधीश तक जुयादीम्ह कार्की वंगु वैशाख २५ गते संवैधानिक परिषदया बैठकं प्रधानन्याधीशय् सिफारिस जूगु खः।

संसदीय सुनुवाइ समिति गठन मजुगु इलय् कार्कीया संसदीय सुनुवाइ प्रक्रिया लिवागु खः।

कार्कीविरुद्ध ३८ म्हेसिगु उजुरीकर्तापिनिगु २९ उजुरी दर्ता जुगु खः।

प्रस्तावित प्रधानन्यायाधीश हरिकृष्ण कार्की न थः इच्छा विपरीत सर्वोच्चय् न्यायायाधीश नियुक्त जूगु धका धाःगु दु।

तत्कालीन प्रधान्यायाधीशया इनापय् थः सर्वोच्चया न्यायाधीश नियुक्त जूगु व आःयागु परिस्थितिबस कायम मुकायम प्रधानन्यायाधीशया जिम्मेवारीइ दु धका धाःगु खः।

थौं सुथय् संसदीय सुनुवाइ समितिया बैठकय् वयकलं अथे धका धाःगु खः। आः परिस्थितिबस व सौभाग्यबस थः च्यालानिसे कायम मुकायम प्रधानन्यायाधीशया जिम्मेवारीइ च्वना च्वनागु दु धका धयादीगु खः। २०७२ साल फागुन १८ गते न्यायाधीशय् सिफारिस जुयादीगु व २०७३ साउन १७ गतेजक न्यायाधीश जूयागु धका कार्कीं जानकारी बिःगु खः।

वंगु वैशाख २५ गते संवैधानिक परिषदया बैठकं प्रधानन्यायाधीशय् कायम मुकायम प्रधानन्यायाधीश कार्कीया नां सिफारिस जूगु खः।

संसदीय सुनुवाइ समितिपाखे अनुमोदन जुइवं राष्ट्रपतिपाखे प्रधानन्यायाधीश नियुक्त याइगु व्यवस्था दु।

राष्ट्रिय जनगणना २०७८ य् जाति, भाषा व धर्म सम्बन्धी मखुगु तथ्यांक भिंकेत नेपाःया आदिवासी जनजाति संघ, संस्थापिन्स माग याःगु दु।

नेपाल आदिवासी जनजाति महासंघया नेतृत्वय् थीथी जातीय संगठनपिन्स प्रधानमन्त्री पुष्पकमल दाहाल प्रचण्डयात थौं बुधवाः बालुवाटारय् नापलाना राष्ट्रिय तथ्यांक कार्यालयं सार्वजनिक याःगु राष्ट्रिय जनगणना २०७८ य् जाती, भाषा व धर्म सम्बन्धी तथ्यांक गलत खः धका धासे प्रधानमन्त्रीयात ज्ञापनपौं लःल्हासे ध्यानाकर्षण याःगु खः ।

तथ्यांक कार्यालयं जारी याःगु जाति, भाषा, धर्मया महलय् जातिपिन्त तछ्याःगु धासे आदिवासी जनजाति संघ, संस्थापिन्स कानुनी व्यवस्था कथं तथ्याङ्क भिंकेमाःगु व जाति दुने थरयात जाति कथं छुट्यायेत इनाप याःगु खः।

प्रधानमन्त्री प्रचण्डं लिसः बिइगु झ्वलय् कानुनीय् व्यवस्था दु कथं न्ह्याः वनां उगु तथ्यांक भिंकेगु बचं बियादीगु खः।

शेयर बजाः थौं न दोहोरो अङ्कं थहावःगु दु। शेयर बजाः परिसूचक नेप्से १६ दशमलव ४२ अङ्कं थहावना २ हजार ३७ दशमलव ०६ बिन्दुइ थ्यःगु दु। मेमेगु समूहया शेयर थौं यक्को थहावःगु दु।

अथेहे बैंक, जीवन बीमा, माइक्रो फाइनान्स लगायत समूहया शेयर थहावःगुलि विकास बैंक, फाइनान्स, होटल, व्यापार लगायतया समूहया शेयर कुहावःगु दु।

कारोबार रकम थौं थहावना ५ अर्ब रुपैयाँ स्वया अप्पो थ्यःगु दु। २७५ गु कम्पनीया १ करोड २५ लाख कित्ता शेयर ५ अर्ब १ करोड ७८ लाख रुपैयाँया कारोबार जूगु दु।

दकलय् अप्पो शिवम् सिमेन्टया २८ करोड १७ लाख रुपैयाँया शेयर न्यायेगु मिइगु जूगु दु। खप्तड लघुवित्त व सिटी होटलया शेयर झण्डै १० प्रतिशतं थहावःगु दु।

समग्र बजाः थहावःसा राष्ट्रिय बीमा कम्पनी व मोलुङ हाइड्रोपावरया शेयर ५ प्रतिशत स्वया अप्पो कुहावःगु दु।

थौं १२६ गु कम्पनीया शेयर भाः थहावःगु दु सा ९१ गु शेयरया भाः कुहावःगु दु सा खुगु कम्पनीया शेयर भाः स्थिर जूगु दु।

करुणामय मानव विकास संघं थीथी थासय् च्वपि ८२ म्ह गरिव व जेहेन्दार विद्यार्थीपिन्त छात्रवृत्ति वितरण याःगु दु।

काभ्रेया बनेपाय् चक्रज्योति माविइ क्वचाःगु उगु ज्याझ्वलय् २१ गु सामुदायिक विद्यालय अध्ययनयाना च्वपि विद्यार्थीपिन्त स्कुल व्याग, ड्रेस, लाकां लगायतया सामग्री वितरण याःगु खः। सन् २००५ सालय् स्थापना जूगु संघं १८ दँ निसे सिन्धुपाल्चोक, काभ्रे व ख्वपया थीथी जिल्लाय् च्वंगु विद्यालयय् अध्ययनयाना च्वपि विद्यार्थीपिन्त छात्रवृत्तिया सामग्री लःल्हाःगु खः।

मानव धर्म निर्वाह यायेगु कथं संघं विद्यार्थीपिन्त ग्वाहालि यायेगु कथं छात्रवृत्ति बिया वयाच्वनागु धका संघया सचिव उत्तम मानन्धरं धाःगु दु। कक्षा १ निसे १० तक अध्ययन यानाच्वपि जेहेन्दार विद्यार्थीपिन्त अथे शैक्षिक सामग्री संघं लःल्हाना वयाच्वंगु खः।

संघया अध्यक्ष सिद्धिगोपाल मानन्धरया सभाध्यक्षताय् जूगु उगु ज्याझ्वलय् बनेपा नगरपालिकाया मेयर शान्तिरत्न शाक्य, ईमेज च्यानल टेलिभिजनया महाप्रबन्धक रघुवरभक्त मानन्धर, वडाध्यक्ष शुभलक्ष्मी मानन्धर, काभ्रे उद्योग वाणिज्य संघया पूर्व अध्यक्ष प्रकाश मानन्धर लगायतपिनिगु सहभागिता दुगु खः।