लुँया भाः थौं न निसः थहावःगु दु।

लुँ तोलां निसः थहावना थौं १ लाख १२ हजार ७ सय रुपैयाँ  थ्यःगु दु धका नेपाल सुन चाँदी व्यवसायी महासङ्घं धाःगु दु।

अथेहे वहःया भाः थौं स्थिर जूया १ हजार ४ सय २० रुपैयाँ हे कारोबार जूगु दु धका महासङ्घं धाःगु दु।

वाद्यगुरु न्हुछेबहादुर डंगोल मोटरसाइकल दुर्घटनाय् लानाः घाःपा जुगु दु । वयकः म्हिगः मंगलवाः बहनि टेकूं कालिमाटी ताँय् मोटरसाइकलं वयाच्वंगु इलय् कारं ठक्कर नकेवं घाःपा जुगु खः ।

सन्तपुरय् जुइत्यःगु नेपाल अर्केष्ट्राया मू निर्देशन यानाच्वनादिम्ह डंगोल म्हिगः पचली लक्ष्मेश्वर देगलं बाजं थाइ पिन्त बाजंया अभ्यास याका छेँ लिहाँवनेगु झ्वलय् थथे दुर्घटनाय् लाःगु खः ।

घाःपा जुइवं डंगोलयात ट्रमा सेन्टरय् यंका वासः याःगु खःसा वयकःया पुलिं अप्वः घाःपा जुगु दु। आः वयकः आः छेँय् च्वनाः वासः याका च्वनादिगु दु ।

ठक्कर ब्यूगु कारया चालकयात कालिमाटी प्रहरी ज्वंगु दु।

प्रधानमन्त्री कार्यालय मातहतया सार्वजनिक खरिद अनुगमन कार्यालयं कार्यसम्पादन चित्तबुझे मजूगु धासे १६ गु ठेकदार कम्पनी व छम्ह आपूर्तिकर्तापिन्त न्ह्यन्हुया दुने स्पष्टीकरण न्यःगु दु।

सार्वजनिक संस्थापिन्स हाकू धलखय् तयेगु निति सिफारिस याःगु कम्पनी व आपूर्तिकर्तापिन्त ३० दिं दुने म्याद बिया स्पष्टीकरण फ्वंगू दु । तर उगु इलय् स्पष्टीकरण मबिउगुलि हाकनं न्ह्य न्हुया म्याद बिया स्पष्टीकरण फ्वंगु दु धका कार्यालयं धाःगु दु।

राजन गौतम नेतृत्वया न्हुगु निर्माण सेवा चितवन, राजा बहादुर झा नेतृत्वया नव निर्माण विल्डर्स प्रालि जनकपुर, सशक्त शरण गोले अभिशेक नेतृत्वया आर्भन कन्स्ट्रक्सन प्रालि चितवन, राजु पोखरेल नेतृत्वया ब्लुवर्ड डिजाइन एण्ड कन्स्ट्रक्सन ख्वप व मिलन पन्त नेतृत्वया इपिक कम्प्युटर्स ट्रेडर्स येँ च्वंगु खः ।

अथेहे बबिन्द्र विक्रम बुढाथोकी नेतृत्वया बुढाथोकी निर्माण सेवा पाँचथर, शेरबहादुर लिम्बु नेतृत्वया माबोहाङ्ग निर्माण सेवा ताप्लेजुङ, शोभा न्यौपाने नेतृत्वया समृद्ध निर्माण सेवा चितवन, डिल्लीराम तिवारी नेतृत्वया जय भगवती निर्माण सेवा चितवन, सुरज कुमार शाही नेतृत्वया शुभम् कन्स्ट्रक्सन चितवनयात स्पष्टीकरण माग याःगु दु धका सार्वजनिक खरिद अनुगमन कार्यालयं धाःगु दु।

लक्ष्मण पाण्डेय नेतृत्वया त्रिवेणी निर्माण सेवा कास्की, सुदिप श्रेष्ठ नेतृत्वया एस कन्स्ट्रक्सन चौतारा, कुलबहादुर श्रेष्ठ नेतृत्वया बी के बी कन्स्ट्रक्सन एण्ड सप्लायर्स सिन्धुली, दिपेन्द्र बहादुर शाही नेतृत्वया सिद्धिसाई प्रकाश कन्स्ट्रक्सन प्रालि न्हुगु बानेश्वर, विनित जोशी नेतृत्वया जोशी विज हाउस प्रालि न्हुगु बानेश्वर नाप ध्रुब प्रसाद न्यौपाने नेतृत्वया चेतना कन्स्ट्रक्सन प्रालि व युकेएन कन्स्ट्रक्सन प्रालि यलयात स्पष्टीकरण फ्वंगु खः।

येँ महानगरपालिकां छात्रवृत्ति वितरण विवरण बुझे मयाःगु निजी स्कुलया नां छगु सूचं सार्वजनिक याःगु दु ।

येँ मनपा शिक्षा विभागं १० तगिं तकया विद्यार्थीयात जेठ १५ गते तक छात्रवृत्ति इनाः उकिया विवरण जेठ १६ गते दुने पेश यायेत सुचं पिथंगु खः । महानगरं सार्वजनिक याःगु सुचं ३४२ गू निजी स्कुलं छात्रवृत्ति विवरण सार्वजनिक मयाःगु खँ न्ह्यथनातःगु दु । येँ मनपा दुने ५२० गू निजी स्कुल सञ्चालन जुयाच्वंगु दु । उगु स्कुलयात थ्वहे वइगु जेठ २८ गते दुने छात्रवृत्ति विवरण पेश यायेत हाकनं म्याद बिउगु दु ।

सुचं बियागु ई दुने नं विवरण पेश मयाइगु स्कुलया अनुमति÷स्वीकृति रद्द यायेगु वा कानुन कथं कारबाही यायेगु ख्याच्वः नं बियातःगु दु । शिक्षा नियमावली २०५९ व महागनर शिक्षा ऐन २०७५ व नियमावलीइ निजी स्कुलय् ब्वनाच्वंपिं विद्यार्थी मध्ये निश्चित प्रतिशत विद्यार्थीयात छात्रवृत्ति बीमाःगु व्यवस्था दु । ऐनय् दुगु व्यवस्था पालना मयात धाःसा स्कुलया स्वीकृति÷अनुमति तकं रद्द याये फइगु कानुनी प्रावधान दु ।

ऐनय् दुगु व्यवस्था कथं निजी स्कुलं मुक्कं भर्ना जूपिं विद्यार्थी ल्याःया १० प्रतिशत विद्यार्थीयात छात्रवृत्ति बीमाःगु व्यवस्था दु । उकिया नितिं सम्बन्धित वडाया वडाध्यक्ष, विद्यालय निरीक्षक, अभिभावकया प्रतिनिधिया समन्वयय् छात्रवृत्ति वितरण सम्बन्धी मापदण्ड क्वःछीमाः ।

तर निजी स्कुलतय्सं थः यत्थे विद्यार्थी ल्ययेगु यानाच्वंगु अभिभावकया गुनासो वयेवं येँ मनपां सुचं पिथंगु खः । येँ मनपां वंगु वैशाख २४ गते छात्रवृत्ति इनेत स्कुलयात पौ च्वःगु खः ।थ्वहे झ्वलय् मेयर बालेन साहं छात्रवृत्ति बुझे याःगु विद्यालययात सुभाय् बीगु दु ।

सामाजिक सञ्जालय् च्वसें मेयर साहं येँ मनपा दुने ब्वति च्वंपिं विद्यार्थीं नियम कथं कायेदइगु अधिकारया बारेय् गम्भीर दुगु खँ धाःगु दु ।