वंगु २४ घण्टाया दुने देयन्यक थप ९९ म्ह कोरोना संक्रमण पुष्टि जूगु दु।

स्वास्थ्य मन्त्रालयया कथं १ हजार ६०४ म्हेसिगु नमुना मध्ये ३६४ म्हेसिगु पीसीआर परीक्षण याःगुलि ५० म्ह व १ हजार २४० म्हेसिगु एन्टीजेन परीक्षण यागुलि ४९ म्ह याना ९९ म्हेसित कोरोना संक्रमण पुष्टि जूगु दु।

अथेहे थ्व नाप कोरोना सक्रिय संक्रमितपि ३७७ म्ह थ्यःगु दु।

शेयर बजाः थौं सामान्य घटे जुगु दु। शेयर बजाः नेप्से थौं २ दशमलव ८० अङ्कं कुहवया १ हजार ९ सय ३१ दशमलव ६८ विन्दुइ कुहावःगु दु।

थौं होटल, बीमा व बैंक समूहया शेयर भचा थहावंसा मेगु समूहया शेयर कुहावःगु दु। २ सय ६५ गु कम्पनीया ३० लाख ५६ हजार कित्ता शेयर ९७ करोड ४५ लाख रुपैयाँया कारोबार जूगु दु।

दलकय् अप्पो सोल्टी होटलया ३ करोड ८९ लाख व एनआईसी एसिया बैंकया करोड ६४ लाख रुपैयाँया शेयर किनबेच जूगु दु।

एसियन हाइड्रोपावर कम्पनीया शेयर झन्डै ८ प्रतिशत व सगरमाथा जलविद्युत् कम्पनीया शेयर साढे ६ प्रतिशतं कुहावाःगु दु।

समग्रमा बजाः कुहावंसा आदर्श लघुवित्त, मोलुङ खोला हाइड्रोपावर व कालिञ्चोक दर्शन लिमिटेडया शेयर १० प्रतिशतं थहावःगु दु।

बोडेय् म्ये प्वाः खनेगु जात्रा क्वचाःगु दु। थुगुसि २७ दँया सुजन बाग श्रेष्ठं म्ये प्वाः खकूगु जात्राया परम्परयात न्ह्याकूगु खः।

सुजन प्यक्वः तक म्ये प्वाः खंम्ह बुद्धकृष्ण बाग श्रेष्ठया कान्छाम्ह काय् खः। बुद्धकृष्णं न्हापां २०६२ साल म्ये प्वाः खकूगु खः सा २०६५ साल तक लगातार प्यकः तक म्ये प्वाः खंगु खः।

अथेहे जुजुभाइ श्रेष्ठं २०६५ निसे २०७२ तक च्याक्वः तक म्ये प्वाः खनिइगु जात्राया निरन्तरता बिःगु खः।

थिमिइ बिस्केट जात्रा तःजिक क्वचाःगु दु। न्हापा मध्यपुर थिमीइ ३२ गु खः जात्रा जुया च्वंगु खःसा आः २३ गु खः  जात्रा जुगु दु।

वंगु चैत्र ३० निसे बैसाख २ गते तक थुगु जात्रा जुइगु याइ। जात्राय् ब्बति कायेगु नितिं छेँखापतिकं छप्वाः छप्वा चिलाख ज्वना वयेगु परम्परा दु। अथेहे भुयू सिन्ह तयकेगु न चलन दु।

जात्रा अवलोकन यायेगु निति स्वनिगःया मेयर उपमेयरपि न वःगु खः।

धम्मवती गुरुमांया हनाय् विशेष मंकाः धम्मपुजा देछायेगु ज्या जुगु दु।

राष्ट्रिय सभागृहय् जूगु छगू ज्याझ्वःया दथुइ उपप्रधानमन्त्री नापं गृहमन्त्री नारायणकाजी श्रेष्ठं वसपोलयात धम्मपुजापौ लःल्हासें सम्मान यानादीगु खः ।

वसपोल ९० दँय् क्यंगु लिसें प्रव्रज्या जुयाबिज्याःगु ७५ दँ क्यंगु लसताय् उगु ज्याझ्वः जूगु खः । ज्याझ्वलय् नेपाःया लागिं म्यान्मारया राजदूत ऊ नु उ, येँ महानगरपालिकाया उपमेयर सुनिता डंगोल, नेवाः न्ह्यलुवा मल्ल के. सुन्दरपिंसं धम्मवती गुरुमां व वसपोलया शिक्षाया बारे बिचाः तयादीगु खःसा डा.रीना तुलाधरं गुरुमांया जीवनी कनादीगु खः ।

थेरवादया भिक्षुपिं, वज्रयानया गुर्जुपिं व महायानया लामापिंसं मंगल पाठ यासें न्ह्याकूगु उगु ज्याझ्वलय् ज्याझ्वःया संयोजक खेमावती गुरुमामं लसकुस यानाबिज्याःगु खः । ज्याझ्वलय् अमता गुरुमामं च्वयाबिज्याःगु ‘नेपालमा थेरवाद बुद्ध धर्म प्रचार प्रसारमा धर्मकीर्ति विहारको योगदान’ नांगु सफू विमोचन जूगु खःसा धर्मकीर्ति विहार संरक्षण कोषया कोषाध्यक्ष अजयरत्न स्थापितं ‘धम्मवती धम्म प्रशिक्षण परियोजना’ या घोषणा यानादीगु खः ।