ब्रायोफाइटसया विज्ञ प्रा.डा. निर्मला प्रधानयात राष्ट्रिय वनस्पति पुरस्कारपाखे हंगु दु।

वनस्पति विभागया ६३ क्वःगु दँ मुज्या व २४ क्वःगु वनस्पति दिवसया लसताय् जुगु ज्याझ्वलय् राष्ट्रिय योजना आयोगया सदस्य डा. जयकान्त राउतं प्रधानयात सिरपा लल्हागु खः। उगु सिरपाया राशी २ लाख रुपैयाँ नगद खः ।

नेपालय् वनस्पतिक स्रोतया अध्ययन, अनुसन्धान नाप प्राध्यापनय् ताः ईनिसे समर्पित जुयादीम्ह वनस्पतिक स्रोतया संरक्षण नाप विकासय् योगदान बिःगुलि हंनागु खँ धका विभागं धाःगु दु।

प्रधानं त्रिभुवन विश्व विद्यालय अन्तर्गत प्राकृतिक विज्ञान संग्रहालय, स्वयम्भूपाखे अवकास काःगु खः।

सगरमाथाय् स्वम्ह शेर्पा आरोही बेपत्ता जूगु दु। पर्यटन विभागया निर्देशक युवराज खतिवडाया कथं स्वम्ह आरोही थौं सुथय् ९ः३० बजेनिसे तनाच्वंगु खः।

आरोहीपि दा छिरी शेर्पा, लाक्पा टेण्डी शेर्पा व लाक्पा रिता शेर्पा तनाच्वंगु खः। उपि स्वम्ह बेस क्याम्पपाखे क्याम्प वानया दथुइ तनाच्वंगु खः।

आः सिम्रिक एयरया हेलिकप्टरं मालेगु ज्या यानाच्वंगु दु।

लोक साहित्य परिषदं करुणाकर सिरपा बाखं च्वमि शान्तराज शाक्ययात लःल्हागु दु । लोक बाखंयात ब्वना सामाजिक सन्जालया लिधंसाय् छेँखा छेँखा पत्तिकं न्यंकादीगु ज्वःमदुगु ज्यायात कदरयासे वयकःयात करुणाकर सिरपा देछागु खः।

ज्याझ्वःया मूपाहा यल महानगरपालिकाया उपमेयर मन्जरी शाक्यं छगु ज्याझ्वः दथुइ वयकःयात हनापौ लःल्हागु खः। यल महानगरया उपमेयर शाक्यं अमर जुयावंम्ह संस्कृतिविद् सत्यमोहन जोशीया लोक साहित्यप्रतिया मतिनायात लुमंका दिसे लोकसाहित्यविद् करुणाकर वैद्यया नामय् निस्वनातःगु सिरपालं सम्मानित जुयादीम्ह साहित्यकार शान्तराज शाक्यया बाखं कनादीगु कलाया प्रशंसा यानादिगु खः।

ज्याझ्वलय् नेपालभाषा केन्द्रिय विभाग प्रमूख राजनलाल जोशी, यल महानगर १२ या वडाध्यक्ष नारायण अवाले, सिरपाया दाता जयकर बैद्य , परिषदया संरक्षक अणुराज शाक्यपिन्सं नुगःखँ तयादीगु खः।

करुणाकर सिरपालं सम्मानित जुयादीम्ह शान्तराज शाक्यं थःम्हं सामाजिक सन्जाल पाखें लोकबाखं कनेगु शुरु यानाबले थथे सिरपा वइ धका बिचाः मदुगुधका धयादीगु खः।

जसपा नेपालया नेता नाप पुर्व मन्त्री राजेन्द्रप्रसाद श्रेष्ठया कुतलय् नेपालभाषा अभियन्तापि शिक्षामन्त्री अशोक राईयात नापलाना सघिय शिक्षा नीतिइ मां भाय्या शिक्षा लागु यायेगु माः धका ध्यानाकर्षण याकूगु दु।

शिक्षामन्त्री राईयात नापलाना सघिय शिक्षा नीति दयकेमाःगु व “भाषाया बिकल्प भाषा“ तया पाठ्यक्रम परिमार्जन यायेमाःगु धका धाःगु खः।

नेपाल सरकारया नीति व कार्यक्रमया प्रमुख मस्यौदाकार राजेन्द्र श्रेष्ठं आःयागु सरकारया नीति व कार्यक्रमय् २.३ नम्बर शिर्षकय् २ नम्बर बुदाँय् न उगु बिषय दुथ्याःगु दु धका ध्यानाकर्षण याःगु खः।

उगु ज्याझ्वलय् न्हुदँ समारोह समिति ११४३ या नायः प्रा डा नरेशमान बज्राचार्य, नेवाः न्ह्यलुवापि डा.महेशमान श्रेष्ठ, शाक्य शुरेन, बिद्या चित्रकार, बिष्णु चित्रकार, दिपक तुलाधर व सृजनमान श्रेष्ठ शिक्षामन्त्री राईयात नापलाना सघिय शिक्षा नीति बिषय खँल्हागु खः।

लिपागु २४ घण्टाय् कोरोना सक्रमणं छम्हेसिगु ज्यान वंगु दु। सोमबाः वीर अस्पतालय् उपचार यानाच्वंम्ह ७० दँ दुम्ह मिसा कोरोना संक्रमणं मदुगु खः।

अस्पतालं बिःगु जानकारी कथं उम्ह मनूयाके चिनिल्वय् व स्वंय् समस्या दुम्ह धका धाःगु खः। स्वास्थ्य तथा जनसंख्या मन्त्रालयया कथं लिपागु २४ घण्टाय् १०६ म्ह कोभिड संक्रमण पुष्टि जूगु दु।

मन्त्रालयया कथं मंगलबाः ४७६ म्हेसिगु पीसीआर व १ हजार ९६० म्हेसिगु एन्टिजेन याना २ हजार ४३६ म्हेसिगु स्वास्थ्य परीक्षण याःगुलि १०६ म्हेसित कोराना संक्रमण पुष्टि जूगु खः।

पीसीआरपाखे ७४ व एन्टिजेन परीक्षणय् ३२ म्हेसित संक्रमण खनेदुगु खः। थ्व नाप आः सक्रिय संक्रमित जूपि ४६९ म्ह थ्यःगु दु।