सरकारयात १ क्वीन्टल लुँ तस्करी प्ररकरणया छानबिन समिति दयकेमाःगु दवाव वयाच्वंगुलि गृहमन्त्री, आईजीपी व सीआईबी प्रमुखपि सिंहदरबारस्थित प्रधानमन्त्री कार्यालय थ्यकूगु दु।

सरकारं उगु प्रकरणय् विशेष अनुसन्धान समिति दयकिइगु अनुमान याःगु दु। आः गृहमन्त्री नारायणकाजी श्रेष्ठ व आईजीपी बसन्तबहादुर कुँवर व केन्द्रीय अनुसन्धान ब्यूरो–सीआईबी प्रमुख किरण बज्राचार्यपि सिंहदरबारस्थित प्रधानमन्त्री कार्यालय वःगु दु।

संवैधानिक परिषदया बैठक लिपा प्रधानमन्त्री पुष्पकमल दाहालं उपि सहलह याइगु जुगु दु। भन्सारय् सामान दुने सुचूका हवाई मार्ग जुया लुँ तस्करीइ राजस्व अनुसन्धान विभागं अनुसन्धान यानाच्वंगु खः।

संगठित अपराधय् अनुसन्धान मजूगु व प्रहरीयात जिम्मा मबिइवं सरकारया आलोचना जुयाच्वंगु खः।

संवैधानिक परिषदं प्रधान न्यायाधीशय् वरिष्ठ न्यायाधीश विश्वम्भर श्रेष्ठयात सिफारिस याःगु दु।

थौं बहनि प्रधानमन्त्री लिसे मन्त्रिपरिषदया कार्यालय सिंहदरबारय् च्वंगु परिषदया बैठकं सर्वोच्च अदालतय् प्रधान न्यायाधीशय् सिफारिस यायेगु निर्णय जुगु धका राष्ट्रिय सभाया अध्यक्ष गणेश तिमिल्सिनां जानकारी बिःगु दु।

सामाखुसीइ चुइका तनाच्वम्ह मचाया शव लूगु दु। सामाखुसी च्वंगु खुसिइ चुइका तनाच्वम्ह १३ दँ दुम्ह मचा साजन मगरया शव लुगु दु।

वयागु शव दक्षिणकाली खुसिइ नापं खुसिइ लुगु धका महाराजगञ्ज वृत्तं धाःगु दु। वंगु साउन ७ गते निसे सामाखुसीइ साजन मगरयात खुसि चुइका यकूगु खः।

शेयर बजाः कारोवार जुइगु वाःया लिपागु दिं थौं सामान्य थहावःगु दु। शेयर बजाः परिसूचक नेप्से थौं बिहीवाः ३ अङ्कं थहावना २ हजार ८९ दशमलव ८४ विन्दुइ थ्यःगु दु।

विकास बैंक, फाइनान्स, होटल, जलविद्युत् व निर्जीवन बीमा समूहया शेयर सामान्य कुहावःगु दु सा मेमेगु समूहया शेयर सामान्य थहावःगु दु।

थौं दकलय् अप्पो सपोर्ट लघुवित्त व एनआईबीएल ग्रोथ फन्डया शेयर १० प्रतिशतं थहावःगु दु। प्रोग्रेसिभ फाइनान्सया शेयर धाःसा ५ प्रतिशतं कुहावःगु दु। २६२ गु कम्पनीया ५१ लाख ३० हजार कित्ता शेयर कारोवार जुगु दु।

४० हजार ७ सय पटक जूगु कारोबारपाखे १ अर्ब ७८ करोड १९ लाख रुपैयाँया शेयर न्यायेगु मिइगु जुगु दु। दकलय् अप्पो शिवम् सिमेन्टया ९ करोड २३ लाख रुपैयाँया शेयर कारोवार जुगु दु।

लुँया भाः तोलां थौ खुसः कुहावःगु दु। लुँ तोलां खुसः कुहावया थौ १ लाख १२ हजार ४ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु।

अथेहे, वहः न तोलां झीन्यातका कुहावःगु दु।वहः तोलां झीन्यातका कुहावया थौ १ हजार ४ सय ६० रुपैयाँ न कारोबार जूगु दु धका महासङ्घं धाःगु दु ।