कम्बोडिया सरकारया ब्बनाय् निर्वाचन पर्यवेक्षणया लागि औपचारिक भ्रमण वना च्वम्ह नेकपा एमालेया अध्यक्ष लिसे पूर्व प्रधानमन्त्री केपी शर्मा ओलीं कम्बोडियाया प्रधानमन्त्रीयाना नापलागु दु।

राजधानी नोम्पेनय् थौं सुथय् प्रधानमन्त्री हुन सेनयाना नापलागु दु धका ओलीया निजी सचिवालयं धाःगु दु। ओलीनाप थीथी देय् या २२ म्ह वरिष्ठ राजनीतिज्ञपि निर्वाचन पर्यवेक्षणया लागि कम्बोडियाय् वःगु खः।

ओलीयात विमानस्थलय् अनया परराष्ट्र मन्त्रालयया उच्च अधिकारीपिन्स लसकुस याःगु खः। विमानस्थलय् ओलीनाप पाकिस्तानया पूर्व प्रधानमन्त्री युसुफ राजा गिलानी, नाइजेरियाया पूर्व राष्ट्रपति जोनाथन गुडलकपिन्स न नापलागु दु धका सचिवालयं धाःगु दु।

कम्बोडियाय् जुयाच्वंगु निर्वाचनय् १८ गु दलं ब्बति काःगु दु। थीथी ६५ देशया ३३५ म्ह पर्यवेक्षकपिन्स ब्बति काःगु दु।

प्रधानमन्त्री पुष्पकमल दाहाल प्रचण्ड थौं इटालीइ वःगु दु। साउन ८ निसे १० गतेतक जुइगु संयुक्त राष्ट्रसङ्घीय खाद्य प्रणाली शिखर सम्मेलनय् ब्बति कायेगु निति प्रधानमन्त्री प्रचण्ड इटालीइ वःगु खः।

प्रधानमन्त्री प्रचण्डनाप कृषि लिसे पशुपन्छी विकास मन्त्री डा. बेदुराम भुसाल, राष्ट्रिय योजना आयोगया सदस्य डा. जयकान्त राउत लिसे प्रधानमन्त्री सचिवालय सदस्य नाप म्ह्याय् गङ्गा दाहाल न भ्रमणय् वःगु खः।

वयकलं इटालीइ जुइगु उगु सम्मेलनय् सम्बोधन याइगु ज्याझ्वः दु। ‘युनाइटेड नेसन्स फुट समिट प्लस टु स्टकटेकिङ मोमेन्ट’ नांया शिखर सम्मेलनया लागि नेपाल सरकारया पाखे प्रधानमन्त्री दाहालं औपचारिक रुपं थःगु धारणा तयेगु ज्याझ्वः दु।

प्रधानमन्त्री प्रचण्डं अतिकम विकसित देशय् अध्यक्षया हैसियतं सोमवाः सम्मेलनय् उलेज्या सत्रयात सम्बोधन याइगु कार्यसूचीइ दु। नाप उगु विद्यालय भोजनया एजेन्डा दुगु बिस्कं सत्रयात नाप मङ्गलवाः खाद्य प्रणाली ह्यूपाः एजेन्डाया सत्रय् न अध्यक्ष राष्ट्रया हैसियतं प्रधानमन्त्रीं सम्बोधन याइगु ज्याझ्वः दु।

लुँ तोलां थौं च्यासः कुहावःगु दु। लुँ तोलां थौं च्यासः कुहावया १ लाख १२ हजार ८ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु।

अथेहे वहः तोलां न झीन्यातका कुहावःगु दु। वहः तोलां झीन्यातका कुहावया १ हजार ४ सय ८० रुपैयाँ न कारोबार जूगु दु धका महासङ्घं धाःगु दु।

नेपाल विद्युत प्राधिकरणं टेकु सबस्टेसनपाखे आपूर्ति जुयाच्वंगु मत कन्ह्यः साउन ६ गते ८ घण्टा तक बन्द जुइत्यःगु दु।

प्राधिकरणं थौं छगू सूचं जारीयासे साउन ६ गते सुथय् ८ः३० बजे निसे न्हिनय् ४ः३० बजेतक विद्युत मवइगु धका जानकारी बिःगु दु ।

थौं बिःगु सूचं कथं बागमती फिडर अन्तर्गत सानेपा राममन्दी, गुसिंगाल, एडभान्स कलेज, अमरावती सानेपाया मोड, रेडियन्ट स्कुल दुगु थासय् बिजुली आपूर्ति बन्द जूगु खः अथे पूच्वो फिडर अन्तर्गत बल्खु, हेल्थपोस्ट, झम्सीखेल, पुल्चोक प्रधानसेनापति निवास, ठाडोढुंगा क्षेत्र व चःमती फिडर अन्तर्गत ज्ञान तीर्थ मार्ग, कालीमाटी सालिक चोक, छाउनी, डल्लु, बिजेश्वरी, स्वयम्भु, चःमती, किमडोल व बारुद खानाय् मत मवइगु जुगु दु।

अथेहे, किपू फिडर अन्तर्गत बल्खु, खसीबजार, त्रिभुवन विश्वविद्यालय, चोभार, टौदह रव ट्याङ्लाफाँटय् न मत मवइगु धका प्राधिकरणं धाःगु दु। त्रिपुरेश्वर फिडर अन्तर्गत टेकुनिसे पचली भैरव, उद्योग वाणिज्य संघ जूया सुकुम्बासी वस्ती, वर्ल्ड ट्रेड सेन्टर व थापाथली स्वीचिङ अन्तर्गत त्रिपुरेश्वर चोक, आशा अस्पताल, रंगशाला, नर्भिक अस्पताल, प्रसूति गृह जूया बबरमहल तक सानेपा, कुपण्डोल हिमालय होटल, स्थानीय विकास मन्त्रालय व पुल्चोकतक मत मवइगु धका धाःगु दु।

अथेतु, भैंसीपाटी फिडर अन्तर्गत महतो मार्ग, भैंसेपाटी आवास, भैंसेपाटी चोक, एकल डाँडा व क्षेत्रपाटी फिडर अन्तर्गत विष्णुमती खुसिइ सिथय् जूया पुष्पलाल पार्क, ढल्को चोकनिसे क्षेत्रपाटीतक मत वइमखु धका प्राधिकरणं धाःगु दु। नेपाल विद्युत प्राधिकणं वैकल्पिक व्यवस्थायाना विद्युत आपूर्ति कम प्रभावित जुइगु कथं दक्को फिडरय् नियमित विद्युत आपूर्ति यायेगु कुतः यायेगु धका धाःगु दु।

दर्ता येँ महानगरपालिकां कक्षा ११ य् छात्रवृत्तिया लागि १ हजार ८३ म्हेसिगु अनलाइन आवेदन दर्ता जूगु दु। येँ महानगरपालिकां वःगु असार २८ गतेनिसे सुथय् १० बजे तक खुल्ला याःगु आवेदनय् साउन ४ गते तक कार्यालय इलय् तक १ हजार ८३ म्हेसिया आवेदन बिःगु दु।

थुकिइ दकलय् अप्पो आवेदक विज्ञान विषयय् छात्र ५४९ म्ह व छात्रा २२७ म्हेसिया बिगु दु धका महानगरपालिकां धाःगु दु। व्यवस्थापन विषयया लागि २३९ म्हेसिया आवेदन बिःगु दु। अथेहे उकि मध्ये छात्र १४८ म्हेसिया व छात्रा ९१ म्हेसिया बिःगु दु।

प्राविधिक विषयया २४ म्ह छात्र व १७ म्ह छात्रायाना ४१ म्हेसिया बिःगु दु। कानुन विषयया लागि १६ म्ह छात्रा व न्ह्य्म्ह छात्रया २३ म्हेसिया बिःगु दु, मानविकीय् निम्हेसिया बिःगु दु धका महानगरया शिक्षा विभागं धाःगु दु। कक्षा ११ या लागि करिब ४ हजार २ सय सिटय् छात्रवृत्ति उपलब्ध याके फइगु महानगरया अनुमान दु।

महानगरपालिकां छात्रवृत्ति बिइगु निति सामुदायिक विद्यालय अध्ययन यानाच्वपि विद्यार्थीपि ४०%, संस्थागत विद्यालयपाखे छात्रवृत्तिइ अध्ययन याना च्वपि विद्यार्थीपि ५%, येँं महानगरपालिका दुने स्थायी बसोबास यानाच्वपि विद्यार्थीया लागि ९%, बञ्चरेडाँडा ल्याण्डफिल्ड साइड प्रभावितजूपिन्त १ प्रतिशत छात्रवृत्ति लःल्हायेत्यःगु खः। ल्यः दुगु ४५ प्रतिशत सिटयात सच्छिगु प्रतिशत माने याना सामुदायिक विद्यालय अध्ययन याना च्वपि विद्यार्थीपिनिगु हकय् लागू जुइगु कथं ३३%, आदिवासी व जनजातिपिन्त १५%, मधेसीपिन्त १२%, खसआर्ययात १७% आरक्षण छात्रवृत्ति सिट उपलब्ध याकेबिइत्यःगु खः।

बिभागया कथं दलितयात ९%, मुस्लिमयात २%, थारुयात ४%, अपाङ्गता जूपिन्त २%, लिउने लानाच्वपिन्त ४%, सहिद व वेपत्ता जूयाच्वपि नागरिकया परिवार व द्वन्द्व पीडित नागरिकया परिवारयात २% छात्रवृत्ति बिइगु धका धाःगु दु। लिउने लागु धका  अछाम, कालीकोट, जाजरकोट, जुम्ला, डोल्पा, बझाङ, बाजुरा, मुगु व हुम्ला जिल्लाय् च्वना च्वपि विद्यार्थीपिन्त माने यायेगु धका महानगरपालिकां धाःगु दु।