राष्ट्रपति रामचन्द्र पौडेलं असनय् जमाद्यःया दर्शन यानादीगु दु। म्हिगः बहनि ९ बजे असन वना जमाद्यःया दर्शन यानादीगु खः।

अथेहे थौं जमाद्यःया रथ असनं सालां हनुमानध्वाकाया कालभैरव द्यःया न्ह्यने हइ। थौ ५ बजे असनं रथ सालां, बालकुमारी, केल त्वाः वघः हनुमानध्वाकाय् थ्यकिइ।

प्रधानमन्त्री पुष्पकमल दाहाल प्रचण्डं थौं मन्त्रिपरिषद् विस्तार यायेगु तयारीइ दु। सत्ता साझेदार दलपिन्स थःगु भागबण्डाय् लागु मन्त्रालय कथं नां प्रधानमन्त्रीयात लःल्हायेगवं मन्त्रिपरिषद् विस्तार जुइ धका प्रधानमन्त्री प्रचण्डया सचिवालय छम्ह दुजलं धाःगु दु।

थौं जुइगु मन्त्रिपरिषद् विस्तारय् नेपाली कांग्रेसं च्याम्ह, नेकपा माओवादी केन्द्रपाखे न्याम्ह, नेकपा एकीकृत समाजवादी व जनता समाजवादी पार्टी (जसपा) पाखे निम्ह निम्ह व जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी व नेपाल समाजवादी पार्टीपाखे छगु छगु मन्त्रालय कायेगु समझदारी जुगु खः।

अथे हे राष्ट्रिय स्वतन्त्र पार्टी व प्रभु साह नेतृत्वया आम जनता पार्टी न सरकारय् सहभागी यायेगु तयारी प्रधानमन्त्री प्रचण्डं याःगु दु।

सत्तारुढ गठबन्धनया शीर्ष नेतापिन्स मन्त्रालयया भागवण्डा लगभग टुंग्ये याःगु दु।

थौं बुधबाः बहनि बालुवाटारय् च्वंगु बैठकं छु दलयात छु मन्त्रालय कायेगु धका समझदारी जुगु दु धका जनता समाजवादी पार्टी (जसपा) या सहअध्यक्ष राजेन्द्र श्रेष्ठं जानकारी बिःगु दु। ‘कन्ह्यः बहनि तक मन्त्रिपरिषदयात पूर्णता बिइ जुइ’, वयकलं धयादीगु दु, ‘दक्को पार्टी न थःथःगु भागय् लाःगु मन्त्रालयया मन्त्रीपिनिगु नां बिइ, वया लिपा मन्त्रीपिनिगु शपथ जुइ।’ स्रोतं बिगु जानकारी कथं राष्ट्रिय जनमोर्चा बाहेक दक्को दलया मन्त्रालय भागवण्डा याये धुकुगु दु

सहमति कथं कांग्रेसं च्याःगु, माओवादीं न्यागु, एकीकृत समाजवादीं निगु, जसपां निगु, जनमत पार्टी, लोसपा, नाउपा व बाबुराम भट्टराई नेतृत्वया नेपाल समाजवादी पार्टी न छगु छगु मन्त्रालय काइगु जुगु दु। आम जनता पार्टीया अध्यक्ष प्रभु शाह न सरकारय् सहभागी जुइगु दु।

उपराष्ट्रपति रामसहायप्रसाद यादवं देशय् वःगु ह्यूपाः, लोकतान्त्रिक संघर्षनाप जनतां याःगु हरेक आन्दोलनय् सञ्चार ख्यःया तधःगु भूमिका दु धका धयादीसे सञ्चार ख्यः पूर्ण समावेशी जुइमाःगुलि बःबियादीगु दु।

नेवाः पत्रकार राष्ट्रिय दबूया प्रतिनिधिपि थौं बुधबाः लैनचौरया उपराष्ट्रपति कार्यालयय् वना नापलायेगु झ्वलय् वयकलं अथे धयादीगु खः। उपराष्ट्रपति यादवं सामाजिक न्याय, लोकतन्त्र व ह्यूपा हयेगु निति सञ्चार जगतया भूमिकाय् सराहना यानादीसे सञ्चार क्षेत्र समावेशी जुलकि अप्पो स्वया अप्पो जनताया सः थ्वइगु धका धयादीगु खः।

नेपाः विविध भाषा, संस्कृति व संस्कार राष्ट्रिय एकताया भाव थकायेगुलि महत्वपूर्ण माध्यम जुगु धका उल्लेख यानादीसे थुकि संरक्षणया लागि पत्रकारितापाखे योगदान बिइमाःगु धका धयादीगु खः। उपराष्ट्रपति यादवं नेपाली सञ्चार क्षेत्रय् समावेशी व मातृभाषाया पत्रकारिता विकासया लागि माःगु नीति अवलम्बन यायेगु निति थःपिनिगु न ध्यानाकर्षण जुगु दु धका धयादीगु खः।

उगु ज्याझ्वलय् पत्रकार दबूया अध्यक्ष नृपेन्द्रलाल श्रेष्ठं उपराष्ट्रपति यादवयात भिंतुना नाप हनापौं लःल्हानादीगु खः। अथे हे वरिष्ठ उपाध्यक्ष सुनील महर्जनं समावेशी सञ्चारया सम्बन्धय् राज्यं कायेगु माःगु नीति, कार्यक्रमबारे दुथ्याकेत ध्यानाकर्षणपत्र उपराष्ट्रपति यादवयात लःल्हानादीगु खः।

ज्याझ्वलय् दबूया महासचिव कृष्णकाजी (के.के) मानन्धर, सचिव राजु नापित, सहसचिव सुनीता महर्जनं प्रेस स्वतन्त्रताया उच्चत्तम अभ्यासया लागि समावेशी व मातृभाषाया पत्रकारिता विकास यायेमाःगुलि बःबियादीगु खः।

राष्ट्रिय सभाया अध्यक्ष गणेशप्रसाद तिमिल्सिनां नेपाल कोरोनां प्रभावित जुगु इलय् थीथी विकासया साझेदार नाप गैर सरकारी संघसंस्थापाखे जीवन रक्षाया लागि बालाक्क ग्वहालि जुगु खँ न्ह्यथनादीगु दु।

वयकलं गुड नेर्वस इन्टरनेशनल नेपालं ज्या यागु नीदँ जूगु लसताय् जुगु छगु ज्याझ्वलय् अथे धयादीगु खः। अध्यक्ष तिमिल्सनां कोरोना महामारीइ दक्षिण कोरियां याःगु ग्वाहालि ल्वमके मज्यू धका धयादीसे गुड नेभर्सं मस्तय्त शिक्षाय् याःगु ग्वहालिं देशया समृद्धिया ग्वहालि जुइगु भलसा कयादीगु खः।

३२ दँ न्ह्यः जुगु दक्षिण कोरियां सुरु याःगु गुड नेवर्स इन्टरनेशनलं सामाजिक सेवाया अभियान नेपालय् २० दँ थ्यःगु दु। किडार्कया कार्यकारी निर्देशक गोबिन्द बहादुर शाहीं मानवीय ग्वहालि व विकासया लागि ज्या यानाच्वंगु समाजय् दुने विविध समस्या दुपि, उपेक्षित, लिउने लानाच्वपि व सीमान्तकृत वर्गया मनू तयेगु जीवन स्तर थकायेगु निति साझेदार संस्थापाखे ग्वहालि यानाच्वंगु खः।

राष्ट्रिय योजना आयोगया सदस्य माननीय डा. जयकान्त रावतं विकासया साझेदार संस्थाय् नेपालं अन्तर्राष्ट्रिय स्तरय् याःगु प्रतिबद्धता पूरा यायेत ग्वाहालि नाप ग्वाहालि यानावया च्वंगु तर नेपाल सरकारया नीति, ज्याझ्वःयात कार्यान्वयन यायेगु योगदानया विषयमा समीक्षायासे न्ह्यावनाच्वंगु संस्थाया ज्या प्रसंशा यानादीगु खः।

नेपालया लागि दक्षिण कोरियाया महामहिम राजदूत पार्क चोङ सुकं नेपालय् २२ जिल्लाय् गरिब व सिमान्तकृत वर्गया मस्तय्त बालागु भविष्यया लागि गुड नेर्वस इन्टरनेशनलं नेपालया नागरिक संघसङ्गठनपिन्स मिले जुया ज्यायाना च्वंगुलि सुभाय् व वइगु दिं थप सफलताया लागि भिंतुना बिःगु खः।

समाज कल्याण परिषदया सदस्य–सचिव मनोज भट्टं गुड नेवर्स इन्टरनेशनलं स्थापना कालनिसे समाज कल्याण परिषदनाप स्वीकृति कया नेपाःया मस्त व समुदायया जीवनय् सकारात्मक ह्यूपा हयेगु ज्या जुयाच्वंगुलि लसता प्वकादीगु खः।