यल महानगरपालिकां छु दिं फोहोरया व्यवस्थापन थः थःगु छेँय् व्यवस्था मिले यायेत इनाप याःगु दु।

स्वनिगलय् फोहोर वान्छ्य्त समस्या जुगु कारण क्यसे महानगरं फोहोर आन्तरिक रुपय् व्यवस्थापन याये माःगु खनेदुगु धासे येँ महानगरया उपमेयर मन्जली शाक्यं अथे इनाप यानादीगु खः ।

तान्वःगु व वा वयाच्वंगु कारणं शहरी क्षेत्रये् सरुवा ल्वय् नाप डेंगुया प्रकोप न खनेदुगुलि थः थःगु छेँय् व त्वाः न सूचुपिचू यायेत इनाप याःगु दु।

राजश्व अनुसन्धान विभागं म्हिगः बुधवाः सिनामंगलय् बरामद याःगु लुँ ज्वना वःगु ट्याक्सी विमानस्थल हे पिहा वये धुकुगु खः।

विभागया महानिर्देशकया कथं म्हिगः न्हिनय् २ बजे भन्सार जाँच पास जुइ धुका पिहावःगु लुँ ज्वना वःगु ट्याक्सीइ बरामद यानागु धका विभागं धाःगु दु।

विभागं लुँ ज्वना वःगु बा २ ज २३२४ नम्बरया ट्याक्सी व चालकयात न नियन्त्रणय् काये धुकुगु दु। हङकङं येँ वःगु क्याथे एयरलाइन्सया विमानया कार्गों लुँ ज्वना वःगु खः।

मोटरसाइकल व स्कुटरया ब्रेक शु दुने लुँ तया हःगु धका विभागया महानिर्देशक ढुंगाना धाःगु दु। लुँ सूयागु खः ज गन यके त्यःगु खः धका अनुसन्धान जूयाच्वंगु दु धका विभागं धाःगु दु।

लुँया भाः आःतकया हे दकलय् अप्पो थ्यःगु दु। लुँ तोलां थौं न्यासः थहावःगु दु। लुँ तोलां न्यासः थहावना थौं १ लाख १३ हजार ६ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु।

वंगु जेष्ठ १९ गते लुँ तोलां दकलय् अप्पो १ लाख १३ हजार ३ सय रुपैयाँ थ्यःगु खः। अथेहे, वहः न आःतक हे दकलय् अप्पो थ्यःगु दु। वहः तोलां न्यातका थहावःगु दु।

वहः तोलां न्यातका थहावना थौ १ हजार ४ सय ९५ रुपैयाँ थ्यःगु दु धका महासङ्घं धाःगु दु।

नेप्से लगातार थौं न थहावःगु दु। शेयर बजार परिसूचक नेप्से थौं बुधवाः ११ दशमलव १७ अङ्कं थहावना २ हजार १ सय ६५ दशमलव २४ विन्दुइ थ्यःगु दु।

बैंकिङ, विकास बैंक, उत्पादन, व्यापार व म्युचल फन्ड समूहया शेयर थौं न थहावःगु दु। मेमेगु समूहया शेयर कुहावःगु दु। थौं दक्को बैंकया शेयरया भाः थहावःगु दु।

दकलय् अप्पो वीपीडब्ल्यू लघुवित्तया शेयर १० प्रतिशतं थहावःगु दु। २६० गु कम्पनीया ८६ लाख ७४ हजार कित्ता शेयर कारोबार जूगु दु।

५१ हजार ४ सय पटक जूगु कारोबारपाखे ३ अर्ब ३४ करोड ८६ लाख रुपैयाँया शेयर कारोवार जूगु दु। दकलय् युनाइटेड अजोड इन्सुरेन्सया २३ करोड ५७ लाख रुपैयाँया शेयर कारोवार  जूगु दु।

उच्च अदालत यलं येँ महानगरपालिका–१० देवीनगरस्थित भद्रकुमारी घले सेवा सदनया संरचना तत्काल मथुनेत अल्पकालीन अन्तरिम आदेश बिःगु दु।

येँ महानगरपालिकां भद्रकुमारी घले सेवा सदनया छू संरचना थौं बुधवाः हे डोजर चले याःगु दु। ल्यः दनिइगु संरचना न थुनेगु तयारी दुगु खः।

तर महानगरपालिकाया उगु पलाःया विरुद्ध निषेधाज्ञाया आदेश माग यासे सदनया पाखे बिःगु निवेदनय् सुनुवाइयासे गर्दै न्यायाधीश श्यामजी प्रधानया इजलासं संरचना मथुनेथ आदेश बिःगु दु। अदालतं सावन ८ गते निगु पक्षयात न सहलह यायेत सःतूगु खः।