सेयर बजाः थौं न थहावःगु दु। थौं बुधबाः १०.३७ अंकं थहावना २१८३.६२ विन्दइ थ्यःगु दु।

म्हिगः मंगलबा स्वया थौं बुधबाः कारोबार रकम न थहावःगु दु। २६१ धितोपत्रया ५४ हजार ३७७ गु कारोबारपाखे ९५ लाख ३२ हजार ८६७ कित्ता सेयर किनबेच जूगु दु।

३ अर्ब ४६ करोड ६५ लाख ८ हजार ३३८ रुपैयाँ बराबरया कारोबार जूगु खः। बैंकिङ, वित्त व मेमेगु उपसूचकबाहेक मेगु दक्को उपसूचक थहावःगु दु।

थौं दकलय् अप्पो होटेल व पर्यटन उपसूचकया लगानीकर्तापिन्स कमे याःगु दु। ग्रीनलाइफ हाइड्रोपावर, आदर्श लघुवित्त, सानिमा जीआइसी इन्स्योरेन्स, सूर्यज्योती लाइफ इन्स्योरेन्स व वलेफी हाइड्रोपावर सकारात्मक सर्किट लेवलय् कारोबार जुगु दु।

आरबीबी म्यूचअल फण्ड दकलय् अीप्पो ५.७० प्रतिशतं कुहावःगु दु। अथेहे जानकी फाइनान्स, पिपुल्स हाइड्रो, सेन्ट्रल फाइनान्सया भाः थौं यक्को कुहावःगु दु।

नेशनल हाइड्रो, हिमाल दोलखा हाइड्रो, ग्रीनलाइफ हाइड्रो, अपर तामाकोशी कम्पनीपिन्स थौं यक्को कारोबार जूगु दु।

बागमती प्रदेश सरकारय् पूर्णता बिःगु दु। मुख्यमन्त्री शालिकराम जम्कट्टेलं ११ म्ह सदस्यीय मन्त्रिपरिषदय् मन्त्रीपिन्त जिम्मेवारी न बिगु दु।

बुधबाः नियुक्त जूपि मन्त्रीपिन्त र्थाैं बुधबाः हे प्रदेश प्रमुख यादवचन्द्र शर्मा न्ह्यने पद व गोपनीयताया शपथ बिःगु खः। जम्कट्टेल मन्त्रिपरिषदय् नेपाल समाजवादी पार्टीया गंगानारायण श्रेष्ठ आन्तरिक मामिला नाप कानून मन्त्री, माओवादीया युवराज दुलाल भौतिक पूर्वाधार विकास मन्त्री व कुमारी मोक्तान सामजिक विकास मन्त्री जूगु दु।

अथेहे एमालेया जगन्नाथ थपलिया आर्थिक मामिला नाप योजना मन्त्री, केशवप्रसाद पोखरेल कृषि नाप पशुपन्छी विकास मन्त्री, एकालाल श्रेष्ठ श्रम रोजगार नाप यातायात मन्त्री, रामेश्वर श्रेष्ठ स्वास्थ्य मन्त्री जूगु दु।

राप्रपाया उद्धव थापा खानेपानी, ऊर्जा नाप सिंचाई मन्त्री, डम्बर तामाङ पर्यटन, उद्योग नाप सहकारी मन्त्री व राजु विष्ट वन नाप वातावरण मन्त्री जूगु दु।

संघीय संसद् भवन न्ह्यने म्हिगः मंगलबाः न्हिनय् थःत थःम्हेसिया च्याका आत्महत्या यायेगु कुतःयाम्ह प्रेमप्रसाद आचार्य थौं मन्त।

किपूया बर्न अस्पतालय् उपचारया झ्वलय् आचार्य थौं सुथय् मदुगु खः। इलामया सूर्योदय नगरपालिका च्वम्ह ३७ दँ दुम्ह आचार्य  मंगलबाः संसद भवन न्ह्यने थःगु म्हय् पेट्रोल तया आत्मदाहया कुतः याःगु खः।

आचार्ययात प्रहरीं उद्धार याना अस्पतालय् यकूगु खः। वयागु ८० प्रतिशत म्ह च्याःगु खः।

नेवाः देय् दबू न येँया सीडीओ कार्यालयं नेवाः नां तयाः संस्था दर्ता याके मबिउगु खँयात कयाः उपप्रधान नापं गृहमन्त्री रवि लामिछानेयात नापलानाः ज्ञापनपौ लःल्हागु दु।

वंगु छुं ई न्ह्यः नेवाः नां तयाः संस्था दर्ता याः वंबलय् येँया सीडीओ कार्यालयं नेवाः नांयात खस नेपाली भासं अनुवाद यानाः तःसा जक दर्ता यायेगु जुइ धासें अथें लित छ्वया हःगु खः ।

थुकिया हे विरुद्ध देय् दबूया कुतलय् म्हिगः गृहमन्त्रीयात नापलानाः ज्ञापनपौ लःहाःगु खः । गृहमन्त्री लामिछानें ज्ञापनपौ लःल्हाना कासें थम्हं थुकिया बारे सीडीओ लिसे खँ ल्हानाः लिपा हानं समस्या मवइ कथं समाधानया लँपु मालेगु बचं बियादिल ।

देशय् लोकतन्त्र वःसां प्रशासनय् उकियात कार्यान्वयन याये हे ल्यं दनि धासें वय्कलं थुकिया लागिं माःगु ज्या याये धयादीगु खः । देय् दबूया नायः पवित्र वज्राचार्यया नेतृत्वय् वंगु उगु पुचलय् बागमती प्रदेशया सांसद शैलेन्द्र वज्राचार्य, दर्ता याके मबिउगु संस्थाया पदाधिकारीपिं मनरत्न शाक्य, सूर्यनारायण महर्जन, गणपतिलाल श्रेष्ठपिनिगु उपस्थिति दुगु खः ।

बाजुराय् म्हिगः मंगलबाः भुखाय् ब्बगलि छम्ह मिसा सीउगु दु।

जिल्लाया गौमुल गाउँपालिका–२ या जुरेलीइ स्थानीय जंगलय् घाँय् चाय्त वनाच्वम्ह भुखाय् ब्बया ल्ह्वः कुतवया सीउगु दु धका प्रहरीं धाःगु दु।

जिल्ला प्रहरी कार्यालयया प्रमुख प्रहरी नायब उपरीक्षक (डीएसपी) सुर्य थापां भुखाय् ब्बया ल्ह्वः कुतुवया जमुना रोकाया मदुगु धका स्थानीयपिन्स जानकारी बिःगु दु धका धाःगु खः।

डीएसपी थापाया कथं प्रहरी निरीक्षकया टोली उद्दारया लागि घटनास्थलय् परिचालन यानागु दु धका धाःगु दु।