नेवाः न्ह्यलुवाः निरञ्जनरत्न शाक्यं च्वयादीगु न्यापु म्येया म्यूजिक भिडियो पिहां वयेत्यःगु दु।

शाक्यं थीथी इलय् च्वयादीगु न्यापु म्येया म्यूजिक भिडियोया निर्माण नांजाःम्ह निर्देशक नाप कलाकार रामकृष्ण खड्गीं निर्देशन यानादीगु खः।

थुगु म्यूजिक भिडियोया उलेज्या जनगायक भृगुराम श्रेष्ठं थ्व हे वइगु मंसीर ९ गते शनिवाः सीटीसी मलय् यानादी त्यःगु दु।

लोकतान्त्रिक समाजवादी पार्टी लोसपा नेपालया संसदीय दलया नेताय् महन्थ ठाकुर सर्वसम्मत जूगु दु।

ठाकुर पार्टीया अध्यक्ष न खः। लोसपां प्रतिनिधि सभाय् प्यःगु सिट त्याकूगु खः। ठाकुरनाप, सर्वेन्द्रनाथ शुक्ला, शरत सिंह भण्डारी व रामप्रकाश चौधरी लोसपापाखे सांसद निर्वाचित जुगु खः।

समानुपातिकय् थ्रेस होल्ड कटे याये मफुगुलि लोसपा राष्ट्रिय दल जुइ मफुगु खः।

सेयर बजाः परिसूचक नेप्से थौं बुधबाः ५.८९ अंकं कुहावया १८६७.२२ अंकय् बन्द जूगु दु।

बैंकिङ उपसूचक ०.२७ प्रतिशतं थहावगुलि वित्त कम्पनी उपसूचक धाःसा १.५ प्रतिशतं कुहावःगु दु। अथेहे मेमेगु उपसूचक १.३९ प्रतिशतं कुहावया दक्को उपसूचक १ प्रतिशत स्वया म्हो कुहावःगु खः।

बुधबाः नेप्सेय् २४ लाख ४० हजार ३०७ कित्ता सूचीकृत धितोपत्र किनबेच जुगुलि कारोबार रकम ८६ करोड ३८ लाख १७ हजार थ्यःगु दु। उकि मध्ये एनआईसी एशिया बैंकया दकलय् अप्पो ११ करोड ८२ लाख ४६ हजारया कारोबार जुगुलि नबिल बैंकया ३ करोड ९५ लाख ९ हजारया कारोबार जुगु खः।

अथेहे शिवम् सिमेन्टया ३ करोड ८५ लाख ७७ हजारया कारोबार जूगु दु। नेप्सेय्  २१२ कम्पनीया सेयर कारोबार जूगुलि १४० कम्पनीया सेयर भाः कुहावःगु दु। ६३ कम्पनीया सेयर भाः थहावःगु दु सा गुंगु कम्पनया सेयर भाः स्थिर जूगु दु।

उकि मध्ये आँधीखोला व सृजनशील लघुवित्तया सेयर भाः थहावना सकारात्मक सर्किट लेभलय् बन्द जुगु दु सा इस्टन हाइड्रोपावरेया सेयर भाः ९.८५ प्रतिशतं थहावःगु दु। पञ्चकन्या माई हाइड्रोपावरया सेयर भाः ६.२८ प्रतिशतं कुहावःगु दु सा गुडविल फाइनान्सइया सेयर भाः ३.६० प्रतिशत व सिनर्जी पावरया सेयर भाः ३.५० प्रतिशतं कुहावःगु दु।

प्रतिनिधिसभाया ज्येष्ठ सदस्य पशुपतिशमशेर जबरां पद व गोपनीयताया शपथ काःगु दु।

जबरायात थौं बुधबाः न्हिनय् राष्ट्रपति विद्यादेवी भण्डारीं पद व गोपनीयताया शपथ बिःगु खः। प्रतिनिधिसभाया सदस्य ज्येष्ठ सदस्यपाखे शपथ ग्रहण याकेगु प्रचलन दु।

थ्व स्वया न्ह्यः ज्येष्ठ सदस्यं राष्ट्रपति कार्यालयपाखे शपथ कायेमाःगु प्रावधान कथं जबरां शपथ काःगु खः।

वंगु मंसिर ४ गतेया चुनावं निर्वाचित प्रतिनिधिसभाया सदस्यपिन्स कन्ह्यः बिहीबाः न्हिनसिया १ बजे शपथ काइगु जुगु दु।

राष्ट्रिय प्रजातन्त्र पार्टीया संसदीय दलया नेताय् पार्टी  अध्यक्ष राजेन्द्र लिङदेन ल्यःगु दु।

थौं च्वंगु राप्रपा संसदीय दलया वैठकया लिङदेनयात सर्वसम्म दलया नेता ल्यःगु खः।

राप्रपां निर्वाचनया प्रत्यक्षय् ७ व समानुपातिकय् ७ याना १४ गु सीट संघिय निर्वाचित जुगु खः।