खपिन्छेँ टोल सुधार कमिटीया ३३ क्वःगु साधारणसभा खपिन्छेँ मंकाः चपाःछेँय् जुगु दु।

किपा ब्वज्या लिपा औपचारिक रुपं उलेज्या याःगु दँमुँज्याय् थीथी ख्यलय् सफलता प्राप्त यानादीपिं त्वाःया जःपिंत हनेज्या नं याःगु खः ।

खपिन्छेँ त्वाःया नायः राजमान अवालेया सभाध्यक्षताय् जूगु न्हापांगु सत्रय् ज्यापु समाज यलया नायः तीर्थलाल महर्जन मूपाहां कथं झायादीगु खः । उगु ज्याझ्वलय् मू गुरु अष्टलाल महर्जन, दाफा म्येँ गुरु मोतिलाल महर्जन, धिमय् गुरु किरण महर्जन, तपगु बासुरि गुरु हरि महर्जन, चिपुगु बासुरि गुरु सानुलाल अवाले, धोलक गुरु प्रशिष महर्जनयात बेतालि चिकाः व सहायक गुरुपिं किसलाल महर्जन, मनोज महर्जन, भुवन महर्जन, रोशन महर्जनयात खादा क्वखायेका हनेज्या याःगु खः ।

अथे हे २०७८ सालया एसइइ परीक्षाय् उत्कृष्ट ल्याः हयादीपिं त्वाःया रोजल महर्जन, कृतिका महर्जन, प्रेक्षा महर्जन, सुबिन अवाले, सोमिग अवाले, सोनिल महर्जनयात नं हनेज्या याःगु खः । थुकथंया ज्यापु समाज यलया सल्लाहकार केशव महर्जन, चाइनिज भाषा अनुवादक आपुलाल अवाले, नेशनल जर्नालिज्म अवार्ड कल्चर एण्ड टुरिज्म – २०७९अवार्डपाखें सम्मानित हरि महर्जन, निक्वःगु नेपालभाषा स्टार म्युजिक भिडियो अवार्डय् बेष्ट मोडल जुयादीत ताःलाःम्ह नांजाःम्ह कलाकार सुरज व्यञ्जनकारयात नं मतिनाया चिं लःल्हासे हनेज्या याःगु खः ।

निगूगु सत्रय् न्ह्याःगु बन्द सत्रय् कमिटीया छ्याञ्जे सुरज व्यञ्जनकारं वार्षिक प्रगति प्रतिवेदन व दांभरिं राजकुमार महर्जनं आर्थिक प्रतिवेदन न्ह्यब्वयादीगु खः । ज्याझ्वलय् विशेष पाहांकथं त्वाः थकालि आशालाल महर्जन, मू गुरु अष्टलाल महर्जन, म्येँ गुरु समन्वय कमिटीया कजि मोतिलाल महर्जन, समाजया न्हापांम्ह न्वकु सबिना महर्जन सल्लाहकार केशव महर्जनपिं झायादीगु खः ।

कवयित्री रजनी मिलाया चिनाखँ मुना ‘स्वस्वं तनावंगु सर्गः’ छगु ज्याझ्वः दथुइ विमोचन जूगु दु ।

नेपालभाषा एकेदेमिं पिथंगु सफू छगू ज्याझ्वःया दथुइ एकेदेमिया हलय् समालोचक, भाषाविद् ज्योतिप्रभा तुलाधरं विमोचन यानादीगु खः ।ए

केदेमिया भाइस चान्सलर मल्ल के सुन्दरया सभाध्यक्षताय् जूगु उगु ज्याझ्वलय् मूपाहाँ तुलाधर नापं पाहाँपिं वरिष्ठ समालोचक व भाषाविद् डा. सुन्दरकृष्ण जोशी, लुम्बिनी बौद्ध विश्वविद्यालयया डिन माणिकरत्न शाक्य, नेपाल प्रज्ञा प्रतिष्ठानया पुलांम्ह प्राज्ञ लक्ष्मी माली, कवयित्री प्रतिसरा साय्मिपिंसं विमोचित चिनाखँ मुनायात कयाः न्ववानादीगु खः ।

एकेदेमिया सदस्य सचिव डा. पुष्पराज राजकर्णिकारं लसकुस यानादीगु ज्याझ्वलय् प्रतिसरा साय्मि, विनिता वज्राचार्य, विना नेम्कुलपिंसं सफुलिइ दुथ्याःगु चिनाखँ नं ब्वनाः न्यंकूगु खः ।

नेपाल आदिवासी जनजाति पत्रकार महासंघं प्रदेश १ या नां ‘कोशी प्रदेश’ तःगुलि विरोध याःगु दु।

थौं शनिबाः महासंघया महासचिव मिलन लिम्बुं छगु विज्ञप्ति जारी यासे सतकय् निषेधाज्ञा जारी यासे प्रदेश १ या नां ‘कोशी प्रदेश’ तःगुलि विरोध याःगु दु। विज्ञप्तिइ धयातःगु, ‘सभ्यता, संस्कृति, जातीय पहिचान व राजनीतिक ऐतिहासिकता थे जाःगु तसकं संवेदनशील प्रदेश नम्बर १ या नां तयेगलि संघीयताया मर्मविपरीत व बलपूर्वक सतकय् निषेधाज्ञा जारी याना ‘कोशी प्रदेश’ कायम यागुलि नेपाल आदिवासी जनजाति पत्रकार महासंघ (फोनिज)या गम्भीर ध्यानाकर्षण जूगु दु।’

प्रदेश १ किरात सभ्यताया विरासत जुगु दावीयासे फोनिजं लिम्बुवानया ऐतिहासिक राजनीतिक पृष्ठभूमिनाप च्वछायेबःगु इतिहासया निरन्तरता जुगु धका धयादीगु दु। अथे तु थुगु प्रदेश कोच सभ्यता व हिमाली संस्कृति नापे शेर्पालुङ पहिचानया थाय् जुगु धका धासे प्रदेशया अप्पो मनू तयेगु भावना व चाहना अःखः नाप खासयाना रैथाने आदिवासी जनजाति समुदायया पहिचान दुगु थाय् यात निर्मम प्रहार याना कोशी प्रदेश नामाकरण याःगु द्धपं बिःगु दु।

थुगु ज्यायात संगठनं बिरोध याःगु दु। विज्ञप्तिइ धयातःगु दु, ‘कोशी खुसियात छु न पहिचान माःगु मदु। पहिचानया प्रदेश फ्वंपि समुदाय, राजनीतिक समूह व सरोकारवाला दथुइ छु न खँ मल्हासे मतादेशया दम्भं जारी याःगु कोशी प्रदेशं प्रदेश नम्बर १ या जनजीवन व प्रदेशवासी दथुइ छप्प जुइगु व हार्दिकतायात न्ह्यकां छ्वयेगु कथं जुगु फोनिज संघीय समितिं ठहर याःगु दु ।’ थुगु पलाः लिपा तक बिखण्डनया पूसा कथं ल्यनाच्वनिइ धका महासंघया विज्ञप्तिइ उल्लेख याःगु दु।

फोनिजं बारम्बार प्रदेश नम्बर १ या नां सभ्यता, पहिचान व ऐतिहासिक निरन्तरताया आधारय् किरात–लिम्बुवान वा लिम्बुवान–किरात जुइ माःगु माग याना वयाच्वनागु धका विज्ञप्तिपाखे लुमका बिःगु दु। महासंघं कोशी प्रदेश खारेजी व पहिचानया आधारय् प्रदेश नम्बर १ या हाकन नां तयेगु सकल शान्तिपूर्ण आन्दोलनय् समर्थन दइ धका जानकारी बिःगु दु।

नेवाः देय् दबू येँ जिल्लापाखे नेवाः पत्रकार राष्ट्रिय दबूया न्हुगु ज्यासना पुचःयात भिंतुना देछायेगु ज्या जुगु दु।

येँया मासंगल्लीइ प्रदिप्त पुस्तकालय् जुगु उगु ज्याझ्वलय् मूपाहाँ कथं देय् दबूया नायः प्रबित्र बज्राचार्य झायादीगु खः।

देय् दबू येँ जिल्लाया नायः धनबहादुर तिमिलाया सभाध्यक्षय् जूगु उगु ज्याझ्वलय् मूपाहाँ देय् दबूया नायः बज्राचार्य, येँ महानगरपालिका २५ वडाध्यक्ष राजेश डंगोल, बरिष्ठ पत्रकार सुरेश किरण मानन्धर व पत्रकार दबूया नायः नृपेन्द्रलाल श्रेष्ठं नेवाः मुद्दाय् दक्को छप्पा छधिइ जुया वनेमाः धका थःथःगु बिचाः तयादीगु खः।

धनबीर महर्जन न्ह्याकादीगु उगु ज्याझ्वलय् देय् दबू येँ जिल्लाया बरिष्ठ न्वकु सृजनमान श्रेष्ठं लसकुस यानादिगु उगु ज्याझ्वलय् पत्रकार दबूया न्हुगु ज्यासना पुचःयात ख्यें सगंनाप मतिनाया चिं न देछायेगु ज्या जुगु खः।

च्यागु दलीय गठबन्धनया पाखे राष्ट्रपतिया उम्मेदवार रामचन्द्र पौडेलं नागरिक उन्मुक्ति पार्टीया संरक्षक रेशम चौधरीयात नापलाःगु दु।

केन्द्रीय कारागार डिल्लीबजारय् वना चौधरीयात नेता पौडेलं नापलाःगु खः। चौधरीं नेता पौडेलयात भोट तयेगु निति थःगु शर्त न्ह्यने तःगु दु। चौधरीं नेता पौडेलयात सुदुरपश्चिम प्रदेशया नां खप्तड थरुहट प्रदेश यायेमाःगु, टीकापुरयात बिस्कं जिल्ला घोषणा यायेमाःगु, गोदावरीइ च्वंगु राजधानीयात धनगढीइ तयेमाःगु, टीकापुर घटनायो दोषीपिन्त त्वःतेमाःगु अडान तःगु दु।

चौंधरी थःगु रिहाई मजूतले नागरिक उन्मुक्ति पार्टी सरकारय् ब्बति मकायेगु सन्देश छ्वःगु दु।