निक्वःगु वल्र्ड बज्राचार्य अवार्ड वइगु पुस २ गते जुइगु जूगु दु । वइगु पुस २ गते येँया प्रज्ञा कमलादीस्थित प्रज्ञा भवनया हलय् अवार्डया निगूगु संस्करण जुइत्यंगु खः ।

विशेष यानाः शैक्षिक क्षेत्रय् केन्द्रीत जुयाः बज्राचार्य समुदाय दुने बियावःगु अवार्डय् थुगुसी सच्छिम्ह स्वयां अप्वः सम्मानित जुइगु ज्याझ्वः कजि शैलेन्द्रमान बज्राचार्यं धयादीगु दु ।

हलिंन्यंक च्वनावःपिं न्यासः स्वयां अप्वःसिनं अवार्डया नितिं थःगु नां दर्ता याकूगु खः ।

अवार्ड ज्याझ्वलय् एस.ई.ई. निसें स्नातकोत्तर तगिंतक्क हरेक संकायया हरेक विधाय् उच्च ल्याः हयाः उत्तीर्ण जूपिन्त बज्राचार्य अवार्डपाखें सम्मान याइ ।

अथे हे, पि. एचडी. पूवंकूपिंलिसें नेपालभाषा व बुद्धिष्ट विषय कयाः ब्वंपिं हरेक विद्यार्थीतय्त अवार्ड लःल्हाइगु जूगु दु । बौद्ध सम्पदा व शिक्षाप्रति युवा पुस्ताय् जागरण हयेगु आज्जुलिसें अवार्ड ज्याझ्वः यानावयागु ज्याझ्वः कजि बज्राचार्यं धयादिल ।

‘झीगु पहिचान धइगु हे झीगु मौलिक सम्पदा व परम्परा खः । युवा पुस्ताय् थज्याःगु विषयप्रति चेतना म्ह्वः जुयावंगु अवस्था दु । अयजुयाः युवा पुस्ता दथुइ नं झीगु पहिचान, धर्म, परम्पराया संरक्षण सम्वद्र्धनय् च्यूताः अप्वय्मा धकाः थुगु अवार्ड ज्याझ्वः यानावयागु खः’ बज्राचार्यया धापू खः ।

नापं अवार्डया निक्वःगु संस्करणय् नं लाइफटाइम अचिभमेन्ट अवार्डलिसें बौद्ध क्षेत्रय् विशिष्ट योगदान बियावःम्ह व्यक्तियात बीगु विशेष सम्मानयात निरन्तरता बीगु ज्याझ्वः कजि बज्राचार्यं धयादिल ।

बज्राचार्यया कथं थुगुसी बौद्ध विद्वानलिसें भाषा जवाः फणिन्द्ररत्न बज्राचार्ययात लाइफटाइम अचिभमेन्ट अवार्डपाखें सम्मानित यायेत्यंगु दु ।

अथे हे, बौद्ध सम्पदा संरक्षण, जिर्णोद्धारलिसें पुनर्निर्माण व बुद्धया शिक्षा प्रचार प्रसारय् विशिष्ट योगदान ब्यूगु धासें येँ महानगरपालिकाया पूर्व मेयर विद्यासुन्दर शाक्ययात विशेष सम्मान बीत्यंगु दु ।

लाइफ टाइम अचिभमेन्ट अवार्ड बज्राचार्य समुदाय दुनेयापिन्त हे बीगु यानाच्वंगु दुसा विशेष सम्मान धाःसा बौद्ध क्षेत्रय् योगदान बियावःपिं गैर बज्राचार्ययात नं बीफुगु खँ ग्वसाः खलकं धाःगु दु ।

थुगु ज्याझ्वः शैक्षिक क्षेत्रय् केन्द्रीत जुयाच्वंगु व लिपा वनाः मेमेगु विभिन्न क्षेत्रय् केन्द्रीत जुयाः अलग अलग क्षेत्रय् योगदान बियावःपिं बज्राचार्यतय्त सम्मान यायेत अलग अलग ज्याझ्वः यानावनेगु ग्वसाः दुगु नं ग्वसाः खलकं धाःगु दु ।

‘आः झी शैक्षिक क्षेत्रय् केन्द्रीत जुयागु दु । लिपा वनाः बज्राचार्य स्पोर्ट्स अवार्ड, बज्राचार्य बिजनेस अवार्ड आदि नं यानावनेगु झीगु योजना दु’ ग्वसाः खलः बज्राचार्य क्लबया नायः सर्जु बज्राचार्यं धयादिल ।

निदँय् छकः यायेगु ग्वसाः कथं सन् २०१९ य् न्ह्याःगु थुगु अवार्डया निक्वःगु संस्करण स्वदँ लिपा जुइत्यंगु खः । दथुइ कोभिड महामारीया हुनिं इलय् ज्याझ्वः यायेमफूगु ग्वसाः खलकं जानकारी ब्यूगु दु ।

थौं आइतबाः च्वंगु मन्त्रिपरिषद बैठकं राजनीतिक आन्दोलनय् सहभागी जुपिनिगु मुद्दा लितकायेगु कथं मुलुकी फौजदारी कार्यविधि संहिता संशोधन यायेत अध्यादेश हयेगु तयारी याःगु दु।

उगु अध्यादेश जारी यायेत राष्ट्रपतिया थाय् छ्वंगु दु। उगु अध्यादेशय् राष्ट्रपतिया निर्णयबारे पूर्वानुमान याये फइमखु धका सञ्चार विज्ञ ढकाल धाःगु दु।

सत्तास्वार्थया लागि कैलालीया टीकापुर घटनाय् जन्मकैदया सजाय फयाच्वंम्ह रेशम चौधरीयात त्वःत्यत अध्यादेश हःगु धका सरकारया विरोध जुयाच्वंगु दु।

सरकारं धासा हिंसात्मक गतिविधिइ संलग्नयात मूलधारय् हयेत अध्यादेश हइगु धका धयावयाच्वंगु दु ।

येँ मनपा २२ वडाय् लाःगु लुँहितिया संरक्षण याय्गु खँय् धरहरा परियोजनां लापरवाही याःगु खँयात कयाः खबरदारीयासें तत्कालया निंतिं ज्या दिकेत इनाप याःगु दु ।

लुँहिति व धरहरा नेपाःया छगू महत्वपूर्ण सांस्कृतिक व ऐतिहासिक सम्पदाकथं दुगु सकसिनं स्यूगु खँ खः धासें येँ मनपा २२ वडाया नायः चिनिकाजी महर्जनं पुरातात्विक महत्वया संरचना स्यंकूगुलिं परियोजना तत्काल न्ह्याके मबीगु खँय् बः बियादिल । वय्कलं लुँहितिया लः मुंकेत धकाः ट्यांकी म्हूगु इलय् लुँहितिइ लः वनीगु सिँयागु धः पूवंक स्यंगु खँय् आपत्ति प्वंकादिल ।

वय्कलं अन लुँहितिलिसे सम्बन्धित छुं नं निर्माण याय्त थःपिनिलिसे समन्वय याय्त इनाप यानागु खँयात छाय् बेवास्ता यानादियागु धकाः परियोजना पक्षयात नं न्ह्यसः तयादिल । येँ मनपाया मेयर बालेन्द्र शाहं नं अवलोकन यानादीगु लुँहितिया ट्यांकी निर्माणया निंतिं खनातःगु गालय् सिँयागु धः पूवंक स्यंकातःगु खँय् आपत्ति प्वंकादिल । धरहरा सुन्धारा संरक्षण समितिया संयोजक गौतम डंगोलं थःपिसं पुनःनिर्माणया ज्याया झ्वलय् पुरातात्विक महत्वया संरचना स्यंगु खँय् आपत्ति प्वंकाबलय् परियोजनां मेयर बालेन्द्र शाहलिसे समन्वय यानाः ज्या यानागु धाःसां मेयर शाह न्ह्यःने दुबले उज्वःगु छुं नं कथंया समन्वय मजू धइगु खँ न्ह्यःने वःगु खँ कुलादिल ।

स्थानीयबासीपिसं मंकाःकथं छगू प्रेस वक्तव्य जारी यासें थ्व विषयस धाःगु दु, ‘२०७२ सालया तःभुखाचं पूवंक स्यंगु धरहराया भग्नावशेषया उचित संरक्षण तकं मयासें मेगु न्हूगु धरहरा दय्केत हथाय्चाःगु सरकारं म्हिगः अन हे दुगु उलि हे महत्वपूर्ण सम्पदा सुन्धाराया अस्तित्व हे न्हंकेगु कुतः जूगु दु ।’विज्ञप्तिइ ‘धरहरा पुननिर्माण योजना हःगु इलय् तत्कालीन सरकारलिसे सुन्धाराय् प्राकृतिक रुपय् लःया धाः न्ह्याइगु व प्राकृतिक रुपं हे निकास याय्गु गुगुुं योजना हे मदु । हाकनं नं स्थानीयया हे निरन्तरया दवावय् तत्कालिन सरकार सुन्धाराय् प्राकृतिककथं लः हय्त अले निकास याय्त सहमत ला जुल तर थुकी गुबले नं छुं ज्या मजूगु’ खँ न्ह्यथनातःगु दु ।

थ्व हे झ्वलय् मंसिर २५ गते आईतवाः लुँहितिइ लः हाय्केत न्हापा न्हापा सिं दय्कातःगु फुक्क संरचना हे पूर्ण रुपय् नास याःगु विज्ञप्तिइ न्ह्यथनातःगु दु । विज्ञप्तिइ धयातःगु दु, ‘धरहरा नां बियाः तुयूगु उंया न्हूगु टावर ला दय्कल तर सुन्धाराया ऐतिहासिकता व थनया स्थानिय मौलिक त्वनेगु लःया गौरवपूर्ण सभ्यता व प्रबिधिया पुनर्निर्माण जुइ धइगु खँय् भलसा काय् फइगु अवस्था मन्त । उकिं थुगु खँयात सार्वजनिक याय् चाहे जुया ।’विज्ञप्तिइ सरोकारवालापिसं लुँहितिया ऐतिहासिक मूल्य मान्यताकथं पुननिर्माणया प्रत्याभूति मजूसां परियोजनाया सकतां ज्या दिकेत व मंसिर २५ गतेया घटनाय् दुथ्याःपिन्त कारवाही याय्त माग यानातःगु दु ।

अथेहे विज्ञप्तिइ सम्पदा पुनर्निर्माणया ज्याय् स्थानियया प्रतिनिधि व पुरातत्वबिदया अनिवार्य सहभागिता दय्माःगु लिसें स्थानीयरुपय् परियोजनां न्हूगु धरहरा टावर दय्केगु झ्वलय् हेभीलोड दुगु गाडी वय् वने याइगुलिं दुगु सडक स्यनाः वा वःगु इलय् ध्याचः व मेबलय् धू ब्वइगु समस्यां स्थानीय छेत्रय् दुगु वायुप्रदूषण तत्काल नियन्त्रण याय्त व परियोजनां स्यंगु दुरसंचार केन्द्रया ज्याकू न्ह्यःनें खिचापुखूतक वनेगु सतक कालोपत्रे याय्माःगु माग यानातःगु दु ।थौंया ज्याझ्वलय् संकटा क्लबया नायः ईन्द्रमान तुलाधर, खिचापोखरी युथ क्लबया नायः राजेश डंगोल, साधारण क्लबया नायः राधाकृष्ण महर्जन व त्वाः छें परिवार क्लबया नायः बिन्देश्वर श्रेष्ठलिसें स्थानीय व्यक्तित्वपिनि ब्वति दुगु खः ।

वंगु ४ मंसिरय् जूगु चुनावपाखे निर्वाचित जूपि प्रतिनिधिसभा सदस्यपिन्त राष्ट्रिय प्रजातन्त्र पार्टी (राप्रपा) या नेता पशुपतिशम्शेर जबरां शपथ नकिइगु जुगु दु।

प्रत्यक्ष निर्वाचित १६५ व दलपाखे समानुपातिक पद्धतिइ निर्वाचितजूपि निर्वाचन आयोगय् नां बुझेयापि ११० म्ह मध्ये ज्येष्ठ सदस्य जबरा जूगु दु। अय्न, निर्वाचन आयोगं निर्वाचित सदस्यपि गुलि दँदुपि स्वयेगु ल्यःदनिइ।

आःतक सार्वजनिक विवरण कथं २७५ सदस्य मध्ये ज्येष्ठ सदस्य कथं जबरा खनेदुगु दु। जबरा ८१ दँ दुम्ह खः। जबराया  जन्म वि. सं १९९८ वैशाख २५ गते (सन् ७ मे १९४१) येँ महाराजगंजय् जन्म जूगु खः।

निर्वाचन आयोगय उम्मेदवारपिनिगु छ्वंगु व्यक्तिगत विवरण कथं राष्ट्रिय जनमोर्चाया अध्यक्ष चित्रबहादुर केसी न ८१ दँयाम्ह खः। केसीयो जन्म वि सं. १९९८ माघ २० गते दुगु आयोगया विवरणय् दु।

अथेहे मेम्ह सर्लाही–२ पाखे निर्वाचित जूम्ह नेपाल समाजवादी पार्टीया अध्यक्ष महिन्द्र राय यादव ८५ दँ थ्यने धुकुम्ह खः। यादवया जन्म १९९४ वैशाख २४ खनेदु। तर यादवं थःगु जन्ममिति द्धःगु खनेदु धका धासे २०७४ सालय् हे प्रतिनिधिसभाया निर्वाचन लिपा ज्येष्ठ सदस्यया हैसियतं सांसदपिन्त शपथ याकेत अस्वीकार याःगु खः। 

वाःया न्हापागु दिं थौं आइतबाः सेयर बजाः तसकं कुहावःगु दु। थौं आइतबाः सेयर बजाः ३१.९७ अंकं घटे जुया १८८५.३१ विन्दुइ कुहावःगु दु।

थ्व धइगु १.६७ प्रतिशतं कुहावःगु खः। थौं २५३ सूचीकृत धितोपत्रय् २४ हजार ६४४ गु कारोबारपाखे ३५ लाख १२ या ८३४ कित्ता सेयर किनबेच जूगु खः सा १ अर्ब १० करोड ३४ लाख ४ हजार ४५ रुपैयाँ बराबरया कारोबार जूगु खः।

बैंकिङ उपसूचक २.३० प्रतिशतं थौं घटे जूगु दु। सीवाईसी नेपाल लघुवित्त वित्तीय संस्थाया सेयर भाःसा सकारात्मक सर्किटय् वःगु दु। थुकिया भाः १६९.८० रुपैया न थहवना १८६८ रुपैयाँ थ्यःगु दु। थ्व बाहेक समिट लघुवित्त वित्तीय संस्था, मैलुङखोला जलविद्युत कम्पनीया भाः ९.९९ व ९.५० प्रतिशतं थहावःगु दु।

थौं दकलय् अप्पो नेडेप लघुवित्त वित्तीय संस्थाया सेयर भाः कुहावःगु दु । थुगु कम्पनीया भाः नकारात्मक सर्किटय् वःगु दु। पाँचथर पावर कम्पनीया ६.९७ प्रतिशतं भाः कुहावःगु दु सा नेपाल इन्भेष्टमेन्ट बैंकया लगानीकर्तापिन्स ५.७४ प्रतिशतं घाटा जूगु दु।

शिवम् सिमेन्ट, नविल बैंक, हिमालय डिष्ट्रिलरी लगायत कम्पनी दकलय् अप्पो कारोबार जूगु दु।