शिक्षालय नेपालं नेवाः पत्रकार राष्ट्रिय दबूया न्हुगु ज्यासना पुचःयात भिंतुना देछायेगु ज्याझ्वः जुगु दु।

उगु ज्याझ्वलय् मूपाहाँ कथं बागमती प्रदेशया सांसद रामकृष्ण चित्रकारं न्हुगु ज्यासना पुचःया भिंतुना पौं लःल्हागु खःसा सार्क जनलिस्त फोरमया केन्द्रिय नायः राजु लामां स्वामां क्वखाय्कादीगु खः।

शिक्षालय नेपालया अध्यक्ष श्याम तडुण्कार, बागमती प्रदेशया सांसद चित्रकार, सार्क जनलिस्त फोरमया केन्द्रिय नायः लामा, फोरमया नेपाः च्याटरया नायः प्रकाश शिसवालपिन्स दबूया न्हुगु ज्यासना पुचःयात भिंतुना नाप कार्यकाल सुथौलाक्क न्ह्यायेमाः धका भिंतुना देछानादीगु खः।

येँ महानगरपालिकाया मेयर बालेन साहं याना वयाच्वंगु थीथी ज्यादतिपूर्ण ज्याखँया विरोधय् फिब्व ख्यलय् तःजिक प्रदर्शन जुगु दु।

उपत्यकाव्यापी सडक विस्तार पीडित संघर्ष समितिया संयोजनय् जूगु उगु प्रदर्शनय् मेयर साहया ज्याखँपाखें पीडित जूपिं थीथी ख्यःया पुचः व मनूतय्सं ब्वति काःगु खः । ज्याझ्वलय् सहभागीजूपिन्ु ‘डोजर आतंक बन्द या’, ‘सडक विस्तारया नामय् उठिवास याये दइ मखु’, ‘महानगरपालिकाया ज्यादति बन्द या’ धकाः च्वयातःगु प्लेकार्ड ब्वया वःगु खः ।

लिसें थीथी खलः पुचःतय्सं थःथःपि ब्यानर नं ब्वःगु खः । ज्याझ्वलय् थीथी कथंया नेवाः अभियानया अभियन्तातय्सं ब्वति काःगु खः । उगु ज्याझ्वलय् सम्बोधनयासें आदिवासी जनजाति महासंघया पुलांम्ह न्वकु गोविन्द छन्थालं येँय् येँ देय्यात हे विनास याइम्ह मेयर माःगु मदु, उकिं येँ देय्यात विनास यायेगुपाखें रोके यायेमाः धकाः आह्वान यानादिल । वय्कलं धयादिल, ‘येँया स्थानीय जनतायात नोक्सान जुइगु ज्या यात धाःसा उकिया विरुद्ध आदिवासी जनजाति समेत सतकय् कुहां वये मालीगु जुइ ।’

सडक विस्तार आन्दोलनया न्ह्यलुवा शान्तप्रकाश श्रेष्ठं थौं सडक विस्तारया नामय् सरकारं नेवाःतय्त विस्थापित यायेत स्वयाच्वंगु दु धासें स्थानीय जनतां सडक मिचे याःगु मखु, सडकं हे स्थानीयवासीयात मिचे याना हयाच्वंगु दु धयादिल ।

अथेहे, रविन्द्र श्रेष्ठ, साहेल सिंह महर्जन, शंकर लिम्बुपिन्स न सभाय् न्ववानादीगु खः।

थौं माघ १६ गते शहीद दिवस तःजिक हनिइगु जुगु दु। प्रजातन्त्र स्थापना नाप पुनर्स्थापना व थीथी कालखण्डय् स्वतन्त्रताया लागि जीवन आहुति बिउपि शहीदपिनिगु लुमन्ति थौं देयन्यक थीथी ज्याझ्वः याना हनेत्यःगु खः।

माघ १० निसे १६ गतेतक थीथी ज्याझ्वःयाना शहीद सप्ताह हनिइगु यानाच्वंगु खः। विसं २०१२ निसे तत्कालीन येँ नगरपालिकाया संयोजकत्वय् माघ १६ गते शहीदया लुमन्ति दिवस कथं हनावयाच्वंगु खः।

स्वतन्त्रताया माग यासे विसं १९९७ य् शहीद शुक्रराज शास्त्रीयात माघ १० गते येँ टेकुया पचलीइ, माघ १३ गते धर्मभक्त माथेमायात सिफलय् व गङ्गालाल श्रेष्ठ नाप दशरथ चन्दयात माघ १५ गते शोभाभगवतीइ राणा शासकपिन्स मृत्युदण्ड बिःगु खः।

यल महानगरपालिकाया थीथी वडाया मिसा सदस्यपिन्स सर्वसाधारणया अपेक्षा व थःगु जिम्मेवारी पुरा यायेत वडाय् बजेट व ज्या यायेगु  वातावरण न तयार यायेमाःगुलि बःबिगु दु।

लैङ्गिक हिंसापाखे प्रभावित मिसा व मस्तयेगु रक्षा सुरक्षा व सशक्तिकरणया ख्यलय् वंगु स्वगु दशक निसे क्रियाशिल संस्था व यल महानगरपालिकाया मंकाः कथं स्थानिय तहय् मिसा वडा सदस्यपिनिगु अर्थपूर्ण सहभागिताया सुनिश्चित यायेत निन्हुया गोष्ठीइ मिसा वडा सदस्यपिनिु बजेट व ज्या यायेगु वातावरण दयेमाःगु धका धाःगु दु।

प्रतिनिधीसभा सदस्य डा. आरजु राणा देउवां नेपाली मिसा पिन्त राजनीतिइ वयेत व निर्वाचन टिकट कायेत, त्याकेत यक्को हे अवरोध यायेगु कुतः यायेत मिसापिन्त राजनीतिज्ञपिनिगु सकारात्मक ग्वाहालि माःगु दु धका धाःगु दु। यल महानगरया २९ वडामध्ये छगु न वडाय् मिसा वडा अध्यक्ष निर्वाचित मजुगु सन्दर्भय् वइगु निर्वाचनय् म्हतिइ न झीम्ह वडा अध्यक्ष दयकेगु वातावरणया लागि राजनीतिक दल, समाज, परिवारं राजनीतिइ न्ह्यावनेत मिसापिन्त विश्वास यायेमाःगुु वातावरणया तयारी आःवनिसे यायेमाः धका धाःगु दु ।

प्रमुख महर्जनं थुगु यस पटकया निर्वाचनय् दलपिनिगु गठवन्धनया कारण प्रमुख जिम्मेवारीइ मिसापि कम  जक त्याःगु, परिवार, सामाजिकलगायत यक्को जिम्मेवारीइ बालाक्क यायेफूपि जक राजनीतिइ न्ह्यावने धका धयादीगु खः। निन्हुयकं जुगु उगु सशक्तिकरण गोष्ठीइ यल महानगरया २९ गु हे वडाया मिसा व दलित मिसा सदस्यपिनिगु सहभागिता दुगु खः।

नेवाः मंकाः मुद्दा सम्वोधन यायेगु प्रतिबद्दता नेवाःतय्गु राष्ट्रिय संगठन नेवाः देय् दबू स्वनिगः विशेष प्रदेशं शनिवाः छगू ज्याझ्वः याना स्वनिगःपाखें वाग्मती प्रदेशय् प्रतिनिधित्व यानादीपिं सकल सांसदपिन्त छगू हे दबुलिइ मंकाः कथं हनेज्या याःगु दु ।

स्वनिगलं प्रनिनिधित्व यानादीपिं वाग्मती प्रदेशया प्रत्येक्ष व समानुपातिक याना मुक्कं ५३ म्ह सांसदत दु । वय्कःपिं सकलसिन ब्वना अथे मंकाः कथं हनेज्या याःगु खः । उगु ज्याझ्वलय् नीच्याम्ह (२८) वाग्मती प्रदेशया सांसदपिं सहभागी जुयादीगु खःसा वय्कःपिन्त हनेज्या याःगु खः ।

मिजंपिं सांसदपिन्त नेवाः परम्परा कथं खेँ सगं बिया, धौ सगं बिया नापं बेतलिं चिना हनेज्या याःगु खःसा मिसापिन्त नेवाः परम्परा कथं खेँ संग बिया धौ सगं बिया दोसल्र्लां न्ययेका हनेज्या याःगु खः । देय् दबू स्वनिगः विशेष प्रदेशया नायः श्रीकृष्ण महर्जनया सभाध्यक्षताय् जुगु उगु ज्याझ्वलय् नेवाः देय् दबूया केन्द्रीय नायः पवित्र बज्राचार्यया मूपाहांसुइ उगु ज्याझ्वः जूगु खः ।

स्वनिगः विशेष प्रदेशया मुख्य सचिव गणेशमान श्रेष्ठं संचालन यानादीगु उगु ज्याझ्वलय् देय् दबू येँ जिल्लाया नायः धनबहादुर महर्जन तिमिला, ख्वप जिल्लाया नायः नरेश नेवाः व यल जिल्लाया बरिष्ठ न्वकू कृष्णभक्त डंगोलपिन्सं भिंतुना न्वचू बियादीगु खः । स्वनिगः विशेष प्रदेशया मिसा न्वकू प्रा. डा. अमिता प्रत्रानं लसकुस न्वचू बियादीगु ख।

ज्याझ्वलय् न्वंवायेगु झ्वलय् वाग्मती प्रदेशया उपसभामुख अप्सरा चापागाई खत्री, राप्पाय राजेन्द्र प्रजापति, एमालेया जयराम थापा, माओवादी केन्द्रयिा देवेन्द्र श्रेष्ठ, कांग्रेसया हरिप्रभा खड्गी, हाम्रो नेपाली पार्टीया शैलेन्द्रमान बज्राचार्यपिन्सं नेवाः मंकाः मुद्दायात नितिं माःगु कथं पलाः ल्ह्वनेगु बचं बियादीगु खः ।

थुगु ज्याझ्वः नेवाः देय् दबू स्वनिगः विशेष प्रदेशया ग्वसालय् जूगु खःसा नेवाः देय् दबू येँ जिल्ला समिति, यल जिल्ला समिति, ख्वप जिल्ला समितिया विशेष ग्वहालिइ अले स्वनिगःया फुक्क हे पालिकाया समितिया ग्वहालिइ जूगु खः ।