रुपन्देही–३ य् गृहमन्त्री बालकृष्ण खाँण लिउने लानाच्वंगु दु।

मंगलबाः सुथय् तकया मतगणनाय् राप्रपाया दीपक बोहरां ४ हजार १७० मत हया न्ह्यने लानाच्वंगु दु । बोहरयात नेकपा एमालेया समर्थन दुगु खः।

अथेहे नेपाली कांग्रेसया उम्मेदवार गृहमन्त्री खाँणं ३ हजार ९१९ मत हया लिउने लानाच्वंगु दु। गृहमन्त्री खाँणयात नेकपा माओवादी केन्द्र, नेकपा एकीकृत समाजवादीनाप सत्ता गठबन्धनया समर्थन दुगु खः ।

यल क्षेत्र नम्बर ३ य् राष्ट्रिय स्वतन्त्र पार्टीया तोसिमा कार्की मतगणनाय् न्ह्यःने लानाच्वंगु दु।

तोसिमां ५ हजार १२३ मत काये धुकुगु दु सा एमालेया अमृत खड्कां ३ हजार ९५९ मत काःगु दु ।

अथेहे नेकपा माओवादी केन्द्रया पम्फा भुसालं २ हजार २९३ मत काःगु दु।

येँ क्षेत्र नम्बर ८ या प्रदेशसभा (१) य् हाम्रो नेपाली  पार्टीया शैलेन्द्रमान बज्राचार्य विजयी जुगु दु ।

बज्राचार्य न ५४६२ मत हःगु खःसा नेकपा एमालेया राजेश शाक्यं ३८११ मत हःगु खः।

अथेहे, नेपाली कांग्रेसया राजुराज जोशीं ३६७० मत हःगु खः।

हिमाली जिल्ला मनाङय् प्रतिनिधि सभा सदस्यय् नेपाली कांग्रेसया टेकबहादुर गुरुङ निर्वाचित जूगु दु।

गुरुङं ३ सय २८ फरकं नेकपा एमालेया पोल्देन छोपाङ गुरुङयात बूका निर्वाचित जूगु दु। कांग्रेसया गुरुङं २ हजार ५ सय ७५ मत हःगु खः।

एमालेया गुरुङं २ हजार २ सय ४७ मत हःगु दु धका मुख्य निर्वाचन अधिकृतया कार्यालयं धाःगु दु।

थ्व स्वया न्ह्यः प्रदेश सभा ‘१’ य् नेपाली कांग्रेसया मुनिन्द्रजङ गुरुङ निर्वाचित जुइ धुकुगु दु। अथेहे, प्रदेश सभा ‘२’ य् स्वतन्त्र उम्मेदवार राजिव गुरुङ (दिपक मनाङे) निर्विरोध जुइ धुकुगु खः।

लमजुङया प्रतिनिधि सभा सदस्य उम्मेदवार जुयाच्वंम्ह नरेन्द्रबहादुर गुरुङ मन्त ।

जनता समाजवादी पार्टीया उम्मेदवार जुयादीम्ह गुरुङ थौं सोमबाः न्हिनय् मदुगु धका छेँ जःपाखे धाःगु खः, मर्स्याङ्दी गाउँपालिका–२ घनपोखरा छेँ दुम्ह ६८ दँ दुम्ह गुरुङ छु दिं न्ह्यःनिसे बिरामी जुयाच्वम्ह खः।

वंगु शुक्रबाः वान्ता जुगुलि बेंसीशहरस्थित जिल्ला अस्पताल लमजुङय् यकूगु खः । जिल्ला अस्पतालय् उपचार यायेमफेय् वं थप उपचारया लागि चितवनय् यकूगु खः।