सर्वोच्च अदालतं सांसद पद खारेज यायेवं रवि लामिछानेया उपप्रधान नाप गृहमन्त्री पद न वःगु दु।

अमेरिकी नागरिकता त्यागेयाना नेपाली नागरिकता हाकन कायेगु प्रक्रिया हे मयागु धासे सर्वोच्च अदालतं लामिछाने उम्मेदवार न अयोग्य धका ठहर याःगु खः।

थ्व नाप वयागु उपप्रधानमन्त्री नाप गृहमन्त्री पद न वःगु दु। फैसला वयेवं महान्यायाधिवक्ता कार्यालयय् वरिष्ठ सरकारी वकिलह दथुइ छलफल जुयाच्वंगु दु।

‘नागरिकता पद हे मजुगुलि आः निगु न पद दइमखु’, छम्ह सरकारी वकिलया कथं, ‘लामिछाने तत्काल नागरिकता कालधाःसा संविधानय् खुलाया दुने दुगु प्रावधान कथं लामिछानया पुनर्नियुक्त जुइगु लँ चायेफु। उकिया बारे जिमिसं खँ ल्हानाच्वंनागु दु।’ 

सर्वोच्च अदालतं रवि लामिछानेया नागरिकता अवैध ठहर याःगु दु। कामु प्रधानन्यायाधीश हरिकृष्ण कार्की नाप न्यायाधीशपिं विश्वम्भर श्रेष्ठ, ईश्वरप्रसाद खतिवडा, आनन्दमोहन भट्टराई व अनीलकुमार सिन्हाया संवैधानिक इजलासं लामिछानेया नागरिकता अवैध जूगु धासे नागरिकता कायेगु प्रक्रिया पूरा मजूतले वयात नेपाःया नागरिक धाये फइ मखु धका फैसला याःगु दु।

अमेरिकी नागरिक जूगुलि लामिछाने न २०७० सालय् भिषा कया नेपाः वःगु खः। ०७२ सालय् नेपाःया पुलागु नागरिकता छ्यला पासपोर्ट दयकूम्ह लामिछाने न अमेरिकी नागरिकता धका ०७५ साल असार ६ गते जक परित्याग याःगु खः। स्वदँ तक लामिछाने न अमेरिका व नेपाः निगु हे पासपोर्ट तयातःगु खः। नागरिकता परित्यापग लिपा लामिछाने नेपाःया नागरिकता कायेगु लागि प्रक्रिया न्ह्याकूगु मदुनि।

लामिछानें न्हुगु नागरिकताया प्रक्रिया हे मयासे राजनीतिक दल चायेका चुनाव ल्वाःगु खः। वयागु नागरिकता हे वैध मजुगु धका उजुरी वःगु खः। उकिइ निर्वाचन आयोगं सुनुवाइ मयागुलि अधिवक्तापि रविराज बसौला, युवराज पौडेलपिन्स रिट दायर याःगु खः।

सर्वोच्च अदालतय् सुरक्षा व्यवस्था कडा याःगु दु।

सर्वोच्च अदालतया संवैधानिक इजलासं गृहमन्त्री रवि लामिछानेया नागरिकता विवादय् थौं फैसला न्यकेगु तयारी जुइवं सुरक्षा व्यवस्था कडा याःगु दु।

संवैधानिक इजलासय् न्याम्ह न्यायाधीशपि छलफल यानाच्वंगु दु। वंगु बुधबाःनिसे जूगु सुनुवाइ थौं फैसला यायेत्यःगु दु।

सर्वोच्च अदालतय् वःगु बुधबां हे दक्को लिखित लिसः बहसनोट व लामिछानेया नागरिकता छानबिनया भ्वँ पेश याये धुकुगु दु।

येँ महानगरपालिकां दरबारमार्गय् याकन हे व्यवस्था मयासा दरबारमार्ग विकास बोर्डं चरणबद्ध आन्दोलन यायेगु चेतावनी बिःगु दु।

थौं शुक्रबाः बोर्डं येँ छगु पत्रकार सम्मेलन यासे येँ महानगरपालिकां दरबारमार्गय् चिइकूगु पार्किङ तत्काल कायम यासा महानगरबिरुद्ध आन्दोलन यायेगु चेतावनी बिःगु दु। बोर्डं ताःईनिसे दबारमार्गया वडा कार्यालय व ट्राफिक प्रहरीया समन्वयय् सतकय् छगु लाइन पार्किङ याउगु व छगु लाइन पार्किङं ट्राफिक व्यवस्थापनय् छु न समस्या मवःगु धका धाःगु खः।

बोर्डनाप छलफल व संवाद मयासे पार्किङ हटे यायेगु निर्णय बोर्डं माने मयायेगु धका धाःगु दु। पत्रकार सम्मेलनय् न्ववासे बोर्डया पूर्वअध्यक्ष गोपाल कक्षपतीं स्मार्ट पार्किङ तया व्यवस्थित यासे पार्किङ जुयाच्वंगुलि महानगरपालिकां छक्वलं बन्द याःगु धका धाःगु खः। वयकलं महानगरं बोर्डनाप याकन हे सहलह ब्याकां पार्किङ व्यवस्था याकन हे यायेमाः धका धाःगु दु।

राष्ट्रियसभा उपाध्यक्षया निति थ्व हे वइगु माघ २३ गते चुनाव जुइगु दु।

थौं शुक्रबाः च्वंगु बैठकय् राष्ट्रियसभा अध्यक्ष गणेश तिमल्सिनां निर्वाचन कार्यक्रम प्रकाशित यायेत निर्देशन बिःगु दु।

राष्ट्रियसभा उपाध्यक्ष पद २०७८ फागुन २१ गतेनिसे खाली जूगु खः।

गोलाप्रथाय् प्यदँया कार्यकालय् तत्कालीन उपाध्यक्ष शशिकला दाहालया कार्यकाल २०७८ फागुन २१ गते क्वचाःगु खः।