मैतीदेवी चुकय् सतकय् च्वंगु प्रहरी बिट येँ महानगर प्रहरीं थौं मंगलबाः थुना बिःगु दु।

मैतीदेवी चुकय् छगु कुचाय् सतक व फुटपाथ पनां दयकातःगु चिधःगु भवनपाखे प्रहरी बिट सञ्चालन याना च्वंगु खः।

उगु थासय् सवारी साधनया चाप अप्पोय् वं प्रहरी बिटया कारण पैदलयात्री न सतकं हे न्यासीवनेत बाध्यता जुगुलि थुनगु खः धका महानगर प्रहरी प्रमुखं धाःगु दु।

स्वनिगलय् न बर्ड फ्लु खनेदुगु दु। येँया नागार्जुन नगरपालिका वडा नम्बर ६ व तार्केश्वर नगरपालिका वडा नम्बर ७ नाप यलया खुमलटारय् बर्ड फ्लु खनेदुगु दु धका पशु सेवा विभागया सूचना अधिकारी डा. चन्द्र ढकालं जानकारी बिःगु दु।

कृषि अनुसन्धान परिषद् नार्कया कथं अनुसन्धान फार्म नाप रामकोट व तारकेश्वरया निजी फार्मय् खा व टर्की सीउगुलि नमुना परीक्षण याःगुलि उमित बर्ड फ्लु पुष्टि जूगु दु धका धाःगु दु।

अन दक्को हे फार्मय् च्वपि पक्षी नाप पक्षीजन्य वस्तु नष्ट याःगु दु। खुमलटारय् २ सय १७ खा, २ हजार ५ सय ३० गः खेँ व २ सय ५० किलो दाना नष्ट याःगु दु धका  प्रवक्ता ढकालं जानकारी बिःगु दु ।

अथेहे तारकेश्वरय् ९ सय ४० खा व १ सय किलो दाना नाप रामकोटय् ४ हजार ५ सय ९१ खाः व २ हजार २ सय ५५ खेँ नष्ट याःगु दु धका प्रवक्ता ढकालं जानकारी बिःगु दु।

नेपाल आयल निगमं इन्धनया भाः थकाःगु दु।

सोमवाः चान्ह्यनिसे लागु जुइगु कथं पेट्रोल व डिजेल÷मचिकनय् लिटरं स्वतका थकाःगु दु।

आः पेट्रोल लिटरं १७८ रुपैयाँ व डिजेल÷मचिकं लिटरं १७५ थ्यःगु दु।

राष्ट्रियसभाया न्वकू पदय् उर्मिला अर्याल निर्विरोध निर्वाचित जूगु दु ।

थौं सोमवाः च्वंगु राष्ट्रियसभाया बैठकं राष्ट्रियसभाया नायः गणेशप्रसाद तिमिल्सिनां अर्यालयात निर्विरोध निर्वाचित याःगु खः।

राष्ट्रियसभाया न्वकू पदय् उर्मिला अर्यालया जक उम्मेदवारी लाःगु खः ।

नेवाः पत्रकार राष्ट्रिय दबुया दुजः नाप नेवाः एचडी टिभिया प्रमुख संचारकःमि नवीन जोशीया अबु दुर्गानन्द जोशी मन्त ।

मदुम्ह जोशी ८४ दँय् कीर्तिपुर अस्पतालय् सुथय् ९ बजे जुया ५ मिनेतय् मदुगु खः।

वय्कःया निम्ह काय् नवीन जोशी व नरेश जोशी अले म्ह्याय् निम्ह दी ।

संचारकःमि नवीन जोशी तधिकःम्ह काय् खः।