श्रावण शुक्ल पञ्चमीया दिं थौं नाग पञ्चमी कुन्हु नागयात पुजा यायेगु याइ।

थौं सुथय् म्वः ल्हुया  मत च्याका, कलश व गणेश पूजा याना गोबर, दुरु, सितू तया मूँ लुँखाय् नाग टासे याना पूजा यायेगु याइ।

अनन्त, बासुकी, पद्म, महापद्म, तक्षक, कुली, कर्कट, शङ्खनाग, शेषनागया फोतो लुँखाय् टिकेगु याइ।

थौं येँया नागपुखुलि व टौदह, ख्वपय् सिद्धपूखुलि विशेष पूजा जुइ।

नेवाः देय् दबू स्वनिगः विशेष प्रदेशया नेतृत्व संघीय सरकारया संस्कृति पर्यटन तथा नागरिक उड्डयन मन्त्रीनिसें भाषा आयोगय् तकं डेलिगेशन वंगु दु।

भाषा आयोगया सिफारिस कथं वाग्मती प्रदेशय् नेपालभाषा व तामाङ भाषायात सरकारी कामकाजि भाषा कथं लागू याकेगु नितिं आइतवाः संघीय सरकारया संस्कृति पर्यटन तथा नागरिक उड्डयन मन्त्री जीवनराम श्रेष्ठया ज्याकुथिइ हे वना भाषा आयोगया सिफासिर कथं ज्या न्ह्याके बिइगु व न्ह्याकेगु नितिं विशेष भूमिका म्हितेत इनाप यानादीगु खः।

मन्त्री श्रेष्ठं भाषा आयोगया सिफासिर कथं वाग्मती प्रदेशय् नेपालभाषा व तामाङ भाषायात कामकाजि भाषा कथं लागू याकेगु नितिं भूमिका म्हिगतेगु व वागमती प्रदेशय् न थःम्हं समन्वयकारी भूमिका म्हितेगु बचं बियादीगु खः। साउन १५ गतेया डेलिगनय् देय् दबू स्वनिगः विशेष प्रदेशया अध्यक्ष श्रीकृष्ण महर्जन, न्वकू प्रा.डा. अमिता प्रधान शाक्य, मू छ्याञ्जे गणेशमान श्रेष्ठ, छ्याञ्जे गंगादेवी महर्जन व तोखाया समाजसेवी अष्टनारायण डंगोलपिं उपस्थिति दुगु खः।

अथेहे, साउन १६ गते सोमवाः भाषा आयोगया ज्याकुथिइ वना भाषा आयोगया सदस्य भाषाविद् अमृत योञ्जनलिसे सहलह ब्याकूगु दु। उगु इलय् संघीय सरकारया संस्कृति पर्यटन तथा नागरिक उड्डयन मन्त्रालयपाखें वाग्मती प्रदेशय् छ्वःगु पौया नक्कल तकं लःल्हायेगु ज्या जूगु खः।

आयोगया सदस्य योञ्जनं नेवाः व तामाङ समुदायया मातृभाषा वाग्मती प्रदेशय् कामकाजि भाषा कथं कार्यान्वयन याकेगु नितिं थःम्ह माःगु कथंया भूमिका म्हितेगु जुइ धकाः बचं बियादीगु खः। ज्याझ्वलय् देय् दबू स्वनिगः विशेष प्रदेशया अध्यक्ष श्रीकृष्ण महर्जन, मू छ्याञ्जे गणेशनमान श्रेष्ठ, छ्याञ्जे गंगादेवी महर्जन, दुजः नरेश श्रेष्ठ, येँ जिल्ला अध्यक्ष धनबहादुर महर्जन तिमिला, यल जिल्ला अध्यक्ष हेराकाजि महर्जन लगायतपिनिगु सहभागी दुगु खः।

जनार्दन शर्मायात अर्थमन्त्री नियुक्ति याउगु विरोधय् नयाँ बानेश्वरय् जुगु प्रदर्शनय् प्रहरीं हस्तक्षेप याउगु दु।

युथ कंग्रेस नेपालया आह्वानय् जुगु प्रदर्शनय् प्रहरीं लाठी चार्ज यायेवं प्रदर्शनकारीपि तितरबितर याउगु खः। व हे झ्वलय् प्रहरीं स्वम्ह मिसा नाप २५ म्हेसित ज्वःगु दु धका युथ कंग्रेस नेपालं धाउगु दु।

बजेट निर्माणया झ्वलय् अनधिकृत मनूपाखे करया भाः हिइगु धका द्धपः बिउसे संसदीय छानबिन समितिं बालाक्क छानबिन हे मयासे निर्दोष ठहर यना शर्मायात हाकन अर्थमन्त्री दयकूगुलि उमिसं प्रदर्शन याउगु खः।

म्हिगः साढे ५४ अङ्कं थहावंगु शेयर बजाः थौं न सामान्य थहावंगु दु।

शेयर बजाः परिसूचक नेप्से थौं १ दशमलव १५ अङ्कं थहावना २ हजार १ सय ९६ दशमलव २५ विन्दुइ थ्यःगु दु। थौं बैंकिङ, व्यापार, जलविद्युत्, उत्पादन व लगानी समूहया शेयर थहावंगु दु।

२१७ कम्पनीइ १ करोड ५ लाख १८ हजार कित्ता शेयर ४ अर्ब ६७ करोड रुपैयाँ कारोबार जुगु खः। दकलय् अप्पो शिवम् सिमेन्ट्सय् ३८ करोड ३१ लाख रुपैयाँया शेयर किनबेच जुगु खः।

थौं बुटवल पावर कम्पनी, गुडविल फाइनान्स व सिटिजन म्युचल फन्डया शेयर ६ प्रतिशत स्वया अप्पो थहावंगु दु। स्वाभिमान लघुवित्तया शेयर धासा ५ प्रतिशत स्वया अप्पो घटे जुगु दु।