निर्वाचन आयोगं नेकपा माओवादी केन्द्र अध्यक्ष पुष्पकमल दाहाल ‘प्रचण्ड’यात आचारसंहिता उल्लंघन याःगु धासे स्पष्टीकरण न्यंगु दु।

आइतबाः गोरखा निर्वाचन क्षेत्र नम्बर २ य् उम्मेदवारी दर्ता यायेगु झ्वलय् पञ्चेबाजं छ्यगुलि आयोगं स्पष्टीकरण न्यःगु खः। प्रचण्डयात न्ह्यन्हुया दुने स्पष्टीकरण बुझे यायेत आयोगं निर्देशन बिःगु खः।

‘छिगु मनोनयन दर्ता यायेगु झ्वलय् बाजं (पञ्चेबाजं) छ्यलागु खःकि मखु? छिगु मनोनयन दर्ता यायेगु झ्वलय् बाजं छ्यलागु खःसा निर्वाचन आचारसंहिता, २०७९ या दफा १३ या उपदफा १ या खण्ड ण य् व्यवस्थाया उल्लघन याःगुलि छाय् कारवाही यायेम्वाः? थुगु पौं थ्यःगुया न्ह्यःन्हुया दुने आयोगय् थ्यकेगु कथं स्पष्टिकरण यायेत निर्णय कथं इनाप यानागु दु’, आयोगं च्वंगु पतिइ उल्लेख याःगु दु।

प्रतिनिधि सभा व प्रदेशसभाय् करिब ६०० म्हेसिया उम्मेदवारपिन्स मनोनयनपत्र लितकाःगु दु। निर्वाचन आयोगया कथं प्रतिनिधि सभाय् ११४ नाप प्रदेशसभाय् ४८३ म्हेसिया मनोनयनपत्र लितकाःगु दु।

थ्व उम्मेदवारी रद्द जुपिनिगु नापया ल्याः खः। निर्वाचन आयोगया कथं, प्रतिनिधिसभाय् कुल २ हजार ५२६ म्हेसिया उम्मेदवारी दर्ता याःगु खःसा आः घटे जूया २ हजार ४१२ म्ह थ्यःगु दु।

प्रदेशसभाय् ३ हजार ४७६ म्हेसिगु उम्मेदवारी बिगुलि आः घटे जूया २ हजार ९९३ म्ह थ्यःगु दु। बुधबाः न्हिनय् तक सम्म उम्मेदवारी लित कायेगु ई निर्वाचन आयोगं बिउगु खःसा वया लिपा नां तक पिकया निर्वाचन चिं तक बिइ धुकुगु दु।

येँ महानगरपालिकां बजाः अनुगमनयात निरन्तरता बीगु जूगु दु । मोहनि नखःयात लक्षित यानाः न्ह्याकूगु बजाः अनुगमन स्वन्तियात नं लक्षित यानाः न्ह्याकीगु जूगु दु ।

लिसें महानगरं स्वन्ति लक्षित नापं नियमित निगुलिं कथंया बजाः अनुगमनयात नं निरन्तरता बीगु जूगु दु ।येँ महानगरया उपप्रमुखलिसें बजाः व्यवस्थापन नाप उपभोक्ता हित संरक्षण समितिया संयोजक सुनिता डंगोलं मोहनि नखःयात लक्षित यानाः जूगु बजाः अनुगमनया समीक्षा बैठकय् न्ववासें अनुगमनया प्रभावकारिताया निंतिं येँ महानगर बजार व्यवस्थापन तथा अनुगमन ऐन, २०७७ या व्यवस्थाकथं महानगरया बजाः अनुगमन निरीक्षक क्वःछीगु खँ धयादीगु दु ।

सन्तुलित बजाः व्यवस्थापन अनुगमनया लिच्वः बांलाःगु वइगु अपेक्षा यासें उपप्रमुख डंगोलं स्वच्छ बजाःया निंतिं योगदान याइपिंत व्यापारय् प्रोत्साहित यायेमाःगु खँय् बः बियादिसें अनुचित ज्यायाइपिंत कडा निगरानी तयेमाः धयादिल। बजाः अनुगमनया निंतिं वाणिज्य विभागपाखें निरीक्षण अधिकृतया अधिकार प्रत्योजनया निंतिं अधिकारीया नां फक्व याकनं सिफारिस यानाः छ्वयेगु प्रक्रिया याकनं न्ह्याकेत नं वय्कलं अधिकारीपिन्त इनाप यानादिल ।

उपप्रमुख डंगोलं प्रक्रियाया विषयलिसें एकीकृत बजाः अनुगमनया खँय् बः बियादिसें अनुगमनय् व्यवसाय दर्ता, नवीकरण स्वयेगु नापं व्यवसाय दर्ता यानाः व मयासे संचालन यायेबलय् छु गज्याःगु जरिवाना जुइ धइगु सूचना हरेक व्यवसायीयात जानकारी दइकथं प्रकाशन यायेत नं बः बियादिल ।अनुगमनया नामय् छगू हे थासय् तःगूमछिं पुचः वनेबलय् उकिं नकारात्मक सन्देश वनीगु खँय् ध्यान बीत धासें वय्कलं सरोकारवाला सकलें छगू हे पुचलय् समावेश जुयाः अनुगमनय् वनेत नं इनाप यानादिल ।

प्रमुख प्रशासकीय अधिकृत वसन्त अधिकारीं यक्वसित छक्वलं प्रभाव लाके फइगु क्षेत्रयात छनोट यानाः अनुगमनय् प्राथमिकता बीमाःगु खँय् बः बियादिल ।येँ महानगरपालिका २० वडाअध्यक्ष राजेन्द्र मानन्धरं स्वनिगःया बजारय् मीत हइगु हलंज्वलंया मू चक्र उत्पादन क्षेत्रपाखें शुरु जुइगुलिं थ्व दक्वं चक्र स्वये फइकथं अनुगमन यायेमाः धयादिल ।

सुधार संस्कृतिविद् नाप वाङ्मय शताब्दी पुरुष सत्यमोहन जोशीयात डिलक्स क्याबिनय् सारे याःगु दु।

किस्ट मेडिकल कलेज नाप शिक्षण अस्पतालया निर्देशक डा. सुरज बज्राचार्यया कथं जोशीया स्वास्थ्यय् छु भचा सुधार जूगु दु सा आः खँ ल्ह्यायेगु न याःगु दु।

डा. बज्राचार्यया कथं ‘वयकलं आः भचा खँ ल्ह्याये फुगु दु सा कमजोरी जुगुलि डिलक्स क्याबिनय् सिफ्ट याना सघन उपचार कक्ष सरह हे सुक्ष्म निगरानीइ तःगु दु,’ धका धयादीगु दु।

डा. बज्राचार्यया कथं निमोनिया संक्रमण नाप मुटया चाल सम्बन्धी समस्याया उपचार जुयाच्वंगु दु।

सत्ता गठबन्धनया निगु दल नेपाली कांग्रेस व नेकपा माओवादी केन्द्रं येँया प्रदेशसभाय् छु भचा निर्वाचन क्षेत्रय् प्रतिस्पर्धा याइगु जुगु दु। सत्ता गठबन्धनय् जूगु सहमति विपरीत छु क्षेत्रय् निगु दलं उम्मेदवारी बिःगु दु।

माओवादी केन्द्रया येँ जिल्ला इन्चार्ज हिमाल शर्मा न थःपिन्त वइगु सहमति जुगुलि कांग्रेसले उम्मेदवारी बिइवं प्रतिस्पर्धा यायेत्यःगु खः।

वयकःया कथं येँ १० निर्वाचन क्षेत्रमध्ये कांग्रेसं १, ३, ४, ५, ६ व १०, माओवादी केन्द्रं २, ७ व ९ नाप नेकपा एकीकृत समाजवादीं येँ–८ बिइगु सहमति जूगु दु। प्रतिनिधिसभाया यक्को थासय् गठबन्धन कायम जूगु दु। तर प्रदेशसभाय् सत्ता गठबन्धनया छगु स्वया अप्पो दलं उम्मेदवारी बिइवं गठबन्धन तोडे जूगु दु।

सत्ता गठबन्धनया प्रदेशसभापाखे येँ–३ (ख), येँ–६ (ख) व येँ–१० (क) थःपिन्त बिइगु सहमति जूगु दु धका माओवादीपिन्स धाःगु दु्। येँ– ३ (ख) य् नेपाली कांग्रेसया बिमल ठकुरीं उम्मेदवारी बिःगु खःसा नेकपा माओवादीया महेश्वर फुँयालं उम्मेदवारी बिःगु खः। अथेहे येँं–६ (ख) य् कांग्रेसया विष्णुभक्त तिमिल्सेनां उम्मेदवारी बिःगु दु सा माओवादी केन्द्रया प्रकाश फुयाँलं उम्मेदवारी बिःगु दु।

माओवादीयात बिइगु सहमति जूसा येँ–१० (क) नेपाली कांग्रेसया पुकार मर्हजनं उम्मेदवारी बिःगु खः। उगु थासय् माओवादी केन्द्रया उम्मेदवार दिलिप मर्हजन बिःगु दु। येँ–१० य् कांग्रेसया राजन केसी सत्ता गठबन्धनं आधिकारिक उम्मेदवार जूसा माओवादी केन्द्रया अञ्जना विशंखे न उम्मेदवारी बिःगु दु।